Nghena endzeni

Hundzela eka leswi nga endzeni

U Ni Xivangelo Xo Tsaka

U Ni Xivangelo Xo Tsaka

 U Ni Xivangelo Xo Tsaka

NTUMBULUKO wa Yehovha wu hlelekile ku sukela eka sele leyitsongo ngopfu leyi hanyaka ku ya eka swirimele leswikulu swa tinyeleti leswi tshameke hi mintlawa leyitsongo ni leyikulu ngopfu. Leswi a swi hi hlamarisi hikuva Muvumbi “a hi Xikwembu xa mpfilumpfilu.” (1 Kor. 14:33) Lunghiselelo ra Xikwembu ra timhaka ta vugandzeri na rona ri hlelekile. Xiya leswi Yehovha a swi endleke. U simeke nhlengeletano yin’we ya vuako hinkwabyo leyi nga ni swivumbiwa leswi tlhariheke swa madzana ya timiliyoni—vanhu emisaveni ni tintsumi etilweni—leswi nga ni ntshunxeko wa ku tihlawulela leswaku swi n’wi tirhela hi vun’we evugandzerini lebyi tengeke. Hakunene nhlengeletano yoleyo yi hlelekile!

Etikweni ra khale ra Israyele, xiphemu xa laha misaveni xa nhlengeletano ya Xikwembu a xi yimeriwa hi muti wa Yerusalema, laha tempele ya Yehovha a yi akiwe kona ni laha hosi leyi totiweke a yi tshama kona. Muisrayele un’wana loyi a a ri evuhlongeni eBabilona u phofule ndlela leyi a a titwa ha yona hi muti wolowo wo kwetsima a ku: “Ririmi ra mina a ri namarhele malaka ya mina, loko a ndzi nga ta ku tsundzuka, loko a ndzi nga ta tlhandlukisa Yerusalema ehenhla ka xivangelo xa mina lexikulu xa ku tsaka.”—Ps. 137:6.

Xana na wena u titwa hi ndlela yoleyo hi nhlengeletano ya Xikwembu namuntlha? Xana ya ku tsakisa swinene ku tlula nchumu wihi na wihi? Xana vana va wena va ma twisisa matimu ya xiphemu xa nhlengeletano ya Xikwembu ya laha misaveni ni ndlela leyi xiphemu xexo xi tirhaka ha yona? Xana va swi twisisa leswaku vona i xiphemu xa vamakwerhu va misava hinkwayo lava nga Timbhoni ta Yehovha? (1 Pet. 2:17) Ha yini u nga tirhisi swiringanyeto leswi landzelaka eVugandzerini bya n’wina bya Ndyangu leswaku u pfuna ndyangu wa wena wu va ni vutivi lebyi engetelekeke ni ku yi tlangela swinene nhlengeletano ya Yehovha?

Rungulela Vana Va Wena Hi ‘Masiku Ya Khale Swinene’

Lembe ni lembe, mindyangu ya Vaisrayele a yi hlengeletana leswaku yi tlangela Paseka. Loko ku simekiwe nkhuvo wolowo, Muxe u lerise vanhu a ku: “Loko n’wana wa wena a ku vutisa endzhaku ka sweswo a ku, ‘Leswi swi vula yini?’ u ta ku eka yena, ‘Yehovha u hi humese aEgipta hi ntamu wa voko, etindlwini ta mahlonga.’” (Eks. 13:14) Matimu ya swilo leswi Yehovha a swi endleleke Vaisrayele a ma nga fanelanga ma rivariwa. Lexi tsakisaka, vatatana vo tala va Vaisrayele va landzele xileriso xa Muxe. Endzhaku ka malembe yo tala, Muisrayele un’wana u khongerile a ku: “Oho Xikwembu, hi swi twile hi tindleve ta hina, vatata wa hina va hi rungulerile ntirho lowu u wu endleke emasikwini ya vona, emasikwini ya khale swinene.”—Ps. 44:1.

Swiendlakalo swa Timbhoni ta Yehovha leswi endlekeke emalembeni yo tlula dzana lama hundzeke swi nga ha vonaka swi ri matimu ya ‘masiku ya khale swinene’ eka vantshwa va namuntlha. U nga swi endlisa ku yini leswaku swiendlakalo sweswo swi vonaka swi ri swa xiviri swinene eka vana va wena? Leswaku vatswari van’wana va endla sweswo, va tirhise buku leyi nge Timbhoni Ta Yehovha I Vahuweleri Va Mfumo Wa Xikwembu, Buku Ya Lembe, timhaka ta vutomi leti humesiweke eka timagazini ta hina swin’we ni swiviko swa matimu ya ta Mfumo ku katsa ni DVD ya hina leyintshwa leyi vulavulaka hi vanhu va Xikwembu va le minkarhini ya hina. Tivhidiyo leti hlamuselaka hi ku xanisiwa ka vamakwerhu etikweni ra khale ra Soviet Union ni le Jarimani hi nkarhi wa mfumo wa Manazi ti dyondzisa mindyangu ku tshembela eka Yehovha loko yi langutane ni miringo. Katsa swilo sweswo eVugandzerini bya n’wina bya Ndyangu. Sweswo swi ta tiyisa ripfumelo ra vana va wena loko vutshembeki bya vona byi ringiwa.

Hambiswiritano, vantshwa va nga ha hatla va phireka loko vo yingisela nkulumo leyi vulavulaka hi matimu. Kutani endla leswaku vana va wena va katseka. Hi xikombiso, u nga ha kombela n’wana wa wena leswaku a hlawula tiko leri n’wi tsakisaka, a endla ndzavisiso hi matimu ya ta Mfumo hi tiko rero naswona a mi hlamusela hi swin’wana swa leswi a swi dyondzeke. Evandlheni ra ka n’wina  swi nga ha endleka ku ri ni Vakreste lava tshameke va tshembekile ku ringana malembe yo tala lava mi nga va rhambelaka evugandzerini bya ndyangu siku rin’wana. Kumbexana n’wana wa wena a nga va vutisa leswaku va hlamusela mintokoto ya vona. Kumbe u nga byela n’wana wa wena ku mpfampfarhuta swifaniso swa swiendlakalo swa nkoka leswi fambisanaka ni vugandzeri bya hina swo fana ni ku akiwa ka rhavi, ku khomiwa ka ntsombano wa matiko, kumbe ku tirhisa gramafoni entirhweni wo chumayela hi yindlu ni yindlu.

Dyondza Ndlela Leyi ‘Xirho Ha Xin’we Xi Endlaka Ntirho Wa Xona’ Ha Yona

Muapostola Pawulo u fanise vandlha ra Vukreste ni “miri hinkwawo, lowu hlanganisiweke hi minsiha leyi hlanganisaka marhambu, [lowu] kulaka ni ku tiaka hi rirhandzu, loko xirho ha xin’we xi ri karhi xi endla ntirho wa xona.” (Efe. 4:16 New International Version) Ku dyondza ndlela leyi miri wa munhu wu tirhaka ha yona swi hi endla hi n’wi tlangela swinene Muvumbi wa hina ni ku n’wi xixima. Hilaha ku fanaka, loko hi kambisisa ndlela leyi vandlha ra misava hinkwayo ri tirhaka ha yona, hi hlamarisiwa hi “vutlhari byo hambana-hambana swinene bya Xikwembu.”—Efe. 3:10.

Yehovha u hlamusela ndlela leyi nhlengeletano yakwe ku katsa ni xiphemu xa le tilweni swi tirhaka ha yona. Hi xikombiso, u hi byela leswaku eku sunguleni u nyike Yesu Kreste nhlavutelo, ivi yena a “[rhuma] ntsumi yakwe, a yi nyikela yi ri swikombiso eka hlonga ra yena Yohane, loyi a nyikeleke vumbhoni.” (Nhlav. 1:1, 2) Loko Xikwembu xi hlavutela ndlela leyi xiphemu xa nhlengeletano ya xona ya le tilweni xi tirhaka ha yona, xana a xi nga ta lava leswaku hi twisisa ndlela leyi ha yona xiphemu ‘ha xin’we xi endlaka ntirho wa xona’ laha misaveni?

Hi xikombiso, loko vandlha ra n’wina ri ta endzeriwa hi mulanguteri wa xifundzha ku nga ri khale, ha yini u nga burisani ni ndyangu wa wena hi mintirho ya valanguteri va swifundzha ni mikateko leyi va yi kumaka? Va n’wi pfuna njhani ha un’we wa hina? Swivutiso swin’wana leswi hi nga bulaka ha swona hi leswi nge: Ha yini swi ri swa nkoka ku vika ntirho wa hina wa nsimu? Nhlengeletano ya Xikwembu yi seketeriwa njhani hi timali? Huvo leyi Fumaka yi hleriwe njhani naswona yi hi nyika swakudya swa moya hi ndlela yihi?

Loko hi twisisa ndlela leyi vanhu va Yehovha va hleriweke ha yona, ha vuyeriwa hi tindlela tin’wana tinharhu: Hi ya hi va tlangela swinene lava va hi tirhelaka hi matimba. (1 Tes. 5:12, 13) Hi khutaziwa ku seketela malunghiselelo ya Mfumo. (Mint. 16:4, 5) Yo hetelela, ndlela leyi hi va tshembaka ha yona lava rhangelaka ya tiya loko hi ri karhi hi vona swivangelo swa le Matsalweni leswi endlaka va teka swiboho ni ku endla malunghiselelo yo karhi.—Hev. 13:7.

“Kambelani Swihondzo Swa Wona Swo Tshama Eka Swona”

“Gwirimani mi rhendzela Siyoni, mi famba-famba eka wona, hlayani swihondzo swa wona. Vekani timbilu ta n’wina erirhangwini ra wona. Kambelani swihondzo swa wona swo tshama eka swona, leswaku mi ta rungulela xitukulwana xa nkarhi lowu taka.” (Ps. 48:12, 13) Kwalaho mupisalema u khutaze Vaisrayele ku languta Yerusalema va ri ekusuhi. Xana wa swi ehleketa swilo swa nkoka leswi a swi tsundzukiwa hi mindyangu ya Vaisrayele, leyi tekeke riendzo ro ya emutini wo kwetsima ku ya hlanganyela eminkhubyeni ya lembe ni lembe ni ku vona tempele ya wona yo saseka? Yi fanele yi susumeteleke ku swi “rungulela xitukulwana xa nkarhi lowu taka.”

Ehleketa hi hosi ya xisati ya le Xeba, leyi a yi nga swi tshembi swiviko swa mfumo lowukulu wa Solomoni ni vutlhari byakwe lebyikulu. I yini leswi yi susumeteleke ku pfumela leswaku swilo leswi yi swi tweke a swi ri ntiyiso? U te: “A ndzi vanga na ripfumelo emaritweni ya vona ku fikela loko ndzi ta leswaku mahlo ya mina ma tivonela hi woxe.” (2 Tikr. 9:6) Hakunene swilo leswi hi swi ‘vonaka hi mahlo ya hina’ swi nga hi khumba timbilu.

U nga va pfuna njhani vana va wena leswaku va vona swihlamariso swa nhlengeletano ya Yehovha hi ‘mahlo ya vona vini’? Loko ku ri ni rhavi ra Timbhoni ta Yehovha ekusuhi ni ndhawu leyi mi tshamaka eka yona, endla matshalatshala yo ri endzela. Hi xikombiso, Mandy na Bethany va kulele etikweni leri Bethele ya kona yi nga ekule ni laha va tshamaka kona hi tikhilomitara ta 1 500. Kambe vatswari va vona a va tshamela ku teka maendzo yo ya valanga eBethele, ngopfu-ngopfu enkarhini lowu vana va vona va vanhwanyana a va ha ri vatsongo. Va te: “Loko hi nga si ya eBethele, a hi ehleketa leswaku a ku ri ndhawu yo kwetsima ngopfu  laha ku tshamaka vatswatsi ntsena. Kambe hi hlangane ni vantshwa lava a va tirhela Yehovha hi matimba naswona a va tiphina hi ntirho wa vona. Hi vone leswaku nhlengeletano ya Yehovha a yi nga heleli laha a hi tshama kona ntsena, naswona nkarhi wun’wana ni wun’wana lowu a hi endzela eBethele a hi kuma matimba lamakulu.” Ku vona nhlengeletano ya Xikwembu ekusuhi swi susumetele Mandy na Bethany leswaku va sungula ku phayona naswona va kale va vitaniwa eBethele leswaku va ya tirha tanihi vatirhi va ku tirhandzela va nkarhinyana.

Hi ni ndlela yin’wana yo ‘vona’ nhlengeletano ya Yehovha, leyi a yi nga ri kona etikweni ra khale ra Israyele. Emalembeni ya sweswinyana, vanhu va Xikwembu va kume tivhidiyo ni ti-DVD leti vulavulaka hi swiphemu swo hambana-hambana swa nhlengeletano ya xona, to fana ni leyi nge: Jehovah’s Witnesses—Organized to Share the Good News, Our Whole Association of Brothers, To the Ends of the Earth ni leyi nge United by Divine Teaching. Loko wena ni ndyangu wa wena mi vona ntirho lowukulu lowu endliwaka hi vatirhi va le Bethele, vatirhi vo phalala, varhumiwa ni vamakwerhu lava lunghiselelaka mintsombano, ndlela leyi mi va tlangelaka ha yona vamakwerhu va misava hinkwayo yi ta kula hakunene etimbilwini ta n’wina.

Vandlha rin’wana ni rin’wana ra vanhu va Xikwembu ri pfuna ngopfu entirhweni wo chumayela mahungu lamanene ni ku seketela Vakreste lava nga swirho swa rona. Hambiswiritano, n’wina ni vana va n’wina tinyikeni nkarhi wo ehleketa hi ‘nhlengeletano hinkwayo ya vamakwenu emisaveni.’ Leswi swi ta mi pfuna leswaku mi tshama mi ‘tiyile eripfumelweni,’ mi xiya leswaku mi ni xivangelo xo tsaka.—1 Pet. 5:9.

 [Bokisi/Xifaniso lexi nga eka tluka 18]

Nhlengeletano Ya Xikwembu—Swa Vuyerisa Ku Dyondza Ha Yona

Hi ni malunghiselelo yo tala lama hi pfunaka hinkwerhu ku dyondza leswi engetelekeke hi matimu ya nhlengeletano ya Yehovha ni ndlela leyi yi tirhaka ha yona. Swivutiso leswi landzelaka swi nga ha ku pfuna ku vona ndlela leyi u nga sungulaka ha yona:

Ntirho wa valanguteri lava famba-fambaka va manguva lawa wu sungule njhani?Timbhoni Ta Yehovha I Vahuweleri Va Mfumo Wa Xikwembu, matluka 222-227.

I yini lexi a xi ri xa nkoka swinene malunghana ni “Siku Ra Vana” eNhlengeletanweni ya swa le Tilweni ya hi 1941?Timbhoni Ta Yehovha I Vahuweleri Va Mfumo Wa Xikwembu, matluka 86, 88.

Huvo leyi Fumaka yi swi endla njhani swiboho?‘Chumayela Mfumo Wa Xikwembu Hi Rixaladza,’ matluka 108-114.