Nghena endzeni

Hundzela eka leswi nga endzeni

Ha Yini Hi Fanele Hi Xixima Vadyuhari?

Ha Yini Hi Fanele Hi Xixima Vadyuhari?

 Ha Yini Hi Fanele Hi Xixima Vadyuhari?

ETLHELO ka ribuwa ra le California eU.S.A., ku ni nsinya wun’wana lowu tekiweke swifaniso swo tala emisaveni. Wu vitaniwa Lone Cypress. Ku vuriwa leswaku nsinya lowu wu ni malembe lama tlulaka 250. Leswi swi tiviwaka leswaku wa tiyisela, nsinya lowu wo saseka wu khathaleriwe hi tindlela to tala. Hi xikombiso, wu boheleriwe hi tintambhu leswaku wu tiyisiwa naswona ku veketeriwe maribye etlhelo ka wona.

Nsinya lowu wa Lone Cypress wu nga ha hi tsundzuxa hi Vakreste lava dyuhaleke lava hi nga na vona, lava va tiyiselaka hi ndlela leyi hlamarisaka. Ndlela yin’wana leyi hlamarisaka leyi va kombisaka ku tiyisela koloko ha yona i ku chumayela mahungu lamanene. Muprofeta Yuwele u profete leswaku “vavanuna lava kuleke” a va ta twarisa rungula ra le Bibeleni. (Yuw. 2:28-32; Mint. 2:16-21) Anakanya hi nkarhi wo tala lowu va wu hetaka va ri karhi va pfuna van’wana leswaku va twa ‘mahungu lamanene ya mfumo’! (Mat. 24:14) Vahuweleri van’wana va Mfumo lava se va dyuhaleke va tiyisele malembe yo tala va ri karhi va xanisiwa kumbe va langutana ni swiphiqo swin’wana. Loko nsinya wunene wu tiviwa hi ku tiyisela naswona wu tiyisiwa hi maribye ni hi tintambhu, vanhu lava dyuhaleke lava nga exikarhi ka hina va fanele va tekeriwa enhlokweni swinene va tlhela va khomiwa hi xichavo ni ku xiximiwa!

Yehovha Xikwembu u lerise vanhu va yena va khale a ku: “U fanele u suka u yima emahlweni ka la nga ni timpfu naswona u fanele u komba xichavo eka munhu la kuleke.” (Lev. 19:32) Exikarhi ka malandza ya Yehovha namuntlha, ku ni vanhu vo tshembeka lava nga swikombiso leswinene lava va nga ni makume ya malembe va ri karhi va ‘famba ni Xikwembu.’  (Mik. 6:8) Loko va ri karhi va ya emahlweni va tirhisa milawu leyi nga le Matsalweni, hakunene misisi ya vona ya mpunga i “harhi ya ku saseka.”—Swiv. 16:31.

Muapostola Pawulo u lerise Timotiya loyi a a ha ri muntshwa a ku: “U nga n’wi soli hi matimba wanuna la kuleke.” Kambe Timotiya a a fanele a ‘n’wi khongotela tanihi tatana’ ni “vaxisati lava kuleke tanihi vamanana.” (1 Tim. 5:1, 2) Entiyisweni, Timotiya a a fanele a “yima” emahlweni ka la nga ni timpfu. Kutani, swi le rivaleni leswaku Yehovha u lava leswaku ndlela leyi hi vulavulaka ha yona yi kombisa leswaku hi ni xichavo.

Varhoma 12:10 yi ri: “Vanani lavo rhanga eku xiximaneni.” A swi kanakanisi leswaku valanguteri evandlheni va va xixima Vakreste lava dyuhaleke. Kambe hinkwerhu hi fanele hi va lavo rhanga eku xiximeni van’wana.

Ina, swirho swa ndyangu swi ni vutihlamuleri byo hlawuleka eka vatswari va swona ni le ka vakokwa wa swona. Malunghana ni nsinya wa Lone Cypress, vanhu va lave tindlela to pfuneta ku wu sirhelela naswona va ha ya emahlweni va endla tano. Hikwalaho hi fanele hi lava tindlela to pfuneta ku sirhelela xindzhuti xa vatswari va hina ni vakokwa wa hina lava dyuhalaka. Hi xikombiso, ku va vayingiseri lavanene swi ta hi pfuna leswaku hi nga sindzisi ku endla swilo hi ndlela ya hina hi nga ri na mhaka ni ndlela leyi va titwaka ha yona.—Swiv. 23:22; 1 Tim. 5:4.

Vadyuhari lava hi nga na vona evandlheni i va risima swinene eka Yehovha. A nga va cukumeti. (Ps. 71:18) Entiyisweni Xikwembu xa ntiyiso xi va nyika matimba leswaku va ya emahlweni va xi tirhela hi ku tshembeka. Onge na hina hi nga hambeta hi seketela ni ku xixima vadyuhari.

[Swifaniso leswi nga eka tluka 7]

Leswi nsinya wa Lone Cypress wu lavaka ku seketeriwa, vadyuhari va lava ku khomiwa hi xichavo naswona va xiximiwa

[Xihlovo Xa Kona]

American Spirit Images/age fotostock