Nghena endzeni

Hundzela eka leswi nga endzeni

Xana Hi Huma Kwihi?

Xana Hi Huma Kwihi?

 Xana Hi Huma Kwihi?

HA YINI SWI RI SWA NKOKA KU KUMA NHLAMULO YA XIVUTISO LEXI? Vanhu vo tala va dyondzisiwe leswaku vutomi emisaveni byi ve kona hi xiwelo. Vanhu va byeriwa leswaku ndlela leyi va titwaka ha yona, vutlhari ni vuswikoti lebyi va nga na byona bya ku lavisisa xikongomelo xa vutomi, hinkwaswo ka swona swi ve kona hi xiwelo.

Kambe xiya: Loko hakunene hi ve kona hikwalaho ka endlelo ra ku tiendlekela ka swilo naswona ku nga ri na Muvumbi, rixaka ra vanhu a ri ta va ri nga ri na vatswari. Vanhu a va nga ta va na munhu wo tlhariha swinene loyi a va ta kuma switsundzuxo eka yena—loyi a nga ta hi pfuna ku tlhantlha swiphiqo swa hina. A hi ta boheka ku titshega hi vutlhari bya hina leswaku hi papalata timhangu ta ntumbuluko, hi sivela tinyimpi ta tipolitiki ni ku tlhantlha swiphiqo swa hina vini.

Xana mhaka ya leswaku a hi ta titshega ntsena hi vutlhari bya hina swi endla leswaku u eneriseka? Loko swi nga ri tano, ehleketa hi mhaka ya leswaku ku ni munhu la nga ni vutlhari lebyi tlakukeke. Mhaka ya kona a yo tsakisa ntsena kambe yi tlhela yi twisiseka swinene.

Leswi Bibele Yi Swi Vulaka

Bibele yi dyondzisa leswaku vanhu va vumbiwe hi Xikwembu hi xoxe. A hi vanga kona hi xiwelo. Ematshan’weni ya sweswo, hi vana va Tatana la nga ni rirhandzu ni vutlhari. Xiya mhaka leyi twisisekaka leyi tsariweke eBibeleni.

Genesa 1:27. “Xikwembu xi ya emahlweni xi tumbuluxa munhu hi xifaniso xa xona, xi n’wi tumbuluxe hi xifaniso xa Xikwembu; xi va tumbuluxe va ri waxinuna ni waxisati.”

Pisalema 139:14. “Ndzi ta ku dzunisa hikuva ndzi endliwe hi ndlela yo hlamarisa, leyi chavisekaka. Mintirho ya wena ya hlamarisa, hilaha moya-xiviri wa mina wu swi lemukaka kahle hakona.”

Matewu 19:4-6. “Xana a mi hlayanga leswaku loyi a va tumbuluxeke eku sunguleni u va endle va va waxinuna ni waxisati kutani a ku, ‘Hikwalaho ka sweswo, wanuna u ta siya  tata wakwe ni mana wakwe naswona u ta namarhela nsati wakwe, kutani lavambirhi va ta va nyama yin’we’? Kutani a va ha ri vambirhi, kambe i nyama yin’we. Hikokwalaho, leswi Xikwembu xi swi paneke swin’we, ku nga tshuki ku va ni munhu la swi hambanisaka.”

Mintirho 17:24, 25. “Xikwembu lexi endleke misava ni swilo hinkwaswo leswi nga eka yona, tanihi leswi xona xi nga Hosi ya tilo ni misava, a xi tshami etitempeleni leti endliweke hi mavoko, naswona a xi tirheriwi hi mavoko ya vanhu onge hi loko xi pfumala xo karhi, hikuva xona xi nyika vanhu hinkwavo vutomi ni ku hefemula ni swilo hinkwaswo.”

Nhlavutelo 4:11. “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.”

Ndlela Leyi Ha Yona Tinhlamulo Ta Bibele Ti Endlaka Leswaku Hi Va Ni Ku Rhula eVuton’wini

Ku tiva leswaku ‘vito ra ndyangu wun’wana ni wun’wana emisaveni ri huma’ eka Xikwembu swi cinca ndlela leyi hi langutaka vanhu van’wana ha yona. (Vaefesa 3:15) Nakambe ku va ni vutivi byebyo swi khumba ndlela leyi hina hi tilangutaka ha yona swin’we ni swiphiqo swa hina. Ndlela leyi hi langutaka swilo ha yona yi ta khumbiwa hi tindlela leti landzelaka.

Loko hi fanele hi endla swiboho swo tika, a hi nge karhateki ngopfu hi mavonelo ya vanhu lama nga faniki. Ematshan’weni ya sweswo, hi ta titshega hi ku helela hi ndzayo ya Bibele. Ha yini? Hikuva “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni, leswaku munhu wa Xikwembu a faneleka hi ku helela, a hlomisiwa hi ku helela eka ntirho wun’wana ni wun’wana lowunene.”—2 Timotiya 3:16, 17.

Ina, ku tirhisa ndzayo ya Bibele swi lava leswaku hi tikarhata hi tlhela hi tikhoma. Minkarhi yin’wana ndzayo ya yona yi nga ha lava leswaku hi endla swilo hi tindlela leti vonakaka ti lwisana ni leswi hi swi rhandzaka. (Genesa 8:21) Hambiswiritano, loko hi pfumela leswaku hi vumbiwe hi Tata wa hina wa le tilweni la nga ni rirhandzu, swa twisiseka ku gimeta hileswaku u tiva ndlela leyinene ngopfu leyi hi faneleke hi hanya ha yona. (Esaya 55:9) Xisweswo, Rito rakwe ra hi tiyisekisa: “Tshemba Yehovha hi mbilu ya wena hinkwayo naswona u nga titshegi hi ku twisisa ka wena n’wini. N’wi tivise tindlela ta wena hinkwato, kutani yena u ta lulamisa tindlela ta wena.” (Swivuriso 3:5, 6) Loko hi tirhisa ndzayo yoleyo, ku karhateka ko tala loku hi vaka na kona loko hi langutane ni swiphiqo ni ku endla swiboho ku ta hela.

Loko hi xanisiwa, a hi nge karhateki hi ku titwa hi ri swikangalafula, hi ehleketa leswaku a hi pfuni nchumu hi ndlela yo karhi loko hi pimanisiwa ni vanhu va rixaka rin’wana kumbe va ndhavuko wun’wana. Ku ri na sweswo, hi ta hlakulela langutelo lerinene ra ku tixixima. Ha yini? Hikuva Tata wa hina Yehovha Xikwembu, “a [nga] yi hi nghohe, kambe eka tiko rin’wana ni rin’wana munhu loyi a [n’wi] chavaka a tlhela a endla ku lulama wa amukeleka eka [ye]na.”—Mintirho 10:34, 35.

Ku tiva leswi swi ta tlhela swi endla leswaku loko hi xanisiwa hi nga languti van’wana hi ndlela yo biha. Hi ta twisisa leswaku ku hava xivangelo lexi twalaka xa ku tivona hi tlakukile eka vanhu va rixaka rin’wana, tanihi leswi Xikwembu “hi munhu un’we xi endle[ke] matiko hinkwawo ya vanhu, leswaku va tshama ehenhla ka vuandlalo hinkwabyo bya misava.”—Mintirho 17:26.

Hakunene ku tiva leswaku ku ni Loyi a hi vumbeke ni leswaku wa hi khathalela swi hi endla hi va ni xikongomelo evuton’wini bya hina. Kambe a swi heleli kwalaho.

[Nkomiso eka tluka 4]

Xana vanhu va huma eka swiharhi?

[Xifaniso eka tluka 5]

Ku tiva leswaku Muvumbi wa hina wa khathala hi hina swi nga endla leswaku hi va ni ku rhula ka xiviri evuton’wini