Nghena endzeni

Hundzela eka leswi nga endzeni

Xana Xikwembu I Munhu Wa Xiviri?

Xana Xikwembu I Munhu Wa Xiviri?

 Xana Xikwembu I Munhu Wa Xiviri?

Tinhlamulo leti tolovelekeke:

▪ “Xikwembu xi le ndhawini yin’wana ni yin’wana eka nchumu wun’wana ni wun’wana. Xi fana ni moya.”

▪ “I matimba lamakulu lama nga hlamuselekiki.”

I yini leswi Yesu a swi vuleke?

▪ “Endlwini ya Tatana ku ni vutshamo byo tala.” (Yohane 14:2) Yesu u vule leswaku Xikwembu xi ni yindlu yo fanekisela kumbe ndhawu yo tshama eka yona.

▪ “Ndzi huma eka Tatana ndzi ta emisaveni. Ku tlula kwalaho, ndzi siya misava, ndzi ya eka Tatana.” (Yohane 16:28) Yesu a a pfumela leswaku Xikwembu i Munhu wa xiviri naswona ku ni ndhawu leyi xi tshamaka eka yona.

YESU a nga si tshama a vula leswaku Xikwembu i matimba lamakulu lama nga hlamuselekiki. Ku hambana ni sweswo u vulavule ni Xikwembu a tlhela a khongela eka xona. A a tala ku vula leswaku Yehovha i Tata wakwe wa le tilweni, ku nga xiga lexi kombisaka leswaku a a ri ni vuxaka lebyikulu na yena.—Yohane 8:19, 38, 54.

I ntiyiso leswaku “a ku na munhu la tshameke a vona Xikwembu” ni leswaku “Xikwembu i Moya.” (Yohane 1:18; 4:24) Kambe leswi a swi vuli swona leswaku a xi na miri wa muxaka wo karhi kumbe xivumbeko xo karhi. Bibele yi hi byela leswi: “Loko ku ri ni miri wa nyama, ni wa moya wu kona.” (1 Vakorinto 15:44) Kutani, xana Yehovha u ni miri wa moya?

Ina. Loko Yesu a pfuxiwe eku feni, u “[nghene] . . . etilweni hi koxe, kutani a humelela emahlweni ka Xikwembu hi xiviri hikwalaho ka hina.” (Vaheveru 9:24) Leswi swi hi dyondzisa swilo swimbirhi swa nkoka hi Xikwembu. Xo sungula, xi ni ndhawu leyi xi tshamaka eka yona. Xa vumbirhi, i Munhu ku nga ri matimba lamakulu lama nga hlamuselekiki lama kumekaka kun’wana ni kun’wana.

Kutani, xana Xikwembu xi swi kotisa ku yini ku lawula swilo kun’wana ni kun’wana? Xikwembu xi nga rhumela moya wa xona lowo kwetsima kumbe matimba lawa xi ma tirhisaka endhawini yin’wana ni yin’wana evuakweni hinkwabyo. Ku fana ni tatana loyi a tshambulutaka voko rakwe leswaku a chavelela ni ku seketela vana vakwe, Xikwembu xi rhumela moya wa xona lowo kwetsima leswaku xi hetisisa xikongomelo xa xona.—Pisalema 104:30; 139:7.

Leswi Xikwembu xi nga Munhu, xi na tona timfanelo, swilo leswi xi swi rhandzaka ni leswi xi nga swi rhandziki naswona xa khumbeka hi swilo leswi vanhu va swi endlaka. Bibele yi hi byela leswaku xi rhandza vanhu va xona, xi tsakisiwa hi swilo leswi xi swi endleke, xi venga ku gandzeriwa ka swifaniso naswona xa vaviseka hikwalaho ka vuhomboloki. (Genesa 6:6; Deteronoma 16:22; 1 Tihosi 10:9; Pisalema 104:31) Eka 1 Timotiya 1:11, xi vitaniwa “Xikwembu lexi tsakeke.” A swi hlamarisi leswi Yesu a vuleke leswaku hi nga dyondza ku rhandza Xikwembu lexi hi timbilu ta hina hinkwato!—Marka 12:30. *

[Nhlamuselo ya le hansi]

^ par. 12 Leswaku u kuma rungula leri engetelekeke hi mhaka leyi, vona ndzima yo sungula ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Marito lama tshahiweke exihlokweni lama nga eka tluka 5]

Ku fana ni tatana loyi a tshambulutaka voko rakwe, Xikwembu xi rhumela moya wa xona lowo kwetsima leswaku xi hetisisa xikongomelo xa xona