Nghena endzeni

Hundzela eka leswi nga endzeni

Ku Tiyiselela Gome Ra Ku Feriwa

Ku Tiyiselela Gome Ra Ku Feriwa

 Ku Tiyiselela Gome Ra Ku Feriwa

“Vana vakwe [Yakobe] va majaha hinkwavo ni va vanhwanyana hinkwavo va hambeta va ta ku ta n’wi chavelela, kambe a nga chaveleleki, a ku: ‘Ndzi ta rhelela eSheol eka n’wananga ndza ha rila!’ Kutani tata wa yena a hambeta a n’wi rila.”—GENESA 37:35.

 YAKOBE u rile ngopfu hileswi a a feriwe hi n’wana wakwe wa jaha. U vule leswaku a a ta n’wi rila kukondza a fa. Ku fana na Yakobe, u nga ha ehleketa leswaku gome ro feriwa hi munhu loyi u n’wi rhandzaka i rikulu swinene lerova a ri nge pfuki ri herile. Xana loko u va ni gome ro tano lerikulu swi kombisa leswaku a wu na ripfumelo eka Xikwembu? A swi tano nikatsongo!

Bibele yi vula leswaku Yakobe i wanuna wa ripfumelo. Yakobe swin’we ni tata wakwe Isaka ni kokwa wakwe Abrahama, va bumabumeriwe hileswi a va ri ni ripfumelo lerikulu. (Vaheveru 11:8, 9, 13) Siku rin’wana u kale a tshwimbirisana ni ntsumi vusiku hinkwabyo leswaku a kuma nkateko lowu humaka eka Xikwembu! (Genesa 32:24-30) Swi le rivaleni leswaku Yakobe a a ri wanuna loyi a a ri ni vuxaka lebyikulu na Yehovha. Kutani hi nga dyondza yini eka Yakobe hileswi a veke ni gome loko a feriwe hi n’wana wakwe? Hambiloko munhu a ri ni ripfumelo leri tiyeke eka Xikwembu, a nga va ni gome lerikulu loko a feriwa. Ku va ni gome i nchumu lowu tolovelekeke naswona i swa ntumbuluko ku va na rona loko u feriwe hi loyi u n’wi rhandzaka.

Ndlela Leyi Gome Ri Hi Khumbaka Ha Yona?

Hi nga va ni gome hi tindlela to hambana-hambana loko hi feriwile, kambe eka vo tala ri endla leswaku va tlhaveka swinene embilwini. Xiya ntokoto wa Leonardo, loyi a a ri ni malembe ya 14 loko tata wakwe a fa hi xitshuketa hikwalaho ka vuvabyi bya mbilu ni ku tsandzeka ku hefemula. Leonardo a nge pfuki a ri rivarile siku leri mhani-ntsongo wakwe a n’wi byeleke ha rona leswaku tata wakwe u file. Eku sunguleni a nga kholwanga leswaku tata wakwe u file hakunene. Hambileswi a voneke ntsumbu wa tata wakwe hi siku ra xilahlo, swi n’wi tikerile ku swi tshemba. Ku hundze tin’hweti ta tsevu Leonardo a nga swi koti ku rila. Hakanyingi a a tikuma a rindze tata wakwe leswaku a vuya hi le ntirhweni. Swi teke kwalomu ka lembe leswaku a swi twisisa hi ku helela leswaku tata wakwe u file. Loko a swi twisisile, u sungule ku va ni xivundza lexikulu. Swilo leswi tolovelekeke swo fana ni ku vuya ekaya laha ku nga riki na munhu, a swi n’wi tsundzuxa tata wakwe loyi a feke. Eminkarhini yoleyo, a a tala ku tsandzeka ku tikhoma kutani a rila. Hakunene a a tsundzuka tata wakwe!

Hilaha ntokoto wa Leonardo wu swi kombisaka hakona, gome leri munhu a nga vaka na rona ri nga va rikulu swinene. Lexi tsakisaka hileswaku swa koteka ku va munhu a hlakarhela eka gome rolero. Hambiswiritano, swi nga ha teka nkarhi leswaku a hlakarhela. Tanihi leswi mbanga yi tekaka nkarhi wo leha leswaku yi hola, ni gome leri munhu a vaka na rona loko a feriwa ri nga ha teka tin’hweti, malembe yo hlayanyana kumbe yo tala. Kambe ku vava lokukulu loku u ku twaka loko wa ha ku feriwa ku ta ya ku hunguteka hi ku famba ka nkarhi naswona vutomi byi ta tlhela byi sungula ku tsakisa hakatsongo-tsongo.

Hi nkarhi wolowo, ku vuriwa leswaku ku va ni gome i swa nkoka leswaku u kota ku hlakarhela ni ku dyondza ku tolovela xiyimo lexintshwa. Hi ta tshamela ku n’wi tsundzuka munhu la feke. Hi fanele hi cinca ndlela leyi a hi hanya ha yona loko a ha hanya, kutani hi sungula ku tihanyela hi ri hexe. Ku rila swi nga ha pfuna ku phofula ndlela leyi u titwaka ha yona. I ntiyiso leswaku loko vanhu va feriwile va nga ha kombisa gome leri va nga na rona hi tindlela to hambana-hambana. Kambe ku ni mhaka yin’we leyi nga ntiyiso: Ku ringeta ku tikhoma leswaku u nga rili swi nga va ni khombo emiehleketweni ni le mirini. Kutani hi nga ku phofula njhani ku vava loku hi ku twaka hi tindlela letinene? Bibele yi ni ndzayo leyi pfunaka. *

 Ku Tiyiselela Gome Ra Ku Feriwa

Vanhu vo tala lava feriweke va kume leswaku ku vulavula swi va pfuna ku phofula ndlela leyi va titwaka ha yona. Hi xikombiso, xiya marito ya Yobo loyi ku vulavuriwaka ha yena eBibeleni loyi a feriweke hi vana vakwe va khume a tlhela a weriwa hi makhombo man’wana. U te: “Kunene moya-xiviri wa mina wu nyenya vutomi bya mina. Ndzi ta humesa mhaka leyi yi ndzi karhataka. Ndzi ta vulavula moya-xiviri wa mina wu ri ni mbitsi!” (Yobo 1:2, 18, 19; 10:1) Xiya leswaku Yobo a a lava ku “humesa” mhaka leyi n’wi karhataka. A a ta swi endlisa ku yini sweswo? U te: “Ndzi ta vulavula.”

Paulo, loyi a feriweke hi mana wakwe u ri: “Nchumu wun’wana lowu ndzi pfuneke i ku vulavula hi mana wa mina.” Kutani ku byela munghana wa wena loyi u n’wi tshembaka ndlela leyi u titwaka ha yona swi nga ha hunguta gome leri u nga na rona. (Swivuriso 17:17) Endzhaku ka loko Yone a feriwe hi mana wakwe, u kombele Vakreste-kulobye leswaku va tshama va ri karhi va n’wi endzela. U ri: “Ku vulavula swi ndzi pfune ku hunguta ku vava loku a ndzi ku twa.” Na wena u nga kuma leswaku ku byela munhu loyi a nga ni ntwela-vusiwana ndlela leyi u titwaka ha yona swi nga endla leswaku swi ku olovela ku tiyiselela gome leri u nga na rona.

Ku tsala na swona swi nga ha pfuna ku hunguta gome. Van’wana lava swi va tikelaka ku phofula ndlela leyi va titwaka ha yona va nga ha kuma leswaku swa va olovela ku tiphofula hi ku tsala kunene. Endzhaku ka ku fa ka Sawulo na Yonathani, Davhida wanuna wo tshembeka u tsale risimu ra xirilo leri eka rona a phofuleke gome leri a a ri na rona. Eku heteleleni risimu rero ra xirilo ri ve xiphemu xa buku ya Bibele ya Samuwele wa Vumbirhi.—2 Samuwele 1:17-27.

Ku rila na kona ku nga ha hunguta gome. Bibele yi ri: “Xin’wana ni xin’wana xi ni nkarhi wa xona lowu vekiweke, ni . . . nkarhi wa ku rila.” (Eklesiasta 3:1, 4) Ku va ni “nkarhi wa ku rila” loko hi feriwa hi munhu loyi hi n’wi rhandzaka. A swi fanelanga swi hi khomisa tingana ku rila loko hi feriwile. Bibele yi ni swikombiso swo tala swa vavanuna ni vavasati vo tshembeka lava phofuleke gome leri a va ri na rona hi ku rila. (Genesa 23:2; 2 Samuwele 1:11, 12) Yesu Kreste u “[humese] mihloti” loko a tshinela ekusuhi ni sirha-bakwa ra munghana wakwe Lazaro, loyi a a ha ku fa loyi a a n’wi rhandza swinene.—Yohane 11:33, 35.

Ku tiyiselela gome swi lava ku lehisa mbilu, hikuva  xiyimo xa wena xi nga ha tshamela ku cinca-cinca. Tsundzuka leswaku a wu fanelanga u khomiwa hi tingana loko u rila. Vanhu vo tala lava tshembekaka va kume leswaku ku rila loko munhu a feriwile i swa ntumbuluko naswona i swa nkoka leswaku a hatla a hlakarhela.

Tshinela Eka Xikwembu

Bibele yi hi byela leswi: “Tshinelani eka Xikwembu, kutani xi ta tshinela eka n’wina.” (Yakobo 4:8) Yin’wana ya tindlela ta nkoka swinene to tshinela eka Xikwembu i ku khongela eka xona. U nga xi tekeli ehansi xikhongelo! Bibele yi hi nyika xitshembiso lexi lexi chavelelaka: “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.” (Pisalema 34:18) Yi tlhela yi hi tiyisekisa yi ku: “Lahlela ndzhwalo wa wena eka Yehovha, u ta ku seketela.” (Pisalema 55:22) Ehleketa hi mhaka leyi. Hilaha hi swi tweke hakona eku sunguleni, vo tala va kume swi pfuna ku vulavula ni munghana loyi va n’wi tshembeka hi ndlela leyi va titwaka ha yona. A swi kanakanisi leswaku swi nga pfuna swinene ku xi phofulela ndlela leyi hi titwaka ha yona Xikwembu lexi tshembisaka ku chavelela timbilu ta hina.—2 Vatesalonika 2:16, 17.

Paulo loyi ku vulavuriweke ha yena eku sunguleni u te: “Loko ndzi xiya leswaku a ndza ha swi koti ku tiyiselela ku vava loku ndzi ku twaka, ndza khinsama kutani ndzi khongela eka Xikwembu, ndzi xi kombela leswaku xi ndzi pfuna.” Paulo u vula leswaku ku khongela swi n’wi pfune ngopfu. Na wena u nga kuma leswaku “Xikwembu xa nchavelelo hinkwawo”  xi ta hlamula swikhongelo leswi u swi endlaka nkarhi na nkarhi hi ku ku nyika xivindzi ni matimba leswaku u kota ku tiyiselela gome leri u nga na rona.—2 Vakorinto 1:3, 4; Varhoma 12:12.

Ntshembo Wa Leswaku Vanhu Lava Feke Va Ta Pfuxiwa

Yesu u te: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya.” (Yohane 11:25) Bibele yi dyondzisa leswaku lava feke va ta tlhela va hanya. * Loko Yesu a ha ri emisaveni, u kombise leswaku wa swi kota ku pfuxa vanhu lava feke. Siku rin’wana u pfuxe xinhwanyetana xa malembe ya 12. Xana vatswari va xona va titwe njhani? A va “nga ha tikoti hi ku tsaka lokukulu.” (Marka 5:42) Loko Yesu Kreste Hosi ya le tilweni se a fuma eMfun’weni wakwe, u ta pfuxa vanhu va ntsandza-vahlayi leswaku va tlhela va hanya laha misaveni—kambe emisaveni leyi nga ni ku rhula ni ku lulama. (Mintirho 24:15; 2 Petro 3:13) Ehleketa hi ntsako lowukulu lowu nga ta va kona loko vanhu lava feke va pfuxeriwa evuton’wini kutani va tlhela va hlangana ni varhandziwa va vona!

Claudete loyi a feriweke hi n’wana wakwe wa jaha, ku nga Renato, eka mhangu ya xihaha-mpfhuka, u veke xifaniso xakwe eka xigwitsirisi. Hakanyingi u languta xifaniso kutani a tibyela leswi, ‘Hi ta tlhela hi vonana loko ku pfuxiwa lava feke.’ Leonardo u vona tata wakwe hi mahlo ya mianakanyo a pfuxiwa emisaveni leyintshwa leyi tshembisiweke hi Xikwembu. Ina, ntshembo wa leswaku vanhu va ta pfuxiwa eku feni i mhaka leyi va chavelelaka hakunene naswona yi chavelela ni vanhu van’wana va ntsandza-vahlayi lava feriweke hi vanhu lava va va rhandzaka. Ntshembo lowu wu nga ku chavelela na wena!

[Tinhlamuselo ta le hansi]

^ par. 8 Leswaku u kuma rungula leri vulavulaka hi ndlela leyi u nga pfunaka vana ha yona leswaku va tiyiselela ku feriwa hi munhu loyi va n’wi rhandzaka, vona xihloko lexi nge “Pfuna N’wana Wa Wena A Tiyiselela Gome Ra Ku Feriwa” eka tluka 18 ku ya eka 20 ra magazini lowu.

^ par. 19 Leswaku u kuma rungula leri engetelekeke hi ntshembo lowu nga eBibeleni wa leswaku lava feke va ta pfuxiwa, vona ndzima 7 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Bokisi/Xifaniso lexi nga eka tluka 7]

“Xikwembu Xa Nchavelelo Hinkwawo”

“A ku dzunisiwe xikwembu tlhelo tata wa hosi ya hina yesu kreste, tatana la nga ni tintswalo letikulu tlhelo xikwembu xa nchavelelo hinkwawo.”—2 Vakorinto 1:3.

Ndzimana leyi ya Bibele yi kombisa leswaku Xikwembu xi nga pfuna malandza ya xona yo tshembeka leswaku ma tiyiselela xiphiqo xihi na xihi lexi ma nga ha humeleriwaka ha xona. Ndlela yin’wana leyi Yehovha a nga ha hi chavelelaka ha yona i ku tirhisa munghana wa hina kumbe munhu loyi hi n’wi rhandzaka la pfumelaka eka tidyondzo leti fanaka ni ta hina.

Leonardo loyi a feriweke hi tata wakwe, u tsundzuka ntokoto lowu n’wi tiyiseke ni ku n’wi chavelela. Loko a ha ku fika ekaya, u tsundzuke leswaku a ku na munhu, hiloko a sungula ku rila hi xiviti. U ye entangeni wun’wana wa le kusuhi laha a nga fika a tshama ebenceni kutani a ya emahlweni a rila. Loko a ri karhi a rila u kombele Xikwembu leswaku xi n’wi pfuna. Hi xitshuketa, ku fike ku yima xibebe ekusuhi ni kwalaho, naswona Leonardo u xiye leswaku muchayeri wa xona a ku ri Mukreste-kulobye. Mukreste loyi a a yisela vanhu swilo leswi va swi xaveke kambe u teke gondzo leri hoxeke. Leonardo u chaveleleke swinene hi ku n’wi vona ntsena.

Eka xiendlakalo xin’wana, wanuna loyi a feriweke hi nsati a a ri ni xivundza ni gome. A a tshamela ku rila hileswi swilo hinkwaswo a swi vonaka swi nga pfuni nchumu. U khinsame a kombela Xikwembu leswaku xi n’wi pfuna. Loko a ha ri eku khongeleni, riqingho ri ririle. A ku ri ntukulu wakwe wa xisati. U ri: “Bulo ro koma leri hi veke na rona ri endle leswaku ndzi tlhela ndzi va ni xivindzi. Ndzi nambe ndzi pfumela leswaku riqingho leri a ku ri nhlamulo ya xikhongelo xa mina xo kombela mpfuno.”

 [Bokisi leri nga eka tluka 9]

Ku Chavelela Vanhu Van’wana

“[Xikwembu] lexi hi chavelelaka enhlomulweni wa hina hinkwawo, leswaku hi ta swi kota ku chavelela lava nga emahlomulweni ya mixaka-xaka hi nchavelelo lowu Xikwembu xi hi chavelelaka ha wona.”—2 Vakorinto 1:4.

Vakreste vo tala va ntiyiso va swi tokote hi ku kongoma leswi marito lawa ma vulaka swona. Leswi va kumeke nchavelelo lowu va pfuneke ku tiyiselela ku feriwa hi vanhu lava va va rhandzaka, va kuma leswaku na vona va swi kota ku khutaza ni ku chavelela van’wana.

Xiya xikombiso xa Claudete, loyi nkarhi na nkarhi a endzelaka vanhu leswaku a ya va dyondzisa tidyondzo leti sekeriweke eBibeleni leti a pfumelaka eka tona. Loko a nga si feriwa hi n’wana wakwe wa jaha, a a endzela wansati un’wana loyi n’wana wakwe a dlayiweke hi khensa ya tisele ta ngati. Wansati loyi a a swi tsakela ku endzeriwa, kambe a a ehleketa leswaku Claudete a nge pfuki a ku twisisile hi ku helela ku vava loku yena a ku twaka. Hambiswiritano, endzhakunyana ka loko n’wana wa Claudete a file, wansati yoloye u endzele Claudete kutani a n’wi byela leswaku u tele ku ta vona loko a ha ri na ripfumelo eka Xikwembu xakwe tanihi leswi sweswi na yena a nga feriwa hi n’wana. Hi ku hlamarisiwa hi ripfumelo ra Claudete leri tiyeke, wansati yoloye u sungule ku dyondza Bibele na Claudete nkarhi na nkarhi naswona u kuma nchavelelo eRitweni ra Xikwembu.

Endzhaku ka loko Leonardo a feriwe hi tata wakwe, u endle xiboho xo dyondza ririmi ra mavoko leswaku a ta chumayela lava feke tindleve rungula ra Bibele leri chavelelaka. U kume leswaku matshalatshala ya yena yo pfuna vanhu lava feke tindleve ma n’wi pfunile swinene. U ri: “Nchumu wun’wana lowu ndzi pfuneke ku tiyiselela gome leri a ndzi ri na rona i ku navela ku pfuna vanhu lava feke tindleve leswaku va dyondza hi Xikwembu. Ndzi tirhise matimba ni nkarhi wa mina wo tala leswaku ndzi va pfuna. Gome leri a ndzi ri na rona ri hundzuke ntsako loko ndzi vona munhu wo sungula loyi a ndzi dyondza na yena Bibele a khuvuriwa! Entiyisweni a ku ri ro sungula ndzi titwa ndzi tsakile swinene hi mpfhuka tatana a fa.”—Mintirho 20:35.

[Xifaniso lexi nga eka tluka 5]

Ku vulavula hi ndlela leyi u titwaka ha yona swi nga ha hunguta gome leri u nga na rona

[Xifaniso lexi nga eka tluka 6]

Ku hlaya hi ta ntshembo wa leswaku vanhu lava feke va ta pfuxiwa i mhaka leyi chavelelaka hakunene

[Xifaniso lexi nga eka tluka 6]

Ku tsala swi nga ku pfuna ku phofula gome leri u nga na rona

[Xifaniso lexi nga eka tluka 8, 9]

Yesu u tshembise leswaku vanhu lava kombisaka ripfumelo eka yena va ta pfuxiwa