Nghena endzeni

Hundzela eka leswi nga endzeni

Xana Pulanete Ya Misava Yi Ta Lovisiwa Yi Nga Ha Vi Kona?

Xana Pulanete Ya Misava Yi Ta Lovisiwa Yi Nga Ha Vi Kona?

 Swivutiso Swa Vahlayi

Xana Pulanete Ya Misava Yi Ta Lovisiwa Yi Nga Ha Vi Kona?

Pulanete ya hina ya Misava yi nge lovisiwi hi mhangu yihi na yihi. Hi nga tiyiseka njhani hi sweswo? Hikuva Xikwembu xi tshembise leswaku misava “a yi nge tsekatsekisiwi hilaha ku nga riki na makumu, kumbe hi masiku.” (Pisalema 104:5) Bibele yi vula leswaku hambileswi ‘xitukulwana xi hundzaka naswona xitukulwana xin’wana xi taka; kambe misava yi kona hilaha ku nga riki na makumu.’—Eklesiasta 1:4.

Ku kandziyisa leswaku misava yi ta tshama hilaha ku nga riki na makumu, ku ni marito mambirhi ya Xiheveru xo sungula lama tirhisiweke eka Pisalema 104:5ʽoh lamʹ leri vulaka “hilaha ku nga riki na makumu” na ʽadh leri vulaka “hi masiku.” Rito leri nge ʽOlamʹ ri nga ha hundzuluxeriwa ri va “malembe yo tala” kumbe “hilaha ku nga heriki.” Hi ku ya hi buku yin’wana ya Harkavy, rito leri nge ʽadh ri vula “nkarhi lowu nga riki na makumu, nkarhi lowu nga heriki.” (Students’ Hebrew and Chaldee Dictionary) Marito lawa mambirhi ma swi kombisa kahle leswaku misava yi ta tshama hilaha ku nga heriki. Kambisisa swivangelo swin’wana swinharhu leswi sekeriweke eBibeleni, leswi hi endlaka hi tshemba leswaku misava yi ta tshama hilaha ku nga heriki.

Xo sungula, Xikwembu xi tumbuluxe misava leswaku vanhu va tshama eka yona—misava hinkwayo yi va paradeyisi leyi tsakisaka, ntanga wo saseka, ku nga ri ndhawu leyi nga riki na vaaki. Esaya 45:18 yi hlamusela Yehovha tanihi “Mutumbuluxi wa matilo, Yena Xikwembu xa ntiyiso, Muvumbi wa misava ni Muendli wa yona, Yena Loyi a yi simekeke yi tiya, loyi a nga yi tumbuluxelangiki swa hava, loyi a yi vumbeke leswaku ku akiwa eka yona.”

Xa vumbirhi, Xikwembu xi tshembise leswaku vanhu lava hlawulaka ku xi yingisa va ta tshama hi ku rhula emisaveni leyi hilaha ku nga heriki. Mikiya 4:4 yi ri: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka; hikuva nomu wa Yehovha wa mavuthu wu swi vurile.” Xisweswo, hi ku ya hi xitshembiso xa Xikwembu, misava yi ta tshama hilaha ku nga heriki yi va kaya ra vanhu, loko swi nga ri tano switshembiso swa xona swi ta va swa hava.—Pisalema 119:90; Esaya 55:11; 1 Yohane 2:17.

Xa vunharhu, Xikwembu xi nyike munhu ntirho wo khathalela misava leyi. Rito ra Xikwembu ri ri: “Loko ku ri matilo, i matilo ya Yehovha, kambe misava u yi nyike vana va vanhu.” (Pisalema 115:16) Xana u kona tatana la nga ni rirhandzu la nga nyikaka n’wana wakwe nyiko yo saseka kutani a tlhela a yi teka a yi onha? A nga kona! Hilaha ku fanaka, Yehovha a nge swi endli sweswo hi misava ni vaaki va yona hikuva “Xikwembu i rirhandzu.”—1 Yohane 4:8.

Loko Yesu Kreste a vulavula hi marito lama vuriweke hi Tata wakwe, u tiyisekise a ku: “Rito ra wena i ntiyiso.” (Yohane 17:17) Nakambe Xikwembu lexi nga hembiki, xa tshembisa: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29; Tito 1:2.

[Laha Xifaniso Xi Humaka Kona eka tluka 31]

Globe: Based on NASA photo