Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Xana Xikwembu xi nga ku endla u fuwa hi ndlela yihi?

Enkarhini lowu nga hundza, Yehovha u katekise vanhu vo tanihi Abrahama na Solomoni hi swilo leswi vonakaka. Kambe rifuwo leri Vakreste va ri lavaka ngopfu ni leri Xikwembu xi nga pfunaka munhu leswaku a ri kuma ri katsa ripfumelo, ku rhula, ku eneriseka ni ntsako.—9/1, matluka 3-7.

• Hi nga dyondza yini eka Yesu hileswi a poniseke Petro loko a ri karhi a mbombomela elwandle? (Mat. 14:28-31)

Loko hi xiya leswaku makwerhu un’wana a nga na ripfumelo, hi nga tshambuluta voko ra hina hi ndlela yo fanekisela kutani hi n’wi pfuna leswaku a va ni ripfumelo leri tiyeke.—9/15, tluka 8.

• I yini leswi Yehovha a bohekeke ku swi tiyisela leswaku a hi kutsula?

Yehovha u tiyisele ku xanisiwa ni ku hlekuriwa ka N’wana wa yena. Naswona hilaha swi fanekiseriweke hakona hi ku tiyimisela ka Abrahama ku nyikela hi n’wana wakwe, Yehovha u tiyisele ku dlayiwa ka N’wana wakwe tanihi xigevenga.—9/15, matluka 28-29.

• Ha yini Codex ya Vatican yi ri ya risima?

I tsalwa ra Xigriki leri tsariweke hi voko emalembeni ya le hansi ka 300 endzhaku ka loko Bibele yi hetiwe ku tsariwa. Yi ni Matsalwa ya Xiheveru lama heleleke ni Matsalwa ya Vukreste ya Xigriki. I buku leyi vakambisisi va yi tirhisaka ku kambisisa leswi a swi kumeka eka matsalwa yo sungula ya Bibele.—10/1, matluka 18-20.

• I yini leswi hi swi dyondzaka eka Swivuriso 24:27 malunghana ni ku “aka vandyangu”?

Wanuna loyi a lavaka ku teka nsati u fanele a tilunghiselela vutihlamuleri byebyo. Leswi swi katsa ku lunghekela ku khathalela ndyangu hi swilo leswi vonakaka ni ku rhangela ndyangu loko swi ta etimhakeni ta vugandzeri.—10/15, tluka 12.

• Ha yini swi hoxile ku vula leswaku Timbhoni ta Yehovha i vukhongeri bya Protestente?

Vuprotestente byi sungule hi lembe-xidzana ra vu-16 eYuropa hi xikongomelo xo cinca matirhelo ya Kereke ya Rhoma Khatoliki. “Vuprotestente” byi tirha eka vanhu lava namarhelaka swikongomelo swa Tsima ro Lwela Fambiselo Lerintshwa ra Kereke. Timbhoni ta Yehovha a ti pfumeli ku lawuriwa hi mupapa emisaveni hinkwayo naswona hi timbilu ta tona hinkwato ti teka Bibele yi ri ya nkoka, kambe ti papalata tidyondzo ni mikhuva yo tala leyi nga riki ya le Matsalweni leyi tolovelekeke eka vukhongeri bya Protestente.—11/1, tluka 19.

• Xana munhu u fanele a dyondza Xiheveru ni Xigriki leswaku a ta twisisa Bibele?

Doo. Loko munhu a tiva tindzimi leti a swi nge n’wi endli leswaku a twisisa rungula leri nga eBibeleni. Munhu loyi a dyondzeke tindzimi toleto swa ha lava a tirhisa swihlamusela-marito ni tibuku leti hlamuselaka ririmi. Leswi Xikwembu xi endleke leswaku marito ya Nandza wa xona lonkulu ma hlayisiwa eka vuhundzuluxeri swi komba leswaku munhu a nga tirhisa ni ku dyondza ntiyiso eka vuhundzuluxeri bya Bibele hi tindzimi leti nga kona sweswi.—11/1, matluka 20-23.

• Yehovha na Yesu va hi vekele xikombiso xa njhani loko swi ta etimhakeni ta ku xixima?

Hambileswi Yehovha a tlakukeke swinene, u tirhisana ni vanhu hi musa naswona wa va xixima. Loko a vulavula na Abrahama na Muxe u tirhise rito ra Xiheveru leri minkarhi yo tala ri hundzuluxeriweke ri va ku “kombela.” (Gen. 13:14; Eks. 4:6) Nakambe Xikwembu xa va yingisela vanhu. (Gen. 18:23-32) Yesu na yena a a va yingisela vanhu, naswona a a tshama a tiyimisele ku va pfuna naswona minkarhi yo tala a va vitana hi mavito ya vona.—11/15, tluka 25.

• Ha yini Vakreste va ntiyiso va nga ri tlangeli Lembe Lerintshwa ra Ndhavuko wa Machayina?

Nkhuvo wa ku tlangela Lembe Lerintshwa ra Ndhavuko wa Machayina i wa nkoka swinene eka tikhalendara ta le Asia. Nkhuvo lowu hakanyingi wu katsa ku ringeta ku kuma mikateko ni ku kombisa ku xixima mimoya. Vakreste va xixima vatswari va vona, kambe va papalata minkhuvo leyi katsaka ku gandzeriwa ka vakokwana lava feke leswaku va ta va sirhelela kumbe leyi lavaka leswaku va ta tsakeriwa hi swikwembu swa le ndyangwini.—12/1, matluka 20-23.