Nghena endzeni

Hundzela eka leswi nga endzeni

Ndlela Ya Sathana Yo Fuma A Yi Nge Humeleli Nikatsongo

Ndlela Ya Sathana Yo Fuma A Yi Nge Humeleli Nikatsongo

 Ndlela Ya Sathana Yo Fuma A Yi Nge Humeleli Nikatsongo

“A swi nge n’wi fambeli kahle nikatsongo lowo homboloka.”—EKL. 8:13.

1. Ha yini mhaka ya leswaku lavo homboloka va ta avanyisiwa yi chavelela?

KU NGA ri khale lavo homboloka va ta tengisiwa. Va ta boheka ku tihlamulela hikwalaho ka leswi va nga swi endla. (Swiv. 5:22; Ekl. 8:12, 13) Mhaka leyi ya chavelela ngopfu-ngopfu eka vanhu lava rhandzaka ku lulama ni lava khomiweke hi ndlela yo biha va tlhela va xanisiwa hi vanhu vo homboloka. Loyi a nga ta rhanga a avanyisiwa eka vanhu lavo homboloka i tata wa vuhomboloki, ku nga Sathana Diyavulosi.—Yoh. 8:44.

2. Ha yini a ku laveka nkarhi leswaku ku lulamisiwa mphikamakaneta leyi sunguleke le Edeni?

2 Le Edeni, Sathana u ve ni vutianakanyi kutani a endla leswaku vanhu va fularhela vulawuri bya Yehovha. Hikwalaho ka sweswo, vatswari va hina vo sungula swin’we na Sathana va tlhontlhe vulawuri lebyi faneleke bya Yehovha kutani va va vadyohi emahlweni ka Yena. (Rhom. 5:12-14) Entiyisweni Yehovha a a byi tiva vuyelo lebyi a va ta byi kuma hikwalaho ka leswi va n’wi deleleke va tlhela va xandzuka. Hambiswiritano, vuyelo byebyo lebyi nga papalatekiki a byi fanele byi kombisiwa vanhu hinkwavo. Hikwalaho, a ku laveka nkarhi leswaku ku lulamisiwa mphikamakaneta leyi ni ku kombisa hi ndlela leyi khorwisaka leswaku vaxandzuki lava a va hemba.

3. Hi yi teka njhani mimfumo ya vanhu?

3 Leswi vanhu va aleke ku lawuriwa hi Yehovha a va fanele va tisungulela tihulumendhe ta vona. Loko muapostola Pawulo a tsalela vapfumeri-kulobye va le Rhoma u vulavule hi tihulumendhe toleto ta vanhu tanihi “valawuri lava tlakukeke.” Enkarhini wa Pawulo, valawuri lava tlakukeke ngopfu-ngopfu a ku ri mfumo wa Rhoma lowu a wu lawuriwa hi Hosi Nero loyi a fumeke ku sukela hi 54 C.E. ku ya eka 68 C.E. Pawulo u vule leswaku valawuri volavo lava tlakukeke “va vekiwe hi Xikwembu eswiyin’weni swa vona leswi hikiweke.” (Hlaya Varhoma 13:1, 2.) Xana marito wolawo ma vula leswaku Pawulo a a vula leswaku mimfumo ya vanhu yi tlakukile ku tlula mfumo wa Xikwembu? Nikatsongo. Ku ri na sweswo a a vula leswaku loko Yehovha a ha pfumelele mimfumo ya vanhu leswaku yi va kona, Vakreste va fanele va ri xixima “lunghiselelo ra Xikwembu” naswona va amukela vafumi volavo.

Ndlela Leyi Yisaka eKhombyeni

4. Hlamusela leswaku ha yini mimfumo ya vanhu yi nga taka yi nga humeleli.

4 Nilokoswiritano, mimfumo ya vanhu leyi kuceteriwaka hi Sathana a yi nge humeleli nikatsongo. Ha yini? Xivangelo xin’wana hileswi yi nga sekeriwangiki eka vutlhari bya Xikwembu. I Yehovha ntsena la nga ni vutlhari lebyi hetisekeke. Hikwalaho, hi yena ntsena la nga hi kongomisaka hi ndlela leyi tshembekaka malunghana ni leswaku vulawuri lebyi nga ta humelela byi fambisiwa njhani. (Yer. 8:9; Rhom. 16:27) Ku hambana ni vanhu lava hakanyingi va ngo ringetela ntsena, Yehovha minkarhi hinkwayo u yi tiva kahle ndlela leyinene yo endla swilo. Mfumo wun’wana ni wun’wana lowu nga landzeriki nkongomiso wa yena a wu nge humeleli. Hikwalaho ka xivangelo xexo ntsena—hi nga ha vuli nsusumeto wo homboloka lowu katsekaka—ndlela ya Sathana yo lawula hi ku tirhisa mimfumo ya vanhu a yi ta tsandzeka ku sukela eku sunguleni.

5, 6. I yini leswi susumeteleke Sathana leswaku a kaneta Yehovha?

5 Munhu la hanyeke kahle a nge sunguli a endla nchumu wo karhi lowu a swi tivaka leswaku a wu nge fambi kahle. Loko a ya emahlweni ni ku endla nchumu wolowo u ta boheka ku pfumela leswaku u endle xihoxo. Matimu ma swi kombise ko tala leswaku a swi pfuni nchumu ku  kanetana ni Muvumbi la nga ni matimba hinkwawo. (Hlaya Swivuriso 21:30.) Hambiswiritano, Sathana u tikukumuxile ni ku fularhela Yehovha hikwalaho ka vutianakanyi. Hikwalaho Diyavulosi u hlawule ndlela leyi yisaka ekhombyeni hi vomu.

6 Ku tikukumuxa ka Sathana ku kombisiwe endzhakunyana hi hosi ya le Babilona leyi tibumeke yi ku: “Ndzi ta tlhandlukela ematilweni. Xiluvelo xa mina ndzi ta xi tlakusela ehenhla ka tinyeleti ta Xikwembu, ndzi ta tshama entshaveni ya nhlangano, etindhawini ta le kule swinene ta n’walungu. Ndzi ta tlhandlukela etindhawini leti tlakukeke ta mapapa; ndzi ta tiendla la fanaka ni La nge Henhla-henhla.” (Esa. 14:13-15) Hosi yoleyo leyi nga tlharihangiki a yi swi kotanga ku endla ntirho lowu a yi lava ku wu endla naswona nxaxamelo wa vafumi va le Babilona wu hele hi ndlela leyi khomisaka tingana. Hilaha ku fanaka, Sathana ni misava ya yena ku nga ri khale va ta hluriwa hi ku helela.

Ha Yini Xikwembu Xi Pfumelele Vanhu Leswaku Va Tifuma?

7, 8. Hi byihi vuyelo byin’wana lebyi veke kona hi leswi Yehovha a pfumeleleke leswaku ku va ni vuhomboloki swa xinkarhana?

7 Van’wana va nga ha tivutisa leswaku ha yini Yehovha a nga va sivelanga vanhu leswaku va nga yimi na Sathana, ni ku pfumela ku fumiwa hi mfumo wa yena tanihi leswi mfumo wolowo a wu ta tsandzeka. Leswi Xikwembu xi nga ni matimba hinkwawo a xi ta va xi swi endlile sweswo. (Eks. 6:3) Hambiswiritano, a xi swi endlanga sweswo. Xi vone ku ri vutlhari ku tshika swa xinkarhana ku nghenelela loko vanhu va xandzukile hikuva a xi swi tiva leswaku hi ku famba ka nkarhi ku nga ngheneleli ka xona a swi ta tisa vuyelo lebyinene. Eku heteleleni Yehovha a a ta lweriwa tanihi mufumi la nga ni rirhandzu, naswona vanhu lava tshembekaka a va ta vuyeriwa eka xiboho xa yena.

8 Vanhu a va ta va va nga xaniseki loko a va ale makungu ya Sathana, niloko a va nga byi fularhelanga vulawuri bya Xikwembu! Nilokoswiritano, xiboho xa Yehovha xa ku pfumelela vanhu leswaku va tifuma swa xinkarhana xi tise vuyelo lebyinene. Xi endle leswaku vanhu va timbilu letinene va swi twisisa kahle leswaku ku yingisa Xikwembu ni ku xi tshemba i vutlhari. Eka malembe-xidzana lama hundzeke vanhu va ringete mimfumo yo hambana-hambana, kambe ku hava ni wun’we lowu tikombeke wu ri lowu hetisekeke. Mhaka yoleyo yi tiyisekisa vagandzeri va Yehovha leswaku ndlela leyi a fumaka ha yona i yinene ngopfu. I ntiyiso leswaku ku pfumelela ka Yehovha vulawuri byo homboloka bya Sathana swi endle leswaku vanhu va xaniseka, ku katsa ni vanhu lava n’wi gandzelaka hi ku tshembeka. Hambiswiritano, ku pfumeleriwa ka vuhomboloki swa xinkarhana na swona swi vuyerise vagandzeri lava va Xikwembu vo tshembeka.

 Ku Xandzuka Loku Dzuniseke Yehovha

9, 10. Hlamusela ndlela leyi mfumo wa Sathana wu endleke ha yona leswaku Yehovha a dzunisiwa.

9 Ku va vanhu va pfumelele ku kuceteriwa hi Sathana ni leswaku va tifuma a swi endlanga leswaku ndlela leyi Yehovha a fumaka ha yona yi vonaka yi nga ri yinene. Ku ri na sweswo, matimu ma kombisa leswaku Yeremiya a a tiyisile loko a vula marito lama huhuteriweke malunghana ni ku tsandzeka ka vanhu ku tifuma. (Hlaya Yeremiya 10:23.) Ku engetela kwalaho ku xandzuka ka Sathana ku nyike Yehovha nkarhi wo kombisa timfanelo ta Yena hi ndlela leyi tlakukeke. Njhani?

10 Leswi hi swi vonaka leswaku vulawuri bya Sathana byi vanga ku xaniseka, timfanelo ta Yehovha leti hetisekeke se ti vonaka swinene. Leswi swi endle leswaku lava va rhandzaka Yehovha va n’wi dzunisa. Ina, hambileswi mhaka leyi yi nga ha vonakaka yi kanetana, vulawuri bya Sathana entiyisweni byi dzunise Xikwembu. Byi kombise ndlela leyinene ngopfu leyi Yehovha a lulamiseke ha yona mhaka ya ku tlhontlhiwa ka vuhosi bya yena. Leswaku hi vona ntiyiso wolowo, a hi kambisiseninyana tin’wana ta timfanelo ta Yehovha ni ku vona leswaku mafumelo ya Sathana yo homboloka ma n’wi susumetele njhani Yehovha leswaku a kombisa timfanelo leti hilaha ku engetelekeke.

11. Rirhandzu ra Yehovha ri kombisiwe hi ndlela yihi?

11 Rirhandzu. Matsalwa ma hi byela leswaku “Xikwembu i rirhandzu.” (1 Yoh. 4:8) Vanhu va vumbiwe va ri ni mfanelo yo kombisa rirhandzu ra Xikwembu. Ku tlula kwalaho, ndlela leyi hlamarisaka leyi hi vumbiweke ha yona yi kombisa rirhandzu ra Xikwembu. Nakambe hi rirhandzu Yehovha u nyike vanhu kaya ro saseka leri nga ni swilo hinkwaswo leswi a swi ta va endla va tsaka. (Gen. 1:29-31; 2:8, 9; Ps. 139:14-16) Kambe endzhaku ka loko ku sungule vuhomboloki endyangwini wa vanhu, Yehovha u kombise rirhandzu ra yena hi ndlela leyintshwa. Njhani? Muapostola Yohane u tshahe marito ya Yesu loko a ku: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yoh. 3:16) A ku na ndlela yin’wana leyi Xikwembu a xi ta va xi kombise vanhu rirhandzu ha yona handle ko rhumela N’wana wa xona la tswariweke a ri swakwe emisaveni hi xikongomelo xo kutsula vadyohi. (Yoh. 15:13) Xikombiso lexi lexikulu xa rirhandzu xi tlhele xi tirha tanihi xikombiso eka vanhu leswaku va kuma nkarhi wa ku kombisa leswaku va rhandza Xikwembu evuton’wini bya vona bya siku ni siku, hilaha Yesu a endleke hakona.—Yoh. 17:25, 26.

12. Matimba ya Yehovha ma kombisiwe hi ndlela yihi?

12 Matimba. I ‘Xikwembu xa Matimba Hinkwawo’ ntsena lexi nga ni matimba ya ku nyika vutomi. (Nhlav. 11:17; Ps. 36:9) Loko munhu a velekiwa u fana ni phepha leri nga tsariwangiki nchumu naswona loko a fa, u va se a tsale swo karhi hikwalaho ka swiboho, swiendlo ni swilo leswi n’wi humeleleke evuton’wini leswi endleke leswaku a va ni vumunhu lebyi a a ri na byona. Rungula rolero ri nga ha tshama emianakanyweni ya Yehovha. Hi nkarhi lowu faneleke Yehovha u ta pfuxa munhu yoloye a ri ni vumunhu lebyi a a ri na byona. (Yoh. 5:28, 29) Hambileswi ku nga riki xikongomelo xa Xikwembu leswaku vanhu va fa, kambe rifu ri nyike Yehovha nkarhi lowunene  wo kombisa leswaku u ni matimba ya ku pfuxa vafi. Hakunene, Yehovha i ‘Xikwembu xa Matimba Hinkwawo.’

13. Ha yini xitlhavelo xa Yesu xi ri xikombiso lexinene xa vululami lebyi hetisekeke bya Yehovha?

13 Vululami. Yehovha a nga hembi; naswona a nga endli hilaha ku nga lulamangiki. (Det. 32:4; Tito 1:2) Minkarhi hinkwayo u namarhela ntiyiso ni vululami hi ndlela leyi hetisekeke hambiloko ku endla tano swi endla leswaku yena a lahlekeriwa. (Rhom. 8:32) Wa nga vona ndlela leyi Yehovha a tweke ku vava ha yona loko a vona N’wana wakwe Yesu a fa emhandzini ya nxaniso onge hiloko a a ri mudyohi! Hikwalaho ka leswi a rhandzaka vanhu lava nga hetisekangiki, Yehovha a a tiyimisele ku pfumelela xiendlakalo lexi lexi vavaka swinene hi xikongomelo xo namarhela vululami byakwe lebyi hetisekeke. (Hlaya Varhoma 5:18-21.) Misava leyi leyi pfumalaka vululami yi nyike Yehovha nkarhi wo kombisa leswaku hi yena a nga ni vululami lebyi hetisekeke.

14, 15. Hi tihi tindlela tin’wana leti vutlhari lebyikulu bya Yehovha ni ku lehisa ka yena mbilu swi kombisiweke ha tona?

14 Vutlhari. Endzhaku ka loko Adamu na Evha va dyohile, Yehovha u paluxe ndlela leyi a a ta lulamisa vubihi hinkwabyo lebyi vangiweke hi ku xandzuka ka vona. (Gen. 3:15) Lunghiselelo ro tano ra xihatla ni ku paluxiwa hakatsongo-tsongo ka xikongomelo xakwe eka malandza ya yena, swi endle leswaku vutlhari bya Yehovha byi va erivaleni. (Rhom. 11:33) Ku hava lexi nga sivelaka vuswikoti bya Xikwembu bya ku lulamisa timhaka hi ndlela leyinene. Emisaveni leyi leyi vanhu va kona va nga ni mahanyelo yo biha, va rhandzaka nyimpi, va nga riki na ntwela-vusiwana, va nga yingisiki, va nga ni tihanyi, xihlawu-hlawu ni vukanganyisi, Yehovha u kume nkarhi lowu eneleke wo kombisa swivumbiwa swakwe leswaku vutlhari bya xiviri i yini. Mudyondzisiwa Yakobo u te: “Vutlhari lebyi humaka ehenhla xo sungula byi tengile, byi tlhela byi va ni ku rhula, ku anakanyela, ku tiyimisela ku yingisa, ku tala tintswalo ni mihandzu leyinene, a byi hambanisi vanhu hi xihlawuhlawu, a byi na vukanganyisi.”—Yak. 3:17.

15 Ku Lehisa Mbilu. Mfanelo ya Yehovha ya ku lehisa mbilu a yi ta va yi nga vonakanga hi ku olova loko a a nga bohekanga ku tirhisana ni vanhu lava nga hetisekangiki, lava dyohaka ni lava endlaka swihoxo. Ku tiyimisela ka Yehovha ku lehisa mbilu ku ringana magidi ya malembe swi kombisa leswaku u ni timfanelo leti leti hlamarisaka naswona u ti kombisa hi ndlela leyi hetisekeke, hikwalaho ka sweswo hi fanele hi n’wi nkhensa swinene. A swi fanerile loko muapostola Petro a vula leswaku hi fanele hi ‘teka ku lehisa mbilu ka Hosi ya hina ku ri ku hi ponisa.’—2 Pet. 3:9, 15.

16. Ha yini ku tiyimisela ka Yehovha ku rivalela swi tisa ntsako lowukulu?

16 Ku Tiyimisela Ku Rivalela. Hinkwerhu hi vadyohi naswona ha khunguvanyeka minkarhi yo tala. (Yak. 3:2; 1 Yoh. 1:8, 9) Ha tlangela swinene hi leswi Yehovha a tiyimiseleke ku hi rivalela “hi ndlela leyikulu”! (Esa. 55:7) Nakambe xiya mhaka leyi: Leswi hi velekiweke hi ri vadyohi lava nga hetisekangiki, ha tsaka swinene loko Xikwembu xi hi rivalela swidyoho swa hina. (Ps. 51:5, 9, 17)  Ku xiya ndlela leyi Yehovha a hi rhandzaka ha yona swi endla leswaku hi ya hi n’wi rhandza swinene naswona sweswo swi endla leswaku hi tekelela xikombiso xakwe loko hi tirhisana ni van’wana.—Hlaya Vakolosa 3:13.

Lexi Endlaka Misava Yi Homboloka

17, 18. Matshalatshala ya Sathana yo fuma ma tsandzeke hi tindlela tihi?

17 Fambiselo hinkwaro ra misava ya Sathana, ku nga ndlela leyi a fumaka ha yona, ri tsandzekile minkarhi hinkwayo eka malembe-xidzana lama hundzeke. Hi 1991, phepha-hungu leri vuriwaka The European ri te: “Xana misava yi hombolokile? I ntiyiso yi hombolokile kambe . . . vuhomboloki byebyo a byi vangiwi hi Xikwembu—byi vangiwa hi vanhu lava tshamaka eka yona.” Sweswo i ntiyiso hakunene! Sathana u kucetele vatswari va hina vo sungula ku hlawula ku fumiwa hi munhu ku ri na ku fumiwa hi Yehovha. Hi ndlela yoleyo va hlawule ku fumiwa hi mfumo lowu a wu ta tsandzeka hi ku helela. Switlhavi ni nhlomulo leswi vanhu va langutanaka na swona emisaveni hinkwayo i xikombiso xa leswaku mfumo wa munhu wu tsandzeke hi ku helela.

18 Ndlela leyi Sathana a fumaka ha yona i ya vutianakanyi. Hambiswiritano, vutianakanyi a byi nge ri hluli rirhandzu, leri vulawuri bya Yehovha byi sekeriweke eka rona. Ndlela ya Sathana yo fuma yi tsandzekile ku endla leswaku vanhu va tshamiseka, va tsaka kumbe va sirheleleka. Ndlela ya Yehovha yo fuma yi tikombile leswaku hi leyinene hakunene! Xana hi na byona vumbhoni bya manguva lawa bya sweswo? Ina, xihloko lexi landzelaka xi ta tlhuvutsa mhaka leyi.

Hi Dyondze Yini Malunghana Ni Vulawuri Loko Hi Hlaya . . . 

Varhoma 13:1, 2?

Swivuriso 21:30?

Yeremiya 10:23?

Vakolosa 3:13?

[Swivutiso Swa Dyondzo]

[Swifaniso leswi nga eka tluka 25]

Mfumo wa Sathana a wu va vuyerisanga hi nchumu vanhu

[Swihlovo Swa Kona]

U.S. Army photo

WHO photo by P. Almasy

[Xifaniso lexi nga eka tluka 26]

Yehovha u ni matimba ya ku pfuxa ni vanhu lava feke

[Xifaniso lexi nga eka tluka 27]

Yehovha u kombise rirhandzu ni vululami hi ku nyikela hi N’wana wakwe leswaku a va gandzelo