Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Xana swa koteka ku wu tiva hi ku kongoma nkarhi lowu Yesu Kreste a beleriweke ha wona?

Xivutiso lexi xi tlakuka hileswi rungula leri huhuteriweke leri vulavulaka hi rifu ra Yesu leri tsariweke hi Marka, mutsari wa buku yin’wana ya Tievhangeli, na muapostola Yohane ri tikombaka onge ra kanetana. Marka u te: “Sweswi a ku ri awara ya vunharhu, kutani [masocha] ma n’wi belela.” (Mar. 15:25) Kambe hi ku ya hi Yohane, “a ku ri kwalomu ka awara ya vutsevu” loko Pilato a nyiketa Yesu eka Vayuda leswaku a beleriwa. (Yoh. 19:14-16) Vahlamuseri va Bibele va nyikele tinhlamuselo to hambana-hambana leswaku va ringeta ku hlamusela rungula leri, leri vonakaka onge ra kanetana. Hambiswiritano, ku hava rungula rin’wana eMatsalweni leri nga tirhisiwaka ku hlamusela ku hambana loku nga kona exikarhi ka timhaka letimbirhi. Kambe ku kambisisa ndlela leyi vanhu a va wu hlayela ha yona nkarhi emasikwini wolawo swi nga hi pfuna.

Hi lembe-xidzana ro sungula ra Nguva ya hina leyi Tolovelekeke, Vayuda va avanyise ku vonakala ka siku hi tiawara ta 12, va hlayela ku sukela loko dyambu ri tlhava. (Yoh. 11:9) Hikwalaho, “awara ya vunharhu” a yi sungula hi awara ya nhungu ku ya eka awara ya kaye nimixo naswona “awara ya vutsevu” a yi sungula hi awara ya khume-n’we ku ya eka awara ya khume-mbirhi ninhlikanhi. I ntiyiso leswaku dyambu a ri tlhava ni ku pela hi minkarhi yo hambana-hambana elembeni. Xisweswo, ku leha ka ku vonakala ka siku a ku hambana hi ku ya hi tinguva. Ku tlula kwalaho, Vayuda a va languta lomu dyambu ri yimeke kona leswaku va tiva leswaku i awara ya vungani ya siku. Hikokwalaho, minkarhi leyi ku vulavuriwaka ha yona a yi nga kongomanga. Hi ntolovelo, Matsalwa ya Vukreste ya Xigriki ma vulavula hi swiendlakalo leswi endlekeke hi awara ya vunharhu, ya vutsevu kumbe ya vukaye, ku nga minkarhi leyi hakanyingi yi vulaka leswaku swiendlakalo swa kona swi endleke kwalomu ka nkarhi wolowo. (Mat. 20:3, 5; Mint. 10:3, 9, 30) Loko nkarhi wu vuriwa hi ku kongoma, ku fana ni loko ku vulavuriwa “hi awara ya vunkombo,” a swi endliwa loko xiendlakalo lexi hlamuseriwaka xi lava leswaku ku boxiwa nkarhi wa kona.—Yoh. 4:52.

Swiviko swa tibuku ta Tievhangeli swi vula mhaka leyi fanaka malunghana ni minkarhi leyi swiendlakalo swa siku ro hetelela ra Yesu ra laha misaveni swi endlekeke ha yona. Ha mune ka swona swi vula leswaku vaprista ni vakulukumba va hlangane ka ha ri vurhonga kutani va yisa Yesu eka Ndhuna-nkulu ya Murhoma Pontiyo Pilato. (Mat. 27:1; Mar. 15:1; Luka 22:66; Yoh. 18:28) Matewu, Marka na Luka va vika leswaku hi awara ya vutsevu, loko Yesu se a beleriwile emhandzini, munyama wu funengete tiko hinkwaro “ku fikela hi awara ya vukaye.”—Mat. 27:45, 46; Mar. 15:33, 34; Luka 23:44.

Nchumu wun’wana wa nkoka lowu nga ha vaka wu endle leswaku nkarhi wa ku beleriwa ka Yesu wu nga fani, hileswi ku biwa hi ximoko a swi tekiwa ku ri xiphemu xa ku beleriwa. Minkarhi yin’wana munhu a a biwa ngopfu hi ximoko lerova a fa. Yesu u fanele a biwe ngopfu lerova swi bohe leswaku ku kumiwa munhu un’wana leswaku a byarha mhandzi ya nxaniso endzhaku ka loko Yesu a byarhe mhandzi yoleyo a ri yexe. (Luka 23:26; Yoh. 19:17) Loko ku biwa hi ximoko a swi tekiwa tanihi masungulo ya ku beleriwa, ku fanele ku hundze nkarhi wo karhi emahlweni ko va Yesu a beleriwa emhandzini ya nxaniso. Hikwalaho, vanhu vo hambana-hambana va nga ha tsala minkarhi leyi nga faniki ya ku beleriwa ka Yesu, swi ya hileswaku a ku ri nkarhi muni loko ha un’we wa vona a languta dyambu enkarhini lowu Yesu a a ri eku biweni hi ximoko ni ku beleriwa.

Muapostola Yohane u tsale rungula rakwe endzhaku ka malembe yo tala vatsari lavan’wana va tibuku ta Tievhangeli va tsale rungula ra vona. Hikwalaho, a a ta kota ku langutisa eka ta vona. I ntiyiso leswaku Yohane u tsale nkarhi lowu hambaneke ni lowu tsariweke hi Marka. Hambiswiritano, leswi swi nyikela vumbhoni bya leswaku Yohane a nga lo namba a kopa rungula ra Marka. Kambe Yohane na Marka va huhuteriwe hi Xikwembu. Hambileswi ku nga riki na Matsalwa lama eneleke lama hlamuselaka ku hambana koloko, hi nga ti tshemba tibuku ta Tievhangeli.