Nghena endzeni

Hundzela eka leswi nga endzeni

Ku Tshemba Yehovha Hi Ku Helela Swi Hi Endla Hi Titwa Hi Sirhelelekile

Ku Tshemba Yehovha Hi Ku Helela Swi Hi Endla Hi Titwa Hi Sirhelelekile

 Ku Tshemba Yehovha Hi Ku Helela Swi Hi Endla Hi Titwa Hi Sirhelelekile

“Yehovha u ta ndzi yingisa loko ndzi n’wi vitana.”—PS. 4:3.

1, 2. (a) Hi xihi xiyimo xa khombo lexi Davhida a langutaneke na xona? (b) Hi tihi tipisalema leti hi nga ta ti kambisisa?

HOSI DAVHIDA u fume tiko ra Israyele malembe yo tala kambe u langutane ni xiyimo lexi nga ni khombo. N’wana wakwe wa jaha Absalomu u tiendle hosi hi vukungundzwana naswona Davhida u boheke ku baleka eYerusalema. U tlhele a xengiwa hi mutsundzuxi wakwe loyi a a n’wi tshemba naswona u tlhandlukele eNtshaveni ya Mitlhwari a ri karhi a rila a nga ambalanga nchumu emilengeni, a famba ni vanhu va nga ri vangani vo tshembeka. Ku tlula kwalaho, Ximeyi, loyi a humaka endyangwini wa yindlu ya Hosi Sawulo, u hoxetele Davhida hi maribye ni ku pfuxa ritshuri a ri karhi a n’wi rhuketela.—2 Sam. 15:30, 31; 16:5-14.

2 Xana maxangu lawa a ma ta endla leswaku Davhida a fa hi mbitsi ni xisandzu? Doo, hikuva a a tshemba Yehovha. Sweswo swi vonaka eka Pisalema ndzima ya vunharhu, leyi tsariweke hi Davhida malunghana ni ku baleka kakwe. U tlhele a tsala ni Pisalema ndzima ya vumune. Tipisalema leti ti kombisa leswaku Xikwembu xi yingisa swikhongelo xi tlhela xi swi hlamula. (Ps. 3:4; 4:3) Ta hi tiyisekisa leswaku Yehovha u sirhelela malandza yakwe yo tshembeka vusiku ni nhlikanhi naswona wa ma katekisa hi ku ma seketela, hi ku ma nyika ku rhula ni ku ma hlayisa. (Ps. 3:5; 4:8) Hikwalaho, a hi kambisiseni tipisalema leti kutani hi vona ndlela leyi ha yona ti hi endlaka hi titwa hi sirhelelekile ni ku hi susumetela ku va hi tshemba Xikwembu.

Loko ‘Swirha Swa Hina Swo Tala Swi Hi Pfukela’

3. Hilaha swi kombisiweke hakona eka Pisalema 3:1, 2, a xi ri njhani xiyimo lexi Davhida a a ri eka xona?

3 Murhumiwa un’wana u te: “Mbilu ya vavanuna va Israyele yi landzela Absalomu.” (2 Sam. 15:13) Leswi Davhida a a nga swi twisisi leswaku Absalomu u swi kotise ku yini ku khorwisa vanhu vo tala leswaku va n’wi seketela hi ndlela yoleyo, u vutisile a ku: “Wena Yehovha, hikwalaho ka yini swirha swa mina swi tele? Hikwalaho ka yini vo tala va ndzi pfukela? Vo tala va byela moya-xiviri wa mina va ku: ‘Xikwembu a xi nge n’wi ponisi.’” (Ps. 3:1, 2) Vaisrayele vo tala a va ehleketa leswaku Yehovha a nge n’wi kutsuli Davhida emavokweni ya Absalomu ni ya vaseketeri vakwe.

4, 5. (a) I yini leswi Davhida a a tiyiseka ha swona? (b) Ma vula yini marito lama nge “La tlakusaka nhloko ya mina”?

4 Kambe Davhida a a titwa a sirhelelekile hikuva a a tshemba Xikwembu hi ku helela. U yimbelele a ku: “Oho Yehovha, wena u xitlhangu lexi xi ndzi rhendzeleke, u ku vangama ka mina ni La tlakusaka nhloko ya mina.” (Ps. 3:3) Davhida a a tiyiseka leswaku Yehovha u ta n’wi sirhelela hilaha xitlhangu xi sirhelelaka socha hakona. Ina, hosi leyi dyuhaleke a yi ri eku balekeni, yi funengete nhloko ya yona naswona yi khomiwe hi tingana. Kambe Loyi a nge Henhla-henhla a a ta herisa maxangu ya Davhida kutani a n’wi vangamisa. Yehovha a a ta n’wi yimisa, a tlakusa nhloko yakwe ni ku tlhela a n’wi veka exikhundlheni lexi tlakukeke. Davhida u khongele eka Xikwembu hikuva a a swi tiva leswaku xi ta n’wi hlamula. Xana u tshemba Yehovha hi ndlela leyi fanaka?

5 Marito lama nge “La tlakusaka nhloko ya mina,” ma kombisa leswaku Davhida a a pfumela leswaku Yehovha u ta n’wi pfuna. Bibele ya Today’s English Version yi ri: “Kambe wena HOSI, u xitlhangu lexi ndzi sirhelelaka ekhombyeni minkarhi hinkwayo; u ndzi endla ndzi hlula ni ku vuyetela xivindzi xa mina.” Malunghana ni xiga lexi nge “La tlakusaka nhloko ya mina,” buku yin’wana ya tinhlamuselo  ta Bibele yi ri: “Loko Xikwembu xi tlakusa . . . ‘nhloko’ ya munhu, xi endla leswaku a va ni ntshembo naswona a titwa a sirhelelekile.” Leswi Davhida a a susiwe exiluvelweni xa le Israyele, a a ri ni xivangelo lexi twalaka xo hela matimba. Hambiswiritano, ‘ku tlakusiwa ka nhloko yakwe’ swi endle leswaku a tlhela a va ni xivindzi, a titwa a sirhelelekile naswona a tshemba Xikwembu.

‘Yehovha U Ta Hlamula!’

6. Ha yini Davhida a vule leswaku swikhongelo swakwe a swi ta hlamuriwa entshaveni yo kwetsima ya Yehovha?

6 Leswi Davhida a a tshemba Yehovha naswona a a swi tiva leswaku U ta hlamula swikhongelo swakwe, u tlhele a ku: “Ndzi ta vitana Yehovha hi rito ra mina, naswona u ta ndzi hlamula a ri entshaveni yakwe yo kwetsima.” (Ps. 3:4) Hi ku landza xileriso xa Davhida, areka ya ntwanano, leyi a yi fanekisela vukona bya Xikwembu, yi tekiwile yi yisiwa eNtshaveni ya Siyoni. (Hlaya 2 Samuwele 15:23-25.) Kutani swa fanela leswi Davhida a vuleke leswaku swikhongelo swakwe a swi ta hlamuriwa entshaveni yo kwetsima ya Yehovha.

7. Ha yini Davhida a a nga chavi nchumu?

7 Leswi Davhida a a tiyiseka leswaku Xikwembu xi ta swi hlamula swikhongelo swakwe, a a nga chavi nchumu. Ematshan’weni ya sweswo, u yimbelele a ku: “Loko ku ri mina, ndzi ta pavalala leswaku ndzi etlela; kunene ndzi ta pfuka, hikuva Yehovha u hambeta a ndzi seketela.” (Ps. 3:5) Hambi ku ri nivusiku, laha a ku ri ni khombo lerikulu ro hlaseriwa hi xitshuketa, Davhida a a nga chavi ku etlela. A a tiyiseka leswaku u ta pfuka hikuva leswi n’wi humeleleke enkarhini lowu hundzeke swi endle leswaku a tshemba Xikwembu hi ku helela. Na hina hi nga va ni ku tiyiseka loku fanaka loko hi khomelela “tindlela ta Yehovha” naswona hi nga tshuki hi n’wi fularhela.—Hlaya 2 Samuwele 22:21, 22.

8. Pisalema 27:1-4 yi swi kombisa njhani leswaku Davhida a a tshemba Xikwembu?

8 Ndlela leyi Davhida a a tshemba Xikwembu hi ku helela ni ku titwa a sirhelelekile ha yona yi vonaka eka yin’wana ya tipisalema takwe, leyi nga ni marito lawa lama huhuteriweke: “Yehovha i ku vonakala ka mina ni ku ponisiwa ka mina. Xana ndzi ta chava mani? Yehovha i khokholo ra vutomi bya mina. Xana ndzi ta chava mani? . . . Hambiloko ntlawa wa vanhu wu dzima ntsonga ku lwa na mina, mbilu ya mina a yi nge chavi. . . . Nchumu wun’we lowu ndzi wu kombeleke eka Yehovha—hi  lowu ndzi nga ta wu rindzela, leswaku ndzi tshama endlwini ya Yehovha masiku hinkwawo ya vutomi bya mina, ndzi vona ku tsakisa ka Yehovha ni ku languta tempele yakwe hi ku tlangela.” (Ps. 27:1-4) Loko u titwa hi ndlela leyi fanaka naswona swiyimo swa wena swi ku pfumelela, u ta ya eminhlanganweni ya vandlha nkarhi ni nkarhi ni vagandzeri-kulobye mi tirhela Yehovha.—Hev. 10:23-25.

9, 10. Ku nga khathariseki marito ya Pisalema 3:6, 7, ha yini u nga vulaka leswaku Davhida a a nga ri na wona moya wo rihisela?

9 Hambileswi Davhida a a langutane ni vukanganyisi bya Absalomu ni ku nga tshembeki ka van’wana vo tala, u yimbelele a ku: “A ndzi nge va chavi vanhu va 10 000 lava va longolokeke va ndzi rhendzela matlhelo hinkwawo. Oho Yehovha, humelela! Ndzi ponise, Wena Xikwembu xanga! Hikuva u ta ba valala va mina hinkwavo erhameni. U ta tshova meno ya lavo homboloka.”Ps. 3:6, 7.

10 Davhida a a nga ri na wona moya wo rihisela. Loko valala vakwe a vo ‘biwa erhameni,’ i Xikwembu a xi ta endla sweswo. Hosi Davhida a a titsalele Nawu naswona a a swi tiva leswaku Yehovha u te: “Ku rihisela ni ndzihiso i swa mina.” (Det. 17:14, 15, 18; 32:35) Nakambe swi le ka Xikwembu loko xi lava ku “tshova meno ya lavo homboloka.” Ku tshova meno ya vona swi vula ku va endla va nga vi na matimba yo vavisa van’wana. Yehovha wa va tiva lavo homboloka hikuva “u vona leswi mbilu yi nga swona.” (1 Sam. 16:7) Hakunene ha tsaka leswi Xikwembu xi hi nyikaka ripfumelo ni matimba yo lwisana na Sathana, munhu wo homboloka swinene, loyi a nga ta pfaleriwa ku nga ri khale ku fana ni nghala leyi vombaka kambe yi nga riki na meno, leyi faneriwaka hi ku lovisiwa ntsena!—1 Pet. 5:8, 9; Nhlav. 20:1, 2, 7-10.

“Ku Ponisa I Ka Yehovha”

11. Ha yini hi fanele hi khongelela vapfumeri-kulobye?

11 Davhida wa swi xiya leswaku i Yehovha ntsena loyi a nga tisaka ku kutsuriwa loku a ku lavaka hi mbilu hinkwayo. Kambe mupisalema a nga tianakanyeli yena ntsena. Ku vuriwa yini hi vanhu lavan’wana hinkwavo lava Yehovha a va tsakelaka? Swi fanerile leswi Davhida a gimeteke pisalema yakwe leyi huhuteriweke hi marito lawa: “Ku ponisa i ka Yehovha. Nkateko wa wena wu le henhla ka vanhu va wena.” (Ps. 3:8) Entiyisweni, Davhida a a ri ni swiphiqo leswikulu, kambe a a tsundzuka vanhu hinkwavo va Yehovha naswona a a tiyiseka leswaku Xikwembu xi ta va katekisa. Xana na hina a hi fanelanga hi va tsundzuka vapfumeri-kulorhi? A hi va katseni eswikhongelweni swa hina, hi kombela Yehovha leswaku a va nyika moya wakwe lowo kwetsima leswaku va va ni xivindzi ni ku chumayela mahungu lamanene hi ku tiyiseka lokukulu.—Efe. 6:17-20.

12, 13. I yini leswi humeleleke Absalomu naswona Davhida u angule njhani?

12 Absalomu u fe hi ndlela leyi khomisaka tingana, ku nga xilemukiso eka hinkwavo lava delelaka van’wana, ngopfu-ngopfu vatotiwa va Xikwembu vo fana na Davhida. (Hlaya Swivuriso 3:31-35.) Ku pfuke nyimpi kutani vuthu ra Absalomu ri hluriwa. Loko Absalomu a ri eku fambeni a gade meyila, misisi yakwe yo tala yi fika yi phasana eka xiphandze xa rhavi ra le hansi ra murhi lowukulu. A sala kona a ncikinya kambe a tsandzeka ku tipfuna kukondza Yowabu a n’wi dlaya hi ku n’wi tlhava embilwini hi mimphiselo yinharhu.—2 Sam. 18:6-17.

13 Xana Davhida u tsakile loko a twa leswaku n’wana wakwe u file? Doo! Ematshan’weni ya sweswo, a a famba-famba hi ku vaviseka, a rila kutani a ku: “N’wananga Absalomu, n’wananga, n’wananga Absalomu! Oho, loko a ku fe mina, mina ematshan’weni ya wena Absalomu n’wananga, n’wananga!” (2 Sam. 18:24-33) I marito ya Yowabu ntsena lama endleke Davhida a tshika ku va ni gome lerikulu. Hakunene u fe ku vava Absalomu, loyi ku navela kakwe ka vutianakanyi ku n’wi kuceteleke ku lwa ni tata wakwe, loyi a a ri mutotiwa wa Yehovha, xisweswo a ti vangela khombo!—2 Sam. 19:1-8; Swiv. 12:21; 24:21, 22.

Davhida U Tlhele A Kombisa Ku Tshemba Xikwembu

14. I yini leswi nga vuriwaka malunghana ni ku tsariwa ka Pisalema ya vumune?

14 Ku fana ni Pisalema ya vunharhu, ya vumune i xikhongelo xa Davhida lexi humaka embilwini lexi nyikelaka vumbhoni bya leswaku a a tshemba Yehovha hi ku helela. (Ps. 3:4; 4:3) Kumbexana Davhida u qambhe risimu leri leswaku a vulavula hi ku ntshunxiwa kakwe ni ku nkhensa Xikwembu  endzhaku ka loko ku pfukela mfumo ka Absalomu ku fambe ximatsi. Kumbexana u ri tsale hileswi a a ehleketa hi vayimbeleri lava nga Valevhi. Ku nga khathariseki leswaku xivangelo xa kona hi xihi, ku anakanyisisa hi Pisalema ya vumune swi nga tiyisa ntshembo wa hina eka Yehovha.

15. Ha yini hi nga khongelaka hi ku tiyiseka lokukulu eka Yehovha hi vito ra N’wana wakwe?

15 Davhida u tlhele a kombisa leswaku u tshemba Xikwembu hi ku helela nileswaku wa tiyiseka leswaku xa swi hlamula swikhongelo. U yimbelele a ku: “Loko ndzi vitana, ndzi hlamule, Wena Xikwembu xanga xo lulama. U fanele u ndzi pfulela ndhawu yo anama emaxangwini. Ndzi kombe tintswalo naswona u yingisa xikhongelo xa mina.” (Ps. 4:1) Hi nga va ni ntshembo lowu fanaka loko hi hanya hi vululami. Leswi hi tivaka leswaku Yehovha, ‘Xikwembu xo lulama,’ u katekisa vanhu vakwe vo lulama, hi nga khongela hi ku tiyiseka lokukulu eka yena hi vito ra N’wana wakwe ni ku kombisa ripfumelo eka gandzelo rakwe ra nkutsulo. (Yoh. 3:16, 36) Hakunene sweswo swi hi tisela ku rhula!

16. Ha yini Davhida a nga ha vaka a hele matimba?

16 Minkarhi yin’wana hi nga ha langutana ni swiyimo leswi hetaka matimba leswi hi tsonaka vurhongo. Kumbexana swi ve tano eka Davhida swa xinkarhana hikuva u yimbelele a ku: “N’wina vana va vanhu, xana ku vangama ka mina ku fanele ku va ndzhukano ku fikela rini, kasi mi hambeta mi rhandza swilo swa hava, kasi mi hambeta mi lava mavunwa?” (Ps. 4:2) Xiga lexi nge “vana va vanhu” swi le rivaleni leswaku xi vula vanhu kambe a xi tirhiseriwi ku va bumabumela. Valala va Davhida a va “rhandza swilo swa hava.” Bibele ya New International Version yi hundzuluxele ndzimana leyi hi ndlela leyi: “Mi ta rhandza mavunwa ni ku lava swikwembu swa mavunwa ku fikela rini?” Hambiloko hi hela matimba hikwalaho ka leswi van’wana va swi endlaka, a hi hambeteni hi khongela hi mbilu hinkwayo naswona hi kombisa leswaku hi xi tshemba hi ku helela Xikwembu xa ntiyiso.

17. Hlamusela leswaku hi nga pfumelelana njhani ni Pisalema 4:3.

17 Ndlela leyi Davhida a a tshemba Xikwembu ha yona yi vonaka eka marito lawa: “Kutani swi tiveni kunene leswaku Yehovha u ta hlawula la tshembekeke wakwe; Yehovha u ta ndzi yingisa loko ndzi n’wi vitana.” (Ps. 4:3) Xivindzi ni ku tshemba Yehovha hi ku helela swa laveka leswaku hi tshama hi tshembekile eka yena. Hi xikombiso, ndyangu wa Vakreste wa ti lava timfanelo leti loko xaka leri nga hundzukiki ri susiwa evandlheni. Xikwembu xa va katekisa lava tshembekaka eka xona ni le tindleleni ta xona. Xisweswo, ku tshembeka ni ku tshemba Yehovha hi ku helela swi kondletela ntsako exikarhi ka vanhu vakwe.—Ps. 84:11, 12.

18. Hi ku ya hi Pisalema 4:4, i yini leswi hi faneleke hi swi endla loko hi tlhaviwe hi marito kumbe hi endliwe swo biha?

18 Hi nga endla yini loko un’wana a vula kumbe a endla swilo leswi hi hlundzukisaka? Hi nga tshama hi tsakile loko hi endla leswi Davhida a swi vulaka: “Hlundzukani, kambe mi nga dyohi. Vulavulani hi mbilu ya n’wina loko mi ri esangweni ra n’wina, kutani mi miyela.” (Ps. 4:4) Loko hi tlhaviwe hi marito kumbe hi endliwe swo biha, hi nga dyohi hi ku rihisela. (Rhom. 12:17-19) Hi nga phofula ndlela leyi hi titwaka ha yona hi mhaka leyi hi xikhongelo loko hi etlela. Loko hi khongela hi mhaka ya kona, hi nga ha cinca langutelo ra hina ha yona naswona hi susumeteleka ku rivalela munhu wa kona hi rirhandzu. (1 Pet. 4:8) Nchumu wa nkoka malunghana ni mhaka leyi i ndzayo ya muapostola Pawulo, leyi swi tikombaka onge yi sekeriwe eka Pisalema 4:4: “Karihani, kambe mi nga dyohi; dyambu ri nga peli ma ha ri eka xiyimo xa ku kariha, mi nga nyiki Diyavulosi ndhawu.”—Efe. 4:26, 27.

19. Pisalema 4:5 yi hi pfuna njhani malunghana ni vugandzeri bya hina?

 19 Loko Davhida a kandziyisa xilaveko xo tshemba Xikwembu, u yimbelele a ku: “Humesani switlhavelo swa ku lulama, naswona mi tshemba Yehovha.” (Ps. 4:5) Switlhavelo leswi a swi nyikeriwa hi Vaisrayele a swi ri swa nkoka ntsena loko vanhu va swi nyikela hi swikongomelo leswinene. (Esa. 1:11-17) Leswaku vugandzeri bya hina byi amukeleka eka Xikwembu, na hina hi fanele hi va ni swikongomelo leswinene naswona hi xi tshemba hi ku helela.—Hlaya Swivuriso 3:5, 6; Vaheveru 13:15, 16.

20. Xi vula yini xiga lexi nge ‘ku vonakala ka xikandza xa Yehovha’?

20 Davhida u ye emahlweni a ku: “Ku ni vo tala lava vulaka va ku: ‘I mani la nga ta hi kombisa leswinene?’ Tlakusela ku vonakala ka xikandza xa wena ehenhla ka hina, Wena Yehovha.” (Ps. 4:6) ‘Ku vonakala ka xikandza xa Yehovha’ swi vula tintswalo ta Xikwembu. (Ps. 89:15) Kutani loko Davhida a khongela a ku: “Tlakusela ku vonakala ka xikandza xa wena ehenhla ka hina,” a a vula leswaku ‘hi kombe tintswalo.’ Leswi hi tshembaka Yehovha, hi ni tintswalo takwe ni ntsako lowukulu tanihi leswi hi endlaka ku rhandza kakwe.

21. I yini lexi hi tiyisekaka ha xona loko hi hlanganyela hi xitalo entirhweni wo tshovela namuntlha?

21 Loko Davhida a ehleketa hi ntsako lowu Xikwembu xi hi nyikaka wona lowu tlulaka lowu vanhu va vaka na wona hi nkarhi wa ntshovelo, u yimbelelele Yehovha a ku: “Kunene u ta tsakisa mbilu ya mina ku tlula nkarhi lowu mavele ya vona ni vhinyo ya vona leyintshwa a swi tele ha wona.” (Ps. 4:7) Hi nga tiyiseka leswaku hi ta kuma ntsako lowukulu loko hi hlanganyela entirhweni wo tshovela wa namuntlha. (Luka 10:2) Leswi ‘tiko lerikulu’ ra vatotiwa ri rhangelaka, ha tsaka sweswi tanihi leswi nhlayo ya ‘vatirhi vo tshovela’ yi hambetaka yi andza. (Esa. 9:3) Xana u hoxa xandla entirhweni lowu lowu tsakisaka wo tshovela?

Hambeta U Tshemba Xikwembu Hi Ku Helela

22. Hi ku ya hi Pisalema 4:8, a swi va fambela njhani Vaisrayele loko va hlayisa Nawu wa Xikwembu?

22 Davhida u gimeta pisalema leyi hi marito lawa: “Ndzi ta pavalala ni ku etlela hi ku rhula, hikuva wena u ri wexe, Wena Yehovha, u endla leswaku ndzi tshama ndzi sirhelelekile.” (Ps. 4:8) Loko Vaisrayele va hlayisa Nawu wa Yehovha, a va va ni ku rhula na yena naswona a va titwa va sirhelelekile. Hi xikombiso, tiko ra ‘Yuda ni ra Israyele ma tshame ma sirhelelekile’ hi nkarhi wa ku fuma ka Solomoni. (1 Tih. 4:25) Lava tshembaka Xikwembu va tiphina hi ntsako hambiloko matiko lawa va akelaneke na wona ma ri ni tihanyi. Ku fana na Davhida, hi etlela hi ku rhula hikuva Xikwembu xi endla leswaku hi titwa hi sirhelelekile.

23. I yini leswi hi nga ta swi kuma loko hi tshemba Xikwembu hi ku helela?

23 A hi yeni emahlweni hi tirhela Yehovha. Onge hi nga tlhela hi khongela hi ripfumelo kutani hi va ni “ku rhula ka Xikwembu loku tlulaka miehleketo hinkwayo.” (Filp. 4:6, 7) Wa nga vona ntsako lowu swi hi tiselaka wona! Naswona hi nga langutela vumundzuku hi ku tiyiseka lokukulu loko hi hambeta hi tshemba Yehovha hi ku helela.

A Wu Ta Hlamula Njhani?

• Hi swihi swiphiqo leswi Davhida a langutaneke na swona hikwalaho ka Absalomu?

Pisalema ya vunharhu yi hi endla hi titwa hi sirhelelekile hi ndlela yihi?

• Hi tihi tindlela leti ha tona Pisalema ya vumune yi hi endlaka hi n’wi tshemba swinene Yehovha?

• Hi nga vuyeriwa njhani hi ku tshemba Xikwembu hi ku helela?

[Swivutiso Swa Dyondzo]

[Xifaniso lexi nga eka tluka 29]

Hambiloko Davhida a balekile hikwalaho ko chava Absalomu, a a tshemba Yehovha

[Swifaniso leswi nga eka tluka 32]

Xana u tshemba Yehovha hi ku helela?