Nghena endzeni

Hundzela eka leswi nga endzeni

Murisi La Khathalaka Ha Wena

Murisi La Khathalaka Ha Wena

 Tshinela Eka Xikwembu

Murisi La Khathalaka Ha Wena

Matewu 18:12-14

‘XANA Xikwembu xa ndzi rhandza?’ Loko u tshame u tivutisa xivutiso xolexo, a wu wexe. Vo tala va hina va langutane ni maxangu ni swiphiqo, naswona minkarhi yin’wana hi nga ha tivutisa loko Muvumbi wa vuako hinkwabyo a ri ni mhaka ni leswi swi hi humelelaka. I swa nkoka ku kuma nhlamulo ya xivutiso lexi nge, Xana Yehovha Xikwembu wa khathala hi un’wana ni un’wana wa hina? Loko a ha ri emisaveni, Yesu loyi a n’wi tivaka kahle Yehovha u vulavule hi xifaniso lexi nyikelaka nhlamulo leyi chavelelaka.

Loko Yesu a fanisa ndlela leyi Yehovha a khathalelaka vanhu ha yona ni leyi murisi a khathalelaka tinyimpfu takwe ha yona, u te: “Loko munhu wo karhi a ri ni tinyimpfu ta 100 kutani ku lahleka yin’we, xana a nge ti siyi leta 99 etintshaveni kutani a ya lava leyi lahlekeke? Naswona loko swo endleka a yi kuma, ndzi tiyisile ndzi ri eka n’wina, u tsaka ngopfu ha yona ku tlula leta 99 leti nga lahlekangiki. Hilaha ku fanaka, Tata wa mina la nge tilweni a nga naveli leswaku un’wana wa lava lavatsongo a lova.” (Matewu 18:12-14) A hi voneni loko Yesu a hlamusela ndlela leyi Yehovha a khathalelaka mugandzeri un’wana ni un’wana Wakwe ha yona.

Murisi a a titwa a ri ni vutihlamuleri byo khathalela nyimpfu yin’wana ni yin’wana yakwe. Loko nyimpfu yi lahleka, a a ta swi tiva leswaku hi yihi leyi lahlekeke. A a tiva nyimpfu yin’wana ni yin’wana hi vito leri a yi thyeke rona. (Yohane 10:3) Murisi a a nga ta tshika ku lava nyimpfu leyi lahlekeke kukondza a yi kuma a yi vuyisela entlhambini. Loko a famba a ya lava nyimpfu leyi lahlekeke, leti ta 99 a ti ta sala ti hlayisekile. Hakanyingi varisi a va tshama swin’we va tshika mintlhambi ya vona yi vundza swin’we. * Kutani murisi loyi a a famba swa xinkarhana a ya lava nyimpfu leyi lahlekeke a siya tinyimpfu ta yena letin’wana ti sala ti khathaleriwa hi varisi-kulobye. Loko murisi a kuma nyimpfu leyi lahlekeke yi nga vavisekanga a a tsaka. A a pakatsa nyimpfu leyi chuheke a yi yisa endhawini leyi hlayisekeke laha ku nga ni tinyimpfu letin’wana.​—Luka 15:5, 6.

Loko Yesu a hlamusela xifaniso lexi u vule leswaku Xikwembu a xi lavi leswaku “un’wana wa lava lavatsongo a lova.” Emahlweni ka kwalaho, Yesu u lemukise vadyondzisiwa vakwe leswaku va nga khunguvanyisi “un’wana wa lava lavatsongo lava pfumelaka eka [yena].” (Matewu 18:6) Kutani, xana xifaniso xa Yesu xi hi dyondzisa yini hi Yehovha? Xi hi dyondzisa leswaku i Murisi loyi a khathalaka swinene hi nyimpfu yin’wana ni yin’wana yakwe, ku katsa ni “lavatsongo”​—lava nga ha vonakaka va nga pfuni nchumu hi ku ya hi langutelo ra misava. Ina, mugandzeri un’wana ni un’wana u hlawulekile naswona i wa nkoka eka Xikwembu.

Loko u lava ku tiyisekisiwa leswaku u wa nkoka eka Xikwembu, i swa nkoka ku dyondza leswi engetelekeke hi Murisi Lonkulu, Yehovha Xikwembu, ni ndlela leyi u nga tshinelaka eka yena ha yona. Hi ku endla tano, u nga tiyiseka hilaha muapostola Petro loyi a tweke Yesu loko a hlamusela hi xifaniso xa ku lahleka ka nyimpfu a titweke hakona. Endzhaku ka nkarhi Petro u tsarile: ‘Lahlelani ku vilela hinkwako ka n’wina eka Xikwembu, hikuva xa mi khathalela.’​—1 Petro 5:7.

[Nhlamuselo ya le hansi]

^ par. 6 A swi nga tiki ku hambanisa mintlhambi tanihi leswi nyimpfu yin’wana ni yin’wana a yi landzela murisi wa yona hileswi a yi tiva rito rakwe.​—Yohane 10:4.