Nghena endzeni

Hundzela eka leswi nga endzeni

Va Tinyikele Hi Ku Tirhandzela—Le Ecuador

Va Tinyikele Hi Ku Tirhandzela—Le Ecuador

 Va Tinyikele Hi Ku Tirhandzela—Le Ecuador

JAHA rin’wana ra Mukreste ra le Italy leri vuriwaka Bruno a ri fanele ri endla xiboho xa nkoka. A ra ha ku heta xikolo naswona a ri pasele ehenhla. Kutani maxaka ni vadyondzisi va rona a va ri khutaza leswaku ri kuma dyondzo ya le henhla. Kambe emalembeni ma nga ri mangani lama hundzeke, ri tinyiketele eka Xikwembu naswona ri xi tshembise leswaku ri ta rhangisa ku rhandza ka xona evuton’wini bya rona. I yini leswi ri swi hlawuleke? Ri ri: “Ndzi khongele eka Yehovha ndzi n’wi byela leswaku ndzi ta hanya hi ku pfumelelana ni ku tinyiketela ka mina naswona ndzi ta rhangisa ku rhandza kakwe evuton’wini bya mina. Ndzi tlhele ndzi n’wi byela leswaku a ndzi lavi ku hanya vutomi lebyi phirhaka kambe ndzi lava ku hanya vutomi lebyi eka byona ndzi nga ta endla mintirho yo tala entirhweni wakwe.”

 Endzhaku ka malembe ma nga ri mangani, Bruno u tikume a ri etikweni ra Ecuador le Amerika Dzonga. U ri: “Yehovha u hlamule xikhongelo xa mina hi ndlela leyi a ndzi nga yi rindzelanga.” Lexi n’wi hlamariseke loko a fika eEcuador hileswi a hlanganeke ni vantshwa van’wana lava na vona va rhurheleke kwalaho leswaku va ya tirhela Yehovha hilaha ku heleleke.

VANTSHWA LAVA ‘RINGAKA YEHOVHA’

Ku fana ni vantshwa van’wana va madzana emisaveni, Bruno u amukeleke xirhambo xa Yehovha lexi nge: “Ndzi kombela mi ndzi ringa, . . . Mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.” (Mal. 3:10) Leswi vantshwa volavo va susumetiweke hi ku rhandza Yehovha, va endle xiboho xo n’wi ‘ringa’ hi ku nyikela hi ku tirhandzela hi nkarhi, matimba ni rifuwo ra vona leswaku va endla ku rhandza kakwe etikweni leri nga ni xilaveko lexikulu xa vahuweleri va Mfumo.

Endzhakunyana ka loko vatirhi lava va ku tirhandzela va fikile exiavelweni xa vona lexintshwa, va tivonele hi ya vona leswaku “ntshovelo i wukulu, kambe vatirhi a hi vangani.” (Mat. 9:37) Hi xikombiso, Jaqueline wa le Jarimani, u tsalele rhavi ra le Ecuador a ku: “Se ndzi ni malembe lama tlulaka mambirhi ndzi chumayela laha Ecuador naswona ndzi ni tidyondzo ta Bibele ta 13, mune wa tona ti va kona eminhlanganweni nkarhi ni nkarhi. Hakunene sweswo swa tsakisa!” Chantal wa le Canada, u ri: “Hi 2008, ndzi rhurhele endhawini yin’wana leyi nga eribuweni ra Ecuador  laha a ku ri ni vandlha rin’we ntsena. Sweswi ku ni mavandlha manharhu ni maphayona lama tlulaka 30 endhawini yoleyo. Hakunene swa tsakisa ku vona vanhu vo tala lavantshwa va endla nhluvuko!” U tlhele a ku: “Sweswinyana ndza ha ku rhurhela edorobeni leri nga eTintshaveni ta Andes, leri laha ri nga kona ku nga timitara ta 2 743 ku suka ehansi ka tintshava teto. Doroba rero ri ni vaaki lava tlulaka 75 000 kambe ko va ni vandlha rin’we ntsena. Vaaki va kona va ma tsakela mahungu lamanene. Ndza tiphina hi ntirho wa mina wo chumayela.”

MINTLHONTLHO LEYI NGA KONA

I ntiyiso leswaku ku rhurhela etikweni rimbe a hi matlangwana. Entiyisweni, vantshwa van’wana va langutana ni mintlhontlho va nga si rhurhela etikweni rimbe. Kayla wa le United States, u ri: “Loko ndza ha ri ekaya, vamakwerhu van’wana lava xikongomelo xa vona a ku ri ku ndzi pfuna va vule marito lama nga khutaziki. A va nga swi twisisi leswaku ha yini ndzi lava ku rhurhela etikweni rimbe leswaku ndzi ya phayona kona. Minkarhi yin’wana sweswo swi ndzi endle ndzi tivutisa ndzi ku, ‘Xana xiboho lexi ndzi lavaka ku xi teka i xa vutlhari hakunene?’” Hambiswiritano, Kayla u endle xiboho xo famba. U ri: “Ku khongela eka Yehovha nkarhi ni nkarhi ni ku vulavula ni vamakwerhu lava wupfeke swi ndzi pfune ku twisisa leswaku Yehovha wa va katekisa vanhu lava nga ni moya wo tinyiketela.”

Eka vanhu vo tala, ku dyondza ririmi rin’wana i ntlhontlho. Siobhan wa le Ireland, u ri: “A swi ndzi vava leswi a ndzi nga swi koti ku vulavula [Xipaniya]. Ndzi boheke ku lehisa mbilu, ndzi xi dyondza hi ku tiyimisela ni ku tihleka loko ndzi endla swihoxo.” Anna wa le Estonia, u ri: “Ku tolovela maxelo lama hisaka swinene, ritshuri ro tala ni ku hlamba hi mati yo titimela a swi nga ri nchumu loko swi pimanisiwa ni ku dyondza Xipaniya. Minkarhi yin’wana a ndzi titwa onge ndzi nga lan’wa. Ndzi dyondze leswaku ndzi fanele ndzi languta nhluvuko lowu ndzi wu endlaka ematshan’weni yo languta swihoxo swa mina.”

Ntlhontlho wun’wana i ku tsundzuka ekaya. Jonathan wa le United States, u ri: “Endzhakunyana ka loko ndzi fike laha Ecuador, ndzi hele matimba hileswi a ndzi ri ekule ni ndyangu wa ka hina swin’we ni vanghana va mina. Kambe dyondzo ya munhu hi yexe ni ku ya ensin’wini swi ndzi pfune leswaku ndzi nga va kumbuki ngopfu. Swi nga si ya kwihi, mintokoto yo tsakisa leyi ndzi veke na yona ensin’wini ni vanghana lavantshwa lava ndzi va kumeke evandlheni swi ndzi pfunile leswaku ndzi tlhela ndzi va ni ntsako.”

 Ntlhontlho wun’wana i ku tolovela mahanyelo ya le tikweni rimbe. Swi nga ha endleka leswaku vutomi bya kona byi hambanile ni bya le tikweni ra ka n’wina. Beau wa le Canada, u ri: “Etikweni ra ka n’wina, gezi ni mati swi tshama swi ri kona, kambe laha swilo sweswo swi pfa swi nga vi kona.” Nakambe ematikweni yo tala lama ha hluvukaka ku ni vusweti, vutleketli bya xiyimo xa le hansi ni vanhu vo tala lava nga kotiki ku hlaya ni ku tsala. Ines wa le Austria, u kota ku langutana ni swiyimo swo tano hi ku languta timfanelo letinene ta vanhu va le ndhawini yoleyo. U ri: “Va ni malwandla, musa, va pfunana naswona va titsongahata. Vo tala va vona va swi tsakela swinene ku dyondza leswi engetelekeke hi Xikwembu.”

‘U TA MI KATEKISA KUKONDZA MI NGA HA PFUMALI NCHUMU’

Hambileswi vantshwa lava hinkwavo lava rhurheleke le Ecuador va titsoneke swilo swo tala, va kuma leswaku Yehovha u va nyika “swo tala swinene ku tlula leswi” a va swi languterile. (Efe. 3:20) Entiyisweni, va titwa va ‘katekisiwile swinene lerova a va ha pfumali nchumu.’ (Mal. 3:10) Twana leswi va swi vulaka hi vutirheli bya vona:

Bruno: “Ndzi sungule vutirheli bya mina laha Ecuador endhawini leyi tsakisaka ya Amazon. Endzhaku ka nkarhi, ndzi pfunete entirhweni wo ndlandlamuxaka rhavi ra Ecuador. Sweswi ndzi tirha kona. Loko ndza ha ri eItaly, ndzi endle xiboho xo rhangisa ntirho wa Yehovha evuton’wini bya mina naswona u ndzi nyike vutomi lebyi tsakisaka lebyi teleke hi mintirho yo hambana-hambana evutirhelini byakwe.”

Beau: “Vuxaka bya mina na Yehovha byi tiye ngopfu sweswi hikuva laha Ecuador ndzi tirhisa nkarhi wa mina wo tala entirhweni wakwe. Nakambe ndzi kota ku famba-famba ndzi ya etindhawini to saseka, ku nga nchumu lowu minkarhi hinkwayo a ndzi lava ku wu endla.”

Anna: “A ndzi ehleketa leswaku a ndzi nge swi koti ku hanya vutomi byo fana ni bya varhumiwa hileswi ndzi nga siki nghenelaka vukati. Kambe sweswi ndza swi vona leswaku swa koteka. Ndzi tsakela ku endla vanhu vadyondzisiwa, ku aka Tiholo ta Mfumo ni ku va ni vanghana lavantshwa hikwalaho ka leswi Yehovha a ndzi katekiseke.”

Elke: “Etikweni ra rikwerhu le Austria, a ndzi tshamela ku khongela eka Yehovha ndzi n’wi kombela leswaku a ndzi nyika dyondzo yin’we ntsena ya Bibele. Sweswi ndzi ni tidyondzo ta Bibele ta 15! Ndzi khapakhapa hi ntsako loko ndzi vona tidyondzo ta mina leti endlaka nhluvuko ti tsakela ku dyondza ntiyiso.”

Joel: “Swa vuyerisa ku tirhela Yehovha etikweni rimbe. Swi ku dyondzisa ku titshega swinene hi yena naswona swa tsakisa ku vona ndlela leyi a ma katekisaka ha yona matshalatshala ya wena. Hi lembe ro sungula leri ndzi rhurheleke ha rona laha ndzi suka eUnited States, ntlawa wa hina lowu a wu ri ni vahuweleri va tsevu wu andzile wu va ni vahuweleri va 21 naswona eXitsundzuxweni a hi ri 110.”

KU VURIWA YINI HI WENA?

Xana n’wina vantshwa swiyimo swa n’wina swa mi pfumelela leswaku mi rhurhela etikweni rimbe leri nga ni xilaveko lexikulu xa vahuweleri va Mfumo? I ntiyiso leswaku ku endla xiboho xexo lexikulu swi lava leswaku u hlela swilo hi vukheta. Kambe nchumu wa nkoka lowu lavekaka i ku rhandza Yehovha ni vanhu. Kutani loko u rhandza Yehovha ni vanhu naswona swiyimo swa wena swi ku pfumelela ku rhurhela etikweni rimbe, khongela eka yena hi mhaka yoleyo. Nakambe vulavula ni vatswari va wena lava nga Vakreste swin’we ni vakulu va vandlha malunghana ni ku navela ka wena. U nga ha xiya leswaku na wena u nga swi kota ku hlanganyela entirhweni lowu wo kwetsima lowu tsakisaka ni lowu vuyerisaka swinene.

[Marito lama tshahiweke exihlokweni lama nga eka tluka 3]

“Ku khongela eka Yehovha nkarhi ni nkarhi ni ku vulavula ni vamakwerhu lava wupfeke swi ndzi pfune ku twisisa leswaku Yehovha wa va katekisa vanhu lava nga ni moya wo tinyiketela.”—Kayla wa le United States

[Bokisi/Xifaniso lexi nga eka tluka 6]

Ndlela leyi u nga tilunghiselelaka ha yona ku ya chumayela etikweni rimbe

• Vana ni dyondzo ya munhu hi yexe nkarhi ni nkarhi

• Hlaya Vutirheli Bya Hina Bya Mfumo bya August 2011 matluka 4-6

• Vulavula ni van’wana lava tshameke va ya chumayela etikweni rimbe

• Endla ndzavisiso hi ndhavuko ni matimu ya tiko ra kona

• Endla khoso ya xisekelo ya ririmi ra kona

[Bokisi/Xifaniso lexi nga eka tluka 6]

Van’wana lava rhurheleke ematikweni mambe va tikhathalela hi ku . . .

• tirha tin’hweti ti nga ri tingani lembe ni lembe ematikweni ya ka vona

• hirhisa tiyindlu kumbe mabindzu ya vona

• tirha va tirhisa Internet

[Swifaniso leswi nga eka matluka 4, 5]

1 Jaqueline wa le Jarimani

2 Bruno wa le Italy

3 Beau wa le Canada

4 Siobhan wa le Ireland

5 Joel wa le United States

6 Jonathan wa le United States

7 Anna wa le Estonia

8 Elke wa le Austria

9 Chantal wa le Canada

10 Ines wa le Austria