Nghena endzeni

Hundzela eka leswi nga endzeni

Xana U Teka Yehovha Tanihi Tata Wa Wena?

Xana U Teka Yehovha Tanihi Tata Wa Wena?

 Xana U Teka Yehovha Tanihi Tata Wa Wena?

“HOSI, hi dyondzise ndlela ya ku khongela.” Loko un’wana wa vadyondzisiwa vakwe a endle xikombelo xexo, Yesu u hlamule a ku: “Loko mi khongela, vulani leswi, ‘Tatana, vito ra wena a ri kwetsimisiwe.’” (Luka 11:1, 2) Loko Yesu a vulavula hi Yehovha a a ta va a tirhise swithopo leswi xiximekaka leswi nge, “Lowa Matimba Hinkwawo,” “Muleteri Lonkulu,” “Mutumbuluxi,” “Nkulukumba wa Masiku,” swin’we ni lexi nge, “Hosi leyi nga riki na makumu.” (Gen. 49:25; Esa. 30:20; 40:28; Dan. 7:9; 1 Tim. 1:17) Ematshan’weni ya sweswo, Yesu u hlawule ku tirhisa rito leri nge, “Tatana.” Ha yini? Kumbexana hikwalaho ka leswi a lavaka leswaku hi tshinelela Munhu la tlakukeke swinene evuakweni hinkwabyo hi ndlela leyi n’wana la titsongahataka a tshineleleka tatana la nga ni rirhandzu ha yona.

Hambiswiritano, vanhu van’wana swa va tikela ku teka Xikwembu tanihi Tata wa vona. Mukreste la vuriwaka Atsuko * u ri: “Endzhaku ka malembe yo tala ndzi khuvuriwile, a swi ndzi tikela ku tshinela eka Yehovha ndzi tlhela ndzi khongela eka yena tanihi Tatana.” Loko a hlamusela leswaku hikwalaho ka yini a swi n’wi tikela u ri: “Tata wa mina a a nga si tshama a ndzi kombisa rirhandzu.”

Emasikwini lawa yo hetelela ya mangava, “xinakulobye xa ntumbuluko” lexi munhu a languteleke ku kombiwa xona hi tata wakwe, a xi kona. (2 Tim. 3:1, 3) Hikwalaho, swi tolovelekile leswaku vanhu va titwa hi ndlela leyi Atsuko a a titwa ha yona. Hambiswiritano, swa khutaza ku tiva leswaku hi ni swivangelo leswi twalaka swo teka Yehovha tanihi Tata wa hina la nga ni rirhandzu.

Yehovha—Munyiki La Nga Ni Rirhandzu

Loko hi lava ku teka Yehovha tanihi Tata wa hina, hi fanele hi n’wi tiva kahle. Yesu u te: “A nga kona la tivaka N’wana hi ku helela handle ka Tatana, hambi ku ri la tivaka Tatana hi ku helela loko ku nga ri N’wana, na mani na mani loyi N’wana a rhandzaka ku n’wi hlavutela eka yena.” (Mat. 11:27) Ndlela leyinene ngopfu leyi u nga n’wi tivaka ha yona Yehovha tanihi Tatana, i ku anakanyisisa hi leswi Yesu a swi paluxeke malunghana ni Xikwembu xa ntiyiso. Hikwalaho, i yini leswi Yesu a swi paluxeke malunghana na Tatana?

Loko a pfumela leswaku Yehovha i Xihlovo xa vutomi byakwe, Yesu u te: “Ndzi [hanya] hikwalaho ka Tatana.” (Yoh. 6:57) Na hina hi kona hikwalaho ka Tata wa hina wa le tilweni. (Ps. 36:9; Mint. 17:28) I yini lexi susumeteleke Yehovha leswaku a nyika van’wana vutomi? I rirhandzu. Na hina hi fanele hi rhandza Tata wa hina wa le tilweni hikwalaho ka leswi a hi nyikeke nyiko yoleyo.

Gandzelo ra Yesu ra nkutsulo i ndlela leyikulu leyi Xikwembu xi kombiseke vanhu rirhandzu ha yona. Xiendlo xexo xa rirhandzu xi endla leswaku vanhu lava nga hetisekangiki va kota ku va ni vuxaka lebyikulu na Yehovha hikwalaho ka N’wana wa yena la rhandzekaka. (Rhom. 5:12; 1 Yoh. 4:9, 10) Naswona leswi Tata wa hina wa le tilweni a nga Muhetisisi wa switshembiso swa yena, hi nga tiyiseka leswaku hinkwavo lava n’wi rhandzaka ni ku n’wi yingisa eku heteleleni va ta tiphina hi “ntshunxeko lowu vangamaka wa vana va Xikwembu.”—Rhom. 8:21.

Nakambe Tata wa hina wa le tilweni u ‘tsuvukisa dyambu ra yena eka’ hina siku ni siku. (Mat. 5:45) A hi kali hi vona swi ri swa nkoka ku khongelela ku tsuvuka ka dyambu. Kambe, ha yi lava miseve ya rona leyi kufumelaka naswona ha tiphina hi yona! Ku engetela kwalaho, Tata wa hina i Munyiki la nga pimanisiwiki na munhu, loyi a tivaka swilaveko swa hina swa nyama hambiloko hi nga si n’wi kombela. Hikwalaho, hi fanele hi tinyika nkarhi wo langutisisa hi tlhela hi anakanyisisa hi ndlela leyi Tata wa hina wa le tilweni a  swi khathalelaka ha yona swivumbiwa swakwe.—Mat. 6:8, 26.

Tata Wa Hina—‘Musirheleri La Nga Ni Tintswalo’

Vuprofeta bya Esaya byi tiyisekise vanhu va Xikwembu va khale byi ku: “Tintshava ti ta suka ni switsunga swi ta tsekatsekisiwa, kambe a ndzi nge tshiki ku va munghana wa n’wina ni ntwanano wa mina wa ku rhula a wu nge tsekatsekisiwi, ku vula Yehovha musirheleri wa n’wina la nga ni tintswalo.” (Esa. 54:10, The Bible in Living English) Loko Yesu a khongela hi vusiku byo hetelela loko a ha ri laha misaveni, u kandziyise yinhla leyi, a kombisa leswaku Yehovha i ‘musirheleri la nga ni tintswalo’ hakunene. Loko Yesu a khongela malunghana ni vadyondzisiwa vakwe u te: “Va le misaveni naswona ndzi ta eka wena. Tatana wo Kwetsima, va rindze hikwalaho ka vito ra wena.” (Yoh. 17:11, 14) Yehovha u va rindzile valandzeri va Yesu a tlhela a va sirhelela.

Ndlela yin’wana leyi Xikwembu xi hi sirhelelaka ha yona namuntlha eka marhengu ya Sathana, i ku hi phamela swakudya swa moya hi nkarhi lowu faneleke hi ku tirhisa “hlonga ro tshembeka ni ro tlhariha.” (Mat. 24:45) Loko hi lava ku “ambala mahavelo hinkwawo lama humaka eka Xikwembu” hi fanele hi dya swakudya sweswo leswi hi tiyisaka. Hi xikombiso, anakanya hi “xitlhangu lexikulu xa ripfumelo” lexi hi pfunaka leswaku hi “kota ku timela ha xona miseve hinkwayo leyi pfurhaka ya lowo homboloka.” (Efe. 6:11, 16) Ripfumelo ra hina ra hi sirhelela hi tlhelo ra moya naswona i vumbhoni bya leswaku Tata wa hina u ni matimba yo hi sirhelela.

Hi nga dyondza leswi engetelekeke malunghana ni tintswalo ta Tata wa hina wa le tilweni hi ku xiya ndlela leyi N’wana wa Xikwembu a tikhomeke ha yona loko a ha ri laha misaveni. Xiya rungula leri kumekaka eka Marka 10:13-16. Eka rungula rolero ku vuriwe leswaku Yesu u byele vadyondzisiwa vakwe a ku: “Tshikani vana lavatsongo va ta eka mina.” Loko vana volavo va n’wi rhendzerile, Yesu u va angarhile hi rirhandzu a tlhela a va katekisa. Va fanele va tsake swinene! Naswona leswi Yesu a nga te: “Loyi a ndzi voneke u vone na Tatana,” ha swi tiva leswaku Xikwembu xa ntiyiso xi lava leswaku hi tshinela eka xona.—Yoh. 14:9.

Yehovha Xikwembu i Xihlovo lexikulu xa rirhandzu. I Munyiki tlhelo Musirheleri la nga pimanisiwiki na munhu, loyi a lavaka leswaku hi tshinela eka yena. (Yak. 4:8) Hikwalaho, a swi kanakanisi leswaku Yehovha i Tatana lonene ngopfu!

Ndlela Leyi Hi Vuyeriwaka Ha Yona!

Ha vuyeriwa swinene loko hi tshemba Yehovha tanihi Tata wa hina wa le tilweni la nga ni rirhandzu ni tintswalo. (Swiv. 3:5, 6) Yesu u vuyeriwile hi ku tshemba Tata wakwe hilaha ku heleleke. Kreste u byele vadyondzisiwa vakwe a ku: “A ndzi ndzexe, kambe Tatana loyi a ndzi rhumeke u na mina.” (Yoh. 8:16) Minkarhi hinkwayo Yesu a a tiyiseka leswaku Yehovha u ta n’wi seketela. Hi xikombiso, loko a khuvuriwa Tata wakwe u n’wi tiyisekise hi rirhandzu a ku: “Loyi i N’wananga, la rhandzekaka, loyi ndzi n’wi amukeleke.” (Mat. 3:15-17) Naswona emahlweninyana ka ku va Yesu a fa, u huwelerile a ku: “Tatana, moya wa mina ndzi wu veka emavokweni ya wena.” (Luka 23:46) Yesu a a n’wi tshemba minkarhi hinkwayo Tata wakwe.

Na hina hi nga endla hilaha ku fanaka. Loko Yehovha a ri etlhelweni ra hina, xana hi nga chava yini? (Ps. 118:6) Atsuko loyi ku vulavuriweke ha yena eku sunguleni, a a tolovele ku titshega hi matimba yakwe loko a ri ni swiphiqo. Kambe endzhaku ka sweswo u sungule ku hlaya hi ta vutomi ni vutirheli bya Yesu, a dzika swinene eka vuxaka lebyikulu lebyi a a ri na byona na Tata wakwe wa le tilweni. Vuyelo byi ve byihi? Atsuko u ri: “Ndzi dyondze leswaku swi vula yini ku va na Tatana ni ku titshega hi yena.” U ya emahlweni a ku: “Ndzi ve ni ku rhula ni ntsako wa xiviri. Entiyisweni, a hi na xivangelo xo karhateka ha nchumu.”

I yini swin’wana leswi hi vuyeriwaka ha swona loko hi teka Yehovha tanihi Tata wa hina? Hakanyingi vana va va rhandza vatswari va vona naswona va lava ku va tsakisa. Hi ku susumeteriwa hi rirhandzu, N’wana wa Xikwembu ‘nkarhi hinkwawo a a endla swilo leswi tsakisaka Tata wakwe.’ (Yoh. 8:29) Hilaha ku fanaka, ndlela leyi hi rhandzaka Tata wa hina wa le tilweni ha yona yi nga hi susumetela ku endla swilo hi vutlhari ni ku n’wi “dzunisa erivaleni.”—Mat. 11:25; Yoh. 5:19.

 Tata Wa Hina ‘U Khoma Voko Ra Hina Ra Xinene’

Tata wa hina wa le tilweni u tlhele a hi nyika “mupfuni,” ku nga moya wakwe lowo kwetsima. Yesu u vule leswaku wu “ta mi kongomisa entiyisweni hinkwawo.” (Yoh. 14:15-17; 16:12, 13) Moya lowo kwetsima wa Xikwembu wu nga hi pfuna leswaku hi n’wi twisisa ku antswa Tata wa hina. Wu nga hi pfuna leswaku hi wisetela “swilo leswi simekiweke swi tiya,” ku nga mavonelo lawa vanhu se va nga na wona, mavonelo lama hoxeke kumbe lama soholotiweke, xisweswo hi “tisa miehleketo hinkwayo evukhumbini leswaku hi yi endla yi yingisa Kreste.” (2 Kor. 10:4, 5) Hikokwalaho, a hi khongeleni eka Yehovha hi kombela “mupfuni” loyi hi tshembisiweke yena, hi tiyiseka leswaku “Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka.” (Luka 11:13) Nakambe swi fanerile ku khongelela moya lowo kwetsima leswaku wu hi pfuna hi tshinela swinene eka Yehovha.

N’wana u titwa a hlayisekile, a sirhelelekile naswona a nga chavi nchumu loko a famba na tata wakwe. Loko hakunene u teka Yehovha tanihi Tata wa wena, u nga tiyisiwa hi marito lawa lama chavelelaka: “Mina, Yehovha Xikwembu xa wena, ndzi khoma voko ra wena ra xinene, yena Loyi a ku byelaka a ku, ‘U nga chavi. Mina ndzi ta ku pfuna.’” (Esa. 41:13) U nga va ni lunghelo lerikulu ro “famba” ni Xikwembu hilaha ku nga heriki. (Mik. 6:8) Yana emahlweni u endla ku rhandza ka Yehovha, kutani u ta titwa u rhandziwa, u tsakile naswona u sirhelelekile hi leswi u n’wi tekaka tanihi Tata wa wena.

[Nhlamuselo ya le hansi]

^ par. 3 Mavito ma cinciwile.