Nghena endzeni

Hundzela eka leswi nga endzeni

Ku Profeta Hi Ta Vumundzuku Bya Hina Lebyi Nga Kwala Nyongeni

Ku Profeta Hi Ta Vumundzuku Bya Hina Lebyi Nga Kwala Nyongeni

 Ku Profeta Hi Ta Vumundzuku Bya Hina Lebyi Nga Kwala Nyongeni

LOKO muapostola Petro a vulavula hi ta vumundzuku bya vanhu ni bya misava u tsale a ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa [Xikwembu], naswona ku ta va ni ku lulama eka swona.” (2 Petro 3:13) Muprofeta Esaya hi yena wo sungula ku vulavula hi xitshembiso xa “matilo lamantshwa ni misava leyintshwa.” (Esaya 65:17; 66:22)  Loko Petro a tshaha vuprofeta lebyi, a a kombisa leswaku a byi nga si hetiseka hi ku helela enkarhini wakwe.

Endzhakunyana, kwalomu ka lembe ra 96 C.E., Nhlavutelo leyi nyikeriweke hi muapostola Yohane yi kombisa leswaku ‘misava yoleyo leyintshwa’ yi fambisana ni mikateko leyi a yi ta va kona loko ku fuma Mfumo wa Xikwembu. (Nhlavutelo 21:1-4) Marito ya Yesu ku katsa ni ya muapostola Pawulo lama vulavulaka hi swiyimo swa misava leswi a swi ta humelela loko Mfumo wa Xikwembu wu nga si sungula ku fuma ma karhi ma hetiseka sweswi. Hikokwalaho, hi nga langutela leswaku Mfumo wolowo wu ta yi tisa hi ku hatlisa misava leyintshwa. Xana yi ta va njhani misava leyintshwa? Buku ya Bibele ya Esaya ya hi byela.

Mikateko eMisaveni Leyintshwa

Ku Rhula eMisaveni Hinkwayo Ni Ku Gandzela Hi Vun’we. “Va ta fula mabanga ya vona ma va swikomu ni mafumu ya vona ma va swikhutulo. Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:2-4.

Ku Rhula Exikarhi Ka Vanhu Ni Swiharhi. “Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we; kutani swi ta rhangeriwa hi mufana lontsongo. Homu ni bere swi ta dya swin’we; vana va kona va ta vundza swin’we. Ni nghala yi ta dya byanyi kukota nkunzi. . . . A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:6-9.

Vanhu Hinkwavo Va Ta Va Ni Ndzalo Ya Swakudya. “Yehovha wa mavuthu u ta endlela vanhu hinkwavo entshaveni leyi, nkhuvo wa swakudya swo nona, nkhuvo wa vhinyo leyi kumekaka eswiseseni, wa swakudya swo nona leswi nga ni mongo, wa vhinyo leyi kumekaka eswiseseni, leyi hlutiweke.”—Esaya 25:6.

Rifu A Ri Nge He Vi Kona. “Entiyisweni [Xikwembu xi] ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo. Naswona ku rhukaniwa ka vanhu va yona yi ta ku susa emisaveni hinkwayo, hikuva Yehovha u vurile.”—Esaya 25:8.

Vafi Va Ta Pfuxiwa. “Lava feke, va ta tlhela va hanya, va ta huma emasirheni ya vona; hinkwavo lava nga hansi emisaveni, va ta yima va yimbelela hi ntsako, . . . U ta endla leswaku lava feke khale, va tlhela va hanya.”—Esaya 26:19, Bibele—Mahungu Lamanene.

Mesiya Muavanyisi Wo Lulama. “A nge avanyisi hi ku ya hi leswi a swi vonaka ematihlweni ya yena, kumbe a tshinya hi ku ya hi leswi twiwaka hi tindleve takwe ntsena. Kutani u ta avanyisa swisiwana hi ku tshembeka, naswona u ta tshinya hi vunene ku pfuna lavo rhula emisaveni.”—Esaya 11:3, 4.

 Mabofu Ni Lava Nga Twiki Va Ta Horisiwa. “Mahlo ya lava nga voniki ma ta pfuriwa, ni tindleve ta lava nga twiki ti ta pfuriwa.”—Esaya 35:5.

Makwandzasi Ma Ta Humesa Mihandzu. “Mananga ni ndhawu leyi nga riki na mati swi ta khana, ni timbala ta le kwandzasini ti ta tsaka, ti rhumbuka kukota safroni. Kunene ti ta rhumbuka, ti ta tsaka hi ntsako ni ku ba nkulungwana.”—Esaya 35:1, 2.

Misava Leyintshwa. “Ndzi tumbuluxa matilo lamantshwa [hulumendhe leyintshwa ya le tilweni] ni misava leyintshwa [vanhu lavantshwa vo lulama]; swilo swo sungula a swi nge tsundzukiwi, hambi embilwini a swi nge ti. Kambe khanani, mi tsaka hi masiku hikwalaho ka leswi ndzi swi tumbuluxaka. . . . Kunene [vaaki va misava leyintshwa leyi tshembisiweke hi Xikwembu] va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo. A va nge tirheli swa hava hi matimba, naswona a va nge he velekeli ku karhateka; hikuva i vana lava katekisiweke va Yehovha, swin’we ni vatukulu va vona. Entiyisweni mina ndzi ta va hlamula va nga si huwelela; loko va ha vulavula, mina ndzi ta va twa.” “‘Tanihi leswi matilo lamantshwa ni misava leyintshwa leyi ndzi yi endlaka swi nga emahlweni ka mina,’ ku vula Yehovha, ‘hi ndlela yoleyo vana va n’wina ni vito ra n’wina swi ta tshama swi ri kona.’”—Esaya 65:17-25; 66:22.

Ku Profeta Hi Vumundzuku Lebyi Tsakisaka

Buku ya Bibele ya Esaya a hi yona ntsena leyi profetaka hi mikateko ya nkarhi lowu taka. Bibele yi tele hi vuprofeta lebyi hlamuselaka swilo swo hlamarisa leswi Xikwembu xi nga ta swi hetisisa hi ku tirhisa Mfumo wa xona lowu nga ehansi ka Kreste. * Xana u nga swi tsakela ku hanya ehansi ka swiyimo swoleswo swa le paradeyisini? A swi kanakanisi leswaku u nga swi tsakela! Tikumele hi wexe leswi Bibele yi swi dyondzisaka hakunene malunghana ni swikongomelo leswinene swa Xikwembu hi vumundzuku u tlhela u dyondza ndlela leyi u nga vaka xiphemu xa swona ha yona. Timbhoni ta Yehovha ti ta swi tsakela ku ku pfuna.

[Nhlamuselo ya le hansi]

^ par. 15 Leswaku u kuma rungula leri engetelekeke malunghana ni Mfumo wa Xikwembu ni leswi wu nga ta swi endla, vona matluka 76-85 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Xifaniso lexi nga eka tluka 8]

Vanhu hi voxe va ta hanyisana hi ku rhula swin’we ni swiharhi

[Xifaniso lexi nga eka tluka 9]

Vafi va ta tlhela va hanya

[Xifaniso lexi nga eka tluka 10]

Misava hinkwayo yi ta va paradeyisi