Nghena endzeni

Hundzela eka leswi nga endzeni

Xana Ndhambi Ya Le Minkarhini Ya Nowa Yi Ve Kona eMisaveni Hinkwayo Hakunene?

Xana Ndhambi Ya Le Minkarhini Ya Nowa Yi Ve Kona eMisaveni Hinkwayo Hakunene?

 Swivutiso Swa Vahlayi

Xana Ndhambi Ya Le Minkarhini Ya Nowa Yi Ve Kona eMisaveni Hinkwayo Hakunene?

Ndhambi ya Nowa yi humelele eka malembe lama tlulaka 4 000 lama hundzeke. Kutani a ti kona timbhoni leti swi voneke hi mahlo leti ta ha riki kona emisaveni leswaku ti hi byela hi ta ndhambi. Hambiswiritano, ku ni swiviko leswi tsariweke swa xiendlakalo xexo, leswi vulaka leswaku mati ya ndhambi ma funengete tintshava to leha swinene ta le nkarhini wolowo.

Buku ya matimu yi ri: “Ndhambi yi va kona masiku ya 40 ehenhla ka misava . . . Mati ma funengeta misava swinene lerova tintshava hinkwato to leha leti a ti ri ehansi ka matilo hinkwawo ti funengetiwa. Mati ma ti hundza hi swisungunu swa 15, [kwalomu ka timitara ta tsevu na hafu] kutani tintshava ti funengetiwa.”—Genesa 7:17-20.

Van’wana va nga ha vula leswaku ku funengetiwa ka misava hinkwayo hi mati i ntsheketo kumbe i ku hundzeleta swilo. Kambe a swi tano nikatsongo! Hakunene xiphemu lexikulu xa misava xa ha funengetiwe hi mati. Mati lama nga emalwandle ma endla tiphesente ta kwalomu ka 71 ya vuandlalo bya misava. Kutani entiyisweni mati ya ndhambi ma ha ri kona. Kutani loko ayisi leyikulu swinene leyi fambaka elwandle ni leyi funengeteke tintshava leti nga ekusuhi ni le North Pole ni le South Pole yi nga n’oka, mati ya lwandle a ma ta tlakuka lerova ma nga funengeta madoroba yo fana na New York na Tokyo.

Vativi va maribye ni misava lava dyondzaka hi ndlela leyi ndhawu ya le n’walungu-vupela-dyambu bya United States yi vumbekeke ha yona, va pfumela leswaku khale ka khaleni ku ve ni tindhambi letikulu ta kwalomu ka 100 leti tshameke ti khukhula ndhawu yoleyo. Yin’wana ya tindhambi toleto ku vuriwa leswaku yi humelele endhawini yoleyo hi xitshuketa, mati ya kona a ma tlakuke swinene lerova a ma funengeta tintshava to leha swinene, ma famba hi rivilo leri endlaka tikhilomitara ta 105 hi awara. Tindhambi tin’wana leti na tona mati ya kona a ma tlakuke hi mimpimo leyi fanaka, ti susumetele vativi va sayense ku pfumela leswaku kumbexana ndhambi ya misava hinkwayo yi ve kona.

Kambe eka lava pfumelaka leswaku Bibele i Rito ra Xikwembu, ndhambi ya misava hinkwayo a hi mhaka leyi va mbambelaka leswaku yi ve kona. I mhaka leyi humeleleke hakunene. Yesu u vule leswi eka Xikwembu: “Rito ra wena i ntiyiso.” (Yohane 17:17) Muapostola Pawulo u tsale leswaku ku rhandza ka Xikwembu hileswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Pawulo a a ta va dyondzisa njhani valandzeri va Yesu tidyondzo leti vulavulaka hi Xikwembu ni xikongomelo xa xona loko ku ri leswaku eRitweni ra xona ku tsariwe mintsheketo?

Yesu a a nga pfumeli ntsena leswaku Ndhambi yi ve kona kambe a a pfumela ni leswaku yi ve kona emisaveni hinkwayo. Eka vuprofeta bya nkoka lebyi a byi vuleke loko a vulavula hi vukona byakwe ni makumu ya mafambiselo lawa ya swilo, u fanise swiendlakalo leswi nga ta endleka hi nkarhi wolowo ni leswi humeleleke eminkarhini ya Nowa. (Matewu 24:37-39) Muapostola Petro na yena u tsale hi ndhambi ya mati ya le minkarhini ya Nowa a ku: “Misava ya nkarhi wolowo yi lovisiwile ha wona loko mati ma yi khubumeta.”—2 Petro 3:6.

Loko mhaka ya Nowa ni ndhambi ya misava hinkwayo a ku ri ntsheketo, swilemukiso swa Petro na Yesu eka lava hanyaka emasikwini ya makumu a swi ta va swa hava. Ematshan’weni ya leswaku mhaka leyi yi lemukisa vanhu namuntlha, dyondzo ya leswaku ndhambi a ku ri ntsheketo ntsena a yi ta pfilunganya ndlela leyi va swi twisisaka ha yona swilemukiso swa le Bibeleni, xisweswo va va ekhombyeni ra ku nga poni nhlomulo lowukulu ku tlula lowu veke kona eminkarhini ya Ndhambi ya Nowa.—2 Petro 3:1-7.

Loko Xikwembu xi vulavula hi musa lowu xi hambetaka xi wu komba vanhu xi te: “Hilaha ndzi hlambanyeke hakona leswaku mati ya Nowa a ma nge he tlheli ma hundza emisaveni, hi ndlela yoleyo ndzi hlambanyile leswaku a ndzi nge ku hlundzukeli kumbe ku ku tshinya.” Leswi Ndhambi ya le minkarhini ya Nowa yi loviseke misava hakunene, Xikwembu xi ta va komba musa vanhu lava tshembelaka eka xona.—Esaya 54:9.