Nghena endzeni

Hundzela eka leswi nga endzeni

Xana Timbhoni Ta Yehovha Ti Pfumela Leswaku Hi Tona Ntsena Leti Nga Ta Ponisiwa?

Xana Timbhoni Ta Yehovha Ti Pfumela Leswaku Hi Tona Ntsena Leti Nga Ta Ponisiwa?

 Swivutiso Swa Vahlayi

Xana Timbhoni Ta Yehovha Ti Pfumela Leswaku Hi Tona Ntsena Leti Nga Ta Ponisiwa?

Timbhoni ta Yehovha ti ehleketa leswaku vukhongeri bya tona i bya ntiyiso. Loko a ti nga ehleketi tano, a ti ta cinca vukhongeri bya tona. Ku fana ni vapfumeri lava pfumelaka eka vukhongeri byin’wana byo tala, Timbhoni ta Yehovha ti tshemba leswaku ti ta ponisiwa. Hambiswiritano, ti tlhela ti pfumela leswaku a hi ntirho wa tona ku avanyisa leswaku i vamani lava nga ta ponisiwa. Phela Xikwembu hi xona xi nga Muavanyisi. Hi xona xi nga ta vula leswaku i mani la nga ta ponisiwa.—Esaya 33:22.

Rito ra Xikwembu ri vula leswaku lava nga ta ponisiwa a va fanelanga va lava ntsena ku ponisiwa kambe va fanele va tlhela va tirhisana ni Muponisi. Hi xikombiso: A hi nge munhu la valangaka ndhawu u lahlekile emananga. U yi lava hi mahlo-ngati ndlela ya ku huma emananga wolawo. Xana u ta fela kwalaho kumbe u ta pona? Sweswo swi titshege hileswaku u ta endla yini loko va lava ku n’wi pfuna. A nga ha ala ku pfuniwa hi munhu loyi a ponisaka vanhu hileswi a tikukumuxaka. Kumbe a nga ha titsongahata a amukela mpfuno kutani a ponisiwa.

Hilaha ku fanaka, lava nga ta pona hi lava tirhisanaka ni Muponisi wa vanhu, Yehovha Xikwembu. Ku ponisiwa i nyiko leyi humaka eka Xikwembu, kambe a hi vanhu hinkwavo lava nga ta yi kuma. Yesu, N’wana wa Xikwembu, u te: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:21.

Timbhoni ta Yehovha ti pfumela leswaku Xikwembu xi ponisa ntsena lava kombisaka ripfumelo eka gandzelo ra nkutsulo ra Yesu kutani va hanya hi tidyondzo leti Yesu a ti dyondziseke. (Mintirho 4:10-12) Xiya swilo swinharhu swa nkoka leswi lavekaka leswaku munhu a ponisiwa leswi nga eRitweni ra Xikwembu.

(1) Yesu u byele valandzeri vakwe a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Xikombiso lexi vekiweke hi Yesu hi byakwe xa ku nyikela hi vutomi byakwe hikwalaho ka vanhu van’wana xi kandziyisa ndlela leyi rirhandzu ri nga ra nkoka ha yona. Lava rhandzaka vanhu van’wana va kombisa mfanelo leyi nga ya nkoka leswaku munhu a ponisiwa.

(2) Loko Yesu a khongela eka Tata wakwe u te: “Ndzi va tivise vito ra wena.” (Yohane 17:26) Yesu a a yi tiva ndlela leyi vito ra Xikwembu, ku nga Yehovha, ri nga ra nkoka ha yona eka Tata wakwe. Yesu u khongelele leswaku vito ta Tata wakwe ri ‘kwetsimisiwa.’ (Matewu 6:9) Ku kwetsimisa vito ra Xikwembu swi katsa ku tiva vito rolero ni ku ri teka ri ri ra nkoka ni leri kwetsimaka. Lava lavaka ku ponisiwa va fanele va tirhisa vito ra Xikwembu ku fana na Yesu. Nakambe va fanele va dyondzisa vanhu van’wana vito ra Xikwembu ni timfanelo ta xona. (Matewu 28:19, 20) Entiyisweni, lava vitanaka vito ra Xikwembu hi vona ntsena lava nga ta ponisiwa.—Varhoma 10:13.

(3) Yesu u byele Pontiyo Pilato a ku: “Mfumo wa mina a hi xiphemu xa misava leyi.” (Yohane 18:36) Namuntlha a va talanga vanhu lava swi kombisaka hi ku kongoma leswaku va tshembela eka Mfumo wa Xikwembu kumbe eka hulumendhe leyi Yesu a nga Hosi ya yona. Ematshan’weni ya sweswo, va tshembela eka mimfumo kumbe minhlangano ya vanhu. Ku hambana ni sweswo, lava nga ta ponisiwa hi lava wu seketeleke hi ku tshembeka Mfumo wa Xikwembu naswona va dyondzisaka van’wana ndlela leyi wu nga ta va ntshunxa ha yona vanhu hinkwavo lava tshembekaka.—Matewu 4:17.

Endzhaku ka loko vadyondzisiwa va Yesu va dyondze hi swilo leswi lavekaka leswaku munhu a ponisiwa, va te: “I mani loyi a nga ponisiwaka?” Yesu u hlamule a ku: “Swilo leswi vanhu va nga swi kotiki Xikwembu xa swi kota.” (Luka 18:18-30) Timbhoni ta Yehovha ti hisekela ku fikelela swilo sweswo leswi lavekaka leswaku munhu a ponisiwa. Nakambe ti tirha hi matimba leswaku ti pfuna van’wana leswaku va ta ponisiwa.