Nghena endzeni

Hundzela eka leswi nga endzeni

“Xana Ndzi Ta Chava Mani?”

“Xana Ndzi Ta Chava Mani?”

 “Xana Ndzi Ta Chava Mani?”

“Hambiloko nyimpi yo ndzi pfukela, ni hi nkarhi wolowo ndzi ta va ni ntshembo.”—PS. 27:3.

HI KU YA HI TINDZIMANA LETI LANDZELAKA, I YINI LESWI NGA KU PFUNAKA LESWAKU U VA NI XIVINDZI?

Pisalema 27:1

Pisalema 27:4

Pisalema 27:11

1. I yini leswi Pisalema 27 yi nga ta hi pfuna leswaku hi swi twisisa?

HA YINI ntirho wa hina wo chumayela wu hambeta wu kula hambileswi swiyimo swa misava swi yaka swi nyanya? Ha yini hi tirhisa nkarhi ni matimba ya hina yo tala hi ku tirhandzela entirhweni wo chumayela hambileswi ikhonomi ya misava yi nga eku tsekatsekeni? Hi nga swi kotisa ku yini ku tshama hi ri ni xivindzi hambiloko vanhu vo tala va chava leswi vumundzuku byi va khomeleke swona? Risimu leri huhuteriweke ra Hosi Davhida leri tsariweke eka Pisalema 27, ri hlamula swivutiso leswi.

2. Ku chava ku nga endla leswaku munhu a titwa njhani kambe i yini leswi hi nga tiyisekaka ha swona?

2 Davhida u sungule pisalema leyi hi marito lama nge: “Yehovha i ku vonakala ka mina ni ku ponisiwa ka mina. Xana ndzi ta chava mani? Yehovha i khokholo ra vutomi bya mina. Xana ndzi ta chava mani?” (Ps. 27:1) Ku chava ku nga heta munhu matimba lerova a nga koti ku endla nchumu. Kambe munhu loyi a tshembaka Yehovha a nga fanelanga a chava nchumu. (1 Pet. 3:14) Loko hi endla leswaku Yehovha a va khokholo ra hina, hi ta ‘tshama hi sirhelelekile naswona a hi nge kavanyetiwi hi ku chava khombo.’ (Swiv. 1:33; 3:25) Ha yini?

“YEHOVHA I KU VONAKALA KA MINA NI KU PONISIWA KA MINA”

3. Yehovha i ku vonakala ka hina hi ndlela yihi, kambe i yini leswi hi faneleke hi swi endla?

3 Xigego lexi nge “Yehovha i ku vonakala ka mina,” xi kombisa leswaku Yehovha u hi dyondzisa ntiyiso lowu hi ntshunxaka emunyameni wa moya. (Ps. 27:1) Rivoni ra xiviri ri nga endla leswaku hi vona khombo kumbe nchumu lowu nga hi khugulaka endleleni, kambe a ri nge wu susi nchumu wolowo. Hina hi fanele hi wu papalata. Hilaha ku fanaka, Yehovha u hi byela leswi swiendlakalo swa misava swi vulaka swona. U tlhela a hi lemukisa hi makhombo ya mafambiselo lawa ya  swilo. U hi nyika milawu leyi nga eBibeleni leyi pfunaka minkarhi hinkwayo kambe hi fanele hi yi tirhisa. Loko hi endla tano, hi ta va ni vutlhari lebyikulu ku tlula valala kumbe vadyondzisi va hina.—Ps. 119:98, 99, 130.

4. (a) Ha yini Davhida a vule hi ku tiyiseka a ku: “Yehovha i ku . . . ponisiwa ka mina”? (b) Yehovha u ta ma ponisa rini malandza yakwe?

4 Marito ya Davhida lama nga eka Pisalema 27:1 ma kombisa leswaku u fanele a tsundzuke ndlela leyi Yehovha a n’wi kutsuleke kumbe a n’wi sirheleleke ha yona enkarhini lowu hundzeke. Hi xikombiso, Yehovha u n’wi kutsule “eka rhuva ra nghala ni le ka rhuva ra bere.” Nakambe u n’wi nyike matimba yo hlula Goliyadi lowa xihontlovila. Endzhaku ka nkarhi, Hosi Sawulo u ringete ku tlhava Davhida hi fumu kambe minkarhi hinkwayo Yehovha u n’wi kutsurile. (1 Sam. 17:37, 49, 50; 18:11, 12; 19:10) A swi hlamarisi leswi Davhida a vuleke hi ku tiyiseka a ku: “Yehovha i ku . . . ponisiwa ka mina.” Yehovha u ta tlhela a ponisa malandza yakwe hilaha a poniseke Davhida hakona. U ta ma ponisa rini? “Enhlomulweni lowukulu” lowu taka.—Nhlav. 7:14; 2 Pet. 2:9.

TSUNDZUKA SWIENDLAKALO LESWI YEHOVHA A KU PFUNEKE EKA SWONA

5, 6. (a) Ku tsundzuka swiendlakalo leswi Yehovha a hi pfuneke eka swona swi hi pfuna njhani leswaku hi va ni xivindzi? (b) Ndlela leyi Yehovha a pfuneke malandza yakwe ha yona enkarhini lowu hundzeke yi hi tiyisa njhani leswaku hi hambeta hi va ni xivindzi?

5 Eka Pisalema 27:2, 3 hi kuma nchumu wa nkoka lowu nga hi pfunaka leswaku hi va ni xivindzi. (Yi hlaye.) Davhida u tsundzuke swiendlakalo leswi Yehovha a n’wi poniseke eka swona. (1 Samuwele 17:34-37) Swiendlakalo sweswo swi n’wi nyike xivindzi xo langutana ni swiyimo swo tika swinene. Xana na wena u va ni xivindzi loko u tsundzuka swiendlakalo leswi Yehovha a ku pfuneke eka swona? Hi xikombiso, xana u tshame u khongela hi mbilu hinkwayo malunghana ni xiphiqo lexi a xi ku dyisa mbitsi ivi u vona ndlela leyi ha yona Yehovha a ku nyikeke vutlhari kumbe matimba yo langutana na xona? Kumbe, xana wa yi tsundzuka ndlela leyi ha yona Yehovha a suseke swihinga leswi a swi ku sivela ku n’wi tirhela u tsakile kumbe ndlela leyi a ku pfuleleke nyangwa leyikulu leyi yisaka entirhweni? (1 Kor. 16:9) U titwa njhani sweswi loko u tsundzuka swiendlakalo sweswo? Xana a swi ku endli u khorwiseka leswaku Yehovha u ta ku pfuna leswaku u hlula kumbe u tiyiselela swihinga kumbe maxangu yo tika swinene?—Rhom. 5:3-5.

6 Hi nga endla yini loko mfumo lowu nga ni matimba wo kunguhata ku herisa Timbhoni ta Yehovha hinkwato? Vavanuna vo tala va manguva  lawa va ringetile ku endla tano kambe va tsandzekile. Ku tsundzuka ndlela leyi Yehovha a pfuneke vanhu vakwe ha yona enkarhini lowu hundzeke, swi ta hi nyika xivindzi xo langutana ni miringo leyi hi nga hlangavetanaka na yona enkarhini lowu taka.—Dan. 3:28.

RHANDZA VUGANDZERI BYA NTIYISO

7, 8. (a) Hi ku ya hi Pisalema 27:4, i yini leswi Davhida a swi kombeleke eka Yehovha? (b) I yini tempele leyikulu ya Yehovha ya moya naswona u gandzeriwa njhani eka yona?

7 Nchumu wun’wana wa nkoka lowu nga endlaka leswaku hi va ni xivindzi i ku rhandza vugandzeri bya ntiyiso. (Hlaya Pisalema 27:4.) Enkarhini wa Davhida, “yindlu ya Yehovha” a ku ri tabernakela. Davhida hi yena a endleke malunghiselelo ya ndlela leyi n’wana wakwe Solomoni a a ta yi aka ha yona tempele. Eka malembe ya madzana lama hundzeke, Yesu u vule leswaku ku ta fika nkarhi lowu swi nga ta ka swi nga ha bohi ku va vanhu va gandzela Yehovha etempeleni leswaku va va lava amukelekaka eka Yena. (Yoh. 4:21-23) Eka Vaheveru ndzima 8 ku ya eka 10, muapostola Pawulo u kombise leswaku tempele leyikulu ya moya yi sungule ku va kona loko Yesu a khuvuriwa hi 29 C.E., xisweswo a tinyiketela ku endla ku rhandza ka Yehovha. (Hev. 10:10) Tempele leyi leyikulu ya moya i lunghiselelo leri Yehovha a ri endleke leswaku hi kota ku N’wi gandzela hi ndlela leyi amukelekaka loko hi kombisa ripfumelo eka gandzelo ra Yesu ra nkutsulo. Hi n’wi gandzela njhani eka yona? Hi ku khongela “hi timbilu ta ntiyiso exitiyisekisweni lexi heleleke xa ripfumelo”; hi ku chumayela handle ko chava; hi ku khathalela ni ku khutaza vamakwerhu loko hi ri eminhlanganweni ya hina ya vandlha ni hi nkarhi wa vugandzeri bya ndyangu. (Hev. 10:22-25) Ku tlangela vugandzeri bya ntiyiso swa hi tiyisa emasikwini lawa yo hetelela ya mangava.

8 Emisaveni hinkwayo, malandza yo tshembeka ya Yehovha ma ndlandlamuxa ntirho wa wona wo chumayela, ma dyondza tindzimi tin’wana ni ku ya chumayela etindhawini leti ku nga ni xilaveko lexikulu xa vahuweleri va Mfumo. Ku fana na mupisalema, swiendlo swa wona swi kombisa leswaku ku ni nchumu wun’we ntsena lowu ma wu kombelaka eka Yehovha. Ma lava ku tiphina hi ku vona ku tsakisa ka Yehovha ni ku hlanganyela entirhweni wo kwetsima hambi ko ba lexi dumaka.—Hlaya Pisalema 27:6.

TSHEMBELA EKA MPFUNO WA YEHOVHA

9, 10. Xi vula yini xitiyisekiso lexi nga eka Pisalema 27:10?

9 Davhida u kombise ndlela leyi a a wu tshemba swinene ha yona mpfuno wa Yehovha hi ku vula a ku: “Loko tatana na manana vo ndzi tshika, Yehovha u ta ndzi teka.” (Ps. 27:10) Loko hi kambisisa swiendlakalo leswi hlamuseriwaka eka 1 Samuwele ndzima 22, hi nga ha gimeta hi ku vula leswaku vatswari va Davhida a va n’wi tshikanga. Hambiswiritano, vanhu vo tala namuntlha va boheke ku tiyiselela ku fularheriwa hi mindyangu ya vona. Kambe vo tala va vona va kume mpfuno ni nsirhelelo evandlheni ra Vukreste.

10 Tanihi leswi Yehovha a lunghekeleke ku seketela malandza yakwe loko ma fularheriwa hi mindyangu ya wona, xana a nge tlheli a ma hlayisa loko ma langutana ni maxangu man’wana yo hambana-hambana? Hi xikombiso, loko hi karhateka hi ndlela leyi hi nga ta wu khathalela ha yona ndyangu wa hina hi tlhelo ra nyama, xana a hi nge n’wi tshembi Yehovha leswaku u ta hi pfuna? (Hev. 13:5, 6) Wa swi twisisa swiyimo ni swilaveko swa malandza yakwe hinkwawo yo tshembeka.

11. Ndlela leyi hi n’wi tshembaka ha yona Yehovha yi nga va khumba njhani vanhu van’wana? Kombisa.

11 Xiya xikombiso xa Victoria, ku nga xichudeni xin’wana xa Bibele xa le Liberia. Loko a ri kusuhi ni ku khuvuriwa, wanuna loyi a a tshama na yena u fambe a n’wi siya ni vana vanharhu. Hambileswi a a nga ri na yona ndhawu yo tshama naswona a a nga tirhi, u hambete a endla nhluvuko hi tlhelo ra moya. Endzhaku ka loko a khuvuriwile, xinhwanyatana xakwe xa malembe ya 13 xi thumbe xipachi lexi a xi tele hi mali. Leswaku va papalata ndzingo wo teka mali yoleyo, va endle xiboho  xo ka va nga yi hlayeli. Ematshan’weni ya sweswo, hi ku hatlisa va tihlanganise ni socha leri a ri lahlekeriwe hi xipachi xexo. Ri va byele leswaku loko vanhu hinkwavo a va fana ni Timbhoni ta Yehovha, misava hinkwayo a yi ta va ndhawu leyinene naswona a yi ta va ni ku rhula lokukulu. Victoria u hlayele socha rero xitshembiso xa le Bibeleni xa leswaku Yehovha u ta tisa misava leyintshwa. Leswi ri tsakisiweke hi ku tshembeka ka Victoria, ri n’wi pambulele mali yo nyawula eka leyi thumbiweke. Hakunene, ripfumelo leri tiyeke leri Timbhoni ta Yehovha ti nga na rona ra leswaku Yehovha u ta ti khathalela ri endla leswaku ti tshembeka.

12. Hi va hi kombisa yini loko hi hambeta hi tirhela Yehovha hambiloko hi heleriwe hi ntirho? Kombisa.

12 Ehleketa ndlela leyi Thomas, muhuweleri un’wana loyi a nga khuvuriwangiki wa le Sierra Leone, a faneleke a titwe ha yona. U sungule ku dyondzisa exikolweni xa le henhla kambe ku hele kwalomu ka lembe a nga si hola hikwalaho ka leswi maphepha ya ntirho a ma nga si lulamisiwa. Hi wihi nchumu wo hetelela lowu a a fanele a wu endla emahlweni ko va a hakeriwa mali yakwe? A a fanele a hlangana ni n’wini wa xikolo loyi a a ri mufundhisi leswaku a n’wi vutisa swivutiso ku vona loko a faneleka ku kuma ntirho wolowo. Mufundhisi yoloye u n’wi byele leswaku tidyondzo ta Timbhoni ta Yehovha a ti fambisani ni milawu ya xikolo xexo. Kutani u byele Thomas leswaku a hlawula ntirho kumbe vukhongeri byakwe. Xisweswo, u tshike ntirho wolowo swin’we ni mali hinkwayo leyi a a kweletiwa yona ivi a kuma ntirho wun’wana wa ku lunghisa swiya-ni-moya ni tiselfoni. Hilaha xikombiso lexi ni swin’wana swo hlayanyana leswi fanaka na xona swi swi kombisaka hakona, a hi fanelanga hi chava leswaku loko ho tshika ntirho a hi nge swi koti ku tikhathalela hi tlhelo ra nyama hikuva Yehovha u ta hi khathalela hileswi a nga Muvumbi wa swilo hinkwaswo ni Musirheleri wa vanhu vakwe.

13. Ntirho wo chumayela hi Mfumo wu famba njhani ematikweni lama nga evuswetini?

13 Ematikweni yo tala lawa ma nga evuswetini, vahuweleri va Mfumo va tshama va khomekile hi ntirho wo chumayela. Ha yini? Rhavi rin’wana ri tsale ri ku: “Vanhu vo tala lava pfumelaka ku fambiseriwa tidyondzo ta Bibele a va tirhi xisweswo va ni nkarhi wo tala wo dyondza. Vamakwerhu na vona va ni nkarhi wo tala wo chumayela. Vanhu lava ngopfu-ngopfu va tshamaka etindhawini leti nga evuswetini lebyikulu a swi kali swi lava u va byela leswaku hi hanya eminkarhini ya makumu; va byi vona vumbhoni bya sweswo kun’wana ni kun’wana laha va nga kona.” Murhumiwa un’wana loyi a heteke malembe yo tlula 12 etikweni leri hi xiringaniso muhuweleri ha un’we a fambisaka tidyondzo to tlula tinharhu ta Bibele u te: “Leswi vahuweleri vo tala va hanyaka vutomi byo olova naswona va nga riki na swilo swo tala swo va kavanyeta, va ni nkarhi wo tala wo chumayela ni wo fambisa tidyondzo ta Bibele.”

14. Hi tihi tindlela leti ntshungu lowukulu wu nga sirheleriwaka ha tona hi Xikwembu?

14 Yehovha u tshembise ku pfuna, ku sirhelela ni ku kutsula malandza yakwe tanihi ntlawa hi tlhelo ra nyama ni ra moya naswona ha n’wi  tshemba. (Ps. 37:28; 91:1-3) Ntshungu lowu nga ta pona “enhlomulweni lowukulu” wu fanele wu ri wukulu swinene. (Nhlav. 7:9, 14) Xisweswo, wu ta sirheleriwa leswaku wu nga lovisiwi hinkwawo emasikwini yo hetelela ya mafambiselo lawa ya swilo. Wu ta nyikiwa swilo hinkwaswo leswi wu swi lavaka leswaku wu kota ku tiyisela miringo ni ku hlayisa vuxaka bya wona na Yehovha. Nakambe Yehovha u ta sirhelela vanhu vakwe eka xiyenge xo hetelela xa nhlomulo lowukulu.

“OHO YEHOVHA, NDZI LETELE MALUNGHANA NI NDLELA YA WENA”

15, 16. Hi vuyeriwa njhani loko hi yingisa nkongomiso wa Xikwembu? Kombisa.

15 Leswaku hi tshama hi ri ni xivindzi, hi fanele hi hambeta hi dyondzisiwa hi Xikwembu. Leswi swi vonaka kahle eka xikhongelo xa Davhida lexi nge: “Oho Yehovha, ndzi letele malunghana ni ndlela ya wena, u ndzi rhangela endleleni ya vululami hikwalaho ka valala va mina.” (Ps. 27:11) Ku hanya hi ku pfumelelana ni xikhongelo lexi swi vula ku wu yingisa hi vurhon’wana nkongomiso wun’wana ni wun’wana lowu sekeriweke eBibeleni, lowu hi wu kumaka enhlengeletanweni ya Yehovha ni ku namba hi wu tirhisa. Hi xikombiso, vanhu vo tala lava hakeleke swikweleti swa vona swa swilo leswi swi nga riki swa nkoka, va nga vula leswaku ku tirhisa xitsundzuxo xa vutlhari xo hanya vutomi byo olova swi va vuyerisile eminkarhini ya sweswinyana ya ku tsekatseka ka ikhonomi. Ematshan’weni yo karhateka hi nhundzu ya vona leyi va nga ha kotiki ku yi hakelela, va kota ku ndlandlamuxa ntirho wa vona wa nsimu. Un’wana ni un’wana wa hina u ta va a endla kahle loko a tivutisa a ku, ‘Xana ndzi namba ndzi swi tirhisa swilo leswi ndzi swi dyondzaka eBibeleni ni le ka minkandziyiso ya hlonga ro tshembeka ni ro tlhariha, hambiloko sweswo swi lava leswaku ndzi titsona swo karhi?’—Mat. 24:45.

16 Loko hi pfumelela Yehovha leswaku a hi letela ni ku hi kongomisa endleleni ya vululami, a hi nge vi na xona xivangelo xo chava. Loko phayona rin’wana ra nkarhi hinkwawo ra le United States ri endle xikombelo xa ntirho lowu a wu ta ri pfuna leswaku ri hambeta ri phayona swin’we ni ndyangu wa rona hinkwawo, mininjhere wa rona u ri byele leswaku a ri nge pfuki ri wu kumile ntirho wolowo loko ri nga ri na yona digri ya le kholichi. Xana leswi swi tshame swi ku humelela lerova u kala u tisola hileswi u ngheneleke ntirho wa nkarhi hinkwawo ematshan’weni yo lava dyondzo leyi tlakukeke? Endzhaku ka mavhiki mambirhi, mininjhere yoloye u heleriwe hi ntirho kutani mininjhere un’wana u vutise makwerhu yoloye malunghana ni tipakani takwe. Handle ko tilumaluma u n’wi hlamusele leswaku yena ni nghamu yakwe i Timbhoni ta Yehovha leti nga vachumayeri va nkarhi hinkwawo naswona va lava ku ya emahlweni ni ntirho wolowo. Loko makwerhu yoloye a nga si vula leswi engetelekeke, mininjhere yoloye u te: “Ndzi swi xiyile leswaku u hambanile ni vanhu van’wana! Loko tatana se a vabyela ku fa, Timbhoni-kuloni timbirhi a ti ta ti ta n’wi hlayela Bibele siku ni siku. Embilwini ya mina ndzi tibyele leswaku loko ndzo tshuka ndzi pfulekeriwa hi nkarhi wo pfuna Mbhoni ya Yehovha, ndzi ta yi pfuna hi mbilu yo basa.” Hi xamundzuku xa kona, makwerhu yoloye u nyikiwe ntirho lowu mininjhere wakwe wo sungula a aleke ku n’wi nyika wona. Hakunene loko hi rhangisa timhaka ta Mfumo ku sungula evuton’wini bya hina, Yehovha u ta hetisisa xitshembiso xakwe xo hi nyika swilaveko swa hina swa nyama.—Mat. 6:33.

HI FANELE HI VA NI RIPFUMELO NI NTSHEMBO

17. I yini leswi nga ta hi pfuna leswaku hi kota ku langutana ni vumundzuku hi xivindzi?

17 Davhida u kandziyise nkoka wo va ni ripfumelo ni ntshembo hi ku vula a ku: “Loko a ndzi nga vanga ni ripfumelo ro vona vunene bya Yehovha etikweni ra lava va hanyaka—!” (Ps. 27:13) Hakunene vutomi bya hina a byi nga ta va na xikongomelo loko Xikwembu a xi nga hi nyikanga ntshembo niloko a hi nga swi tivi swilo leswi boxiweke eka Pisalema 27! Kutani a hi hambeteni hi khongela hi ku tiyiseka hi kombela matimba ni ku kutsuriwa tanihi leswi hi langutanaka ni swiendlakalo leswi hi yisaka eka Armagedoni.—Hlaya Pisalema 27:14.

[Swivutiso Swa Dyondzo]

[Xifaniso lexi nga eka tluka 23]

Davhida u kume matimba loko a tsundzuka swiendlakalo leswi Yehovha a n’wi kutsuleke eka swona

[Xifaniso lexi nga eka tluka 25]

Xana ku tsekatseka ka ikhonomi ku hi pfulela ndlela yo ndlandlamuxa ntirho wa hina wa nsimu?