Nghena endzeni

Hundzela eka leswi nga endzeni

Xana Xikwembu Xi Amukela Vukhongeri Hinkwabyo?

Xana Xikwembu Xi Amukela Vukhongeri Hinkwabyo?

 Xana Xikwembu Xi Amukela Vukhongeri Hinkwabyo?

Tinhlamulo leti tolovelekeke:

▪ “Vukhongeri hinkwabyo i tindlela leti yaka eka Xikwembu.”

▪ “A swi na mhaka leswaku u pfumela yini ntsena loko u tinyiketele hi mbilu hinkwayo eka vukhongeri bya wena.”

I yini leswi Yesu a swi vuleke?

▪ “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.” (Matewu 7:13, 14) Yesu a a nga pfumeli leswaku magondzo hinkwawo ma ya eka Xikwembu.

▪ “Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.” (Matewu 7:22, 23) Yesu a nga va amukeli hinkwavo lava tivulaka valandzeri vakwe.

VANHU vo tala lava nghenaka kereke va khomelela swinene eka tidyondzo ni mindhavuko ya vona. Kambe ku humelela yini loko tidyondzo teto ti nga fambisani ni leswi tsariweke eRitweni ra Xikwembu, ku nga Bibele? Yesu u kombise khombo ro landzela mindhavuko ya vanhu loko a byela vafundhisi va le nkarhini wakwe a ku: “Mi endle rito ra Xikwembu ri nga tirhi hikwalaho ka ndhavuko wa n’wina.” Nakambe u tshahe marito lawa lama vuriweke hi Xikwembu: “Vanhu lava va ndzi xixima hi milomu ya vona, kambe timbilu ta vona ti le kule swinene na mina. Va tama va ndzi gandzela swa hava, hikuva va dyondzisa swileriso swa vanhu va swi endla tidyondzo leti nga enawini.”—Matewu 15:1-9; Esaya 29:13.

Nakambe i swa nkoka ku va vanhu va va ni mahanyelo lamanene ku tlula ku va va va ni tidyondzo letinene. Bibele yi vula leswi hi lava tivulaka leswaku va gandzela Xikwembu: “Va vula erivaleni leswaku va tiva Xikwembu, kambe va xi landzula hi mintirho ya vona.” (Tito 1:16) Entiyisweni, Bibele yi vula leswi hi vanhu va le minkarhini ya hina: “Ematshan’weni yo rhandza Xikwembu, va ta rhandza mintsako. Hambileswi va nga ta tikombisa va rhandza vukhongeri, vukhongeri bya vona byi nge vi bya xiviri. U nga tihlanganisi ni vanhu vo tano.”—2 Timotiya 3:4, 5, Contemporary English Version.

Ku laveka leswi engetelekeke ku tlula ku va munhu a tinyiketela hi mbilu hinkwayo eka vukhongeri byakwe. Ha yini? Munhu a nga ha va a tinyiketele hi mbilu hinkwayo eka swilo leswi hoxeke. Kutani vutivi lebyi kongomeke hi Xikwembu i bya nkoka. (Varhoma 10:2, 3) Ku va ni vutivi lebyi ni ku hanya hi ku ya hi leswi Bibele yi swi vulaka swi ta hi endla leswaku hi tsakisa Xikwembu. (Matewu 7:21) Kutani vukhongeri lebyi amukelekaka eka Xikwembu byi katsa swikongomelo leswinene, tidyondzo ta ntiyiso ni swiendlo leswinene. Naswona swiendlo leswinene swi vula ku endla ku rhandza ka Xikwembu siku ni siku!—1 Yohane 2:17.

Loko u lava ku tiva swo tala malunghana ni leswi Bibele yi hi byelaka swona hi Xikwembu, tihlanganise ni Timbhoni ta Yehovha leswaku u va ni dyondzo ya Bibele ya mahala.

[Marito lama tshahiweke exihlokweni lama nga eka tluka 9]

Vukhongeri lebyi amukelekaka eka Xikwembu byi katsa swikongomelo leswinene, tidyondzo ta ntiyiso ni swiendlo leswinene