Nghena endzeni

Hundzela eka leswi nga endzeni

“Nkarhi Lowu Vekiweke” Wu Tshinele

“Nkarhi Lowu Vekiweke” Wu Tshinele

 “Nkarhi Lowu Vekiweke” Wu Tshinele

KU FANA na muprofeta Habakuku, vadyondzisiwa va Yesu a va swi navela ku vona ku xaniseka ku hela. Loko vadyondzisiwa va Yesu se va twe leswi Mfumo wa Xikwembu wu nga ta swi endla leswaku wu lulamisa swiyimo laha misaveni, va n’wi vutise va ku: “Xana swilo leswi swi ta endleka rini, naswona xi ta va xihi xikombiso xa vukona bya wena [ematimbeni ya Mfumo] ni xa makumu ya mafambiselo ya swilo?” (Matewu 24:3) Loko Yesu a va hlamula u va byele leswaku i Yehovha Xikwembu ntsena loyi a tivaka nkarhi lowu ha wona Mfumo wu nga ta yi lawula hi ku helela misava leyi. (Matewu 24:36; Marka 13:32) Hambiswiritano, Yesu ni van’wana va swi vule ka ha ri emahlweni swilo leswi a swi ta humelela tanihi xikombiso xa leswaku makumu ma tshinele.—Vona  bokisi leri nga exineneni.

Xana a wu pfumeli leswaku swilo leswi swa humelela namuntlha? Yesu u tlhele a vula ka ha ri emahlweni leswaku ntirho wo dyondzisa a wu ta endliwa emisaveni hinkwayo. U te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.

Sweswo hi swona leswi humelelaka namuntlha. Timbhoni ta Yehovha ti endla ntirho wolowo. Ematikweni ya kwalomu ka 236, Timbhoni ta Yehovha leti tlulaka timiliyoni ta nkombo ti byela vanhu malunghana ni leswi Mfumo wa Xikwembu wu nga ta swi endla naswona ti va pfuna leswaku va hundzula vutomi bya vona va endla leswi Xikwembu xi swi languteleke eka vona, tanihi leswi xikongomelo xa xona ku nga ku herisa ku xaniseka. Yana emahlweni u dyondza hi Mfumo wa Xikwembu naswona u ta va ni lunghelo ro hanya emisaveni leyi nga riki na maxangu—hilaha ku nga heriki.

[Bokisi leri nga eka tluka 8]

 Matsalwa Lama Vulavulaka Hi Masiku Ya Makumu

MATEWU 24:6, 7; NHLAVUTELO 6:4

• Tinyimpi leti nga si tshamaka ti va kona

MATEWU 24:7; MARKA 13:8

• Ku tsekatseka lokukulu ka misava

• Ku kayivela ka swakudya

LUKA 21:11; NHLAVUTELO 6:8

• Mintungu

MATEWU 24:12

• Ku andza ka ku kala nawu

• Ku hola ka rirhandzu

NHLAVUTELO 11:18

• Ku onhiwa ka misava

2 TIMOTIYA 3:2

• Ku rhandza mali ku tlula mpimo

• Ku nga yingisi vatswari

• Vanhu lava tirhandzaka ku tlula mpimo

2 TIMOTIYA 3:3

• Vanhu lava nga riki na xinakulobye xa ntumbuluko

• Vanhu lava nga laviki ntwanano hambi wu ri wihi

• Ku tsandzeka ku tikhoma loku andzeke eka vanhu hinkwavo

• Ku andza ka vanhu lava nga rhandziki vunene emisaveni hinkwayo

2 TIMOTIYA 3:4

• Vanhu lava rhandzaka mintsako ku ri ni ku rhandza Xikwembu

2 TIMOTIYA 3:5

• Vakanganyisi vo tala lava tivulaka Vakreste

MATEWU 24:5, 11; MARKA 13:6

• Vukona bya vaprofeta vo tala va mavunwa

MATEWU 24:9; LUKA 21:12

• Ku xanisiwa ka Vakreste va ntiyiso

MATEWU 24:39

• Vanhu lava swi baka hi makatla switsundzuxo swa Bibele

[Xifaniso lexi nga eka tluka 8]

Emisaveni hinkwayo, Timbhoni ta Yehovha ti dyondzisa vanhu hi Mfumo wa Xikwembu