Nghena endzeni

Hundzela eka leswi nga endzeni

Ha Yini Hi Fanele Hi Tirhisa Vito Ra Xikwembu Kasi A Hi Tiyiseki Hi Mavitanelo Ya Rona?

Ha Yini Hi Fanele Hi Tirhisa Vito Ra Xikwembu Kasi A Hi Tiyiseki Hi Mavitanelo Ya Rona?

 Swivutiso Swa Vahlayi

Ha Yini Hi Fanele Hi Tirhisa Vito Ra Xikwembu Kasi A Hi Tiyiseki Hi Mavitanelo Ya Rona?

Ku hava munhu ni un’we namuntlha loyi a tivaka ndlela leyi vito ra Xikwembu a ri vitaniwa ha yona hi Xiheveru xa khale. Hambiswiritano, lexi tsakisaka hileswi vito ra Xikwembu ri humelelaka minkarhi ya kwalomu ka 7 000 eBibeleni. Loko Yesu a ha ri laha misaveni u tivise vanhu vito ra Xikwembu naswona u lerise vadyondzisiwa vakwe leswaku va khongelela vito rero leswaku ri kwetsimisiwa. (Matewu 6:9; Yohane 17:6) Xisweswo, swi le rivaleni leswaku i swa nkoka swinene eka Vakreste ku tirhisa vito ra Xikwembu. Kambe, ha yini ndlela leyi vito rero a ri vitaniwa ha yona eku sunguleni yi nga tiveki kahle namuntlha? Ku ni swivangelo swimbirhi leswi twalaka.

Xo sungula, kwalomu ka malembe ya 2 000 lama hundzeke, Vayuda van’wana va sungule ku pfumela leswaku swa yila ku vitana vito ra Xikwembu. Loko munhu a kuma vito ra Xikwembu loko a hlaya Bibele, a a ri siva hi rito leri nge “Hosi.” Hi ndlela yoleyo, endzhaku ka loko ku hundze malembe-xidzana yo tala vito leri ri nga tirhisiwi, vanhu va rivale ndlela leyi vito ra Xikwembu a ri vitaniwa ha yona.

Xa vumbirhi, Xiheveru xa khale a xi tsariwa handle ko tirhisa switwari, hilaha swi endliwaka hakona loko ku komisiwa marito ya Xinghezi ni ya tindzimi tin’wana. Loko munhu a hlaya rungula leri tsariweke, a a tinghenisela switwari emiehleketweni yakwe. Hi ku famba ka nkarhi, ku sunguriwe endlelo leri a ri ta endla leswaku mavitanelo ya marito ya Xiheveru ma nga rivariwi hi ku helela. Ku nghenisiwe switwari eka rito rin’wana ni rin’wana eBibeleni ya Xiheveru. Hambiswiritano, ku hava switwari leswi nghenisiweke eka vito ra Xikwembu hambi eka rito leri nge “Hosi” leri siveke vito ra Xikwembu leswaku swi pfuna muhlayi ku ri tsundzuka.

Hikwalaho ka sweswo, i switatisi swa mune ntsena leswi saleke eka matsalwa leswi vuriwaka Tetragrammaton, leswi xihlamusela-marito xin’wana xi vulaka leswaku i “maletere ya mune ya Xiheveru lama hakanyingi ma hundzuluxeriwaka ma va YHWH kumbe JHVH hi ku landza mpfumawulo wa rito, lama vumbaka vito ra Xikwembu leri faneleke ra le Bibeleni.” Swa olova ku vona ndlela leyi maletere lama nge YHWH ma hundzukaka “Yehovha” ha yona loko ku nghenisiwa switwari eka wona, ku nga matsalelo lama tolovelekeke ngopfu ni lama amukelekaka hi Xitsonga.

Hambiswiritano, vakambisisi van’wana va ringanyeta leswaku ku tirhisiwa mavitanelo lama nge “Yahweh.” Xana mavitanelo wolawo ma yelana swinene ni mavitanelo yo sungula? Ku hava ni un’we la swi tivaka. Entiyisweni, vakambisisi van’wana va nyikele swivangelo swa leswaku mavitanelo lawa ma nga tirhisiwi. I ntiyiso leswaku mavito man’wana ya le Bibeleni loko ma vitaniwa hi tindzimi ta manguva lawa, a ma fani nikatsongo ni mavitanelo ya Xiheveru xo sungula, naswona a va talanga vanhu lava swi va vilerisaka sweswo. Sweswo swi vangiwa hileswi mavito wolawo se hi ma toloveleke ngopfu hi ririmi ra hina naswona hi hatlaka hi ma tiva. Swi tano ni hi vito leri nge Yehovha.

Vakreste va lembe-xidzana ro sungula a va vitaniwa vanhu va vito ra Xikwembu. A va chumayela vanhu van’wana malunghana ni vito leri va tlhela va va khutaza leswaku va ri vitana. (Mintirho 2:21; 15:14; Varhoma 10:13-15) Swilo dlaa erivaleni leswaku i swa nkoka eka Xikwembu leswaku hi tirhisa vito ra xona hi ririmi rihi na rihi leri hi ri vulavulaka naswona hi hanya hi ku pfumelelana ni leswi ri vulaka swona.

[Marito lama tshahiweke exihlokweni lama nga eka tluka 31]

Lexi tsakisaka hileswi vito ra Xikwembu ri humelelaka minkarhi ya kwalomu ka 7 000 eBibeleni