Nghena endzeni

Hundzela eka leswi nga endzeni

3. Pfumela Ku Pfuniwa Hi Van’wana

3. Pfumela Ku Pfuniwa Hi Van’wana

 Ndlela Leyi U Nga Yi Twisisaka Ha Yona Bibele

3. Pfumela Ku Pfuniwa Hi Van’wana

Loko muvalangi Edward John Eyre, a teke riendzo ro tika ro tsemakanya Rivala ra Nullarbor leri nga kwandzasi, Vaaborigine va n’wi dyondzise ndlela leyi a nga kumaka mati ha yona eka switsunga swa sava ni le ka mirhi leyi vuriwaka eucalyptus. Leswi Eyre a pfumeleke ku pfuniwa hi vanhu lava ri tivaka kahle tiko rero swi ponise vutomi byakwe.

HILAHA xikombiso lexi xi kombisaka hakona, leswaku munhu a kota ku heta ntirho wo tika hakanyingi swi lava leswaku a pfuniwa hi munhu loyi a nga ni ntokoto. Ku laveka nchumu lowu fanaka loko u sungula ku hlaya Bibele.

Yesu a a nga langutelanga leswaku vadyondzisiwa vakwe va twisisa Bibele handle ko pfuniwa hi vanhu van’wana. Siku rin’wana u “[pfule] mianakanyo ya vona hi ku helela leswaku va twisisa nhlamuselo ya Matsalwa.” (Luka 24:45) Yesu a a swi tiva leswaku vanhu lava hlayaka Bibele va lava ku pfuniwa leswaku va twisisa tidyondzo ta Matsalwa.

I Mani Loyi A Nga Ta Hi Pfuna?

Yesu u lerise valandzeri vakwe leswaku ku va vona lava pfunaka vanhu ku twisisa Bibele. Loko Yesu a nga si tlhandlukela etilweni, u va lerise a ku: “Hikokwalaho fambani mi ya endla vanhu va matiko hinkwawo va va vadyondzisiwa, . . . mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Ntirho wa  nkoka wa Vakreste i ku dyondzisa, leswi katsaka ku hlamusela ndlela leyi milawu leyi kongomisaka ya Bibele yi nga tirhisiwaka ha yona evuton’wini. Vakreste va ntiyiso va pfuna vanhu van’wana leswaku va twisisa tidyondzo ta Bibele.

Endzhakunyana ka loko Yesu a nyike valandzeri vakwe xileriso xexo, ku humelele xiendlakalo lexi tsakisaka. Bibele yi vulavula hi mutirhela-mfumo wa le vuhosini loyi a a huma etikweni ra Etiyopiya loyi a a hlaya xiphemu xin’wana xa vuprofeta bya Esaya. U hlaye tindzimana leti n’wi pfilunganyeke. Hi ku ya hi leswi tsariweke eBibeleni, tindzimana leti n’wi pfilunganyeke a ti hlayekisa xileswi: “U yisiwe eku dlayiweni ku fana ni nyimpfu, ni ku fana ni xinyimpfana lexi nga vulavuriki eka mutsemeti wa xona, na yena a nga wu pfuli nomu. Hi nkarhi wa ku tsongahatiwa kakwe u avanyisiwe hilaha ku nga fanelangiki. I mani loyi a nga ta rungula vuxokoxoko bya xitukulwana xakwe? Hikuva vutomi byakwe byi susiwile emisaveni.”—Mintirho 8:32, 33; Esaya 53:7, 8.

Mutirhela-mfumo yoloye u vutise Filipi, ku nga Mukreste loyi a a ri ni ntokoto naswona a a ma tiva kahle Matsalwa. U vutise a ku: “Xana muprofeta u vula leswi malunghana na mani? Malunghana na yena kumbe malunghana ni munhu un’wana?” (Mintirho 8:34) Muetiyopiya yoloye loyi a a swi lava hi mbilu hinkwayo ku tiva mhaka leyi, se a a vuya hi  le ku gandzeleni ka Xikwembu eYerusalema naswona swi nga ha endleka leswaku u khongerile a kombela leswaku a twisisa mhaka leyi a a hlaya ha yona. Swi le rivaleni leswaku a a hiseka ni ku titsongahata loko a hlaya. Nilokoswiritano, mutirhela-mfumo loyi a a nga si xi twisisa xiphemu xexo. U kombele Filipi leswaku a n’wi pfuna. Nhlamuselo ya Filipi yi n’wi tsakise ngopfu wanuna loyi lerova u ve Mukreste.—Mintirho 8:35-39.

Timbhoni ta Yehovha ti ya emahlweni ti endla ntirho lowu a wu endliwa hi Filipi ni Vakreste van’wana vo sungula. Ematikweni lama tlulaka 235, Timbhoni ti pfuna vanhu van’wana hi ku tirhandzela leswaku va twisisa leswi Bibele yi swi dyondzisaka hakunene. Ti endla sweswo hi ku dyondza Matsalwa lama vulavulaka hi swiendlakalo leswi humelelaka namuntlha. Endlelo leri ra ku dyondza Bibele nkarhi na nkarhi ri katsa ku kambisisa leswi Bibele yi swi vulaka malunghana ni mhaka yo karhi. *—Vona bokisi leri nge,  “Tinhlamulo Leti Enerisaka Ta Swivutiso Swa Bibele.”

“Swivutiso Swa Mina Hinkwaswo Swi Hlamuriwile”

Steven, Valvanera, na Jo-Anne lava ku vulavuriweke ha vona eku sunguleni ka xihloko lexi, va sungule ku dyondza Bibele ni Timbhoni ta Yehovha. Steven u ri: “Swi ndzi hlamarisile ku tiva leswaku hakanyingi u nga kuma nhlamulo ya mhaka leyi u yi lavaka hi ku fananisa milawu leyi kongomisaka kumbe swiviko swo hlayanyana swa le Bibeleni ntsena. Loko ndzi nga si sungula ku dyondza Bibele ni Timbhoni ta Yehovha, ku hava munhu loyi a ndzi kombeke leswaku sweswo swi endlisiwa ku yini. Swi ndzi tsakise ngopfu ku tiva leswaku vanhu a va fanelanga va phikizana hi Bibele eka mabulo lawa eka wona ku nga kumiwiki tinhlamulo leti enerisaka naswona ku vaka ni mavonelo lama kanetanaka malunghana ni leswi nga ntiyiso hi Xikwembu ni hi Bibele.”

Valvanera u te: “Hinkwaswo leswi ndzi swi dyondzeke ni Timbhoni a swi twisiseka. Ndzi dyondze leswaku a ndzi fanelanga ndzi pfumela swilo hileswi ntsena ndzi dyondzisiweke swona eKerekeni, kambe ndzi fanele ndzi swi pfumela hikwalaho ka leswi swi hlamuseriweke hi ndlela leyi twisisekaka.” Jo-Anne u te: “Mhaka ya leswaku swivutiso hinkwaswo leswi a ndzi ri na swona swi hlamuriwe hi ku tirhisa Bibele swi endle leswaku ndzi n’wi xixima swinene Yehovha hikuva a a swi tiva leswaku vanhu a va ta va ni swivutiso swo tala leswi tikaka ku swi hlamula kutani u endle leswaku ku tsariwa tinhlamulo leti enerisaka ta swivutiso sweswo eBibeleni.”

Xana yi kona Mbhoni ya Yehovha leyi u yi tivaka? Ha yini u nga yi kombeli leswaku yi ku komba ndlela leyi dyondzo yoleyo ya Bibele yi fambisiwaka ha yona? Loko yi nga ri kona Mbhoni ya Yehovha leyi u yi tivaka, hi kombela u tsalela eka yin’wana ya tiadirese leti xaxametiweke eka tluka 4 ra magazini lowu. U nga yi twisisa Bibele loko u kombela moya lowo kwetsima wa Xikwembu, loko u yi hlaya handle ko yi xopaxopa ni ku kombela mpfuno wa mudyondzisi wa Bibele loyi a fanelekaka.

[Nhlamuselo ya le hansi]

^ par. 10 Buku leyi pfuneke vanhu vo tala ku dyondza hi Matsalwa lama vulavulaka hi swiendlakalo leswi humelelaka namuntlha hi leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Bokisi/Xifaniso lexi nga eka tluka 8]

 Tinhlamulo Leti Enerisaka Ta Swivutiso Swa Bibele

Tin’wana ta tinhloko-mhaka leti tlhuvutsiwaka hi Timbhoni ta Yehovha eka dyondzo ya tona ya Bibele:

• Hi xihi xikongomelo xa Xikwembu hi misava?

• Lava feke va kwihi?

• Xana hi hanya “emasikwini yo hetelela”?

• Ha yini Xikwembu xi pfumelela leswaku ku va ni ku xaniseka?

• Xana ndzi nga endla yini leswaku ndzi va ni ndyangu lowu tsakeke?

[Swifaniso leswi nga eka tluka 7]

Leswaku u twisisa Bibele . . . khongelela moya lowo kwetsima wa Xikwembu, hlaya handle ko yi xopaxopa, pfumela ku pfuniwa hi vanhu van’wana