Nghena endzeni

Hundzela eka leswi nga endzeni

Yana eMahlweni U Letela Matimba Ya Wena Ya Ku Twisisa

Yana eMahlweni U Letela Matimba Ya Wena Ya Ku Twisisa

 Yana eMahlweni U Letela Matimba Ya Wena Ya Ku Twisisa

SWA tsakisa hakunene ku vona mutlangi a ri karhi a endla vutiolori bya yena hi xihatla! Bibele yi khutaza Vakreste leswaku va letela vuswikoti bya vona byo anakanya hi ndlela leyi mutlangi a tiletelaka ha yona.

Eka papila ra yena leri yaka eka Vaheveru, muapostola Pawulo u tsale a ku: “Swakudya leswi tiyeke i swa vanhu lava wupfeke, lava va letelaka matimba ya vona ya ku twisisa [Hi ku kongoma, “swirho leswi twaka”] hi ku ma tirhisa [ku fana ni mutlangi] leswaku va hambanisa leswi lulameke ni leswi hoxeke.” (Hev. 5:14, nhlamuselo ya le hansi ya NW) Ha yini Pawulo a khutaze Vakreste va Vaheveru leswaku va letela vuswikoti bya vona byo anakanya hi ndlela leyi mutlangi a endlaka vutiolori ha yona? Hi nga ma letela njhani matimba ya hina ya ku twisisa?

“Mi Fanele Mi Va Vadyondzisi”

Loko Pawulo a hlamusela xikhundlha xa Yesu tanihi “muprista lonkulu hi ku ya hi mukhuva wa Melkisedeke,” u tsarile a ku: “Hi ni swo tala swo swi vula malunghana na yena [Yesu], leswi swi nonon’hwaka ku swi hlamusela, hileswi mi tlanyaleke eku tweni ka n’wina. Hikuva, kunene, hambileswi mi faneleke ku va vadyondzisi hikwalaho ka nkarhi, nakambe mi lava un’wana la nga ta mi dyondzisa ku sukela eku sunguleni swilo swa masungulo swa marito lama hlawulekisiweke ya Xikwembu; naswona mi fana ni lava lavaka ntswamba, ku nga ri swakudya swo tiya.”—Hev. 5:10-12.

Entiyisweni, Vakreste van’wana va Vayuda va lembe-xidzana ro sungula a va nga endlanga nhluvuko eku twisiseni ka vona ni hi tlhelo ra moya. Hi xikombiso, a swi va tikela ku amukela ku voningeriwa loku engetelekeke malunghana ni Nawu swin’we ni ku yimba. (Mint. 15:1, 2, 27-29; Gal. 2:11-14; 6:12, 13) Van’wana a swi va tikela ku tshika mikhuva leyi fambisanaka ni Savata ya vhiki na vhiki ni Siku ro Kombela ku Rivaleriwa ra lembe ni lembe. (Kol. 2:16, 17; Hev. 9:1-14) Hikwalaho, Pawulo u va khutaze leswaku va letela matimba ya vona ya ku twisisa leswaku va ta kota ku hambanisa leswi lulameke eka leswi hoxeke a tlhela a va byela leswaku va ‘chivirikela eku wupfeni.’ (Hev. 6:1, 2) Xitsundzuxo xa yena xi fanele xi susumetele van’wana leswaku va anakanyisisa hi ndlela leyi a va byi tirhisa ha yona vuswikoti bya vona byo anakanya naswona swi nga endleka leswaku sweswo swi va endle leswaku va endla nhluvuko hi tlhelo ra moya. Ku vuriwa yini hi hina?

Letela Matimba Ya Wena Ya Ku Twisisa

Hi nga byi letela njhani vuswikoti bya hina byo anakanya leswaku hi ta kula hi tlhelo ra moya? Pawulo u te: ‘Hi ku byi tirhisa.’ Ku fana ni vatlangi lava hikwalaho ko endla vutiolori va letelaka misiha ni mimiri ya vona leswaku yi kota ku endla swilo leswi rharhanganeke, na hina hi fanele letela vuswikoti bya hina byo anakanya leswaku hi hambanisa leswi lulameke ni leswi hoxeke.

John Ratey loyi a nga profesa wa vutshunguri bya miehleketo wa le Xikolweni xa Vutshunguri xa Harvard u ri: “Vutiolori i nchumu wun’we wa nkoka lowu u nga wu endlelaka byongo bya wena.” Hi ku ya hi Gene Cohen, mukongomisi wa Ndhawu leyi kambisisaka Vudyuhari, Rihanyo ni Vumunhu le Yunivhesiti ya George Washington, “loko hi ringeta ku endla swilo swo tika, tisele ta byongo bya hina ti humesa swilo leswintshwa leswi hlanganisaka tisele kutani ku andza mavangwa lama nga le xikarhi ka makumu ya tisele to twa.”

Hikwalaho, hi ta va hi tlharihile loko hi tirhisa vuswikoti bya hina byo anakanya hi tlhela hi engetela vutivi bya hina bya Rito ra Xikwembu. Loko hi endla tano hi ta swi kota ku endla “ku rhandza ka Xikwembu loku hetisekeke.”—Rhom. 12:1, 2.

 Vana Ni Ku Navela “Swakudya Leswi Tiyeke”

Loko hi navela ku ‘chivirikela eku wupfeni,’ hi fanele hi tivutisa: ‘Xana ndzi endla nhluvuko eku twisiseni ka ntiyiso wa le Bibeleni? Xana van’wana va ndzi teka ndzi ri munhu la wupfeke hi tlhelo ra moya?’ Manana u tsakela ku nyika ricece ra yena ntswamba ni swakudya swa tincece loko a ha ri n’wana. Kambe anakanya ndlela leyi a a ta karhateka ha yona loko ko hundza malembe kambe n’wana wa yena a nga dyi swakudya leswi tiyeke. Hilaha ku fanaka, swa hi tsakisa ku vona xichudeni xa hina xa Bibele xi endla nhluvuko kukondza xi tinyiketela kutani xi khuvuriwa. Kambe, ku vuriwa yini loko munhu yoloye a nga endli nhluvuko hi tlhelo ra moya endzhaku ka sweswo? Xana sweswo a swi nga ta heta matimba? (1 Kor. 3:1-4) Mudyondzisi u tshemba leswaku hi nkarhi lowu faneleke mudyondzisiwa lontshwa na yena u ta va mudyondzisi.

Ku tirhisa matimba ya hina ya ku twisisa leswaku hi vulavula hi timhaka to karhi swi lava leswaku hi anakanyisisa, kutani sweswo swi lava hi endla matshalatshala. (Ps. 1:1-3) A hi fanelanga hi pfumelela ku kavanyetiwa hi swilo leswi nga laviki leswaku hi tirhisa mianakanyo ya hina swinene, swo tanihi ku hlalela thelevhixini kumbe vuhungasi leswaku swi hi sivela ku anakanyisisa hi swilo swa nkoka. Leswaku hi kurisa vuswikoti bya hina byo anakanya, i swa nkoka leswaku hi kuma hi tlhela hi enerisa ku navela ka hina ka ku dyondza Bibele ni minkandziyiso ya “hlonga ro tshembeka ni ro tlhariha.” (Mat. 24:45-47) Ku engetela eka xiyimiso xa nkarhi na nkarhi xa dyondzo ya munhu hi yexe xa Bibele, i swa nkoka leswaku hi tivekela nkarhi wa ku va ni Dyondzo ya Ndyangu ni ku kambisisa hi vuenti tinhloko-mhaka to karhi ta le Bibeleni.

Jerónimo, mulanguteri la famba-fambaka wa le Mexico u vula leswaku u hlaya nkandziyiso wun’wana ni wun’wana wa Xihondzo xo Rindza loko wu huma. U tlhela a veka nkarhi wa ku hlaya swin’we ni nsati wakwe. Jerónimo u ri, “Tanihi vatekani hi ni mukhuva wa ku hlaya Bibele swin’we siku ni siku, naswona hi tlhela hi tirhisa ni minkandziyiso yo tanihi broxara leyi nge ‘Tiko Lerinene.’” Mukreste la vuriwaka Ronald u vula leswaku u tshama a ri karhi a fambisana ni ku hlaya ka Bibele ka le vandlheni. Nakambe u hlele ni dyondzo ya munhu hi yexe leyi nga ta teka nkarhi wo leha leyi eka yona a tlhuvutsaka nhloko-mhaka yin’we kumbe timbirhi. Ronald u ri: “Swiyimiso leswi swi endla leswaku ndzi tshama ndzi yi langutele hi mahlo-ngati dyondzo leyi landzelaka.”

Ku vuriwa yini hi hina? Xana hi tivekela nkarhi lowu eneleke wa ku dyondza Bibele hi tlhela hi anakanyisisa hi Rito ra Xikwembu? Xana hi letela vuswikoti bya hina byo anakanya hi tlhela hi va ni ntokoto eku endleni ka swiboho hi ku pfumelelana ni milawu ya le Matsalweni? (Swiv. 2:1-7) Onge hi nga tiyimisela ku va vanhu lava wupfeke hi tlhelo ra moya, hi katekisiwa hi vutivi ni vutlhari lebyi kumiwaka hi lava letelaka matimba ya vona ya ku twisisa leswaku va kota ku hambanisa leswi lulameke ni leswi hoxeke!

[Xifaniso lexi nga eka tluka 23]

Hi letela vuswikoti bya hina byo anakanya ‘hi ku byi tirhisa’