Nghena endzeni

Hundzela eka leswi nga endzeni

“Mulanguteri Lonene Ni Munghana Loyi A A Rhandzeka”

“Mulanguteri Lonene Ni Munghana Loyi A A Rhandzeka”

 “Mulanguteri Lonene Ni Munghana Loyi A A Rhandzeka”

JOHN (JACK) BARR, loyi a a ri xirho xa Huvo leyi Fumaka ya Timbhoni ta Yehovha, u hete pfhumba rakwe ra laha misaveni hi Mugqivela nimixo, December 4, 2010. A a ri ni malembe ya 97. U hlamuseriwa tanihi “mulanguteri lonene ni munghana loyi a a rhandzeka.”

Makwerhu Jack Barr u velekeriwe edorobeni ra Aberdeen, eScotland naswona a a ri rikotse eka vana vanharhu. Vatswari vakwe a va ri vatotiwa. Makwerhu Barr hakanyingi a a vulavula hi rirhandzu malunghana ni ndyangu wa ka vona; a a tlangela xikombiso lexinene lexi vatswari vakwe lava rhandzekaka va n’wi vekeleke xona.

Loko a nghene emalembeni ya vuntshwa, Jack swi sungule ku n’wi tikela swinene ku vulavula ni vanhu lava a nga va tiviki. Hambiswiritano, u lwe hi matimba ku hlula xiphiqo xexo naswona hi Sonto yin’wana ninhlikanhi hi 1927 loko a ri ni malembe ya 14, u byele tata wakwe leswaku se u swi lunghekerile ku famba na yena entirhweni wo chumayela hi yindlu ni yindlu. Wolawo a ku ri masungulo ya malembe yakwe yo tala entirhweni wa Yehovha. Ku sukela hi siku rero ku fikela loko a fa, Makwerhu Barr u ve muchumayeri loyi a hisekaka wa mahungu lamanene.

Mhangu yo chavisa leyi laveke ku dlaya mana wakwe yi endle leswaku a ehleketisisa hi xikongomelo xa vutomi naswona hi 1929 u tinyiketele eka Yehovha, kambe u kombise ku tinyiketela kakwe loko a khuvuriwa enhlengeletanweni yo sungula leyi a yeke eka yona hi 1934. Kutani hi 1939, u ve xirho xa ndyangu wa Bethele edorobeni ra London le Nghilandhi. Xisweswo u sungule ntirho wa nkarhi hinkwawo lowu tekeke malembe ya 71.

Hi October 29, 1960, Makwerhu Barr u nghenele leswi a swi vitaneke “vuxaka bya risima swinene” loko a tekana na Mildred Willett, loyi a a ri phayona tlhelo murhumiwa wa khale wo hiseka. Mpatswa wa ka Barr a wu tiviwa tanihi lowu tinyiketeleke ni lowu nga swikombiso leswinene naswona wu tshame wu ri tano kukondza Mildred a heta pfhumba rakwe ra laha misaveni hi October 2004. A va hlaya xiyenge xa Bibele swin’we siku ni siku hi mpfhuka va tekana.

Eka lava a va n’wi tiva, vito leri nge Jack Barr ri ta va tsundzuxa wanuna loyi a a nyika vanhu switsundzuxo leswinene, leswi minkarhi hinkwayo a swi ri leswi ringaniselaka, leswi nga ni musa ni leswi dzikeke eMatsalweni. A a ri wanuna wa migingiriko ni mulanguteri loyi a anakanyelaka, loyi a nga ni rirhandzu ni munghana wo tshembeka. Tinhlamulo, tinkulumo ni swikhongelo swakwe a swi kombisa ndlela leyi a a rhandza ntiyiso ha yona ni ndlela leyi vuxaka byakwe na Yehovha a byi tiye ha yona.

Hambileswi hi nga ta n’wi tsundzuka Makwerhu wa hina loyi a rhandzekaka Barr, hi tsaka na yena leswi a kumeke nyiko ya ku nga fi, ku nga lunghelo leri a a ri langutele hi mahlo-ngati naswona a a tshamela ku vulavula ha rona. A a ri lava hi mbilu yakwe hinkwayo.—1 Kor. 15:53, 54. *

[Nhlamuselo ya le hansi]

^ par. 8 Loko u lava ku twa hi mhaka ya vutomi bya John E. Barr, hlaya Xihondzo xo Rindza xa July 1, 1987, matluka 26 ku ya eka 31.