Nghena endzeni

Hundzela eka leswi nga endzeni

Ku Khomeka Hi Ntirho Wa Xikwembu Ni Ku Tshama U Tsakile

Ku Khomeka Hi Ntirho Wa Xikwembu Ni Ku Tshama U Tsakile

 Ku Khomeka Hi Ntirho Wa Xikwembu Ni Ku Tshama U Tsakile

YEHOVHA u lava leswaku u tsaka. (Ps. 100:2) Leswi u nga un’wana wa malandza ya yena, swi nga ha endleka na wena u khomekile. Kumbexana a wu nga khomekanga hi ndlela leyi loko u nyiketela vutomi bya wena eka Xikwembu, kambe sweswi vutihlamuleri lebyi u nga na byona entirhweni ni le vandlheni byi nga ha ku endla u titwa u tikeriwa. U nga ha tivona nandzu loko u nga koti ku endla hinkwaswo leswi u lavaka ku swi endla. Xana u nga ringanisela njhani hi ndlela leyi faneleke naswona u tshama u ri ni “ntsako wa Yehovha”?—Neh. 8:10.

U hanya eminkarhini yo tika naswona u langutana ni mintshikilelo yo tala, hikwalaho u fanele u hleleka kahle. Ndzayo yin’wana leyi huhuteriweke ya muapostola Pawulo ya faneleka emhakeni leyi: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.”—Efe. 5:15, 16.

Hikwalaho ka ndzayo leyi ya vutlhari, xana u nga tivekela njhani tipakani letinene ivi u tshama u ri ni dyondzo ya munhu hi yexe, u khathalela ndyangu, u ya ensin’wini, u tirha ntirho wo tihanyisa u tlhela u endla mintirho yin’wana?

Xana wa ha yi tsundzuka ndlela leyi a wu tsake ha yona loko u tinyiketela eka Xikwembu kutani u khuvuriwa? U tsakisiwe hileswi se a wu tiva Yehovha ni swikongomelo swa yena. Swi nga ha va swi ku teke tin’hweti to tala u ri karhi u dyondza hi ku hiseka leswaku u kuma vutivi byebyo swin’we ni ntsako. Kambe a swi fanerile leswaku u endla matshalatshala wolawo. Sweswo swi endle leswaku u cinca u va ni mahanyelo lamanene.

Leswaku u tshama u tsakile u fanele u tshamela ku tiyisa vuxaka bya wena na Yehovha. Loko swi ku tikela ku kuma nkarhi wa ku hlaya Bibele, kambisisa xiyimiso xa wena. Hambiloko wo heta timinete ti nga ri tingani hi siku u dyondza u tlhela u anakanyisisa, sweswo swi ta ku endla u tshinela eka Yehovha naswona sweswo swi ta endla leswaku u tsaka.

Malandza yo tala ya Xikwembu ma nga tixavela nkarhi wa swilo swa nkoka hi ku tshika ku endla swilo leswi nga riki swa nkoka. Tivutise, ‘Xana ndzi heta nkarhi wo tanihi kwihi ndzi ri karhi ndzi hlaya timagazini ta misava kumbe maphepha-hungu, ndzi hlalele TV, ndzi yingisele vuyimbeleri kumbe ndzi tihungasa?’ Swilo sweswo swi nga ha tsakisa kambe loko ntsena swi endliwa hi ku ringanisela. (1 Tim. 4:8) Loko u swi xiya leswaku u ni xiphiqo malunghana  ni ndlela leyi u tirhisaka nkarhi wa wena ha yona, teka magoza yo lulamisa xiyimiso xa wena.

Adam, loyi a nga ni nsati ni vana vanharhu naswona a nga nkulu wa vandlha u hlamusela leswi n’wi pfunaka: “Ndzi tikarhatela ku hanya vutomi byo olova. Ndzi papalata vuhungasi lebyi dyaka nkarhi naswona a ndzi xavi swilo leswi nga ta lava ku tshama swi ri karhi swi khathaleriwa. A ndzi titsoni swilo—ndzi hlawule ku tihungasa hi ndlela yo olova.”

Ku anakanyisisa hi vuyelo lebyinene bya swiboho swa wena swi nga endla leswaku u tlhela u va ni ntsako naswona swi nga ku pfuna ku tshama u ri ni langutelo lerinene. Hi xikombiso, Mariusz, nkulu la nga ni vana vanharhu u ri: “Loko ndzi sungule ku dyondza Bibele, ndzi sungule ku va ni langutelo lerinene. Minkarhi yo tala ndzi langutana ni miringo, leyi yo tala ya yona yi tiviwaka hi Yehovha. Kambe hikwalaho ka ku seketeriwa hi yena, ndzi langutele vumundzuku hi ntsako.”

Ku fana ni le mhakeni ya Mariusz, langutelo lerinene a ri nge endli leswaku u nga ha vileli nikatsongo. Kambe ri nga ku pfuna leswaku u titwa u antswa naswona u langutana ni swiphiqo swa vutomi hi ndlela leyinene. Ha hlaya: “Hinkwawo masiku ya la xanisekaka ma bihile; kambe loyi a nga ni mbilu leyinene u tshama a ri ni nkhuvo.” (Swiv. 15:15) Nakambe anakanyisisa hi rirhandzu leri Xikwembu se xi ku kombiseke rona. Ku anakanyisisa koloko ku nga tiyisa ndlela leyi u xi rhandzaka ha yona ku tlhela ku kurisa ntsako lowu u nga na wona hi Xikwembu.—Mat. 22:37.

Ku rhangisa Yehovha evuton’wini swi kurisa ntsako wa ndyangu. Ku kombisa timfanelo ta Vukreste swi hunguta timholovo naswona swi endla leswaku ndyangu wu tolovelana wu tlhela wu tirhisana hi ndlela leyi tsakisaka. Hikwalaho, kaya ra n’wina ri ta va ndhawu leyi nga ni ku rhula ni vun’we eka ndyangu hinkwawo.—Ps. 133:1.

Ku endla mintirho leyi kurisaka vuxaka bya n’wina na Yehovha tanihi ndyangu swi kurisa ntsako wa xiviri. Mariusz, u ri: “Ndzi wu teka wu ri wa nkoka nkarhi lowu hi wu hetaka tanihi ndyangu. Nsati wa mina u ndzi seketela swinene. Minkarhi hinkwayo loko swi koteka u va a ri na mina, hambi ndzi le nsin’wini kumbe ndzi le ku basiseni ka xitediyamu emahlweni ka ntsombano, naswona u famba na mina loko ndzi ya nyikela tinkulumo ta le rivaleni emavandlheni man’wana. Leswi swa ndzi khutaza.”

Matsalwa ma lerisa Vakreste ku khathalela swilaveko swa nyama swa mindyangu ya vona. (1 Tim. 5:8) Kambe loko ntirho wa ku tihanyisa wu ku dyela nkarhi wa wena wo tala ni matimba ya wena, sweswo swi nga endla leswaku u nga ha wu tsakeli ntirho wa Xikwembu. Khongela eka Yehovha hi mhaka yoleyo. (Ps. 55:22) Van’wana va kume leswaku loko va ta kota ku rhangisa Mfumo wa Xikwembu va fanele va lava ntirho wun’wana. Mukreste a nga fanelanga a pfumelela leswaku ntirho lowu holelaka lowu n’wi dyelaka nkarhi wa yena wo tala ni matimba ya yena wu n’wi sivela ku khathalela timhaka leti khumbaka vuxaka bya yena na Yehovha, ku nga tona leti nga ta nkoka swinene.—Swiv. 22:3.

U nga ha kuma swi pfuna ku tsala ehansi vuyelo lebyinene ni lebyo biha bya ntirho lowu u nga ha wu kumaka kumbe lowu u wu tirhaka sweswi. Ntirho lowu hakelaka wu tlhela wu enerisa wa naveleka. Kambe, xana ntirho lowu u wu tirhaka sweswi wa ku pfuna leswaku u tiyisa vuxaka bya ndyangu wa wena na Yehovha? Kambisisa swilo hinkwaswo leswi katsekaka, kutani u endla swiboho leswi nga ta endla leswaku u rhangisa vuxaka bya wena na Yehovha.

Loko ntirho wa wena wu nga ku pfumeleli leswaku u kurisa vuxaka bya wena na Yehovha, swi lava leswaku u lulamisa swiyimo swa wena. Vakreste vo tala va endla ku cinca lokukulu leswaku va kuma nkarhi wo kurisa vuxaka bya vona na Yehovha. Makwerhu un’wana wa xinuna wa le Poland u ri: “Nkarhi wun’wana ndzi boheke ku tshika ntirho lowu a ndzi wu endla hikuva minkarhi yo tala a ndzi va ndzi nga ri kona ndzi fambe hi ntirho. A ndzi nga ri na nkarhi lowu eneleke wo tikhathalela kahle timhaka leti khumbaka vuxaka bya mina na Yehovha kumbe wo va ni ndyangu wa mina.” Sweswi u tirha ntirho lowu n’wi siyaka a ri ni nkarhi wo tala ni matimba.

Tsakela Ku Pfuna Van’wana

Yesu u vule leswaku “ku nyika swi tisa ntsako lowukulu ku tlula ku amukela.” (Mint. 20:35) Vakreste va nga pfulekeriwa hi minkarhi yo tala yo nyika. Minkarhi yin’wana, ku n’wayitela, ku qhavula, kumbe ku nkhensa swi huma embilwini hikwalaho ka leswi un’wana a nyikeleke nkulumo hi ndlela leyinene ku nga ha va swona leswi lavekaka ku tisela wena ntsako ni munhu lowun’wana.

Muapostola Pawulo u khutaze Vakreste-kulobye a ku: “Vulavulani hi ku chavelela eka mimoya-xiviri leyi karhatekeke, seketelani lava tsaneke.” (1 Tes. 5:14) Mimoya-xiviri leyi karhatekeke yi nga ha vona onge a yi swi koti ku langutana ni swiphiqo hi  matimba ya yona. Xana u nga pfuna vanhu vo tano? Loko u vona leswaku un’wana wa vamakwenu u heleriwa hi ntsako entirhweni wa Yehovha, ringeta ku n’wi khutaza. Loko u endla tano u ta khutazeka na wena. Ku ni swiphiqo swin’wana leswi munhu a nga taka a nga swi koti ku swi tlhantlha. Hambiswiritano, u nga ha kombisa ntwela-vusiwana hi mbilu hinkwayo naswona u nga khutaza vamakwenu leswaku va titshega hi nseketelo lowu tshamaka wu ri kona wa Yehovha. Lava va titshegaka hi wona a va nge pfuki va khomisiwe tingana.—Ps. 27:10; Esa. 59:1.

Goza rin’wana leri pfunaka i ku rhamba munhu loyi a vonakaka a nga ri na ntsako leswaku a famba na wena ensin’wini. Loko Yesu a rhuma vadyondzisiwa va 70, u va rhume “hi vambirhi-mbirhi.” (Luka 10:1) A swi kanakanisi leswaku wa pfumela leswaku endlelo rolero ri pfune ntlawa wun’wana ni wun’wana leswaku wu khutazana. Xana na wena u nga tirhisa endlelo rolero leswaku u pfuna van’wana va tlhela va kuma ntsako namuntlha?

Namuntlha hi ni swivangelo leswi twalaka swo karhateka. Hambiswiritano, Pawulo wa hi khutaza a ku: “Nkarhi hinkwawo tsakani eHosini. Nakambe ndzi ri, Tsakani!” (Filp. 4:4) Leswi u rhandzaka Xikwembu, u xi yingisaka naswona u tiyiselaka hi ku hiseka entirhweni lowu xi ku nyikeke wona leswaku u wu endla, vutomi bya wena byi ni xikongomelo. Sweswo swi ku tisela ntsako. Xa nkoka swinene, Yehovha u ku pfuna leswaku u langutana ni mintshikilelo ni swiphiqo leswi u langutanaka na swona.—Rhom. 2:6, 7.

Hi ni ripfumelo ra leswaku hi le kusuhi swinene ni misava leyintshwa leyi Yehovha a hi tshembiseke yona. Mawaku mikateko yo tala leyi yi nga ta hi tisela yona swin’we ni swivangelo swo tsaka leswi yi nga ta endla leswaku hi va na swona! (Ps. 37:34) Hikwalaho hi nga tsaka, hi nga rivali mikateko leyi Yehovha a hi nyikaka yona hambi ku ri sweswi. Hikwalaho hi nga “[tirhela] Yehovha hi ku tsaka.”—Ps. 100:2.

[Dayagramu leyi nga eka tluka 8]

(Leswaku u vona rungula leri hleriweke hi ku helela, vona nkandziyiso wa kona)

Loko u lava ku tshama u tsakile u nga ha boheka ku lulamisa ndlela leyi u tirhisaka nkarhi wa wena ha yona

VUHUNGASI

KU KHATHALELA MUTI ni NDYANGU

NTIRHO

MINHLANGANO YA VUKRESTE

DYONDZO YA MUNHU HI YEXE

NSIMU

[Swifaniso leswi nga eka tluka 10]

Xana u nga swi kota ku pfuna van’wana leswaku va tlhela va tsaka?