Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

Xikombiso xa Solomoni xi nga va xilemukiso eka hina hi ndlela yihi?

Xikwembu xi katekise Hosi Solomoni xi tlhela xi n’wi tirhisa. Hambiswiritano, Solomoni u tshike ku yingisa nawu wa Xikwembu enkarhini wa ku fuma kakwe. U teke n’wana wa Faro loyi a a gandzela swikwembu swa hava, u teke vasati vo tala naswona u pfumelele vasati volavo vambe leswaku va n’wi kucetela ku gandzela swikwembu swa mavunwa. Hi fanele hi tivonela leswaku hi nga ngheniwi hi langutelo leri hoxeke hakatsongo-tsongo. (Det. 7:1-4; 17:17; 1 Tih. 11:4-8)—12/15, matluka 10-12.

Ha yini hi nga vulaka leswaku Sara a a ri wansati loyi a a chava Xikwembu tlhelo nsati lonene?

Loko Xikwembu xi lerise Abrahama leswaku a suka eUra, a swi vula leswaku a a ta siya vandyangu wakwe, vanghana ni mukhuva lowu a a hanya ha wona leswaku a ya endhawini leyi a a nga yi tivi. Kambe Sara u khomisane na yena naswona a a tshemba leswaku Xikwembu xi ta n’wi katekisa. A a xixima Abrahama naswona u kombise timfanelo letinene.—1/1, tluka 8.

Ha yini Yehovha a kombele Abrahama leswaku a endla gandzelo hi n’wana wakwe loyi a a n’wi rhandza swinene?

I swa nkoka ku tsundzuka leswaku Xikwembu a xi n’wi pfumelelanga Abrahama leswaku a endla gandzelo hi Isaka. Drama leyi yi kombisa ndlela leyi Xikwembu a xi ta twa ku vava ha yona loko xi nyikela hi N’wana wa xona, Yesu.—1/1, tluka 23.

I yini leswi kombisaka leswaku ku sukela hi lembe-xidzana ro sungula ku ya emahlweni, a ku ri ni Vakreste van’wana va ntiyiso lava totiweke emisaveni?

Exifanisweni xa Yesu lexi vulavulaka hi “koroni” ni “mfava,” “mbewu leyinene” yi fanekisela “vana va mfumo.” (Mat. 13:24-30, 38) Mfava a wu ta kula swin’we ni koroni ku fikela hi siku ra ntshovelo. Xisweswo, hambileswi hi nga va tiviki hi ku kongoma vanhu lava fanekiseriwaka hi koroni, minkarhi hinkwayo va fanele va ve kona ku ta fikela namuntlha.—1/15, tluka 7.

Hi swihi swiendlakalo leswi nga ta hi yisa hi ku kongoma eka Armagedoni?

Matiko ma ta vula xitiviso xa nkoka lexi nge “Ku rhula ni nsirhelelo!” (1 Tes. 5:3) Tihulumendhe ti ta hlasela vukhongeri bya mavunwa. (Nhlav. 17:15-18) Vagandzeri va ntiyiso va ta hlaseriwa. Kutani makumu ma ta fika.—2/1, tluka 9.

Hi nga lwisana njhani ni mboyamelo wa mavondzo?

Magoza lama landzelaka ma nga hi pfuna: Tikarhatele ku hlakulela rirhandzu ni xinakulobye xa vumakwerhu, tihlanganise ni vanhu lava chavaka Xikwembu, lava tindlela to endla leswinene, ‘tsaka ni lava tsakaka.’ (Rhom. 12:15)—2/15, matluka 16-17.

I vamani lava vulavulaka Xinahuatl naswona i yini leswi va endleriwaka swona?

A ku ri ririmi ra Vaaztec va khale naswona ra ha vulavuriwa hi vanhu lava ringanaka 1,5 wa timiliyoni eMexico. Timbhoni ti chumayela hi Xinahuatl naswona minkandziyiso yin’wana ya hina ya kumeka hi ririmi rero.—3/1, matluka 13-14.

Loko u nyika vanhu switsundzuxo, i yini leswi u faneleke u swi tsundzuka?

Xi twisise kahle xiyimo xa loyi a kombelaka xitsundzuxo. Papalata ku hatlisela ku hlamula. Titsongahate u tlhela u tirhisa Rito ra Xikwembu. Loko swi koteka, tirhisa minkandziyiso leyi sekeriweke eBibeleni. Papalata ku endlela van’wana swiboho.—3/15, matluka 7-9.

Yesu u khutaze vayingiseri vakwe leswaku va famba tikhilomitara timbirhi. (Mat. 5:41) Xana a a vula yini?

Hi nkarhi wolowo eIsrayele, valawuri va Varhoma a va sindzisa munhu ku endla ntirho. Loko Yesu a khutaza vayingiseri vakwe leswaku va famba tikhilomitara timbirhi, a a vula leswaku a va fanele va endla ntirho lowu valawuri va va lerisaka leswaku va wu endla handle ko va hlundzukela.—4/1, tluka 9.