Nghena endzeni

Hundzela eka leswi nga endzeni

Malunghana Ni Ntshembo Wa Leswaku Vafi Va Ta Pfuxiwa

Malunghana Ni Ntshembo Wa Leswaku Vafi Va Ta Pfuxiwa

 Leswi Hi Swi Dyondzaka Eka Yesu

Malunghana Ni Ntshembo Wa Leswaku Vafi Va Ta Pfuxiwa

Yesu u pfuxe vafi vanharhu, xisweswo a kombisa leswaku ku ni ntshembo wa leswaku vafi va ta pfuxiwa. (Luka 7:11-17; 8:49-56; Yohane 11:1-45) Leswaku hi twisisa mhaka ya leswaku vafi va ta pfuxiwa, hi fanele hi rhanga hi twisisa leswaku rifu ri vangiwa hi yini nileswaku ri sungule kwihi.

Ha Yini Hi Vabya Hi Tlhela Hi Fa?

Loko Yesu a rivalela vanhu swidyoho swa vona, a va hanyisiwa. Hi xikombiso, Yesu u vule marito lama landzelaka loko ku tisiwa wanuna la omeke swirho eka yena: “‘I yini lexi olovaka swinene, i ku vula u ku, Swidyoho swa wena swi rivaleriwile, kumbe i ku vula u ku, Pfuka u famba? Hambiswiritano, ku endlela leswaku mi swi tiva leswaku N’wana wa munhu u ni mfanelo yo rivalela swidyoho emisaveni—’ kutani a byela munhu la omeke swirho a ku: ‘Pfuka, teka sangu ra wena u muka.’” (Matewu 9:2-6) Kutani xidyoho hi xona xi hi vangelaka vuvabyi ni rifu. Xidyoho lexi hi tswariweke na xona xi vangiwe hi munhu wo sungula, Adamu.—Luka 3:38; Varhoma 5:12.

Ha Yini Yesu A File?

Yesu a nga si tshama a dyoha. Hikokwalaho a a nga faneriwi hi ku fa. Leswi Yesu a hi feleke, u hi hakelele swidyoho swa hina. U vule leswaku ngati yakwe a yi ta “halateriwa vo tala leswaku va rivaleriwa swidyoho.”—Matewu 26:28.

Yesu u tlhele a ku: ‘N’wana wa munhu a nga telanga ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.’ (Matewu 20:28) Yesu u vule leswaku hakelo leyi a yi hakeleke i “nkutsulo” hikuva wu ntshunxe van’wana eka rifu. Nakambe Yesu u te: “Ndzi tile leswaku va ta kuma vutomi ni leswaku va byi kuma hi xitalo.” (Yohane 10:10) Leswaku hi wu twisisa hi ku helela ntshembo wa leswaku lava feke va ta pfuxiwa, hi fanele hi tlhela hi tiva xiyimo lexi va nga eka xona sweswi.

 Ku Humelela Yini Loko Munhu A Fa?

Loko Lazaro munghana wa Yesu a fa, Yesu u hlamusele leswi humelelaka munhu loko a file. U byele vadyondzisiwa vakwe a ku: “‘Lazaro nakulorhi u ye eku wiseni, kambe ndzi ya [eBetaniya] leswaku ndzi [ya] n’wi pfuxa evurhongweni.’ . . . A va anakanya leswaku u vulavula hi ku wisa evurhongweni. Hikokwalaho, enkarhini wolowo Yesu a va byela hi ku kongoma: ‘Lazaro u file.’” Xisweswo, Yesu u swi veke erivaleni leswaku vafi va etlele, a va twi nchumu.—Yohane 11:1-14.

Lazaro se a a ri ni masiku ya mune a file loko Yesu, munghana wakwe, a n’wi pfuxa. Kambe Bibele a yi vuli nchumu hi swilo leswi Lazaro a hlangavetaneke na swona hi nkarhi wolowo. Nkarhi lowu Lazaro a a file a a nga twi nchumu naswona a a nga tivi nchumu.—Eklesiasta 9:5, 10; Yohane 11:17-44.

Hi Wihi Ntshembo Lowu Nga Kona Hi Vafi?

Vafi va ta pfuxiwa leswaku va hanya hilaha ku nga heriki. Yesu u te: “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena [Yesu] kutani va huma.”—Yohane 5:28, 29.

Xitshembiso xa leswaku vafi va ta pfuxiwa i xikombiso xa leswaku Xikwembu xa hi rhandza. Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.”—Yohane 3:16; Nhlavutelo 21:4, 5.

Leswaku u kuma rungula leri engetelekeke hi mhaka leyi, vona ndzima 6 ya buku leyi nge Xana Bibele Yi Dyondzisa Yini Hakunene? *

[Nhlamuselo ya le hansi]

^ par. 15 Yi kandziyisiwe hi Timbhoni ta Yehovha.