Nghena endzeni

Hundzela eka leswi nga endzeni

Eka Vahlayi Va Hina

Eka Vahlayi Va Hina

 Eka Vahlayi Va Hina

HI TSAKELA ku mi tivisa leswaku ku sukela eka nkandziyiso lowu, ku ta va ni ku cinca ko karhi eka xivumbeko xa Xihondzo xo Rindza. Hi nga si hlamusela ku hambana loku nga ta va kona, mi nge hi vula leswi nga ta ka swi nga cinci.

Vito ra magazini lowu leri nge Xihondzo xo Rindza Xi Huwelela Mfumo Wa Yehovha, a ri cincanga. Hikwalaho Xihondzo xo Rindza xi ta hambeta xi tlakusa Yehovha tanihi Xikwembu xa ntiyiso ni ku chavelela vahlayi va xona hi mahungu lamanene ya Mfumo wakwe. Swihloko leswi nga eka tluka 5 ku ya eka 9 enkandziyisweni lowu, swi tlhuvutsa leswaku Mfumo wolowo i yini nileswaku wu ta ta rini. Ku tlula kwalaho, Xihondzo xo Rindza xi khutaza vahlayi leswaku va va ni ripfumelo eka Yesu Kreste, xi seketela ntiyiso wa Bibele naswona xi hlamusela leswi swiendlakalo swa misava swi vulaka swona hi ku pfuniwa hi vuprofeta bya Bibele, hilaha magazini lowu a wu ri karhi wu endla hakona ku ringana makume ya malembe.

Kutani i ku hambana kwihi loku nga ta va kona? Mi nge hi mi hlamusela swilo swin’wana leswintshwa leswi tsakisaka leswi nga ta va eka nkandziyiso wa ti-1 ta n’hweti yin’wana ni yin’wana. *

Eka nkandziyiso wa n’hweti yin’wana ni yin’wana ku ta va ni swiyenge swo hlayanyana leswi nga ta khutaza vanhu leswaku va dya marhambu ya nhloko. Xihloko lexi nge “Xana A Wu Swi Tiva?” xi ta vulavula hi rungula ra xisekelo leri paluxaka nhlamuselo ya timhaka ta le Bibeleni leti hlawuriweke. Xihloko lexi nge “Tshinela Eka Xikwembu” xi ta kandziyisa tindzimana to karhi ta le Bibeleni ta leswi hi nga swi dyondzaka hi Yehovha. Xiyenge lexi nge “Vahlayi Va Hina Va Vutisa” xi ta tlhuvutsa tinhlamulo ta swivutiso leswi tolovelekeke swa Bibele. Hi xikombiso, vanhu vo tala va tivutisa, “Xana Mfumo wa Xikwembu wu le mbilwini ya wena?” U ta kuma nhlamulo ya xivutiso xexo eka tluka 13.

Ku ta va ni swiyenge swo hlayanyana swa nkarhi na nkarhi leswi endleriweke ku pfuna mindyangu. Xiyenge lexi nge “Magoza Ya Nkoka Ya Ku Va Ni Ntsako eNdyangwini,” lexi nga ta humelela ka mune hi lembe, xi ta kombisa swiyimo swa xiviri swa swiphiqo swa le mindyangwini xi tlhela xi kombisa ndlela leyi misinya ya milawu ya Bibele yi nga pfunaka ha yona ku tlhantlha swiphiqo sweswo. Xiyenge lexi nge “Dyondzisa Vana Va Wena” lexi vatswari va faneleke va xi hlaya ni vana va vona, ni lexi nge “Ta Vantshwa Va Hina” lexi nga ta pfuna vantshwa va tsakela ku hlaya Bibele, swi ta cincana eka nkandziyiso wa n’hweti yin’wana ni yin’wana.

Swiyenge swin’wana leswi engetelekeke swi ta humelela ka mune hi lembe. Xiyenge lexi nge “Tekelela Ripfumelo Ra Vona” xi ta hi khutaza ku landzela xikombiso xa munhu loyi ku vulavuriwaka ha yena eBibeleni. Hi xikombiso, eka tluka 18 ku ya eka 21 enkandziyisweni lowu, u ta hlaya rungula leri khutazaka malunghana na muprofeta Eliya ni ku dyondza ndlela leyi hi nga tekelelaka ripfumelo rakwe ha yona. Xiyenge lexi nge “Papila Leri Humaka . . .” xi ta va ni xiviko lexi tsariweke hi un’wana wa varhumiwa ni vanhu van’wana lava nga etindhawini to hambana-hambana ta misava. Xiyenge lexi nge “Leswi Hi Swi Dyondzaka Eka Yesu” xi ta va ni tidyondzo ta xisekelo ta Bibele leti hlamuseriwaka hi ndlela yo olova.

Ha tiyiseka leswaku Xihondzo xo Rindza xi ta hambeta xi va lexi tsakisaka eka vahlayi lava xiximaka Bibele ni lava lavaka ku tiva leswi buku leyi yi swi dyondzisaka hakunene. Hi tshemba leswaku magazini lowu wu ta ku pfuna leswaku u enerisa ku navela ka wena ko lava ku tiva ntiyiso wa Bibele.

VAKANDZIYISI

[Nhlamuselo ya le hansi]

^ par. 4 Sweswi ku ta humesiwa minkandziyiso yimbirhi ya Xihondzo xo Rindza. Nkandziyiso wa ti-1 ta n’hweti wu ta endleriwa vanhu hinkwavo. Kasi wa ti-15 wu ta va nkandziyiso wa vandlha lowu Timbhoni ta Yehovha ti nga ta wu dyondza eminhlanganweni ya tona ya vandlha, leyi un’wana ni un’wana a amukelekaka eka yona.