Nghena endzeni

Hundzela eka leswi nga endzeni

Yehovha U Hlamusele Timfanelo Takwe

Yehovha U Hlamusele Timfanelo Takwe

 Tshinela Eka Xikwembu

Yehovha U Hlamusele Timfanelo Takwe

Eksoda 34:6, 7

XANA a wu ta xi hlamusela njhani Xikwembu—timfanelo ta xona ni ndlela leyi xi endlaka ha yona swilo eka swiyimo swo hambana-hambana? Ehleketa u ri karhi u vutisa Xikwembu hi timfanelo ta xona kutani u yingisela loko xi ri karhi xi ku hlamusela tona. Muprofeta Muxe u swi endlile sweswo. Lexi tsakisaka, u huhuteriwe ku tsala leswi xi swi vuleke.

Loko Muxe a ri eNtshaveni ya Sinayi u kombele Yehovha a ku: “Ndzi kombela u ndzi komba ku vangama ka wena.” (Eksoda 33:18) Hi siku leri landzeleke, muprofeta yoloye u nyikiwe lunghelo ro vona ku vangama ka Xikwembu. * Muxe a nga swi hlamuselanga hi vuenti leswi a swi voneke exivonweni xexo lexi hlamarisaka. Kambe u tsale nchumu wun’wana wa nkoka swinene, ku nga leswi Xikwembu xi swi vuleke. A hi kambisiseni leswi Yehovha a swi vuleke hilaha swi tsariweke hakona eka Eksoda 34:6, 7.

Nchumu wo sungula lowu Yehovha a wu paluxeke malunghana ni timfanelo takwe hileswaku i “Xikwembu xa tintswalo ni nsovo.” (Ndzimana 6) Hi ku ya hi mukambisisi un’wana wa Bibele, rito ra Xiheveru leri hundzuluxeriweke ri va “tintswalo,” ri vula “ntwela-vusiwana wa [Xikwembu], lowu fanaka ni lowu tatana a wu kombisaka vana vakwe.” Rito leri hundzuluxeriweke ri va “nsovo” ri fambisana ni riendli leri “hlamuselaka munhu loyi a susumetiwaka hi mbilu yakwe ku pfuna munhu un’wana loyi a lavaka nchumu wo karhi.” Swi le rivaleni leswaku Yehovha u lava hi tiva leswaku u khathalela vagandzeri vakwe hilaha vatswari va va khathalelaka hakona vana va vona. Wa va rhandza naswona wa khathala hi swilaveko swa vona.—Pisalema 103:8, 13.

Yehovha u tlhele a vula leswaku u “hlwela ku hlundzuka.” (Ndzimana 6) A nga ma hlundzukeli hi ku olova malandza yakwe lama nga laha misaveni. Ematshan’weni ya sweswo, u ma lehisela mbilu a tlhela a ma rivalela swihoxo swa wona a ri karhi a ma nyika nkarhi wo hundzuka eswidyohweni swa wona.—2 Petro 3:9.

Xikwembu xi ye emahlweni xi vula leswaku xi “[tele] musa wa rirhandzu ni ntiyiso.” (Ndzimana 6) Musa wa rirhandzu i mfanelo ya risima leyi endlaka leswaku Yehovha a va ni vuxaka lebyi tiyeke ni vanhu vakwe. (Deteronoma 7:9) Nakambe Yehovha i xihlovo xa ntiyiso. A nga kanganyisi naswona yena a nga kanganyisiwi. Leswi a nga “Xikwembu xa ntiyiso,” hi nga swi tshemba hi ku helela swilo hinkwaswo leswi a swi vulaka, ku katsa ni switshembiso  leswi a hi tshembisaka swona leswaku  swi ta endleka enkarhini lowu taka.—Pisalema 31:5.

Mhaka yin’wana ya nkoka leyi Yehovha a lavaka leswaku hi yi tiva malunghana na yena hileswaku u rivalela “xihoxo ni ku tlula nawu ni xidyoho.” (Ndzimana 7) U “lunghekele ku rivalela” vadyohi lava hundzukaka. (Pisalema 86:5) Hi nkarhi lowu fanaka, Yehovha a nga swi amukeli swilo swo biha. U vula leswaku “a nga ka a nga tshiki ku xupula la faneriwaka hi ku xupuriwa.” (Ndzimana 7) Xikwembu lexi kwetsimaka tlhelo lexi lulameke a xi nge tshiki ku xupula vadyohi lava dyohaka hi vomu. Ku nga ri khale va ta tshovela leswi va swi byaleke.

Ndlela leyi Yehovha a hlamuseleke timfanelo takwe ha yona yi swi kombisa kahle leswaku u lava leswaku hi n’wi tiva naswona hi ti tiva kahle timfanelo takwe swin’we ni tindlela takwe. Xana leswi a swi ku susumeteleki ku lava ku dyondza swo tala hi timfanelo takwe to saseka?

[Nhlamuselo ya le hansi]

^ par. 5 Muxe a nga n’wi vonanga hi ku kongoma Yehovha, hikuva ku hava munhu loyi a nga vonaka Xikwembu ivi a hanya. (Eksoda 33:20) Entiyisweni Yehovha u kombe Muxe xivono xa  ku vangama Kakwe, a vulavula na yena hi ku tirhisa ntsumi.