Nghena endzeni

Hundzela eka leswi nga endzeni

Ha Yini Xikwembu Xi Pfumelela Ku Xaniseka?

Ha Yini Xikwembu Xi Pfumelela Ku Xaniseka?

 Swivutiso Swa Vahlayi

Ha Yini Xikwembu Xi Pfumelela Ku Xaniseka?

Xikwembu a hi xona xi vangelaka vanhu ku xaniseka. Bibele yi ri: “A swi ve ekule swinene ni Xikwembu xa ntiyiso leswaku xi endla hilaha ku hombolokeke!” (Yobo 34:10) Kutani i mani muvangi-nkulu wa ku xaniseka?

Yesu u vule leswaku Sathana i “mufumi wa misava.” (Yohane 14:30) I ntiyiso leswaku Yehovha i Hosi ya Vuako Hinkwabyo. Xikhundlha xexo a nge pfuki a xi tshikile. Hambiswiritano, Xikwembu xi pfumelele Sathana leswaku a fuma misava ku ringana nkarhi wo karhi.—1 Yohane 5:19.

Xana Sathana i mufumi wa njhani? Ku sukela eku sunguleni Sathana u ve mudlayi tlhelo mukanganyisi. U pfilunganya vanhu hi tindlela to hambana-hambana. Yesu u n’wi hlamusele hi ndlela leyi: “Yena a a ri mudlayi wa vanhu ku sukela eku sunguleni, naswona a nga yimanga a tiyile entiyisweni, hikuva ntiyiso a wu kona eka yena. Loko a vulavula vunwa, u vulavula hi ku landza mboyamelo wa yena, hikuva i muhembi ni tata wa mavunwa.” (Yohane 8:44.) Yesu u tlhele a vula leswaku vanhu lava a va lava ku n’wi dlaya a va ri vana va Sathana, mudlayi wo sungula. Va tiendle vana va yena hi ku tekelela swiendlo swa yena. Xivuriso xin’wana xi ri: Ku tlula ka mhala ku letela n’wana wa le ndzeni.

Sathana wa ha hlohlotela vanhu leswaku va va ni moya wo dlaya. Hi xikombiso, R. J. Rummel, khale ka profesa wa le Yunivhesiti ya Hawaii, le U.S.A., u ringanyeta leswaku ku sukela hi 1900 ku fikela hi 1987, mimfumo yo hambana-hambana yi dlaye vanhu vo ringana 169 198 000 hi nkarhi wa mpfilumpfilu wa tipolitiki, ku yayarheriwa ka tinxaka ni madzolonga lama nga hlawuriki ndluwa ma siya hove. Nakambe ku ni vanhu va makume ya timiliyoni lava dlayiweke etinyimpini hi nkarhi wolowo.

Loko Xikwembu ku nga ri xona xi vangaka ku xaniseka, ha yini xi ku pfumelela? Hikuva mphikamakaneta leyi khumbaka swivumbiwa hinkwaswo evuakweni hinkwabyo leyi tlakusiweke khale malunghana ni leswinene ni leswo biha ya ha lava ku lulamisiwa. A hi kambisiseni yin’wana ya yona.

Eku sunguleni ka matimu ya vanhu, Adamu na Evha va yime na Sathana. Va fularhele Xikwembu va hlawula ku tifuma, leswi entiyisweni a swi vula leswaku a va ri ehansi ka vulawuri bya Diyavulosi.—Genesa 3:1-6; Nhlavutelo 12:9.

Yehovha u vone swi fanerile leswaku ku hundza nkarhi wo karhi leswaku ku va ni vumbhoni lebyi eneleke leswaku a kota ku lulamisa mphikamakaneta yoleyo. Byi ve byihi vuyelo bya ku tifuma ka vanhu? Ku fuma ka vanhu loku nga ehansi ka nkucetelo wa Sathana ku vange ku xaniseka ntsena. Hakunene ku va Xikwembu xi pfumelele leswaku ku hundza nkarhi wo leha swi vuyerise vanhu. Hi ndlela yihi? Lava kambisiseke vumbhoni byolebyo kutani va byi tshemba va ve ni lunghelo ro kombisa leswaku va tiyimisele ku fumiwa hi Xikwembu. Lava dyondzaka milawu ya Xikwembu va tlhela va hanya ha yona va ni ntshembo wo hanya hilaha ku nga heriki.—Yohane 17:3; 1 Yohane 2:17.

I ntiyiso leswaku sweswi misava yi le hansi ka vulawuri bya Sathana byo homboloka. Kambe swo va swa xinkarhana. Ku nga ri khale Yehovha u ta tirhisa N’wana wakwe leswaku a “herisa mintirho ya Diyavulosi.” (1 Yohane 3:8) Ehansi ka nkongomiso wa Xikwembu, Yesu u ta chavelela lava nga ni gome ni ku herisa swiyimo swo biha leswi vanhu va langutaneke na swona. U ta pfuxa vanhu hinkwavo va tibiliyoni lava feke leswaku va tlhela va hanya emisaveni.—Yohane 11:25.

Ku pfuxiwa ka Yesu i xikombiso xa ku hlula ka Xikwembu mintirho ya Diyavulosi—ku nga xikombiso xa leswi nga ta endleriwa vanhu lava hlawulaka ku fumiwa hi Xikwembu. (Mintirho 17:31) Bibele yi hi pfuna ku twisisa leswi nga ta humelela enkarhini wolowo hi marito lawa lama chavelelaka: “Xikwembu hi xiviri xi ta va na [vanhu]. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:3, 4.