Nghena endzeni

Hundzela eka leswi nga endzeni

Ku Dyondza Leswi Nga Ntiyiso Hi Tihele Swi Nga Ku Khumba Njhani?

Ku Dyondza Leswi Nga Ntiyiso Hi Tihele Swi Nga Ku Khumba Njhani?

 Ku Dyondza Leswi Nga Ntiyiso Hi Tihele Swi Nga Ku Khumba Njhani?

LAVA dyondzisaka leswaku tihele i ndhawu leyi vanhu vo homboloka va nga ta xanisiwa eka yona va n’wi onha vito Yehovha Xikwembu swin’we ni timfanelo takwe. I ntiyiso leswaku Bibele ya vula leswaku Xikwembu xi ta herisa vanhu vo homboloka. (2 Vatesalonika 1:6-9) Kambe mfanelo leyikulu ya Xikwembu a hi ku hlundzuka ka xona loku faneleke.

Xikwembu a xi rhandzi ku rihisela. Xi tshame xi vutisa xi ku: “Xana mi anakanya leswaku ndzi tsakela rifu ra munhu wo homboloka?” (Ezekiyele 18:23, Bibele—Mahungu Lamanene) Loko Xikwembu xi nga swi tsakeli leswaku lowo homboloka a fa, xi nga swi tsakela njhani ku hlalela vanhu vo tano loko va xanisiwa hilaha ku nga heriki?

Mfanelo leyikulu ya Xikwembu i rirhandzu. (1 Yohane 4:8) Hakunene “Yehovha hi lonene eka hinkwavo, naswona tintswalo takwe ti le henhla ka mintirho yakwe hinkwayo.” (Pisalema 145:9) Xisweswo, Xikwembu xi lava leswaku na hina hi xi rhandza hi mbilu hinkwayo.—Matewu 22:35-38.

Xana U Tirhela Xikwembu Hileswi U Chavaka Tihele Kumbe Hileswi U Xi Rhandzaka?

Dyondzo ya leswaku mimoya ya vanhu yi ta xanisiwa etiheleni yi endla leswaku vanhu va xi chava swinene Xikwembu. Kambe munhu loyi a dyondzaka ntiyiso hi Xikwembu kutani a sungula ku xi rhandza u ta xi chava hi ndlela leyi faneleke. Pisalema 111:10 yi ri: “Ku chava Yehovha i masungulo ya vutlhari. Hinkwavo lava va swi endlaka va ni ku twisisa lokunene.” Ku chava Xikwembu swi vula ku xi xixima hi mbilu hinkwayo, ku nga ri ku chava ka ku rhurhumela. Xichavo xolexo xi hi susumetela leswaku hi nga lavi ku xi khunguvanyisa.

Xiya ndlela leyi ku dyondza leswi nga ntiyiso hi tihele swi n’wi khumbeke ha yona Kathleen, wansati la nga ni malembe ya 32 loyi eku sunguleni a a tirhisa swidzidziharisi. A a hanyela ku ya eminkhubyeni, a a ri ni madzolonga, a a nga tirhandzi naswona a a ri ni mahanyelo yo biha. U te: “A ndzi languta xinhwanyetana xa mina lexi nga ni lembe rin’we kutani ndzi ku, ‘N’wananga mbuyangwana! Ndzi ta hisiwa etiheleni hikwalaho ka leswi.’ ” Kathleen u ringetile ku tshika ku tirhisa swidzidziharisi, kambe a swo fana ni kwala. U te: “A ndzi swi lava ku va munhu lonene kambe swilo hinkwaswo leswi a swi endleka evuton’wini bya mina ni le misaveni a swi twerisa vusiwana. A ndzi vona swi nga pfuni nchumu ku va munhu lonene.”

Hiloko Kathleen a hlangana ni Timbhoni ta Yehovha. U te: “Ndzi dyondze leswaku a ti kona tihele. Matsalwa lama vulaka sweswo a ma twisiseka swinene. Ku tiva leswaku a ndzi nge hisiwi etiheleni swi ndzi endle ndzi titwa ndzi ntshunxekile swinene.” Kambe u tlhele a dyondza hi xitshembiso xa Xikwembu xa leswaku vanhu va ta hanya hilaha ku nga heriki emisaveni leyi nga riki na vuhomboloki. (Pisalema 37:10, 11, 29; Luka 23:43) U te: “Sweswi ndzi ni ntshembo wa xiviri, ku nga ku hanya hilaha ku nga heriki eParadeyisini!”

Xana Kathleen a a ta tshika ku tirhisa swidzidziharisi tanihi leswi se a a nga ha chavi leswaku u ta hisiwa etiheleni? U ri: “Loko ndzi twa leswaku ndzi navela swidzidziharisi, a ndzi khongela eka Yehovha Xikwembu ndzi kombela leswaku a ndzi pfuna. A ndzi ehleketisisa hi ndlela leyi Yehovha a yi langutaka ha yona mikhuva yoleyo leyi thyakeke kutani a ndzi nga swi lavi ku n’wi twisa ku vava. U swi hlamurile swikhongelo swa mina.” (2 Vakorinto 7:1) Kathleen u swi kotile ku tshika mikhuva yakwe yo biha hileswi a a nga swi lavi ku hlundzukisa Xikwembu.

Ku hlakulela ku rhandza Xikwembu ni ku xi chava hi ndlela leyi faneleke, ku nga ri ku chava ku hisiwa etiheleni, swi nga hi susumetela ku endla ku rhandza ka xona leswaku hi va ni ntsako lowu nga heriki. Mupisalema u tsale a ku: “Wa tsaka un’wana ni un’wana la chavaka Yehovha, la fambaka etindleleni takwe.”—Pisalema 128:1.

[Bokisi/Swifaniso leswi nga eka tluka 9]

I VAMANI LAVA NGA TA HUMESIWA ETIHELENI?

Tibibele tin’wana ti pfilunganya vanhu hileswi ti hundzuluxeleke marito mambirhi ya Xigriki lama nga faniki—Geʹen·na na Haiʹdes—hi rito rin’we leri nge “tihele.” EBibeleni rito leri nge Geʹen·na ri vula ku va munhu a loviseriwa makumu a nga ha tlheli a pfuxiwa. Ku hambana ni sweswo, lava nga Haiʹdes kumbe eHayidesi, va ta pfuxiwa.

Xisweswo, endzhaku ka loko Yesu a file a tlhela a pfuxiwa, muapostola Petro u tiyisekise lava a va n’wi yingiserile leswaku Yesu “a nga tshikiwanga etiheleni.” (Mintirho 2:27, 31, 32; Pisalema 16:10, King James Version) Rito leri hundzuluxeriweke eka ndzimana leyi ri va “tihele” i rito ra Xigriki leri nge Haiʹdes. Yesu a nga yanga endhawini leyi pfurhaka ndzilo. Hayidesi kumbe “tihele” a ku ri sirha. Kambe Yesu a hi yena ntsena loyi Xikwembu xi n’wi humeseke eHayidesi.

Loko Bibele yi vulavula hi ku pfuxiwa ka vafi yi ri: “Rifu ni Tihele swi tlherisa vafi lava a va ri ka swona.” (Nhlavutelo 20:13, 14, Bibele—Mahungu Lamanene) Ku humesiwa ka vafi ‘etiheleni’ hi Xikwembu swi vula leswaku xi ta va tlherisela evuton’wini lava xi nga ta vona va faneriwa hi ku pfuxiwa. (Yohane 5:28, 29; Mintirho 24:15) Swi ta tsakisa hakunene ku vona varhandziwa va hina lava feke va pfuxeriwa evuton’wini enkarhini lowu taka! Yehovha Xikwembu loyi rirhandzu rakwe ri tshamaka hilaha ku nga heriki u ta swi endla sweswo.