Nghena endzeni

Hundzela eka leswi nga endzeni

Xi Twisisa Ku Vava Loku Hi Ku Twaka

Xi Twisisa Ku Vava Loku Hi Ku Twaka

 Tshinela Eka Xikwembu

Xi Twisisa Ku Vava Loku Hi Ku Twaka

Yohane 11:33-35

“NTWELA-VUSIWANA i ku twela van’wana ku vava.” Yoleyo i ndlela leyi murhumiwa la dyuhaleke wa Timbhoni ta Yehovha a tshameke a yi hlamusela ha yona mfanelo leyi ya risima. Yehovha Xikwembu i xikombiso lexikulu xa ntwela-vusiwana. U twa ku vava loku vanhu vakwe va ku twaka. Hi nga tiyiseka njhani hi sweswo? Ntwela-vusiwana wa Yehovha wu kombisiwe hi ku helela hi marito ni swiendlo swa Yesu leswi a swi endleke loko a ha ri emisaveni. (Yohane 5:19) Hi xikombiso, xiya xiendlakalo lexi tsariweke eka Yohane 11:33-35.

Loko Lazaro munghana wa Yesu a file swi nga languteriwanga, Yesu u ye eximutanini lexi Lazaro a a tshama eka xona. Swi le rivaleni leswaku vamakwavo va Lazaro va xisati, Mariya na Marta, a va ri ni gome swinene. Yesu a a wu rhandza swinene ndyangu lowu. (Yohane 11:5) Xana a a ta endla yini? Rungula ri ri: “Loko Yesu a . . . vona [Mariya] a rila ni Vayuda lava teke na yena va rila, a konya emoyeni, a karhateka; hiloko a ku: ‘Mi n’wi veke kwihi?’ Va ku eka yena: ‘Hosi, tana u ta vona.’ Yesu a humesa mihloti.” (Yohane 11:33-35) Xana Yesu a a rilela yini? I ntiyiso leswaku Lazaro munghana wakwe la rhandzekaka a a file, kambe Yesu a a ta n’wi pfuxa ku nga ri khale. (Yohane 11:41-44) Xana wu kona nchumu wun’wana lowu endleke leswaku Yesu a rila?

Tlhela u languta marito lama tshahiweke laha henhla. Xiya leswaku loko Yesu a vone Mariya ni vanhu van’wana va rila, u ‘konyile’ a tlhela a “karhateka.” Marito ya ririmi ro sungula lama tirhisiweke laha ma kombisa ku tlhaveka swinene embilwini. * Yesu u khumbiwe swinene hi leswi a swi voneke. Leswaku u twe ku vava swinene swi vonake loko mahlo yakwe ma sungula ku xiririka mihloti. Swi le rivaleni leswaku Yesu u khumbiwe hi ku vava loku a ku twiwa hi vanhu van’wana. Xana u tshame u rila hikwalaho ka leswi munhu loyi u n’wi rhandzaka a a ri eku rileni?—Varhoma 12:15.

Ntwela-vusiwana wa Yesu wu hi pfuna ku dyondza timfanelo ni tindlela ta Tata wakwe, Yehovha. Tsundzuka leswaku Yesu u ti kombise hi ku hetiseka timfanelo ta Tata wakwe lerova u kale a ku: “Loyi a ndzi voneke u vone na Tatana.” (Yohane 14:9) Kutani loko hi hlaya leswaku “Yesu [u] hume[se] mihloti” hi nga tiyiseka leswaku Yehovha u twa ku vava loku vagandzeri vakwe va ku twaka. Entiyisweni, vatsari van’wana va Bibele va tiyisekisa mhaka leyi. (Esaya 63:9; Zakariya 2:8) Hakunene Yehovha i Xikwembu xa rirhandzu!

Hi tshinela eka vanhu lava nga ni ntwela-vusiwana. Loko hi hele matimba kumbe hi karhatekile, hi tshinela eka vanhu lava nga ta twisisa xiyimo xa hina kutani va hi tshandzisa. Sweswo swi hi endla hi tshinela swinene eka Yehovha, Xikwembu lexi nga ni ntwela-vusiwana lexi twaka ku vava loku hi ku twaka ni ku twisisa leswi hi endlaka hi rila!—Pisalema 56:8.

[Nhlamuselo ya le hansi]

^ par. 6 Rito ra Xigriki leri hundzuluxeriweke ri ku “u humese mihloti” hakanyingi ri vula “ku rila handle ko ba pongo,” kasi rito leri tirhisiweke ku hlamusela ndlela leyi Mariya ni lavan’wana a va rila ha yona ri nga ha vula “ku kalakala.”