Nghena endzeni

Hundzela eka leswi nga endzeni

Ha Yini Xikwembu Xi Nyika Vanhu Nyiko Ya Vutomi Lebyi Nga Heriki?

Ha Yini Xikwembu Xi Nyika Vanhu Nyiko Ya Vutomi Lebyi Nga Heriki?

 Swivutiso Swa Vahlayi . . . 

Ha Yini Xikwembu Xi Nyika Vanhu Nyiko Ya Vutomi Lebyi Nga Heriki?

▪ Bibele yi vula leswaku Xikwembu xi hi nyike lunghelo ro kuma “vutomi lebyi nga heriki.” (Yohane 6:40) I yini lexi susumetelaka Xikwembu ku hi nyika nyiko yo tano? Xana hileswi xi nga ni vululami?

Vululami byi katsa ku khoma vanhu van’wana hi ndlela leyinene. Xana hakunene ha faneleka ku kuma vutomi? Nikatsongo. Bibele yi ri: “A nga kona munhu la lulameke emisaveni la hambetaka a endla leswinene naswona a nga dyohiki.” (Eklesiasta 7:20) Xidyoho xi ni vuyelo bya xona. Xikwembu xi byele wanuna wo sungula Adamu ka ha ri emahlweni leswaku siku leri a nga ta wu dya ha rona u ta fa. (Genesa 2:17) Hi ku famba ka nkarhi, muapostola Pawulo na yena u huhuteriwe ku tsala a ku: “Hakelo leyi tisiwaka hi xidyoho i rifu.” (Varhoma 6:23) Kutani loko vatukulu hinkwavo va Adamu va faneriwa hi rifu, ha yini Xikwembu xi va nyike ntshembo wo kuma vutomi lebyi nga heriki?

Ntshembo wo kuma vutomi lebyi nga heriki i “nyiko ya mahala.” Nyiko leyi yi ri kombisa kahle rirhandzu ni musa wa Xikwembu. Bibele yi ri: “Hinkwavo va dyohile, naswona va kayivela ku vangama ka Xikwembu, kutani i nyiko ya mahala leyi endleke leswaku va vuriwa lava lulameke hi musa lowu nga faneriwiki, hi ku ntshunxiwa hi nkutsulo lowu hakeriweke hi Kreste Yesu.”—Varhoma 3:23, 24.

Hambileswi hinkwerhu hi faneriwaka hi ku fa, Xikwembu xi hlawule ku nyika lava xi rhandzaka vutomi lebyi nga heriki. Xana sweswo swi kombisa leswaku Xikwembu xi kala vululami? Bibele yi ri: “Kutani hi ta ku yini? Xana Xikwembu xi kala vululami? Sweswo swi nga tshuki swi va tano! Hikuva xi ri eka Muxe: ‘Ndzi ta va ni tintswalo eka mani na mani loyi ndzi nga ni tintswalo eka yena, naswona ndzi ta n’wi komba ntsetselelo mani na mani loyi ndzi n’wi kombaka ntsetselelo.’ . . . Wena munhu, kasi kahle-kahle wo va mani leswaku u hlamula Xikwembu?”—Varhoma 9:14-20.

Etindhawini tin’wana ta misava, xirho lexi tlakukeke xa mfumo kumbe muavanyisi a nga rivalela khamba leri a ri fanele ri tirhela xigwevo xa rona malembe yo tala swinene. Loko khamba rero ri endla leswi ri lerisiwaka swona hi ku tshembeka naswona ri cinca mahanyelo ya rona, muavanyisi kumbe xirho lexi tlakukeke xa mfumo xi nga ha hlawula ku rivalela khamba rero hi ku hunguta xigwevo xa rona kumbe xi namba xi ri humesa ekhotsweni. Lexi i xikombiso xa musa.

Hilaha ku fanaka, Yehovha a nga hlawula ku ka a nga xupuli vadyohi hinkwavo. Kambe hikwalaho ko susumetiwa hi rirhandzu, vanhu lava n’wi rhandzaka naswona va xiximaka milawu ya yena a nga va nyika vutomi lebyi nga heriki. Bibele yi ri: “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

Ndlela leyi Yehovha a hi rhandzaka ha yona yi vonake kahle loko a rhumela N’wana wakwe a ta xaniseka hikwalaho ka hina a tlhela a hi fela. Loko Yesu a vulavula hi Tata wakwe u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16.

Vanhu hinkwavo lava rhandzaka Yehovha naswona va endlaka ku rhandza kakwe va amukeleka eka yena ku nga khathariseki rixaka ra vona. Kutani ntshembo wa vutomi lebyi nga heriki i xikombiso xa musa ni rirhandzu lerikulu leri Xikwembu xi hi kombisaka rona.

[Marito lama tshahiweke exihlokweni lama nga eka tluka 29]

I xikombiso xa musa ni rirhandzu lerikulu leri Xikwembu xi hi kombisaka rona