Nghena endzeni

Hundzela eka leswi nga endzeni

Ku Nga Ri Khale Misava Yi Ta Va Paradeyisi!

Ku Nga Ri Khale Misava Yi Ta Va Paradeyisi!

 Ku Nga Ri Khale Misava Yi Ta Va Paradeyisi!

“Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” —Matewu 6:9, 10.

XIKHONGELO lexi lexi dumeke lexi vanhu vo tala va xi vulaka Xikhongelo xa Hosi, xi nyika vanhu ntshembo. Njhani?

Hilaha Xikhongelo xa Hosi xi vulaka hakona, Mfumo wa Xikwembu wu ta endla leswaku ku rhandza ka xona ku endleka emisaveni hilaha ku endlekaka hakona sweswi etilweni. Xikwembu xi lava ku tlhela xi endla misava yi va Paradeyisi. (Nhlavutelo 21:1-5) Kahle-kahle Mfumo wa Xikwembu i yini naswona wu ta swi endlisa ku yini leswaku misava leyi yi tlhela yi va Paradeyisi?

Hulumendhe Ya Xiviri

Mfumo wa Xikwembu i hulumendhe ya xiviri. Leswaku hulumendhe yihi na yihi yi kota ku fuma kahle, yi fanele yi va ni vafumi, milawu ni vanhu lava fumiwaka. Xana Mfumo wa Xikwembu wu na swona sweswo hinkwaswo? Xiya ndlela leyi Bibele yi swi hlamulaka ha yona swivutiso swinharhu leswi landzelaka:

I vamani vafumi eMfun’weni wa Xikwembu? (Esaya 33:22) Yehovha Xikwembu u hlawule N’wana wakwe Yesu Kreste leswaku a va hosi ya Mfumo lowu. (Matewu 28:18) Hi ku kongomisiwa hi Yehovha, Yesu u hlawule nhlayo leyi pimiweke ya vanhu “lava humaka eka tinyimba hinkwato ni tindzimi hinkwato ni vanhu hinkwavo ni matiko hinkwawo” leswaku va ta fuma na yena tanihi “tihosi emisaveni.”—Nhlavutelo 5:9, 10.

Hi yihi milawu leyi Mfumo wa Xikwembu wu yi vekeleke lava nga ta fumiwa hi wona leswaku va hanya ha yona? Yin’wana ya milawu kumbe swileriso swa kona swi lava leswaku lava fumiwaka va teka goza ro karhi. Yesu u kombise leswaku hi yihi yin’wana ya milawu yoleyo leyi nga ya nkoka swinene hi ku vula a ku: “‘U fanele u rhandza Yehovha Xikwembu  xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo. Xa vumbirhi, lexi fanaka na xona, xi ri, ‘U fanele u rhandza warikwenu kukota loko u tirhandza.’”—Matewu 22:37-39.

Milawu yin’wana yi lava leswaku lava fumiwaka hi Mfumo wa Xikwembu va papalata swiendlo swo karhi. Hi xikombiso, Bibele yi nyikela xileriso lexi lexi kongomeke: “Mi nga xisiwi. Loko ti ri timbhisa, kumbe vagandzeri va swifaniso swa hava, kumbe vaoswi, kumbe vanhu lava hlayiseriweke swikongomelo leswi nga riki swa ntumbuluko, kumbe vavanuna lava etlelaka ni vavanuna-kulobye, kumbe makhamba, kumbe vanhu va makwanga, kumbe swidakwa, kumbe varhuketeri, kumbe vadyeleri, va nga ka va nga yi dyi ndzhaka ya mfumo wa Xikwembu.”—1 Vakorinto 6:9, 10.

I vamani lava nga ta fumiwa hi Mfumo wa Xikwembu? Yesu u va fanise ni tinyimpfu lava nga ta fumiwa hi Mfumo wa Xikwembu. U te: “Ti ta yingisa rito ra mina, ti ta va ntlhambi wun’we, murisi a va un’we.” (Yohane 10:16) Leswaku munhu a va un’wana wa lava nga ta fumiwa hi Mfumo wa Xikwembu, a nga fanelanga a vula ntsena leswaku u landzela Murisi Lonene Yesu, kambe u fanele a endla ni leswi A n’wi lerisaka swona. Yesu u te: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:21.

Hikokwalaho, lava nga ta fumiwa hi Mfumo wa Xikwembu va xixima vito ra Xikwembu leri nge Yehovha, va tlhela va ri tirhisa hilaha Yesu a endleke hakona. (Yohane 17:26) Va yingisa xileriso xa Yesu xa leswaku va dyondzisa vanhu van’wana “mahungu lamanene lawa ya mfumo.” (Matewu 24:14; 28:19, 20) Naswona va rhandzana swinene.—Yohane 13:35.

“Ku Lovisa Lava Onhaka Misava”

Swiyimo swa misava namuntlha swi kombisa leswaku Mfumo wa Xikwembu wu ta teka goza ro tisa ku cinca lokukulu emisaveni ku nga ri khale. Hi swi tivisa ku yini sweswo? Malembe ya 2 000 lama hundzeke, Yesu u hlamusele xikombiso lexi nga ni swiyenge swo tala, lexi a xi ta kombisa leswaku “mfumo wa Xikwembu wu kusuhi.” (Luka 21:31) Hilaha swi kombisiweke hakona exihlokweni lexi hundzeke, swiyenge swa xikombiso xolexo swi vonaka kahle sweswi emisaveni hinkwayo.

I yini leswi nga ta landzela? Yesu u te: “Endzhaku ka sweswo ku ta va ni nhlomulo lowukulu lowu ku nga si tshamaka ku humelela lowu fanaka na wona hi mpfhuka misava yi va kona ku fikela sweswi, e-e, naswona a wu nge he tlheli wu va kona.” (Matewu 24:21) Xiendlakalo lexi lexi nga ni khombo swinene xi ta va xi nga vangiwanga hi munhu. Ku ri na sweswo i goza leri Xikwembu xi nga ta ri teka ro “lovisa lava onhaka misava.” (Nhlavutelo 11:18) Vanhu lavo homboloka, lava swiendlo swa vona swa vutianakanyi swi endleke leswaku ku sala katsongo ku va misava yi onhiwa hi ku helela, “va ta dlayiwa emisaveni.” Kambe lava nga riki na xisolo, lava tirhelaka Xikwembu hi ndlela leyi amukelekaka, va ta “sala eka yona.”—Swivuriso 2:21, 22.

Yehovha Xikwembu u ni swivangelo leswi twalaka swo teka goza rero. Ha yini? Xiya xikombiso lexi: A hi nge u ni yindlu leyi u yi hirhisaka. Van’wana va lava hirheke eka yona va tikhome kahle naswona va anakanyela; va hakela rhente naswona va khathalela tikamara ta vona. Hambiswiritano, van’wana lava hirheke kwalaho va vanga mpfilumpfilu naswona va ni vutianakanyi; a va swi lavi ku hakela rhente naswona va onha yindlu yoleyo. Hambileswi va tsundzuxiweke ko tala leswaku va nga swi endli sweswo, va phikelela va endla swilo swo biha. Xana a wu ta endla yini? Leswi u nga n’wini wa yindlu a wu ta hlongola vanhu volavo vo biha.

Hilaha ku fanaka, leswi Yehovha Xikwembu a nga Muvumbi wa misava ni hinkwaswo leswi nga eka yona, u ni mfanelo yo hlawula loyi a faneriwaka hi ku tshama emisaveni. (Nhlavutelo 4:11) Yehovha u vule leswaku xikongomelo xakwe i ku herisa vanhu hinkwavo vo homboloka lava nga endliki ku rhandza kakwe naswona va karhataka van’wana.—Pisalema 37:9-11.

Ku Vuyeteriwa Ka Paradeyisi

Ku nga ri khale, Mfumo wa Xikwembu lowu hosi ya wona ku nga Yesu Kreste wu ta fuma misava. Yesu u vule leswaku ku cinca koloko lokuntshwa i ‘ku vuyeteriwa ka swilo hinkwaswo.’ (Matewu 19:28, Bibele—Mahungu Lamanene) Swi ta va njhani swiyimo emisaveni? Xiya switshembiso leswi landzelaka leswi nga eBibeleni:

 Pisalema 46:9. “U herisa tinyimpi ku ya fika emakumu ya misava.”

Esaya 35:1. “Mananga ni ndhawu leyi nga riki na mati swi ta khana, ni timbala ta le kwandzasini ti ta tsaka, ti rhumbuka kukota safroni.”

Esaya 65:21-23. “Ntirho wa mavoko ya vona, vahlawuriwa va mina va ta wu tirhisa hi xitalo. A va nge tirheli swa hava hi matimba, naswona a va nge he velekeli ku karhateka.”

Yohane 5:28, 29. “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra [Yesu] kutani va huma.”

Nhlavutelo 21:4. [Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”

Swivangelo Leswi Hi Endlaka Hi Tshemba Switshembiso Leswi

Xana wa swi tshemba switshembiso leswi nga eBibeleni? Bibele yi profete leswaku vanhu vo tala a va nga ta swi tshemba. Yi ri: “Emasikwini ya makumu ku ta va ni vahlekuri . . . va famba hi ku ya hi ku navela ka vona va ku: ‘Byi kwihi vukona byakwe lebyi tshembisiweke? Hikuva, ku sukela siku vatata wa hina va etleleke ha rona eku feni, swilo hinkwaswo swa ha tshame hilaha a swi ri hakona eku sunguleni ka ntumbuluko.’” (2 Petro 3:3, 4) Kambe vahlekuri volavo va hoxisa swinene. Kambisisa swivangelo swa mune ntsena leswi nga ku endlaka u tshemba leswi Bibele yi swi vulaka:

(1) Xikwembu xi nghenelerile etimhakeni ta vanhu enkarhini lowu hundzeke. Xikombiso lexikulu xa sweswo i Ndhambi ya le masikwini ya Nowa.—2 Petro 3:5-7.

(2) Rito ra Xikwembu ri profete hi ndlela leyi pakanisaka hi swiyimo swa misava leswi endlekaka sweswi.

(3) Swilo hinkwaswo a swi hambeti swi endleka “hilaha a swi ri hakona eku sunguleni ka ntumbuluko.” Misava ya hina yi ni swiphiqo leswikulu swa ntshamisano, swa mahanyelo ni swa ku thyakisiwa ka mbango leswi nga si tshamaka swi va kona emisaveni.

(4) “Mahungu lamanene lawa ya mfumo” ma karhi ma chumayeriwa emisaveni hinkwayo, leswi kombisaka leswaku ‘makumu ma ta fika’ ku nga ri khale.—Matewu 24:14.

Timbhoni ta Yehovha ta ku rhamba leswaku u dyondza na tona Rito ra Xikwembu, ku nga Bibele, leswaku u ta tiva swo tala hi ta vutomi lebyi nga heriki loko ku fuma Mfumo wa Xikwembu. (Yohane 17:3) Hakunene vanhu va ta va ni vumundzuku lebyi tsakisaka. Minkarhi leyi tsakisaka yo va kwala nyongeni! Xana u ta va kona laha?

[Marito lama tshahiweke exihlokweni lama nga eka tluka 7]

Lava vulaka leswaku swilo swi ta tshama hilaha swi nga hakona namuntlha va hoxisa swinene

[Xifaniso lexi nga eka tluka 8]

Xana u ta va kona laha?