Nghena endzeni

Hundzela eka leswi nga endzeni

Xana A Wu Swi Tiva?

Xana A Wu Swi Tiva?

 Xana A Wu Swi Tiva?

Xana lwandle leri n’okisiweke leri a ri ri etempeleni leyi akiweke hi Solomoni a ri tamela mpimo wo tanihi kwihi wa mati?

Rungula leri nga eka 1 Tihosi 7:26 ri vula leswaku lwandle a ri tamela “mimpimo ya tibati ta 2 000” ta mati lawa a ma tirhisiwa hi vaprista, kasi rungula rin’wana leri nga eka 2 Tikronika 4:5 leri vulavulaka hi lwandle leri, ri vula leswaku a ri tamela “mimpimo ya tibati ta 3 000.” Leswi swi endle leswaku van’wana va vula leswaku ku hambana loku nga kona eka tindzimana leti ku vangiwe hi xihoxo lexi endliweke hi vakopi va buku ya Tikronika.

Hambiswiritano, Bibele ya Vuhundzuluxeri Bya Misava Leyintshwa yi hi pfuna ku twisisa leswaku ha yini mavekelo lawa ya tindzimana letimbirhi ma nga hoxanga. Tihosi to Sungula 7:26 yi ri: “A ri tamela mimpimo ya tibati ta 2 000.” Xiya leswaku 2 Tikronika 4:5 yi ri: “A ri ri xikutsu lexi nga tamelaka mimpimo ya tibati ta 3 000.” Kutani 2 Tikronika 4:5 yi kombetela eka mpimo hinkwawo wa mati lowu xihlambelo xa le tempeleni a xi kota ku wu tamela, kasi 1 Tihosi 7:26 yi vula mpimo wa mati lawa hi ntolovelo a ma cheriwa eka xihlambelo xa le tempeleni. Hi marito man’wana, a xi nga si tshama xi tatiwa hi ku helela. Swi vonaka onge hi ntolovelo a ku cheriwa mimpimo ya tibati ta 2 000 ta mati eka xona.

Ha yini Yesu na Petro va hakele xibalo xa tempele hi mali yin’we ntsena ya nsimbi?

Esikwini ra Yesu, wanuna un’wana ni un’wana wa Muyuda la nga ni malembe yo tlula 20 hi vukhale, a a fanele a hakela xibalo xa tempele xa lembe ni lembe xa tidrakma timbirhi. Mali leyi a yi ringana ni muholo wa kwalomu ka masiku mambirhi. Loko ku tlakuke xivutiso malunghana ni ku hakeriwa ka xibalo lexi, Yesu u byele Petro a ku: “Yana elwandle, u hoxa xinjovo, ivi u teka nhlampfi yo sungula leyi nga ta huma, naswona loko u pfula nomu wa yona, u ta kuma mali ya nsimbi ya statera. Yi teke u ya hakelela mina na wena.”—Matewu 17:24-27.

Swidyondzi swo tala swi pfumela leswaku mali ya nsimbi ya statera leyi ku vulavuriweke ha yona laha, kahle-kahle i mune wa tidrakma. A yi ringana ku hakela xibalo xa tempele xa vanhu vambirhi. Mali ya nsimbi ya statera a yi toloveleke ngopfu naswona a yi kumeka hi ku olova ku tlula mali yin’we ya nsimbi leyi ringanaka tidrakma timbirhi. Xisweswo xihlamusela-marito xin’wana xi ri: “Swi vonaka onge Vayuda a va tolovele ku hlangana leswaku va hakela xibalo xa Tempele havambirhi-mbirhi va tirhisa mali yin’we ya nsimbi [ya statera].”—The New Bible Dictionary.

Ku engetela kwalaho, munhu wihi na wihi loyi a a lava ku hakela xibalo xa munhu un’we ntsena hi mali yin’we ya nsimbi ya statera, a a fanele a hakerisiwa ndziho wa ku cinceriwa mali yoleyo. Ndziho wa kona a wu ringana tiphesente ta nhungu. Hambiswiritano, lava a va hakelela vanhu vambirhi hi nkarhi wun’we a va nga hakerisiwi ndziho wolowo. Kutani hambi ku ri emhakeni leyi leyi nga nyawuriki, rungula leri tsariweke eka Matewu ri pfumelelana ni swiendlo leswi a swi tolovelekile swa le minkarhini ya Yesu.

[Xifaniso eka tluka 15]

Xifaniso xa mali ya nsimbi leyi ringanaka mune wa tidrakma