Nghena endzeni

Hundzela eka leswi nga endzeni

“Xinhwanyetana Xa Muisrayele” Xa Manguva Lawa

“Xinhwanyetana Xa Muisrayele” Xa Manguva Lawa

 “Xinhwanyetana Xa Muisrayele” Xa Manguva Lawa

HI 2006, loko ka ha sale mavhiki mambirhi leswaku ku va Xitsundzuxo xa rifu ra Yesu, xirho xin’wana ni xin’wana xa ndyangu wa ka Sales lowu tshamaka edorobeni ra Praia Grande le Brazil, xi tsale nxaxamelo wa lava xi nga ta va rhamba. Abigayl, loyi a nga ni malembe ya tsevu, u nyikiwe xirhambo kutani a vutisiwa leswaku i mani loyi a nga ta n’wi nyika xona.

U hlamule a ku, “Ndzi lava ku nyika wanuna loyi a tshamelaka ku n’wayitela loko a ndzi vona.”

Vatswari vakwe va vutise va ku, “I mani wanuna wa kona?”

U hlamule a ku, “Loyi a fambaka hi xitulu xa lava lamaleke.”

Endzhaku ka masiku ya mune Abigayl u kombe vatswari vakwe wanuna wa kona. Vito rakwe i Walter, naswona u tshama ekusuhi ni Holo ya Mfumo. Loko Walter a ri ni malembe ya 28, kwalomu ka malembe ya 15 lama hundzeke, u humeleriwe hi mhangu ya movha leyi endleke leswaku miri wakwe wu nga ha tirhi ku suka emasengeni ku ya emilengeni. Leswi a a fuwile a a ri ni vanhu vambirhi lava a va n’wi rindza. Endzhaku ka loko Abigayl a kume mpfumelelo wo vulavula na Walter, vatswari vakwe va hlamusele Walter leswaku n’wana wa vona u lava ku n’wi nyika xirhambo.

Endzhaku ka loko Abigayl a vulavulele xirhambo xexo, u te: “Hinkwavo eHolweni ya Mfumo va ni swirhambo swo tala, kambe mina ndzi na xin’we ntsena. Kutani hi wena ntsena ndzi ku rhambaka. Loko u nga ti ndzi ta va ndzi nga ri na munhu un’wana loyi ndzi n’wi rhambeke. Kambe loko u ta ndzi ta tsaka swinene, naswona Yehovha u ta tsaka ni ku tlurisa.”

Hi siku ra Xitsundzuxo, Abigayl ni Timbhoni tin’wana a va ri karhi va basisa Holo ya Mfumo va lunghiselela Xitsundzuxo lexi a xi ta va kona madyambu wolawo. Nhlikanhi wolowo Walter u hundze hi kwalaho, kuteloko a vona Abigayl hiloko a byela muchayeri wakwe leswaku a yimisa movha. U pfule fasitere kutani a vutisa Abigayl leswaku u endla yini. Abigayl u n’wi byele leswaku a va basisela yena holo leswaku yi languteka kahle.

Hi madyambu wolawo Abigayl a a karhateke swinene. Nkulumo yi sungurile naswona a a tshamela ku halahala ku vona loko Walter a fikile. Hi xitshuketa Walter ni varindzi vakwe va fikile. Abigayl u n’wayitele swinene. Endzhaku ka nkulumo, Walter u vule leswaku a a ri endleleni yo ya edorobeni rin’wana hiloko a jika a ya eXitsundzuxweni hikwalaho ka leswi a a lava ku tsakisa Abigayl. U engetele a ku: “Leswi ndzi swi tweke eka nkulumo ya kona hi swona leswi a ndzi lava ku swi twa.” U kombele Bibele naswona u sungule ku dyondza ni ku va kona eminhlanganweni.

Hi ku famba ka nkarhi, makwavo wa Walter wa xisati u vule leswaku u lava ku vona Abigayl, loyi buti wakwe a tshamelaka ku vulavula ha yena. Loko a n’wi vona, u tsake ngopfu ku tiva leswaku Abigayl i xinhwanyetana lexinene. U te, “Sweswi ndza swi tiva leswaku ha yini buti wa mina a tshama a tsakile.”

Walter u ya emahlweni a dyondza ni ku va kona eminhlanganweni. Wa hlamula ni ku byela van’wana swilo leswi a swi dyondzeke. Hakunene Abigayl lontsongo u hi tsundzuxa xinhwanyetana xa Muisrayele lexi pfuneke Namani leswaku a tiva Yehovha, Xikwembu xa ntiyiso.—2 Tihosi 5:2-14.