Nghena endzeni

Hundzela eka leswi nga endzeni

Ntiyiso Malunghana Ni Matilo

Ntiyiso Malunghana Ni Matilo

 Ntiyiso Malunghana Ni Matilo

HAKUNENE wu koka rinoko ntshembo wo ya hanya etilweni! Mamoslem, Mahindu, Mabudha, swirho swa tikereke ta Vujagana ni vanhu vo tala lava nga byi tsakeriki vukhongeri va wu hlamusela hi tindlela to hambana-hambana ntshembo wo ya hanya etilweni. Vanhu vo tala va ehleketa leswaku matilo i ndhawu yo saseka ni leyi tsakisaka laha loko va fika kona va wisaka maxangu va tlhela va hlanganisiwa ni “varhandziwa va vona lava feke.” Eka vo tala xivuriso lexi xi vurisile loko xi ku: Vanhu hinkwavo va lava ku ya etilweni kambe ku hava ni un’we wa vona loyi a lavaka ku fa leswaku a ya kona. Ha yini swi ri tano?

Loko a hi vumberiwe ku fa kutani hi ya hanya etilweni, xana vanhu a va nga ta swi langutela hi mahlo-ngati sweswo ku fana ni n’wana loyi a swi langutelaka hi mahlo-ngati ku kula kumbe muntshwa loyi a swi langutelaka hi mahlo-ngati ku nghenela vukati? Lexi hlamarisaka hileswaku vanhu vo tala a va swi lavi ku fa.

Nilokoswiritano, vafundhisi va vula leswaku endzhaku ko hanya laha misaveni swa xinkarhana, loko hi fa hi ya etilweni. Hi xikombiso, Theodore Edgar Cardinal McCarrick mufundhisi lonkulu wa le Washington, D.C., u tshahiwe a ri karhi a vula marito lama landzelaka: “A hi nga vumberiwanga ku hanya laha misaveni, kambe a hi vumberiwe ku ya hanya etilweni.” Khale ka presidente wa National Association of Evangelicals ya le United States u tshahiwe a ku: “Xikongomelo xa vutomi i ku vangamisa Xikwembu ni ku ya etilweni . . . hikuva matilo i kaya ra hina.”

Minkarhi yo tala vanhu lava tshembaka leswaku va ta ya hanya etilweni endzhaku ka loko va file, va ni rungula ritsongo leri seketelaka mhaka ya vona. George Barna la nga presidente wa khampani leyi lavisisaka mavonelo ya vukhongeri u xiye leswaku “langutelo leri vanhu vo tala va nga na rona ra leswaku ku ni vutomi endzhaku ka rifu, ri sekeriwe eka rungula leri humaka eka swilo swo hambana-hambana swo tanihi tifilimi, vuyimbeleri ni tinovhele.” Mufundhisi wa kereke ya Episcopal wa le Florida, u tshahiwe a ri karhi a ku: “A hi tivi to tala hi matilo, handle ko tiva leswaku hilaha Xikwembu xi tshamaka kona.”

Hambiswiritano, matilo i nhloko-mhaka ya nkoka swinene eBibeleni. Hi ku ya hi Rito ra Xikwembu, xana matilo ma njhani? Loko hakunene vanhu va ya etilweni, xana va ya endla yini?

[Marito lama tshahiweke exihlokweni lama nga eka tluka 3]

Ha yini vanhu vo tala va lava ku ya etilweni, kambe lava lavaka ku fa leswaku va ya kona va nga tati ni xandla?