Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• I yini leswi nga ta ku pfuna ku dyondzisa vana va wena ku va ni vutihlamuleri?

‘Vekela n’wana wa wena ntila’ leswaku a kota ku byarha vutihlamuleri. (Yoh. 13:15) U nga languteli swilo leswikulu; loko a ri karhi a kula u nga langutela swo tala eka yena etimhakeni to basa, to hlayisa nkarhi ni ku endla ntirho wa xikolo. Veka milawu leyi kongomeke leswaku u letela n’wana wa wena ku hetisisa vutihlamuleri byakwe.—5/1, matluka 19-20.

• Ha yini Xikwembu xi nga n’wi xupulanga Aroni loko a endle rhole ra nsuku?

Aroni u tlule nawu wa Xikwembu malunghana ni ku gandzela swifaniso. (Eks. 20:3-5) Kambe, Muxe u kombelele Aroni eka Xikwembu naswona xikombelo xakwe xi ve ni “matimba lamakulu.” (Yak. 5:16) Aroni a a tshembekile ku ringana malembe yo tala. Naswona hambileswi vanhu va kuceteleke Aroni ku endla rhole, endzhakunyana u swi kombisile leswaku mbilu ya yena a yi yimi na vona tanihi leswi a tihlanganiseke ni vana va Levhi hi ku yima na Yehovha. (Eks. 32:25-29)—5/15, tluka 21.

• A wu ri kwihi muti wa Ofiri lowu Bibele yi vulaka leswaku nsuku a wu kumeka eka wona?

Solomoni u endle swikepe le Esiyoni-gebere leswaku a ta tisa nsuku lowu humaka eOfiri. (1 Tih. 9:26-28) Hlaluko rero a ri ri ehenhla ka Nsonga-nkulu wa Aqaba ekusuhi ni ndhawu leyi namuntlha yi vuriwaka Elata na Aqaba eLwandle ro Tshwuka. Hikwalaho, swi nga ha endleka leswaku muti wa Ofiri a wu ri eArabiya ekusuhi ni Lwandle ro Tshwuka kumbe etimbuweni ta Afrika kumbe ta Indiya.—6/1, tluka 15.

• Xana ‘balsama ya le Giliyadi’ yi kombetela eka yini? (Yer. 8:22)

Mafurha ya balsama a ku ri mafurha yo nun’hwela lama humaka eka mirhi yo hambana-hambana ya le tindhawini tin’wana ta le Giliyadi, evuxeni bya Nambu wa Yordani. A ma tirhisiwa ku tshungula timbanga. Xiyimo xa Vaisrayele lexi terisaka vusiwana a xi fanele xi endle leswaku va lava ku tshunguriwa kambe a va swi lavanga. (Yer. 8:9)—6/1, matluka 21-22.

• I yini lexi nga pfunaka Mukreste leswaku a langutana ni ku nga tshembeki ka munghana wa vukati?

Loko munghana wa vukati la nga riki na nandzu a ringetile ku hanya hi milawu ya Bibele, a nga fanelanga a tivona nandzu hileswi munghana wa yena wa vukati a osweke. Xikwembu xa swi tiva leswaku na wena u lava ku chaveleriwa ni ku khutaziwa. Xi nga ku chavelela hi ku tirhisa Vakreste-kulobye.—6/15, matluka 30-31.

• U nga endla yini leswaku u pfuna munhu la vabyaka?

Vana muyingiseri lonene. (Ekl. 3:1, 7) Kombisa ntwela-vusiwana naswona u anakanyela. (Rhom. 12:15) Vana la khutazaka ni la pfunaka. (Kol. 4:6; 1 Yoh. 3:18) Tshama u ri karhi u vulavurisana na yena. (Swiv. 17:17)—7/1, matluka 10-13.

• Hi swi tivisa ku yini leswaku Xikwembu a xi vanga na masungulo?

Muxe u kombise mhaka yoleyo eka xikhongelo. (Ps. 90:2) Hikwalaho, Yehovha u ni xithopo xo hlawuleka lexi nge, “Hosi leyi nga riki na makumu.” (1 Tim. 1:17)—7/1, tluka 28.

• U nga va pfuna njhani vana va wena leswaku va rhandza ku hlaya?

Rirhandzu ni xikombiso xa wena swi ta ku pfuna ku va endla leswaku va rhandza ku hlaya. Nakambe va nyike tibuku. Hlaya hi rito ra le henhla. Va khutaze ku hlaya na wena ni ku bula hi leswi mi swi hlayeke. Kombela vana va wena leswaku va ku hlayela naswona va khutaze ku vutisa swivutiso.—7/15, tluka 26.

• Ha yini Yesu a nga hatliselanga ku ya eka munghana wa yena Lazaro loyi a a vabya kutani a n’wi tshungula?

Loko Yesu a fika, Lazaro a a ri ni masiku ya mune a file. Ku hlwela ka Yesu ku endle leswaku a nyikela vumbhoni lebyikulu hi Tata wakwe. Xisweswo vo tala va ve vapfumeri. (Yoh. 11:45)—8/1, matluka 14-15.

• A ku ri yini ‘tindhawu leti tlakukeke’?

Minkarhi yo tala a ku vuriwa tindhawu leti nga le switsungeni kumbe tindhawu tin’wana ta vugandzeri bya mavunwa. Minkarhi yin’wana tialitari, tinsika to kwetsima kumbe tinsika ni swifaniso swin’wana swa vukhongeri leswi a swi tirhisiwa loko ku gandzeriwa, a swi vekiwa etindhawini toleto leswaku ku endliwa mikhuva leyi Xikwembu xi yi vengaka. (Tinhl. 33:52)—8/1, tluka 23.