Nghena endzeni

Hundzela eka leswi nga endzeni

Ku Langutana Ni Ku Nga Tshembeki Ka Munghana Wa Vukati

Ku Langutana Ni Ku Nga Tshembeki Ka Munghana Wa Vukati

 Ku Langutana Ni Ku Nga Tshembeki Ka Munghana Wa Vukati

MARGARITA ni nuna wa yena Raúl, a va ri ni malembe yo tala va ri karhi va tirhela Yehovha entirhweni wa nkarhi hinkwawo. * Kambe endzhakunyana ka loko va kume n’wana wa vona wo sungula, Raúl u sungule ku pfumelela vuxaka bya yena na Yehovha leswaku byi tsana. Eku heteleleni, Raúl u sungule ku tikhoma hi ndlela yo biha naswona u susiwile evandlheni ra Vukreste. Margarita u ri: “Loko swilo leswi hinkwaswo swi humelela, a ndzi swi vona leswaku ndzi ta fa. A ndzi ri ni gome lerikulu naswona a ndzi nga swi tivi leswaku ndzi endla yini.”

Endzhakunyana ka loko Jane a tekiwile, nuna wa yena u sungule ku ka a nga ha tshembeki. U sungule ku n’wi ba. Jane u ri: “Loko a ndzi ba ro sungula, a ndzi tsemeke nhlana, a ndzi khomiwe hi tingana naswona a ndzi titwa ndzi tsongahatiwile. U sungule ku swi endla mukhuva leswaku a ndzi ba ivi endzhaku ka sweswo a kombela leswaku ndzi n’wi rivalela. A ndzi anakanya leswaku leswi ndzi nga Mukreste minkarhi hinkwayo a ndzi boheka ku n’wi rivalela ndzi tlhela ndzi rivala. Nakambe a ndzi anakanya leswaku ndzi ta va ndzi nga tshembeki loko ndzi byela munhu un’wana xiphiqo xa hina—hambi ku ri vakulu va le vandlheni. Ndzi ye emahlweni ndzi biwa ndzi tlhela ndzi rivalela ku ringana malembe yo tala. Nkarhi lowu hinkwawo a ndzi anakanya leswaku ku ni nchumu wo karhi lowu ndzi nga wu endlaka leswaku nuna wa mina a ndzi rhandza. Loko a ta hetelela a ndzi siyile ni  n’wana wa hina wa nhwanyana, ndzi swi vonile leswaku ndzi tsandzekile, naswona a ndzi vona onge a ndzi fanele ndzi endle kumbe ndzi vula leswi engetelekeke leswaku vukati bya hina byi nga hohloki.”

Ku fana na Margarita na Jane, swi nga ha endleka u tshikilelekile emintlhavekweni, u ni xiphiqo xa timali naswona vuxaka bya wena na Yehovha byi khumbeke swinene hikwalaho ka leswi nuna wa wena a nga tshembekangiki. Kumbe u nga ha va u ri wanuna loyi a dyaka mbitsi a xeva hi nhlomulo hi leswi nsati wa wena a nga tshembekangiki. Handle ko kanakana, hi hanya “[eminkarhini] ya mangava leyi swi nonon’hwaka ku langutana na yona,” hilaha Bibele yi profeteke hakona. Vuprofeta lebyi byi kombisa leswaku “emasikwini yo hetelela,” mindyangu a yi ta hlaseriwa, laha emindyangwini yo tala a ku nga ta va ni rirhandzu ra ntumbuluko. Eka van’wana a swi ta tikomba leswaku va hemba loko va vula leswaku va tirhela Xikwembu. (2 Tim. 3:1-5) Vakreste va ntiyiso na vona va langutana ni swiphiqo leswi; hikwalaho, i yini lexi nga ku pfunaka ku langutana ni xiyimo lexi loko munghana wa wena wa vukati a nga tshembekanga?

Tilangute Hi Ndlela Leyi Yehovha A Ku Langutaka Ha Yona

Eku sunguleni, swi nga ha ku tikela ku pfumela leswaku munhu loyi u n’wi rhandzaka a nga ku twisa ku vava swinene hi ndlela leyi. U nga ha sungula ku tivona nandzu hikwalaho ka xiendlo xa yena xo biha.

Kambe, tsundzuka leswaku hambi ku ri Yesu wanuna wo hetiseka u xengiwe hi munhu loyi a a n’wi tshemba a tlhela a n’wi rhandza. Yesu u hlawule vanakulobye va yena lavakulu, vaapostola, endzhaku ko anakanyisisa hi mhaka leyi hi vukheta swinene a tlhela a khongela ha yona. Vaapostola lava 12 hinkwavo a va ri malandza ya Yehovha yo tshembeka. Hikwalaho, a swi kanakanisi leswaku Yesu a a karhateke swinene loko Yudasi a “[hundzuka] madlayisana.” (Luka 6:12-16) Hambiswiritano, Yehovha a nga vonanga Yesu nandzu hikwalaho ka swiendlo swa Yudasi.

I ntiyiso leswaku ku hava munghana wa vukati loyi a nga munhu la hetisekeke sweswi. Vatekani havambirhi va ta swi endla swihoxo. Mupisalema la huhuteriweke u tsarile a ku: “Loko a wu languta swihoxo, Wena Yah, Oho Yehovha, i mani loyi a a ta yima?” (Ps. 130:3) Vatekani havambirhi va fanele va tikarhatela ku rivalelana xisweswo va tekelela Yehovha.—1 Pet. 4:8.

Hambiswiritano, “un’wana ni un’wana wa hina u ta tihlamulela eka Xikwembu.” (Rhom. 14:12) Loko munghana wa vukati a ri ni mukhuva wa ku tirhisa mavulavulelo lama tlhavaka kumbe wa ku ba munghana lowun’wana wa vukati, i munghana wa vukati la nga ni nandzu la nga ta tihlamulela eka Yehovha. Yehovha a nga ma lavi madzolonga ni mavulavulelo lama tlhavaka, hikwalaho a ku na xivangelo lexi twalaka xo khoma munghana wa vukati hi ndlela yo tano leyi nga kombisiki rirhandzu ni ku xixima. (Ps. 11:5; Efe. 5:33; Kol. 3:6-8) Entiyisweni, loko Mukreste a tshamela ku va na xifafa naswona a nga hundzuki, u fanele a susiwa evandlheni ra Vukreste. (Gal. 5:19-21; 2 Yoh. 9, 10) Munghana wa vukati a nga fanelanga a titwa a ri na nandzu hi leswi a vikeke mikhuva yo tano leyi nga riki ya Vukreste eka vakulu. Hakunene, Yehovha u va twela vusiwana vanhu lava khomiwaka hi ndlela yo tano yo biha.

Loko munghana wa vukati a endla vuoswi, a nga dyoheli munghana lowun’wana wa vukati loyi a nga riki na nandzu ntsena kambe u dyohela na Yehovha. (Mat. 19:4-9; Hev. 13:4) Loko ku ri leswaku munghana wa vukati loyi a nga riki na nandzu a a tikarhatela ku hanya hi milawu ya le Bibeleni, a nga fanelanga a titwa a ri ni nandzu hikwalaho ka xidyoho lexi endliweke hi munghana wa yena wa vukati loyi a osweke.

Tsundzuka leswaku Yehovha wa yi tiva ndlela leyi u titwaka ha yona. U tihlamusela tanihi nuna la nga n’wini wa tiko ra Israyele, naswona Rito ra yena ri ni tindzimana to tala leti khumbaka mbilu leti hlamuselaka gome leri a veke na rona hikwalaho ka leswi tiko leri ri endleke vuoswi hi tlhelo ra moya. (Esa. 54:5, 6; Yer. 3:1, 6-10) Tiyiseka leswaku Yehovha u yi vona kahle mihloti leyi u nga na yona hikwalaho ka leswi munghana wa wena wa vukati a nga tshembekiki. (Mal. 2:13, 14) Wa swi tiva leswaku u lava ku chaveleriwa ni ku khutaziwa.

Ndlela Leyi Yehovha A Chavelelaka Ha Yona

Ndlela yin’wana leyi Yehovha a chavelelaka ha yona i ku tirhisa vandlha ra Vukreste. Jane u wu kumile nchavelelo wolowo. Jane u ri: “Mulanguteri  wa xifundzha u endze hi nkarhi lowu a ndzi tshoveke mbilu swinene. A a yi tiva ndlela leyi a ndzi tshikileleke ha yona hikwalaho ka leswi nuna wa mina a a lava ku dlaya vukati. U hete nkarhi wo leha a ri karhi a ndzi pfuna leswaku ndzi anakanya hi matsalwa yo tanihi 1 Vakorinto 7:15. Tindzimana ta le Bibeleni swin’we ni marito ya yena ya musa swi ndzi pfunile leswaku ndzi nga ha tivoni nandzu naswona swi endle leswaku ndzi va ni ku rhula ka mianakanyo.” *

Margarita, loyi ku vulavuriweke ha yena eku sunguleni u tlhele a dyondza leswaku Yehovha u nyikela mpfuno hi ku tirhisa vandlha ra Vukreste. Margarita u ri: “Loko swi va erivaleni leswaku nuna wa mina a a nga swi lavi ku hundzuka, ndzi teke vana va mina hi rhurhela edorobeni rin’wana. Loko ndzi fika kwalaho ndzi kote ku hirha makamara mambirhi. Hi siku leri tlhandlamaka, loko ndzi ri karhi ndzi pakulula tibege ta hina ndzi ri ni gome lerikulu, ndzi twe munhu a ri karhi a gongondza enyangweni. A ndzi anakanya leswaku i n’wini wa ndhawu leyi ndzi tshamaka eka yona tanihi leswi a a ri muakelani wa mina. Lexi ndzi hlamariseke, a ku ri makwerhu wa xisati loyi a dyondzeleke manana Bibele naswona a pfuneke ndyangu wa ka hina ku dyondza ntiyiso. A a nga ehleketi leswaku a nga ndzi vona kambe a a te endlwini leyi hikuva a a dyondza Bibele ni n’wini wa ndhawu leyi ndzi tshamaka eka yona. Ndzi te hefu—kambe ndzi tsandzeke ku tikhoma. Ndzi n’wi hlamusele xiyimo xa mina hiloko hi rila swin’we. U nambe a hlela leswaku hi ya enhlanganweni hi siku rero. Vamakwerhu va le vandlheni rolero va hi amukele hi mandla mambirhi, naswona vakulu va endle malunghiselelo ya ku ndzi pfuna ku khathalela swilaveko swa moya swa ndyangu wa mina.”

Ndlela Leyi Van’wana Va Nga Pfunaka Ha Yona

Hakunene, swirho swa vandlha ra Vukreste swi nga pfuneta eku khathaleleni ka swilaveko swa xisekelo swa munhu hi tindlela to tala. Hi xikombiso, Margarita a a fanele a kuma ntirho. Ndyangu wun’wana evandlheni rolero wu vule leswaku wu nga n’wi pfuna ku khathalela vana va yena loko xikolo xi humile loko swi laveka.

Margarita u ri: “Leswi ndzi swi tlangelaka swinene hiloko vamakwerhu va xinuna ni va xisati va lava ku famba na mina ni vana va mina ensin’wini.” Hi mpfuno wo tano, swirho swa vandlha swi pfuna ku ‘rhwalela van’wana mindzhwalo’ naswona loko swi endla tano swi hetisisa “nawu wa Kreste.”—Gal. 6:2.

Lava va xanisekaka hikwalaho ka swidyoho swa van’wana entiyisweni va wu tlangela mpfuno wa muxaka lowu. Monique, loyi nuna wa yena a n’wi siyeke a ri ni xikweleti xa R110 000 ni vana va mune lava a a fanele a va kurisa, u ri: “Vamakwerhu va xinuna ni va xisati va le vandlheni va ndzi kombise rirhandzu swinene. A ndzi nga ta kota ku endla nchumu handle ka nseketelo wa vona. Ndza swi vona leswaku Yehovha u tirhise vamakwerhu  volavo lavanene, lava tinyiketeleke ku pfuna vana va mina. Ndzi tsakele ku vona vana va mina va kula hi tlhelo ra moya va ri ni mpfuno wo tano. Loko ndzi lava xitsundzuxo, vakulu a va ndzi pfuna. Loko ndzi lava munhu wo vulavula na yena, a va ndzi yingisela.”—Mar. 10:29, 30.

I ntiyiso leswaku munghana la nga ni rirhandzu u ta swi xiya loko ku nga ri nkarhi wa ku vulavula hi mhaka leyi vavaka ya munhu un’wana. (Ekl. 3:7) Margarita u ri: “Minkarhi yo tala a ndzi tsakela ku vulavula ni vamakwerhu va xisati va le vandlheni ra mina lerintshwa hi ntirho wa ku chumayela, tidyondzo ta hina ta Bibele, vana va hina—handle ka swiphiqo swa mina. A ndzi swi tlangela leswaku a va lava ndzi rivala hi swilo leswi nga ndzi humelela kutani va ndzi pfuna ku sungula hi vuntshwa.”

Lwisana Ni Moya Wa Ku Lava Ku Rihisela

Minkarhi yin’wana, ematshan’weni yo tivona nandzu hikwalaho ka swidyoho swa munghana wa wena wa vukati, u nga ha hlundzukisiwa hi mhaka ya leswaku u xaniseka swinene hikwalaho ka swihoxo swa yena. Loko moya wolowo wo pfumeleriwa leswaku wu kula, wu nga ha ku endla leswaku u nga tshembeki eka Yehovha. Hi xikombiso, u nga ha ringeka leswaku u lava tindlela ta ku rihisela eka munghana wa wena wa vukati la nga tshembekangiki.

Loko u xiya leswaku u sungula ku va ni moya wa ku lava ku rihisela, u nga ha anakanyisisa hi xikombiso xa Yoxuwa na Kalebe. Vavanuna lava vo tshembeka va hoxe vutomi bya vona ekhombyeni leswaku va ya kambela Tiko leri Tshembisiweke. Tinhlori letin’wana a ti nga ri na ripfumelo naswona ti endle leswaku vanhu va nga ha yingisi Yehovha. Vaisrayele van’wana va kale va lava ku khandla Yoxuwa na Kalebe hi maribye loko va ringeta ku khutaza tiko rero leswaku ri tshama ri tshembekile. (Tinhl. 13:25–14:10) Yoxuwa na Kalebe va boheke ku tsendzeleka emananga ku ringana malembe ya 40 ku nga ri hikwalaho ka xihoxo xa vona kambe hikwalaho ka xihoxo xa Vaisrayele van’wana.

Hambileswi Yoxuwa na Kalebe swi nga ha endlekaka leswaku va titwe va hele matimba, a va pfumelanga leswaku swidyoho swa vamakwavo swi va endla va hlundzuka. Va rhangise ku tirhela ka vona Yehovha. Endzhaku ko heta malembe ya 40 emananga, vona swin’we ni Valevhi, va hakeriwe hi ku va lava poneke eka xitukulwana xexo naswona va pfumeleriwile ku nghena eTikweni leri Tshembisiweke.—Tinhl. 14:28-30; Yox. 14:6-12.

Swiendlo swa munghana wa wena wa vukati loyi a nga tshembekangiki swi nga ha endla leswaku u xaniseka nkarhi wo leha. Vukati byi nga ha hela, kambe u nga ha xaniseka emintlhavekweni u tlhela u va ni xiphiqo xa timali. Hambiswiritano, ematshan’weni yo pfumela ku tshikileleka ku tlula mpimo, tsundzuka leswaku Yehovha u swi tiva kahle leswi a faneleke a swi endla eka lava va honisaka milawu ya yena hi vomu, hilaha xikombiso xa leswi humeleleke eka Vaisrayele lava nga riki na ripfumelo emananga xi kombisaka hakona.—Hev. 10:30, 31; 13:4.

U Nga Swi Kota Ku Langutana Ni Xiyimo Lexi!

Ematshan’weni yo pfumelela mianakanyo yo biha leswaku yi ku tshikilela, tshama u ri karhi u anakanya hi mianakanyo ya Yehovha. Jane u ri: “Ndzi kume leswaku ku yingisela Xihondzo xo Rindza ni Xalamuka! leyi rhekhodiweke swa ndzi pfuna leswaku ndzi langutana ni xiyimo lexi. Minhlangano ya vandlha a yi ndzi nyika matimba swinene. Ku hlamula eminhlanganweni a swi endla ndzi nga anakanyi hi swiphiqo swa mina. Ntirho wo chumayela na wona wu ndzi pfune hi ndlela leyi fanaka. Loko ndzi pfuna van’wana leswaku va va ni ripfumelo eka Yehovha, a ndzi tiyisa ripfumelo ra mina. Naswona ku khathalela swichudeni swa Bibele swi ndzi pfunile leswaku ndzi anakanya hi swilo swa nkoka swinene.”

Monique, loyi ku vulavuriweke ha yena hala henhla, u ri: “Ndzi kote ku tiyisela hikwalaho ko va kona eminhlanganweni nkarhi na nkarhi ni hi ku ya entirhweni wa nsimu minkarhi yo tala hilaha ndzi nga kotaka hakona. Ndyangu wa hina wu ni vun’we naswona wu ni vun’we swin’we ni vandlha. Swiphiqo swa mina swi ndzi pfunile leswaku ndzi kota ku vona ku tsana ka mina. Ndzi ringiwile, kambe hi ku pfuniwa hi Yehovha ndza swi kota ku tiyisela.”

Na wena u nga swi kota ku tiyisela miringo leyi fanaka. Ku nga khathariseki ku karhateka loku u vangeriweke kona hi munghana wa vukati loyi a nga tshembekangiki, tikarhatele ku yingisa ndzayo leyi huhuteriweke ya Pawulo, leyi nge: “Hi nga tshiki ku endla leswi nga swinene, hikuva hi nguva leyi faneleke hi ta tshovela loko hi nga karhali.”—Gal. 6:9.

[Tinhlamuselo ta le hansi]

^ par. 2 Mavito man’wana ma cinciwile.

^ par. 13 Leswaku u kuma rungula leri engetelekeke malunghana ni langutelo ra Bibele emhakeni ya ku thalana ni ya ku dlaya vukati, vona buku leyi nge “Tihlayiseni eRirhandzwini Ra Xikwembu,” matluka 125-130, 219-221.

[Xifaniso lexi nga eka tluka 31]

Vanghana va vukati lava siyiweke va va tlangela vanhu lava va pfunaka entirhweni wa nsimu