Nghena endzeni

Hundzela eka leswi nga endzeni

U Tiyisile, Lowu I Nkandziyiso Wa Vandlha!

U Tiyisile, Lowu I Nkandziyiso Wa Vandlha!

 U Tiyisile, Lowu I Nkandziyiso Wa Vandlha!

Hi wu endle hi vuntshwa nkandziyiso wa vandlha leswaku wu koka mahlo nileswaku wu ku pfuna loko u dyondza Rito ra Yehovha ra ntiyiso wa risima.—Ps. 1:2; 119:97.

Eka malembe ya mune lama hundzeke, hi sungule ku kandziyisa minkandziyiso yimbirhi ya Xihondzo xo Rindza, wa vanhu hinkwavo ni wa hina Timbhoni ta Yehovha swin’we ni swichudeni swa hina swa Bibele leswi endlaka nhluvuko.

Malunghana ni nkandziyiso wa vandlha, makwerhu un’wana wa xinuna loyi a nga ni malembe yo tala a tirhela Yehovha u tsale a ku: “Ndzi kume leswaku nkandziyiso wo sungula wa vandlha wa Xihondzo xo Rindza wu kahle ngopfu naswona wu ndzi tsakise swinene. Ndlela leyi wu ti hlamuseleke hi vuenti ha yona tidyondzo ta nkoka ta Bibele yi fikelele mbilu ya mina. Ndza ri tlangela lunghiselelo leri lerinene swonghasi lerintshwa.” Kasi makwerhu un’wanyana wa xinuna u tsale a ku: “Ndzi swi langutela hi mahlo-ngati ku heta nkarhi wo tala ndzi ri karhi ndzi dyondza nkandziyiso lowu swin’we ni Bibele ya mina ya Vuhundzuluxeri Bya Misava Leyintshwa leyi nga ni tinhlamuselo ta le hansi.” Ha tshemba leswaku na wena u titwa hi ndlela leyi fanaka.

Hilaha u swi tivaka hakona, Xihondzo xo Rindza xi sungule ku kandziyisiwa hi 1879. Moya wa Yehovha hi wona lowu endleke leswaku magazini lowu wu kandziyisiwa malembe wolawo hinkwawo, hambileswi minkarhi yin’wana a swi nga olovi. (Zak. 4:6) Emalembeni wolawo ya 133, xifunengeto xa magazini lowu xi cinciwe ko hlayanyana. Hi 2012, xifunengeto xa nkandziyiso wun’wana ni wun’wana wa vandlha xi ta va ni xifaniso lexi mpfampfarhutiweke xa vamakwerhu lava nga eku chumayeleni, lexi nga ta hi tsundzuxa hi ntirho wa hina lowu hi nyikiweke wona hi Yehovha wo nyikela vumbhoni bya rixaladza malunghana ni Mfumo wakwe. (Mint. 28:23) Eka tluka 2 ra xifunengeto xexo, u ta kuma xinepe lexi xifaniso lexi mpfampfarhutiweke xi kopiweke eka xona swin’we ni rungula ro koma leri hlamuselaka leswi humelelaka kwalaho nileswaku ndhawu yoleyo hi le kwihi. Lembe leri hinkwaro, swinepe sweswo swi ta hi tsundzuxa hinkwerhu leswaku vanhu va Yehovha va le ku chumayeleni ka mahungu lamanene “emisaveni hinkwayo leyi akiweke.”—Mat. 24:14.

Hi swihi swilo swin’wana leswi cinciweke eka magazini lowu? Swivutiso swa mpfuxeto se swi ta va eku sunguleni ka xihloko xin’wana ni xin’wana lexi dyondziwaka evandlheni. Leswi swi ta kandziyisa tinhla-nkulu leti u faneleke u ti lavisisa loko u ri karhi u dyondza xihloko xa kona. Hambiswiritano, vafambisi va Dyondzo ya Xihondzo xo Rindza va ta hambeta va vutisa swivutiso sweswo emakumu ka dyondzo yoleyo. U ta xiya leswaku tindhawu leti nga ematlhelo ka matluka laha marito ma helelaka kona ti ndlandlamuxiwile katsongo nileswaku tinomboro ta matluka ni ta tindzimana ti vonaka kahle.

Hilaha swi hlamuseriwaka hakona enkandziyisweni wa n’hweti leyi, ku nghenisiwe nhloko-mhaka leyintshwa leyi nge, “Tolo A Nga Ha Vuyi,” leswaku yi hlamusela swiendlakalo swa nkoka leswi endlekeke ematin’wini ya manguva lawa ya Timbhoni ta Yehovha. Nakambe minkarhi yin’wana ku ta va ni nhloko-mhaka leyi nge, “Va Tinyiketele Hi Ku Tirhandzela,” leyi nga ta vulavula hi mintokoto ya xiviri. Mintokoto yoleyo yi ta hlamusela hi vuenti ntsako ni ku eneriseka loku vamakwerhu va xinuna ni va xisati va veke na kona hikwalaho ka leswi va yeke va ya chumayela etindhawini leti ku nga ni xilaveko lexikulu xa vahuweleri va Mfumo.

Onge u nga tiphina swinene hi nkarhi lowu u wu hetaka u ri eku dyondzeni ka Rito ra Xikwembu hi ku pfuniwa hi magazini lowu.

Vakandziyisi

[Xifaniso lexi nga eka tluka 3]

1879

[Xifaniso lexi nga eka tluka 3]

1895

[Xifaniso lexi nga eka tluka 3]

1931

[Xifaniso lexi nga eka tluka 3]

1950

[Xifaniso lexi nga eka tluka 3]

1974

[Xifaniso lexi nga eka tluka 3]

2008