Nghena endzeni

Hundzela eka leswi nga endzeni

Xana Wu Ta Ta Rini Mfumo Wa Xikwembu?

Xana Wu Ta Ta Rini Mfumo Wa Xikwembu?

 Xana Wu Ta Ta Rini Mfumo Wa Xikwembu?

“HOSI, xana u vuyetela mfumo eIsrayele hi nkarhi lowu?” (Mintirho 1:6) Vaapostola a va swi lava hi timbilu ta vona hinkwato ku tiva leswaku Yesu a a ta wu simeka rini Mfumo wakwe. Ninamuntlha, hambileswi se ku hundzeke malembe ya kwalomu ka 2 000, vanhu va ha swi lava hi timbilu ta vona hinkwato ku tiva: Xana wu ta ta rini Mfumo wa Xikwembu?

Leswi Mfumo a wu ri mhaka-nkulu leyi Yesu a a chumayela ha yona, u nga ha ehleketa leswaku u vulavule hi xivutiso lexi. Hakunene u vulavule ha xona! U vulavule ko tala hi nkarhi wo karhi lowu a wu vitaneke “vukona” byakwe. (Matewu 24:37) Vukona byebyo byi hlangana swinene ni ku simekiwa ka Mfumo wa Mesiya. Vukona lebyi i yini? A hi kambisiseni tinhla ta mune leti Bibele yi ti paluxaka malunghana ni vukona bya Kreste.

1. Vukona bya Kreste a byi ta sungula endzhaku ka rifu rakwe. Yesu u vulavule hi xifaniso lexi eka xona a tifaniseke ni munhu loyi a a “endzele tiko ra le kule a ya kuma matimba ya vuhosi.” (Luka 19:12) Xifaniso xexo lexi nga vuprofeta xi hetiseke njhani? Yesu u file kutani a pfuxiwa; ivi a endzela “tiko ra le kule,” ku nga etilweni. Hilaha Yesu a profeteke hakona eka xifaniso lexi fanaka, a a ta vuya hi le ku kumeni ka matimba ya vuhosi “endzhaku ka nkarhi wo leha.”​—Matewu 25:19.

Endzhaku ka malembe yo hlayanyana loko Yesu a tlhandlukele etilweni, muapostola Pawulo u tsarile: “Munhu loyi [Yesu] u nyikele xitlhavelo xin’we a xi nyikelela swidyoho swa minkarhi hinkwayo kutani a tshama evokweni ra xinene ra Xikwembu, ku sukela kwalaho u rindzile, kukondza valala vakwe va va vunavelo bya milenge yakwe.” (Vaheveru 10:12, 13) Endzhaku ka loko Yesu  a fikile etilweni, u rindze nkarhi wo leha. Ku rindza koloko ku hetelele ku hela loko Yehovha Xikwembu a endla N’wana wakwe Hosi ya Mfumo wa Mesiya lowu tshembisiweke ku sukela khale. Ku endliwa ka yena hosi ku ve ku sungula ka vukona bya Kreste. Xana vanhu emisaveni a va ta xi vona xiendlakalo lexi xo tsakisa?

2. Vukona bya Kreste a byi vonaki ematihlweni ya vanhu. Tsundzuka leswaku Yesu u vulavule hi xikombiso xa vukona bya yena. (Matewu 24:3) Loko vukona bya yena a byi vonaka ematihlweni ya vanhu, xana a ku ta laveka xikombiso? Hi xikombiso: Ehleketa u ri karhi u famba leswaku u ya vona lwandle. U nga ha vona mimfungho ya le gondzweni leyi ku kongomisaka loko u ri karhi u famba, kambe loko se u fike eribuweni, u yime laha mati ma helelaka kona u ri karhi u vona mati yo tala lama fikaka evugimamusi, xana u nga langutela ku vona mfungho lowu nga ni nseve lowukulu lowu kombetelaka emahlweni wu ri ni rito leri tsariweke hi marito lamakulu leri nge “Lwandle”? Doo! A ku laveki mfungho lowu ku kombaka nchumu lowu u kotaka ku wu vona kahle.

Yesu u hlamusele xikombiso xa vukona byakwe leswaku a pfuna vanhu va xiya leswi a swi ta humelela etilweni, ku nga ri ku kombetela eka nchumu wo karhi lowu vanhu va kotaka ku wu vona hi mahlo ya vona. Xisweswo, Yesu u te: “Mfumo wa Xikwembu a wu ti hi ku vonakala ko hlawuleka.” (Luka 17:20) Kutani, xana xikombiso a xi ta va komba hi ndlela yihi lava nga emisaveni leswaku vukona bya Kreste se byi sungurile?

3. Vukona bya Yesu a byi ta vonaka hi ku nyanya ka maxangu laha misaveni. Yesu u vule leswaku vukona byakwe tanihi Hosi etilweni a byi ta vonaka emisaveni hi tinyimpi, tindlala, ku tsekatseka ka misava, mintungu ni ku kala nawu. (Matewu 24:7-12; Luka 21:10, 11) I yini leswi a swi ta vanga maxangu lawa hinkwawo? Bibele yi hlamusela leswaku Sathana, “mufumi wa misava leyi,” u hlundzuke swinene hikuva u tiva leswaku nkarhi wa yena se wu komile leswi vukona bya Kreste tanihi Hosi byi sunguleke. (Yohane 12:31; Nhlavutelo 12:9, 12) Vumbhoni byebyo lebyi nga erivaleni bya leswaku Sathana u hlundzukile ni bya vukona bya Kreste byi tele enkarhini wa hina. Ngopfu-ngopfu ku sukela hi 1914, ku nga lembe leri van’wamatimu va xiyeke leswaku ri ve ni ku cinca lokukulu hileswi vumbhoni lebyi byi vonakeke hi mpimo lowu nga si tshamaka wu va kona emisaveni hinkwayo.

Sweswo hinkwaswo swi nga ha vonaka onge i mahungu yo biha, kambe a swi tano. Swi vula leswaku Mfumo wa Mesiya wa fuma sweswi etilweni. Ku nga ri khale, mfumo wolowo wu ta fuma ni misava leyi hinkwayo. Kambe, vanhu va ta wu tiva njhani Mfumo wolowo leswaku va ta kota ku amukela vulawuri bya wona ni ku tiveka ehansi ka wona?

4. Vukona bya Yesu byi vonaka hi ntirho wo chumayela lowu endliwaka emisaveni hinkwayo. Yesu u vule leswaku vukona byakwe a byi ta fana ni “masiku ya Nowa.” * (Matewu 24:37-39)  Nowa a a ngo va muaki wa ngalava ntsena; u tlhele a va “muchumayeri wa leswo lulama.” (2 Petro 2:5) Nowa u lemukise vanhu leswaku vuavanyisi bya Xikwembu a byi tshinele. Yesu u vule leswaku ni valandzeri vakwe emisaveni a va ta lemukisa vanhu enkarhini wa vukona byakwe. U profete a ku: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”​—Matewu 24:14.

Hilaha hi hlayeke hakona eka xihloko lexi hundzeke, Mfumo wa Xikwembu wu ta lovisa mimfumo hinkwayo ya misava leyi. Ntirho wo chumayela wu lemukisa vanhu leswaku Mfumo lowu wa le tilweni wu ta teka goza ku nga ri khale, wu pfulela vanhu hinkwavo ndlela yo pona ndzoviso lowu taka kutani va va ehansi ka wona. Kutani, xivutiso xa nkoka hi lexi nge, Xana wena u ta angula njhani?

Xana Ku Ta Ka Mfumo Wa Xikwembu I Mhaka Leyi Tsakisaka Eka Wena?

Rungula leri Yesu a ri chumayeleke a ri ri rin’wana ra timhaka leti nyikaka ntshembo lowu nga pimanisiwiki ni nchumu. Endzhaku ka nxandzuko wa le Edeni eka magidi ya malembe lama hundzeke, Yehovha Xikwembu u kunguhate ku simeka mfumo lowu nga ta lulamisa timhaka, a endla leswaku vanhu vo tshembeka va vuyela exiyin’weni lexi a a lave leswaku va va eka xona ku sukela eku sunguleni​—ku nga ku hanya hilaha ku nga heriki eparadeyisini ya laha misaveni. Ku hava nchumu lowu tsakisaka ku tlula ku tiva leswaku hulumendhe leyi tshembisiweke khale ya karhi ya fuma sweswi etilweni. Mhaka leyi a hi norho kambe i ya xiviri!

Sweswi, Hosi leyi hlawuriweke hi Xikwembu ya karhi ya fuma exikarhi ka valala va yona. (Pisalema 110:2) Emisaveni leyi hombolokeke leyi fularheleke Xikwembu, Mesiya u hetisisa ku rhandza ka Tata wakwe ku nga ku lava hinkwavo lava lavaka ku tiva leswi Xikwembu xi nga swona hakunene ni ku xi gandzela “hi moya ni ntiyiso.” (Yohane 4:24) Ntshembo wo hanya hilaha ku nga heriki ehansi ka Mfumo wa Xikwembu wu pfulekele vanhu va tinxaka hinkwato, lavakulu ni lavatsongo ni va mindhavuko hinkwayo. (Mintirho 10:34, 35) Hi ku khutaza leswaku u amukela lunghelo leri hlamarisaka leri u nyikiwaka rona. Dyondza hi Mfumo wa Xikwembu sweswi, leswaku u tiphina hi ku hanya ehansi ka vulawuri bya wona byo lulama hilaha ku nga heriki!​—1 Yohane 2:17.

[Nhlamuselo ya le hansi]

^ par. 10 Marito ya Yesu ma pfuna ku lulamisa xihoxo lexi endliweke hi Tibibele tin’wana loko ti hundzuluxa rito leri nge “vukona.” Tibibele tin’wana ti hundzuluxele rito leri ti ku “ku ta,” “ku fika” kumbe “ku vuya,” ku nga marito lawa hinkwawo ma vulaka xiendlakalo xa nkarhinyana. Kambe xiya leswaku Yesu a nga fanisanga vukona byakwe ni Ndhambi ya siku ra Nowa, ku nga xiendlakalo lexi endlekeke kan’we ntsena, kambe u byi fanise ni “masiku ya Nowa,” ku nga xiendlakalo lexi endlekeke nkarhi wo karhi. Ku fana ni nkarhi wolowo wa khale, vukona bya Kreste a ku ta va nkarhi wo karhi lowu vanhu a va ta khomeka ngopfu hi timhaka ta vutomi ta siku ni siku lerova va honisa xilemukiso lexi nyikeriwaka.

[Swifaniso eka tluka 8, 9]

Mahungu yo biha lawa hi ma twaka siku ni siku ma nyikela vumbhoni bya leswaku ku nga ri khale ku ta fika swilo leswinene

[N’wini wa Xifaniso]

Antiaircraft gun: U.S. Army photo