Nghena endzeni

Hundzela eka leswi nga endzeni

Ndlela Leyi Ripfumelo Ra Mina Ri Ndzi Pfuneke Ha Yona Ku Langutana Ni Maxangu

Ndlela Leyi Ripfumelo Ra Mina Ri Ndzi Pfuneke Ha Yona Ku Langutana Ni Maxangu

 Ndlela Leyi Ripfumelo Ra Mina Ri Ndzi Pfuneke Ha Yona Ku Langutana Ni Maxangu

Hi ku vula ka Soledad Castillo

Xivundza a xi ta va xi ndzi hlurile minkarhi yo hlayanyana evuton’wini bya mina, kambe xi tsandzekile. Loko ndzi ri ni malembe ya 34 nuna wa mina la rhandzekaka u file. Endzhaku ka malembe ya tsevu tatana na yena u file. Endzhaku ka tin’hweti ta nhungu tatana a file ndzi byeriwe leswaku n’wana wa mina la nga swakwe u khomiwe hi vuvabyi lebyi nga tshungulekiki.

VITO ra mina ndzi Soledad, leswi vulaka “Xivundza.” Hambileswi swilo leswi ndzi humeleleke swi nga ha vonakaka swi nga tolovelekanga, a ndzi si tshama ndzi titwa ndzi ri ni xivundza lexikulu. Loko ndzi weriwa hi maxangu, a ndzi tshemba leswaku Yehovha Xikwembu a a ri na mina, ‘a ndzi khome hi voko kutani a ndzi pfuna leswaku ndzi nga chavi.’ (Esaya 41:13) Mi nge ndzi mi chumbutela ndlela leyi ndzi ma hluleke ha yona maxangu ya mina ni ndlela leyi ma endleke leswaku ndzi tshinela eka Yehovha ha yona.

Vutomi Lebyi Tsakisaka Ni Swiphiqo Swi Nga Ri Swingani

Ndzi velekiwe edorobeni ra Barcelona, le Spain, hi May 3, 1961, naswona hi mina n’wana ndzi ri ndzexe eka vatswari va mina, José na Soledad. Loko ndzi ri ni malembe ya kaye, Manana u dyondze Bibele a kuma ntiyiso. I khale a lava tinhlamulo ta swivutiso leswi a a ri na swona malunghana ni vukhongeri kambe a nga ti kumanga tinhlamulo leti enerisaka ekerekeni yakwe. Siku rin’wana, Timbhoni ta Yehovha timbirhi ti n’wi endzele ekaya naswona ti hlamule swivutiso swakwe hinkwaswo hi ku n’wi hlayela Matsalwa. U nambe a amukela dyondzo ya Bibele.

A swi tekanga nkarhi leswaku Manana a va Mbhoni ya Yehovha leyi khuvuriweke naswona endzhaku ka malembe ma nga ri mangani, Tatana u landzele xikombiso xakwe. Eliana loyi a a dyondza Bibele na Manana, u hatle a swi xiya leswaku na mina a ndzi swi tsakela ku hlaya Rito ra Xikwembu. Hambileswi a ndza ha ri ntsongo, Eliana u ringanyete leswaku na mina ndzi dyondzeriwa Bibele. Mpfuno wakwe ni swikhutazo swa Manana swi endle leswaku ndzi khuvuriwa loko ndzi ri ni malembe ya 13.

Loko ndza ha ri muntshwa, a ndzi tala ku khongela eka Yehovha, ngopfu-ngopfu loko ndzi lava ku endla swiboho. Entiyisweni loko ndza ha ri muntshwa a ndzi vanga ni swiphiqo swo tala. A ndzi ri ni vanghana vo tala evandlheni naswona a ndzi tolovelane swinene ni vatswari va mina. Hi 1982, ndzi tekane na Felipe, Mbhoni leyi a yi tivekele tipakani to fana ni ta mina to lava ku tirhela Yehovha hi xitalo.

Ku Kurisa N’wana Wa Hina Leswaku A Rhandza Yehovha

Endzhaku ka malembe ya ntlhanu hi tekanile, ndzi veleke n’wana wo saseka wa mufana loyi hi n’wi thyeke vito leri nge Saúl. Mina na Felipe a hi tsakile loko hi kuma n’wana loyi. A hi ri ni ntshembo wa leswaku Saúl a a ta kula a va n’wana la hanyeke kahle ni la rhandzaka Xikwembu. Mina na Felipe a hi heta nkarhi wo tala hi ri karhi hi vulavula na Saúl hi Yehovha, hi dya na yena swakudya, hi n’wi yisa entangeni  hi tlhela hi tlanga na yena mintlangu. Saúl a a swi rhandza ku famba na Felipe loko a ya chumayela vanhu van’wana, naswona hambileswi a ha ri ntsongo a a n’wi pfuna leswaku a hoxa xandla entirhweni lowu hi ku n’wi dyondzisa ku gongondza ni ku nyika vanhu swiphephana.

Saúl u endle hilaha a hi n’wi dyondzisa hakona. Loko a ri ni malembe ya tsevu, se a a chumayela swin’we na hina nkarhi hinkwawo. A a rhandza ku yingisela timhaka ta le Bibeleni naswona a a tshama a yi langutele hi mahlo-ngati dyondzo ya hina ya Bibele ya ndyangu. Endzhakunyana ka loko a sungule ku ya exikolweni, u sungule ku tiendlela swiboho leswitsongo hi ku ya hi vutivi lebyi a a ri na byona bya Bibele.

Hambiswiritano, loko Saúl a hlanganise malembe ya nkombo, vutomi bya ndyangu wa hina byi cince swinene. Felipe u ngheniwe hi xitsongwatsongwana emahahwini yakwe. Vuvabyi lebyi byi n’wi xanise tin’hweti ta 11, a a nga koti ku endla nchumu naswona minkarhi yo tala a a tshama a etlele. Nuna wa mina u fe a ri ni malembe ya 36.

Ni sweswi ndza ha rila loko ndzi tsundzuka lembe rero ra mangava. Ndzi vone nuna wa mina a ri karhi a hela matimba hakatsongo-tsongo hikwalaho ka vuvabyi byolebyo naswona ku ri hava lexi ndzi nga xi endlaka. Enkarhini wolowo ndzi ringete ku khutaza Felipe hambileswi embilwini ya mina a ndzi swi xiya leswaku tipakani ta mina swin’we ni swikongomelo leswi a ndzi ri na swona a swi nga ha ta tlhaveriwa hi dyambu. A ndzi n’wi hlayela swihloko leswi sekeriweke eMatsalweni naswona sweswo swi hi tiyisile loko hi nga swi koti ku ya eminhlanganweni ya Vukreste. Loko a fa a ndzi vona swi nga ha pfuni nchumu ku hanya.

Kambe Yehovha u ndzi seketerile. Nkarhi na nkarhi a ndzi n’wi kombela leswaku a ndzi nyika moya wakwe. Ndzi n’wi nkhensile hikwalaho ka malembe yo tsakisa lawa mina na Felipe hi tiphineke ha wona ni leswi a ndzi nyikeke ntshembo wo tlhela ndzi n’wi vona loko vafi va pfuxiwa. Ndzi kombele Xikwembu leswaku xi ndzi pfuna ndzi tsaka loko ndzi anakanya hi minkarhi leyi tsakisaka leyi hi tiphineke ha yona ni nuna wa mina nileswaku xi ndzi nyika vutlhari byo kurisa n’wana wa hina a va Mukreste wa ntiyiso. Hambileswi a ndzi twa ku vava swinene, ndzi titwe ndzi chavelelekile.

Vatswari va mina swin’we ni vamakwerhu evandlheni va ndzi seketele swinene. Hambiswiritano, ndzi boheke ku hlayela Saúl Bibele ni ku n’wi dyondzisa ndlela yo tirhela Yehovha. Khale ka muthori wa mina u ndzi nyike ntirho wa kahle wa le hofisini, kambe ndzi hlawule ntirho wo basisa leswaku ndzi ta kota ku heta nkarhi wo tala ndzi ri na Saúl loko a vuya exikolweni.

Tsalwa leri ri ndzi pfune ku vona ndlela leyi swi nga swa nkoka ha yona ku dyondzisa Saúl tindlela ta Xikwembu: “Letela mufana hi ndlela leyi nga yakwe; hambiloko a kurile a nge hambuki eka yona.” (Swivuriso 22:6) Ndzimana leyi yi ndzi nyike ntshembo wa leswaku Yehovha a a ta katekisa matshalatshala ya mina loko ndzi tikarhatela ku dyondzisa Saúl milawu yakwe. I ntiyiso leswaku ndzi boheke ku titsona swo karhi, kambe a ndzi lava ku heta nkarhi ni n’wana wa mina naswona sweswo hi swona leswi a swi ri swa nkoka ku tlula ku kuma mali.

Loko Saúl a ri ni malembe ya 14, tata wa mina u file. Saúl u twe ku vava swinene hikuva rifu ra kokwa wakwe ri n’wi pfuxele timbanga leti a veke na tona loko ku fa tata wakwe. Tata wa mina na yena u veke xikombiso lexinene hileswi a a rhandza Yehovha. Endzhaku ka rifu ra kokwa wakwe, Saúl u vule  leswaku hi yena loyi a a ta boheka ku wundla mana wakwe ni kokwa wakwe tanihi leswi a ku nga ha salanga wanuna un’wana handle ka yena.

Ku Karhatiwa Hi Vuvabyi Bya Khensa Ya Tisele Ta Ngati

Endzhaku ka tin’hweti ta nhungu tata wa mina a file, dokodela wa hina u ndzi byele leswaku ndzi yisa Saúl exibedlhele xa laha a hi tshama kona tanihi leswi a a tshama a karhele swinene. Endzhaku ko kamberiwa minkarhi yo landzelelana, madokodela ma ndzi byele leswaku Saúl u ni khensa ya tisele ta ngati. *

Eka malembe mambirhi ni hafu lama landzeleke, Saúl a a tshamela ku ya exibedlhele loko a ri karhi a ringeta ku hlula khensa ni ku tirhisa vutshunguri byo tirhisa tikhemikhali lebyi madokodela a ma byi tirhisa loko ma ringeta ku tshungula khensa. Eka tin’hweti ta tsevu to sungula loko a ri karhi a tshunguriwa, khensa yakwe yi nyamalarile ku ringana tin’hweti ta 18. Kambe khensa yi tlhele yi vuya naswona Saúl u boheke ku tlhela a amukela vutshunguri byo tirhisa tikhemikhali swa xinkarhana, lebyi n’wi endleke a tsana swinene. Khensa yi tlhele yi nyamalala swa xinkarhana ntsena naswona Saúl a a nga ha ta swi kota ku amukela vutshunguri byebyo ra vunharhu. Saúl se a a nyiketele vutomi byakwe eka Xikwembu naswona u vule leswaku a a lava ku khuvuriwa a va Mbhoni ya Yehovha, kambe u fe loko a ha ku hlanganisa malembe ya 17.

Madokodela hakanyingi ma ringanyeta leswaku vanhu lava nga ni khensa va pomperiwa ngati leswaku ku hunguteka switlhavi leswi va vaka na swona loko va tirhisa vutshunguri byo tirhisa tikhemikhali. Kambe ku pomperiwa ngati a ku byi tshunguli vuvabyi bya khensa. Loko madokodela ma hi byela ro sungula leswaku Saúl u ni vuvabyi bya khensa ya tisele ta ngati, mina na yena hi va hlamusele kahle leswaku a hi nga ta pfumela leswaku Saúl a pomperiwa ngati hikuva a hi lava ku yingisa nawu wa Yehovha lowu nge ‘papalatani ngati.’ (Mintirho 15:19, 20) Loko mina ndzi nga ri kona, Saúl u boheke ku khorwisa madokodela minkarhi yo tala leswaku xiboho lexi a xi tekeke a a tiendlele xona handle ko byeleteriwa. (Vona bokisi eka tlula 31.)

Eku heteleleni madokodela ma gimete hileswaku hambileswi Saúl a a ha ri ntsongo kambe a a swi twisisa kahle leswi nga ta n’wi humelela hikwalaho ka vuvabyi byakwe. Va pfumerile leswaku va endla hi ku ya hi xiboho lexi hi xi tekeke xisweswo va n’wi tshungule handle ko tirhisa ngati, hambileswi a va tshamela ku hi sindzisa leswaku hi cinca xiboho xa hina. A ndzi tinyungubyisa swinene hi Saúl loko ndzi n’wi twa a ri karhi a hlamusela madokodela xiboho xakwe xa ku nga lavi ku pomperiwa ngati. Swi le rivaleni leswaku a a ri ni vuxaka lebyikulu na Yehovha.

Hi lembe rero loko ndzi byeriwa ro sungula hi ta vuvabyi bya Saúl, ku humesiwe buku leyi nge Tshinela Eka Yehovha entsombanweni wa hina wa muganga eBarcelona. Buku yoleyo ya nkoka yi hi tiyisile ku fana ni nsoma enkarhini lowu a hi nga swi tivi leswaku ku ta humelela yini hi vumundzuku bya hina. Loko hi ri exibedlhele a hi hlaya swiyenge swa yona swin’we. Eminkarhini yo tala yo nonon’hwa leyi hi langutaneke na yona endzhaku ka sweswo, a hi tshamela ku tsundzuka leswi hi swi dyondzeke eka yona. Hi nkarhi wolowo marito ya Esaya 41:13, lama tshahiweke eku sunguleni ka buku yoleyo, ma hi tiyisile swinene. Ndzimana yoleyo yi ri: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’”

Ripfumelo Ra Saúl Ri Khumbe Vanhu Van’wana

Ndlela leyi Saúl a a wupfe ha yona ni leswi a a nga karhateki hi vuvabyi byakwe swi hlamarise madokodela ni vaongori va le Xibedlhele xa Vall d’Hebrón. Ntlawa hinkwawo lowu a wu n’wi khathalela a wu n’wi rhandza. Dokodela loyi a tirhanaka ni vavabyi lava nga ni khensa endzhaku ka sweswo u tshungule vana van’wana lava nga Timbhoni lava nga ni khensa ya tisele ta ngati, naswona u va xixime swinene. U tsundzuka xiboho lexi tiyeke xa Saúl xa ku namarhela tidyondzo leti a a pfumela eka tona, xivindzi lexi a a ri na xona loko a langutane ni rifu ni ndlela leyi a a tshama a tsakile ha yona. Ntlawa wa vaongori wu byele Saúl leswaku a a ri muvabyi wa kahle swinene ku tlula lava va tshameke va va na vona ekamareni  rolero ra vavabyi. Va vule leswaku a nga si tshama a gungula naswona a tshama a tsakile hambiloko se a ri ekusuhi ni ku fa.

Dokodela wa mianakanyo u ndzi byele leswaku vana vo tala lava ringanaka na Saúl lava khomiweke hi vuvabyi lebyi nga ta hetelela byi va dlaya, va tala ku nga ma yingisi madokodela ni vatswari hikwalaho ko twa ku vava ni ku karhateka. Kambe u xiye leswaku Saúl a nga swi endlanga sweswo. U hlamarisiwe hi ku vona Saúl a tsakile naswona a rhurile. Leswi swi endle leswaku mina na Saúl hi kuma ndlela yo n’wi chumayela hi vupfumeri bya hina.

Nakambe ndzi tsundzuka leswaku ndlela leyi Saúl a a tikhome ha yona yi pfune Mbhoni yin’wana evandlheni ra hina. Mbhoni leyi yi ve ni ntshikilelo wa mianakanyo ku ringana malembe ya tsevu naswona murhi lowu a yi wu tirhisa a wu yi pfunanga nchumu. Minkarhi yo hlayanyana a yi tshama na Saúl vusiku hinkwabyo exibedlhele yi n’wi khathalela. Yi ndzi byele leswaku ndlela leyi Saúl a a byi languta ha yona vuvabyi byakwe yi yi khumbe swinene. Yi xiye leswaku hambileswi Saúl a a tshama a lo lakahla hi ku karhala, a a ringeta ku khutaza vanhu hinkwavo lava a va n’wi endzela. Mbhoni leyi yi te: “Xikombiso xa Saúl xi ndzi nyike xivindzi xo lwisana ni vuvabyi bya mina bya ntshikilelo wa mianakanyo.”

Se ku hundze malembe manharhu Saúl a file. Ni sweswi ndza ha twa ku vava. Ndzi tsanile ku fana ni vanhu hinkwavo kambe Xikwembu xi ndzi nyike “matimba lama tlulaka lama tolovelekeke.” (2 Vakorinto 4:7) Ndzi dyondze leswaku hambi ku ri swiendlakalo leswi nonon’hwaka ni leswi vavaka swi nga va leswi vuyerisaka. Ku tiyisela gome ro feriwa hi nuna wa mina, tata wa mina ni n’wana wa mina swi ndzi pfune leswaku ndzi va anakanyela swinene vanhu van’wana ni ku va twela vusiwana lava xanisekaka. Ku tlula hinkwaswo, swi endle leswaku ndzi tshinela swinene eka Yehovha. Ndzi nga swi kota ku langutana ni swiyimo swin’wana leswi nga ha ndzi humelelaka enkarhini lowu taka handle ko chava hikuva Tata wa mina wa le tilweni u hambeta a ndzi pfuna. Ni sweswi u ndzi khoma hi voko.

[Nhlamuselo ya le hansi]

^ par. 19 Saúl a a ri ni vuvabyi byo chavisa bya khensa ya tisele ta ngati, lebyi dlayaka tisele to basa ta ngati.

[Bokisi/Xifaniso lexi nga eka tluka 31]

XANA U TSHAME U TIVUTISA?

Kumbexana u tshame u twa leswaku Timbhoni ta Yehovha a ti pfumeli ku pomperiwa ngati. Xana u tshame u tivutisa leswaku ha yini ti nga pfumeli?

Hakanyingi vanhu a va xi twisisi xiboho xexo xa Timbhoni lexi sekeriweke eBibeleni. Minkarhi yin’wana vanhu va ehleketa leswaku Timbhoni ta Yehovha ti ala tindlela hinkwato to tshungula kumbe a ti byi teki byi ri bya nkoka vutomi. Sweswo a hi ntiyiso nikatsongo. Timbhoni ta Yehovha ti lava leswaku tona ni swirho swa mindyangu ya tona swi tshunguriwa hi ndlela leyinene ngopfu. Hambiswiritano, ti lava ku tshunguriwa handle ko pomperiwa ngati kumbe hi mirhi leyi nga riki na swiaki swa ngati. Ha yini?

Xiboho xa tona xi sekeriwe eka nawu wa nkoka lowu Xikwembu xi wu nyikeke vanhu. Endzhakunyana ka Ndhambi ya le masikwini ya Nowa, Xikwembu xi pfumelele Nowa ni ndyangu wakwe ku dya nyama ya swiharhi. Kambe Xikwembu xi va vekele nawu lowu: A va nga fanelanga va dya ngati. (Genesa 9:3, 4) Vanhu va tinxaka hinkwato va huma eka Nowa, kutani nawu lowu wa tirha eka vanhu hinkwavo. A wu herisiwanga nikatsongo. Endzhakunyana ka malembe-xidzana yo tlula nhungu, Xikwembu xi tlhele xi tiyisekisa nawu wolowo eka tiko ra Israyele, xi hlamusela leswaku ngati ya kwetsima, yi yimela moya-xiviri kumbe vutomi hi byoxe. (Levhitika 17:14) Endzhakunyana ka malembe yo tlula 1 500, vaapostola lava nga Vakreste va lerise Vakreste hinkwavo leswaku va “papalata . . . ngati.”—Mintirho 15:29.

Timbhoni ta Yehovha ti swi vona swi nga twali nikatsongo ku vula leswaku ti papalata ngati hi ku helela kasi hi hala tlhelo ti pfumela ku pomperiwa yona emirini. Hikokwalaho ti lava leswaku ti tshunguriwa hi ku tirhisa tindlela leti nga katsiki ngati. Hakanyingi xiboho xexo lexi sekeriweke eMatsalweni xi endla leswaku ti tshunguriwa hi tindlela ta xiyimo xa le henhla. A swi kanakanisi leswaku hi yona mhaka leyi ni vanhu vo tala lava nga riki Timbhoni ta Yehovha va lavaka ku tshunguriwa handle ko tirhisa ngati.

[Xifaniso lexi nga eka tluka 29]

Ndzi ri ni nuna wa mina Felipe ni n’wana wa hina Saúl

[Xifaniso lexi nga eka tluka 29]

Vatswari va mina, José na Soledad

[Xifaniso lexi nga eka tluka 30]

Loko ka ha sele n’hweti yin’we leswaku Saúl a fa