Nghena endzeni

Hundzela eka leswi nga endzeni

Ndlela Leyi Yehovha A Tirhisaka Moya Lowo Kwetsima Ha Yona Ku Hetisisa Xikongomelo Xa Yena

Ndlela Leyi Yehovha A Tirhisaka Moya Lowo Kwetsima Ha Yona Ku Hetisisa Xikongomelo Xa Yena

 Ndlela Leyi Yehovha A Tirhisaka Moya Lowo Kwetsima Ha Yona Ku Hetisisa Xikongomelo Xa Yena

“Rito ra mina leri humaka enon’wini wa mina . . . ri ta humelela hakunene eka leswi ndzi ri rhumeleke swona.”—ESA. 55:11.

1. Kombisa ku hambana exikarhi ka kungu ni xikongomelo.

ANAKANYA vavanuna vambirhi lava va tilunghiselelaka ku teka riendzo hi timovha. Un’wana u kunguhate ku famba hi ndlela yo karhi leswaku a ta fika laha a yaka kona. Lowun’wana u yi tiva kahle ndlela leyi a nga ta famba ha yona naswona u tiva ni tindlela tin’wana to tala leti a nga ti tirhisaka. U tiyimiserile ku tirhisa ndlela yin’wana loko swiyimo swi n’wi boha ku endla tano. Hi ndlela yo karhi, ndlela leyi vavanuna lavambirhi va hleleke maendzo ya vona ha yona yi kombisa ku hambana loku nga kona exikarhi ka ku kunguhata ni xikongomelo. Kungu ri nga ha fanisiwa ni ku kunguhata ku famba hi ndlela yo karhi, kasi xikongomelo xi nga ha katsa ku va ni pakani emianakanyweni kambe u nga ri na ndlela yin’we ntsena yo yi fikelela.

2, 3. (a) Xikongomelo xa Yehovha xi katsa yini, naswona hi rihi goza leri a ri tekeke endzhaku ka loko Adamu na Evha va dyohile? (b) Ha yini hi fanele hi endla hi ku pfumelelana ni ndlela leyi Yehovha a xi hetisisaka ha yona xikongomelo xa yena?

2 Loko swi ta eku hetisiseni ka xikongomelo xa yena, Yehovha a nga na kungu leri nga hundzukiki kambe u ni xikongomelo lexi nga ta hetiseka hi ku famba ka nkarhi. (Efe. 3:11) Xikongomelo lexi xi katsa leswi a a ri na swona emianakanyweni eku sunguleni hi vanhu ni hi misava—leswaku misava leyi yi hundzuriwa kaya leri nga paradeyisi laha vanhu lava hetisekeke va nga hanyaka hi ku rhula va tsakile hilaha ku nga heriki. (Gen. 1:28) Endzhaku  ka loko Adamu na Evha va dyohile, Yehovha u teke goza a tlhela a endla malunghiselelo ku tiyisekisa leswaku xikongomelo xa yena xi ta hetiseka. (Hlaya Genesa 3:15.) Yehovha a a lava leswaku wansati wa yena wo fanekisela a tswala “mbewu,” kumbe N’wana loyi eku heteleleni a a ta lovisa muhlohloteri Sathana, a tlhela a herisa ni maxangu lawa a ma vangeke.—Hev. 2:14; 1 Yoh. 3:8.

3 Ku hava muungameri etilweni kumbe emisaveni loyi a nga sivelaka Xikwembu ku hetisisa xikongomelo xa xona. (Esa. 46:9-11) Ha yini hi nga vulaka tano? Hikuva moya lowo kwetsima wa Yehovha wa katseka. Moya wolowo lowu nga ni matimba swinene wa tiyisekisa leswaku xikongomelo xa Xikwembu xi “ta humelela hakunene.” (Esa. 55:10, 11) Hi fanele hi xiya hi tlhela hi endla hi ku pfumelelana ni ndlela leyi Xikwembu xi xi hetisisaka ha yona xikongomelo xa xona. Vumundzuku bya hina byi titshege hi ku hetiseka ka xona. Ku engetela kwalaho, swi tiyisa ripfumelo ku vona ndlela leyi Yehovha a tirhisaka moya lowo kwetsima ha yona. Hikwalaho, a hi kambisiseni ndlela leyi moya lowo kwetsima wu tirheke ha yona enkarhini lowu hundzeke, ndlela leyi wu tirhaka ha yona sweswi ni ndlela leyi wu nga ta tirha ha yona enkarhini lowu taka, eku hetisiseni ka xikongomelo xa Yehovha.

Ndlela Leyi Moya Lowo Kwetsima Wu Tirheke Ha Yona eNkarhini Lowu Hundzeke

4. Yehovha u xi paluxe njhani xikongomelo xakwe hakatsongo-ntsongo?

4 Eminkarhini ya Bibele, Yehovha u paluxe xikongomelo xakwe hakatsongo-ntsongo. Eku sunguleni, nhlamuselo ya Mbewu leyi tshembisiweke a yi ri “xihundla xo kwetsima.” (1 Kor. 2:7) Yehovha u tlhele a vulavula hi mbewu endzhaku ka malembe ya kwalomu ka 2 000. (Hlaya Genesa 12:7; 22:15-18.) Yehovha u nyike Abrahama xitshembiso lexi a xi ta hetiseka hi ndlela leyikulu. Marito lama nge “hi mbewu ya wena,” a ma kombisa leswaku Mbewu yoleyo a yi ta va munhu wa nyama loyi a a ta va ntukulu wa Abrahama. Hi nga tiyiseka leswaku Sathana a a tshwukise ni mahlo a lava ku vona loko vuxokoxoko lebyi byi ri karhi byi paluxeka. A swi kanakanisi leswaku Nala loyi a a lava ku herisa kumbe ku onha nxaxamelo wa vatukulu va Abrahama kutani a sivela xikongomelo xa Xikwembu leswaku xi nga hetiseki. Kambe sweswo a swi nga ta endleka hikuva moya wa Xikwembu lowu nga vonakiki a wu ri eku tirheni. A wu tirha hi tindlela tihi?

5, 6. Yehovha u wu tirhise njhani moya wa yena leswaku a sirhelela vanhu va rixaka leri Mbewu a yi ta huma eka rona?

5 Yehovha u tirhise moya wakwe leswaku a sirhelela vanhu va rixaka leri Mbewu a yi ta huma eka rona. Yehovha u byele Abrama (Abrahama) a ku: “Ndzi xitlhangu xa wena.” (Gen. 15:1) Marito wolawo a ma nga ri xitshembiso lexi nga vuliki nchumu. Hi xikombiso, anakanya hi leswi humeleleke kwalomu ka 1919 B.C.E. loko Abrahama na Sara va tshame swa xinkarhana le Gerara. Leswi Abimeleke hosi ya le Gerara a a nga swi tivi leswaku Sara a a ri nsati wa Abrahama, u teke Sara hi xikongomelo xo n’wi endla nsati wa yena. Xana Sathana a a tirhisa xiyimo xexo vona va nga swi tivi, a ringeta ku sivela Sara leswaku a nga tswaleli Abrahama n’wana? Bibele a yi vuli nchumu hi mhaka yoleyo. Leswi yi hi byelaka swona hi leswaku Yehovha u nghenelerile. U tsundzuxe Abimeleke enorhweni leswaku a nga n’wi khumbi Sara.—Gen. 20:1-18.

6 Yehovha a nga va sirhelelanga hi nkarhi wolowo ntsena. Yehovha u kutsule Abrahama ni swirho swa ndyangu wa yena minkarhi yo hlayanyana. (Gen. 12:14-20; 14:13-20; 26:26-29) Hikwalaho, mupisalema u vulavule hi Abrahama ni vatukulu va yena a ku: “[Yehovha] a nga va pfumelelanga vanhu van’wana leswaku va va dyelela, kambe u tshinye tihosi hikwalaho ka vona, a ku: ‘N’wina mi nga tshuki mi va khumba vatotiwa va mina, naswona mi nga endli nchumu xo biha eka vaprofeta va mina.’”—Ps. 105:14, 15.

7. Yehovha u sirhelele rixaka ra Israyele hi tindlela tihi?

7 Hi ku tirhisa moya wa yena, Yehovha u sirhelele rixaka ra khale ra Vaisrayele, leri Mbewu leyi tshembisiweke a yi ta huma eka rona. Hi ku tirhisa moya, Yehovha u nyike Vaisrayele Nawu wa yena, lowu sirheleleke vugandzeri bya ntiyiso swin’we ni Vayuda leswaku va nga thyakisi vugandzeri bya vona, mahanyelo ya vona ni mimiri ya vona. (Eks. 31:18; 2 Kor. 3:3) Hi nkarhi wa Vaavanyisi, Yehovha u nyike vavanuna vo karhi matimba yo kutsula Vaisrayele eka valala va vona. (Vaav. 3:9, 10) Eka malembe-xidzana ya le kusuhi ni nkarhi lowu Yesu, loyi a nga lonkulu eka mbewu ya Abrahama a tswariweke ha wona, moya lowo kwetsima wu fanele wu katsekile eku sirheleleni ka muti wa Yerusalema, muti wa Betlehema ni tempele, ku nga tindhawu leti a ti  ta katseka ngopfu eku hetisekeni ka vuprofeta lebyi khumbaka Yesu.

8. I yini lexi kombisaka leswaku moya lowo kwetsima a wu tirha hi ku kongoma eka vutomi ni vutirheli bya N’wana wa Xikwembu?

8 Moya lowo kwetsima a wu katseka hi ku kongoma eka vutomi ni vutirheli bya Yesu. Moya lowo kwetsima lowu wu tirheke embelekweni wa nhwana Mariya wu endle swilo leswi a swi nga si tshama swi endleka. Wu endle leswaku wansati la nga hetisekangiki a tika kutani a veleka N’wana la hetisekeke, loyi a a nga ri ehansi ka xigwevo xa rifu. (Luka 1:26-31, 34, 35) Endzhakunyana moya lowo kwetsima wu sirhelele Yesu loyi a a ri ricece leswaku a nga dlayiwi a ha ri ntsongo. (Mat. 2:7, 8, 12, 13) Loko Yesu a ri ni malembe ya kwalomu ka 30, Xikwembu xi n’wi totile hi moya lowo kwetsima, xi n’wi hlawula ku va mudyandzhaka exiluvelweni xa Davhida ni ku n’wi rhuma leswaku a ya chumayela. (Luka 1:32, 33; 4:16-21) Moya lowo kwetsima wu nyike Yesu matimba ya ku endla masingita, ku katsa ni ku horisa lava vabyaka, ku phamela mintshungu ni ku pfuxa vafi. Swiendlo sweswo swo va swikombiso swa mikateko leyi hi nga yi langutelaka loko Yesu se a fuma tanihi hosi.

9, 10. (a) Moya lowo kwetsima wu tikombe njhani leswaku wa tirha eka vadyondzisiwa va Yesu va lembe-xidzana ro sungula? (b) Hi xihi xiendlakalo lexi paluxiweke hi lembe-xidzana ro sungula C.E. lexi kombiseke leswaku xikongomelo xa Yehovha xi le ku hetisekeni?

9 Ku sukela hi Pentekosta ya 33 C.E., Yehovha u tirhise moya wa yena ku tota xiphemu xa mbewu ya Abrahama, laha vo tala va vanhu volavo a va nga ri vatukulu va Abrahama. (Rhom. 8:15-17; Gal. 3:29) Moya lowo kwetsima a wu tikomba leswaku wa tirha eka vadyondzisiwa va Yesu va lembe-xidzana ro sungula, wu va endle va kota ku chumayela hi ku hiseka wu tlhela wu va nyika matimba ya ku endla masingita. (Mint. 1:8; 2:1-4; 1 Kor. 12:7-11) Hikwalaho ka tinyiko toleto to endla masingita, moya lowo kwetsima wu paluxe nchumu lowuntshwa malunghana ni ndlela leyi Yehovha a a ta xi hetisisa ha yona xikongomelo xa yena. Yehovha a a nga ha lavi leswaku vanhu va gandzela hi ndlela leyi a yi simekeke eka madzana ya malembe emahlweni ka kwalaho laha a ku gandzeriwa etempeleni ya le Yerusalema. Vandlha lerintshwa ra Vukreste leri a ra ha ku vumbiwa hi rona leri se a ri amukeleka. Ku sukela hi nkarhi wolowo, Yehovha u tirhisa vandlha rolero leri totiweke leswaku a hetisisa xikongomelo xa yena.

10 Tindlela ti nga ri tingani leti Yehovha a tirhiseke moya lowo kwetsima eminkarhini ya ku tsariwa ka Bibele leswaku a tiyiseka leswaku xikongomelo xa yena xi ta hetiseka a ku ri ku sirhelela, ku nyika matimba ni ku tota. Kambe ku vuriwa yini hi le nkarhini wa hina? Yehovha u wu tirhisa njhani moya wa yena leswaku a seketela xikongomelo xa yena? Hi fanele hi swi tiva, hikuva hi lava ku endla swilo hi ku pfumelelana ni moya wolowo. Kutani, sweswi a hi kambisiseni tindlela ta mune leti Yehovha a tirhisaka moya wa yena namuntlha ha tona.

Ndlela Leyi Moya Lowo Kwetsima Wu Tirhaka Ha Yona Namuntlha

11. I yini lexi kombisaka leswaku moya lowo kwetsima wu susumetela vanhu va Xikwembu leswaku va basa, naswona u nga swi kombisa njhani leswaku u tirhisana ni moya wolowo?

11 Xo sungula, moya lowo kwetsima wu pfuna vanhu va Xikwembu leswaku va tshama va basile. Vanhu va Yehovha lava n’wi tirhelaka hi ku pfumelelana ni ku rhandza ka yena naswona va nga ta vuyeriwa eka xikongomelo xa yena, va fanele va basa emahanyelweni. (Hlaya 1 Vakorinto 6:9-11.) Vanhu van’wana lava vaka Vakreste va ntiyiso a va endla mikhuva leyi thyakeke yo tanihi vumbhisa, vuoswi ni vusodoma. Ku navela loku endlaka leswaku vanhu va endla xidyoho ku nga ha va ku dzikile swinene. (Yak. 1:14, 15) Kambe, vanhu volavo va ‘hlantswiwile va basa,’ leswi kombisaka leswaku va hundzukile evuton’wini bya vona leswaku va ta tsakisa Xikwembu. I yini lexi endlaka leswaku munhu la rhandzaka Xikwembu a swi kota ku hlula ku navela ku endla swilo leswo biha? Vakorinto vo Sungula 6:11 yi vula leswaku i “moya wa Xikwembu xa hina.” Loko u tshama u basile emahanyelweni, u kombisa leswaku u pfumelela moya wolowo wu ku lawula evuton’wini bya wena.

12. (a) Hi ku ya hi xivono xa Ezekiyele, xana Yehovha u yi kongomisa njhani nhlengeletano yakwe? (b) U nga swi kombisa njhani leswaku u endla swilo hi ku pfumelelana ni moya?

12 Xa vumbirhi, Yehovha u tirhisa moya wakwe leswaku a kongomisa nhlengeletano yakwe laha a lavaka leswaku yi ya kona. Eka xivono xa Ezekiyele, xiphemu xa le tilweni xa nhlengeletano ya Yehovha xi hlamuseriwa tanihi kalichi ya le tilweni leyi nga siveriwiki hi nchumu ku hetisisa xikongomelo xa  Yehovha. I yini lexi endlaka leswaku kalichi leyi yi ya eka tlhelo ro karhi? I moya lowo kwetsima. (Ezek. 1:20, 21) A hi tsundzukeni leswaku nhlengeletano ya Yehovha yi vumbiwa hi swiphemu swimbirhi, ku nga xiphemu xa le tilweni ni xa laha misaveni. Loko xiphemu xa le tilweni xi kongomisiwa hi moya lowo kwetsima, swi vula leswaku ni xiphemu xa laha misaveni na xona xi kongomisiwa hi wona. Loko u yingisa naswona u wu landzela hi vutshembeki nkongomiso lowu humaka eka xiphemu xa laha misaveni xa nhlengeletano ya Xikwembu, u ta va u kombisa leswaku u fambisana ni kalichi ya Yehovha ya le tilweni naswona u endla swilo hi ku pfumelelana ni moya lowo kwetsima.—Hev. 13:17.

13, 14. (a) I vamani lava vumbaka “xitukulwana lexi” lexi Yesu a vulavuleke ha xona? (b) Nyika xikombiso lexi kombisaka leswaku moya lowo kwetsima wa tirha eku endleni leswaku hi twisisa ntiyiso wa le Bibeleni. (Vona bokisi leri nge, “Xana U Fambisana Ni Ntiyiso Wa Le Bibeleni Lowu Hlamuseriwaka Hakatsongo-tsongo?”)

13 Xa vunharhu, moya lowo kwetsima wu hi pfuna leswaku hi twisisa ntiyiso wa le Bibeleni. (Swiv. 4:18) Magazini lowu se i khale wu ri karhi wu tirhisiwa swinene hi “hlonga ro tshembeka ni ro tlhariha” leswaku ri hlamusela ntiyiso wa le Bibeleni hakatsongo-ntsongo. (Mat. 24:45) Hi xikombiso, anakanya ndlela leyi a hi xi twisisa ha yona “xitukulwana lexi,” lexi Yesu a vulavuleke ha xona. (Hlaya Matewu 24:32-34.) Yesu a a vulavula hi xitukulwana xihi? Xihloko lexi nge, “Vukona Bya Kreste—Xana Byi Vula Yini Eka Wena?” xi hlamusele leswaku Yesu a a nga vulavuli hi vanhu lavo homboloka kambe a a vulavula hi vadyondzisiwa vakwe, lava ku nga ri khale a va ta totiwa hi moya lowo kwetsima. * Valandzeri va Yesu lava totiweke va lembe-xidzana ro sungula swin’we ni lava va le minkarhini ya hina, hi vona a va ta vona xikombiso va tlhela va twisisa leswi xi vulaka swona, ku nga leswaku Yesu “u le kusuhi, etinyangweni.”

14 Nhlamuselo leyi yi vula yini eka hina? Hambileswi hi nga ta ka hi nga swi koti ku wu pima hi ku kongoma nkarhi lowu “xitukulwana lexi” xi wu hanyaka, hi fanele hi tsundzuka swilo swo hlayanyana malunghana ni rito “xitukulwana”: Hakanyingi ri vula vanhu va malembe yo hambana-hambana lava hanyaka enkarhini wo karhi; a wu lehanga ku tlula mpimo nkarhi wa kona; naswona wu ta fika emakumu. (Eks. 1:6) Hikwalaho, hi fanele hi ma twisisa hi ndlela yihi marito ya Yesu malunghana ni “xitukulwana lexi”? Entiyisweni a a vula ntsena vatotiwa lava voneke ku sungula ka masiku yo hetelela hi 1914 swin’we ni vatotiwa lava a va ta vona ku sungula ka nhlomulo lowukulu. Xitukulwana xexo a xi ri ni masungulo naswona hakunene xi ta va ni mahetelelo. Ku hetiseka ka swiendlakalo swo hambana-hambana swa masiku yo hetelela swi swi veka erivaleni leswaku nhlomulo lowukulu wu fanele wu ri kwala nyongeni. Loko hi tshama hi hitekile naswona  hi tshama hi rindzile, hi kombisa leswaku hi fambisana ni mindzulamiso leyi endliwaka malunghana ni ndlela leyi a hi wu twisisa ha yona ntiyiso wa le Bibeleni naswona hi landzela nkongomiso wa moya lowo kwetsima.—Mar. 13:37.

15. I yini lexi kombisaka leswaku moya lowo kwetsima hi wona wu hi nyikaka matimba yo chumayela mahungu lamanene?

15 Xa vumune, moya lowo kwetsima wu hi nyika matimba leswaku hi chumayela mahungu lamanene. (Mint. 1:8) I yini xin’wana lexi nga kombisaka ndlela leyi mahungu lamanene ma chumayeriweke ha yona emisaveni hinkwayo? Anakanya hi mhaka leyi. Swi nga ha endleka leswaku na wena u un’wana wa lava swi nga endlekaka leswaku hikwalaho ka ku va ni tingana letikulu kumbe ku chava, u tshame u vula u ku, ‘A ndzi nge pfuki ndzi chumayerile hi yindlu ni yindlu!’ Kambe, sweswi u hlanganyela hi ku hiseka eka ntirho wolowo. * Timbhoni to tala ta Yehovha to tshembeka ti ye emahlweni ti chumayela hambiloko ti kanetiwa kumbe ti xanisiwa. I moya lowo kwetsima wa Xikwembu ntsena lowu nga hi nyikaka matimba ya ku hlula swiphiqo leswi chavisaka wu tlhela wu hi pfuna leswaku hi endla swilo leswi a hi nga ta swi kota ku swi endla hi matimba ya hina. (Mik. 3:8; Mat. 17:20) Loko u hlanganyela hi xitalo entirhweni wo chumayela, u kombisa leswaku u tirhisana ni moya wolowo.

Leswi Moya Lowo Kwetsima Wu Nga Ta Swi Endla Enkarhini Lowu Taka

16. Ha yini hi nga tiyisekaka leswaku Yehovha u ta sirhelela vanhu vakwe hi nkarhi wa nhlomulo lowukulu?

16 Enkarhini lowu taka, Yehovha u ta tirhisa moya wa yena lowo kwetsima hi tindlela leti hlamarisaka leswaku a hetisisa xikongomelo xa yena. Xo sungula anakanya hi mhaka ya nsirhelelo. Hilaha hi voneke hakona, enkarhini lowu hundzeke Yehovha u tirhise moya wa yena leswaku a sirhelela vanhu swin’we ni tiko hinkwaro ra Israyele. Hikwalaho, hi ni xivangelo lexi twalaka xo tshemba leswaku u ta tirhisa moya wolowo lowu nga ni matimba leswaku a sirhelela vanhu va yena eka nhlomulo lowukulu lowu tshinelaka. Hikwalaho a hi fanelanga hi mbambela malunghana ni ndlela leyi Yehovha a nga ta hi sirhelela ha yona hi nkarhi wolowo. Ematshan’weni ya sweswo, hi fanele hi langutela vumundzuku hi ri ni ntshembo, hi tiva leswaku minkarhi hinkwayo Yehovha wa va vona vanhu lava n’wi rhandzaka naswona u ta va nyika moya wa yena lowo kwetsima.—2 Tikr. 16:9; Ps. 139:7-12.

17. Yehovha u ta wu tirhisa njhani moya wa yena lowo kwetsima emisaveni leyintshwa?

17 Yehovha u ta wu tirhisa njhani moya wakwe lowo kwetsima emisaveni leyintshwa leyi taka? U ta tirhisa moya wolowo a endla leswaku tibuku-nsongwa letintshwa leti nga ta pfuriwa hi nkarhi wolowo ti kumeka. (Nhlav. 20:12) Xana tibuku-nsongwa toleto ti ta va ti ri ni rungula rihi? Swi le rivaleni leswaku ti ta va ti ri ni rungula leri nga ni vuxokoxoko bya leswi Yehovha a swi languteleke eka hina hi nkarhi wa malembe wolawo ya gidi. Xana u swi langutele hi mahlo-ngati ku kambisisa rungula leri nga ta kumeka eka tibuku-nsongwa toleto? Hi langutele misava yoleyo leyintshwa hi mahlo-ngati. Hakunene swi ta tsakisa swinene ku hanya enkarhini wolowo laha Yehovha a nga ta tirhisa moya wa yena lowo kwetsima leswaku a hetisisa xikongomelo xa yena hi misava ni hi vanhu lava hanyaka eka yona.

18. I yini leswi u tiyimiseleke ku swi endla?

18 A hi fanelanga hi rivala leswaku xikongomelo xa Yehovha xi ta hetiseka hakunene hikuva u tirhisa moya wa yena lowo kwetsima, ku nga matimba lamakulu swinene evuakweni hinkwabyo lama nga ta hetisisa xikongomelo xexo. Wa katseka na wena eka xikongomelo xexo. Hikwalaho, tiyimisele ku kombela moya wa Yehovha naswona u endla swilo hi ku pfumelelana ni nkongomiso wa wona. (Luka 11:13) Loko u endla tano, u nga ha va ni ntshembo wo hanya hilaha Yehovha a a lava leswaku vanhu va hanya hakona, ku nga ku hanya emisaveni leyi nga Paradeyisi hilaha ku nga heriki.

[Tinhlamuselo ta le hansi]

^ par. 15 Leswaku u kuma xikombiso xa munhu loyi a hluleke tingana letikulu kutani a hisekela ntirho wo chumayela, vona Xihondzo xo Rindza xa September 15, 1993, tluka 19.

Wa Tsundzuka Xana?

• Yehovha u wu tirhise njhani moya wa yena lowo kwetsima eminkarhini ya Bibele leswaku a hetisisa xikongomelo xakwe?

• Yehovha u wu tirhisa njhani moya wa yena sweswi?

• Yehovha u ta wu tirhisa njhani moya wa yena enkarhini lowu taka leswaku a hetisisa xikongomelo xa yena?

[Swivutiso Swa Dyondzo]

[Bokisi leri nga eka tluka 10]

Xana U Fambisana Ni Ntiyiso Wa Le Bibeleni Lowu Hlamuseriwaka Hakatsongo-tsongo?

Yehovha u ya mahlweni a paluxa ntiyiso wa le Bibeleni eka vanhu va yena. Hi yihi mindzulamiso yin’wana leyi kandziyisiweke eka Xihondzo xo Rindza?

▪ Xifaniso xa Yesu xa comela xi vulavula hi dyondzo yihi leyinene malunghana ni ku endla nhluvuko hi tlhelo ra moya? (Mat. 13:33)—July 15, 2008, matluka 19-20.

▪ Ku vitaniwa ka Vakreste leswaku va ya hanya etilweni ku hela rini?—May 1, 2007, matluka 30-31.

▪ Swi vula yini ku gandzela Yehovha “hi moya”? (Yoh. 4:24)—July 15, 2002, tluka 15.

▪ Ntshungu lowukulu wu tirhela exivaveni xihi? (Nhlav. 7:15)—May 1, 2002, matluka 30-31.

▪ Ku hambanisiwa ka tinyimpfu ni timbuti ku endleka rini? (Mat. 25:31-33)—October 15, 1995, matluka 18-28.