Nghena endzeni

Hundzela eka leswi nga endzeni

Tlangela Vamakwenu Lava Feke Tindleve!

Tlangela Vamakwenu Lava Feke Tindleve!

 Tlangela Vamakwenu Lava Feke Tindleve!

VANHU va Xikwembu va manguva lawa i ndyangu lowukulu wa vamakwavo lava ndzhaka ya vona yi sukelaka eka vavanuna ni vavasati va khale swinene. Vanhu volavo va katsa Samuwele, Davhida, Samsoni, Rahava, Muxe, Abrahama, Sara, Nowa na Avele. Exikarhi ka malandza ya Yehovha yo tshembeka, ku ni vanhu vo tala lava feke tindleve. Hi xikombiso, vanhu vambirhi vo sungula lava veke Timbhoni ta Yehovha eMongolia a va ri mpatswa lowu feke tindleve. Naswona hikwalaho ka ku tshembeka ka vamakwerhu lava feke tindleve va le Rhaxiya, hi hlurile eka Huvo ya le Yuropa ya Timfanelo ta Vanhu.

Manguva lawa, “hlonga ro tshembeka ni ro tlhariha” ri humese minkandziyiso ya ririmi ra mavoko naswona ri hlele mavandlha swin’we ni tinhlengeletano ni mintsombano hi ririmi ra mavoko. (Mat. 24:45) Malunghiselelo lawa ma va pfune swinene vanhu lava tirhisaka ririmi leri. * Kambe, xana u tshame u tivutisa leswi a swi ri xiswona eka vanhu lava feke tindleve ku dyondza hi Xikwembu xa ntiyiso ni ku hambeta va twisisa ntiyiso handle ka malunghiselelo lawa? Xana u tshame u anakanya hi leswi u nga swi endlaka leswaku u pfuna vanhu lava feke tindleve lava tshamaka endhawini ya ka n’wina?

Loko Ku Nga Si Va Ni Malunghiselelo Ya Manguva Lawa

Ha yini u nga vutisi vanhu van’wana lava kuleke lava feke tindleve malunghana ni ndlela leyi va dyondzeke hi Xikwembu ha yona? Va nga ha ku byela ndlela leyi va titweke ha yona loko va swi kuma ro sungula leswaku Xikwembu xi ni vito—ni ndlela leyi ntiyiso wolowo wu va pfuneke ha yona leswaku va cinca vutomi bya vona ni ku va tiyisa ku ringana malembe yo tala, loko tivhidiyo kumbe ti-DVD leti va pfunaka leswaku va dyondza leswi engetelekeke hi ntiyiso wa Matsalwa ti nga si va kona. Va nga ha hlamusela leswaku a swi ri njhani loko minhlangano ya Vukreste yi nga si fambisiwa kumbe ku tolokiwa hi ririmi ra mavoko. Munhu un’wana a a ta tshama ekusuhi na vona a va tsalela tinhla ephepheni leswaku a va pfuna va twisisa leswi a swi vuriwa. Makwerhu un’wana wa xinuna la feke tindleve u dyondze ntiyiso wa Bibele hi ndlela yoleyo ku ringana malembe ya nkombo loko ku nga si fika munhu loyi a a ta toloka minhlangano hi ririmi ra mavoko.

Timbhoni tin’wana ta khale leti feke tindleve ta ha tsundzuka leswaku a swi ri njhani ku chumayela vanhu lava kotaka ku vulavula. Hi voko rin’we a ti khoma khadi leri tsariweke swingheniso swo olova leswi a ti swi tirhisa loko ti chumayela hi yindlu ni yindlu. Hi voko lerin’wana, a ti khoma timagazini leta ha ku humaka ta Xihondzo xo Rindza ni Xalamuka! A swi tika ku fambisela munhu un’wana la feke tindleve dyondzo ya Bibele mi tirhisa ntsena minkandziyiso leyi kandziyisiweke leyi havumbirhi bya n’wina a mi nga yi twisisi kahle. Swi nga ha endleka leswaku vahuweleri van’wana lava kuleke lava feke tindleve va ha tsundzuka ndlela leyi a swi va twisa ku vava ha yona loko vanhu va nga va twisisi kutani va nga swi koti ku ya emahlweni va bula hi ntiyiso. Nakambe va swi tiva leswaku swi njhani ku rhandza Yehovha swinene kambe u nga swi koti ku ri kombisa kahle rirhandzu rero. Ha yini? Hikuva a va nga tiyiseki leswaku va yi twisisa kahle mhaka yo karhi.

Ku nga khathariseki swihinga sweswo hinkwaswo, vamakwerhu lava, lava tirhisaka ririmi ra mavoko va tshame va tshembekile. (Yobo 2:3) Va rindzele Yehovha hi ku swi rhandza. (Ps. 37:7) Naswona sweswi u va katekisa hi swilo swo tala ku tlula leswi vo tala a va swi languterile.

Xiya matshalatshala lama endliweke hi makwerhu un’wana la feke tindleve, la nga nuna tlhelo tatana. Loko tivhidiyo ta ririmi ra mavoko ti nga si va kona, a a fambisa dyondzo ya ndyangu hi ku tshembeka. N’wana wa yena wa mufana u ri: “Minkarhi  hinkwayo a swi n’wi tikela tatana ku fambisa dyondzo ya ndyangu, hikuva swilo hinkwaswo leswi a a fanele a hi dyondzisa swona a swi ri eminkandziyisweni leyi kandziyisiwaka. Minkarhi yo tala, a a nga swi twisisi kahle leswi tsariweke. Na hina vana a hi endla leswaku swi n’wi tikela ku fambisa dyondzo ya ndyangu. A hi hatlisela ku n’wi byela loko a nga hlamuselanga swilo kahle. Nilokoswiritano, minkarhi hinkwayo a a yi fambisa dyondzo ya ndyangu. A a swi teka swi ri swa nkoka swinene ku hi dyondzisa swo karhi hi Yehovha ematshan’weni yo khomiwa hi tingana hileswi a a nga xi twisisi kahle Xinghezi.”

Nakambe ku ni xikombiso xa Richard, makwerhu la nga ni malembe ya va-70, loyi a feke tindleve naswona a nga bofu, loyi a tshamaka le Brooklyn, eNew York, le U.S.A. Swa tiveka leswaku Richard u tshama a ri kona eminhlanganweni ya Vukreste. Leswaku a ya eminhlanganweni, u famba hi xitimela lexi fambaka ehansi ka misava a ri yexe, ivi a hlayela switichi leswaku a ta tiva laha a nga ta chika kona. Siku rin’wana hi xixika, ku we gamboko yo tala swinene naswona a ku ri ni moya lerova vamakwerhu va vona swi antswa leswaku minhlangano yi nga vi kona. Vanhu hinkwavo evandlheni va byeriwile kambe hi xihoxo Richard a nga tivisiwanga. Loko vamakwerhu va xiye leswaku a va nga n’wi tivisanga Richard, va sungule ku n’wi lava, kutani va n’wi kuma a yime ehandle ka Holo ya Mfumo a nga heli mbilu, a yimele ku pfuleriwa minyangwa. Loko va n’wi vutisa leswaku ha yini a fambe eka maxelo lawa yo biha, u te, “Ndzi rhandza Yehovha.”

Xana U Nga Endla Yini?

Xana va kona vanhu lava feke tindleve endhawini leyi u tshamaka eka yona? Xana u nga ri dyondzanyana ririmi ra mavoko leswaku u ta kota ku vulavurisana na vona? Hi ntolovelo vanhu lava tirhisaka ririmi ra mavoko va ni tintswalo swin’we ni mbilu yo leha loko va dyondzisa van’wana ririmi ra vona. U nga ha hlangana ni munhu la feke tindleve u nga swi langutelanga kumbe ensin’wini. Xana u nga endla yini? Ringeta ku vulavurisana na yena. Koweta hi mavoko, tsala tinotsi, tirhisa swifaniso kumbe u hlanganisa swilo leswi hinkwaswo. Hambiloko munhu yoloye a kombisa leswaku a nga wu tsakeli ntiyiso, byela Mbhoni leyi feke tindleve kumbe leyi tivaka ririmi ra mavoko leswaku a wu endzele munhu la feke tindleve. Rungula rero ri nga ha tsakisa munhu la feke tindleve loko ri hundziseriwa eka yena hi ririmi ra mavoko.

Swi nga endleka leswaku u le ku dyondzeni ka ririmi ra mavoko naswona u hlanganyela evandlheni leri tirhisaka ririmi ra mavoko. Xana u nga swi kotisa ku yini ku va ni vutshila u tlhela u ri twisisa kahle ririmi rero? Hambiloko ku ri ni vahuweleri lava kotaka ku vulavula evandlheni ra ka n’wina, swi nga antswa leswaku mi tirhisa ririmi ra mavoko loko mi vulavurisana! Leswi swi ta ku pfuna leswaku u ehleketa hi ririmi ra mavoko, ku nga swilo leswi u swi vonaka. Minkarhi yin’wana u nga ha rivala u vulavula ematshan’weni yo tirhisa ririmi ra mavoko hikuva u swi toloverile ku vulavula. Hambiswiritano, loko u dyondza ririmi rin’wana, u fanele u phikelela leswaku u ta kota ku khuluka kahle.

Ku tikarhatela ku tirhisa ririmi ra mavoko swi komba leswaku hi rhandza vamakwerhu lava tirhisaka ririmi rero hi tlhela hi va xixima. Anakanya ndlela leyi vanhu lava feke tindleve va karhatekaka ha yona masiku hinkwawo hikwalaho ka leswi vanhu van’wana va nga va twisisiki entirhweni kumbe exikolweni. Makwerhu un’wana wa xinuna la  feke tindleve u ri: “Vanhu lava ndzi hanyaka na vona masiku hinkwawo va vulavula. Minkarhi yo tala ndzi titwa ndzi ri ni xivundza ndzi tlhela ndzi vona onge a ndzi rhandziwi naswona ndzi dya mbitsi naswona ndzi pfa ndzi hlundzuka. A ndzi nge swi koti ku yi hlamusela kahle ndlela leyi ndzi pfaka ndzi titwa ha yona.” Minhlangano ya hina yi fanele yi va minkarhi leyi tsakisaka laha eka yona vamakwerhu lava feke tindleve va kumaka rungula leri nga va tiyisaka ripfumelo ra vona ni ku tsakela ku burisana ni vamakwavo.—Yoh. 13:34, 35.

Nakambe yi fanele yi tekeriwa enhlokweni mintlawa leyitsongo ya vanhu lava feke tindleve leyi hlanganyelaka ni mavandlha lama nga tirhisiki ririmi ra mavoko. Vanhu lava nga eka mintlawa yoleyo vo tolokeriwa kunene. Leswaku lava feke tindleve va vuyeriwa swinene eka leswi tolokiwaka eHolweni ya Mfumo, va tshama eswitulwini leswi nga emahlweni. Leswi swi va pfuna leswaku va xi vona kahle xivulavuri swin’we ni loyi a tolokaka va nga kavanyetiwi. Ku vuriwa leswaku swirho hinkwaswo swa vandlha swi ma tolovela hi ku hatlisa malunghiselelo lawa, a ma swi kavanyeti. Nakambe malunghiselelo lawa ma tirhisiwa etinhlengeletanweni ni le mintsombanweni leyi tolokiwaka hi ririmi ra mavoko. Swirho swa vandlha leswi tirhaka hi matimba swi fanele swi bumabumeriwa hikwalaho ka ku toloka ka swona kahle hilaha munhu la feke tindleve a ta ri hundzisela hakona rungula ra kona, hi ndlela leyi twalaka ni leyi nga ya ntumbuluko.

Kumbexana u le vandlheni leri seketelaka ntlawa lowu tirhisaka ririmi ra mavoko kumbe leri nga ni vanhu va nga ri vangani lava feke tindleve lava tolokeriwaka minhlangano. Xana u nga endla yini ku komba vamakwerhu lava, lava feke tindleve leswaku u na mhaka na vona? Va rhambe ekaya ra wena. Loko swi koteka, ri dyondzenyana ririmi ra mavoko. U nga karhateki loko mi nga twanani kahle. U ta yi kuma ndlela yo vulavurisana na vona naswona loko u va kombisa rirhandzu ro tano swi ta endla leswaku mi va ni swilo swo tsakisa swo swi tsundzuka. (1 Yoh. 4:8) Timbhoni leti feke tindleve ti ni swilo swo tala leswi ti nga swi endlaka. Ti rhandza ku vulavula, ti tlharihile naswona ti rhandza ku hleka. Makwerhu un’wana wa xinuna loyi vatswari va yena va feke tindleve, u ri: “Vutomi bya mina hinkwabyo a ndzi tshama ni vanhu lava feke tindleve naswona ndzi dyondze swilo swo tala swinene swa nkoka. Hi nga dyondza swo tala eka vamakwerhu lava feke tindleve.”

Yehovha wa va rhandza vagandzeri va yena vo tshembeka ku katsa ni lava feke tindleve. Hakunene xikombiso xa vona xa ripfumelo ni ku tiyisela xi endla leswaku nhlengeletano ya Yehovha yi fuwa. Hikwalaho onge hi nga va tlangela vamakwerhu lava feke tindleve!

[Nhlamuselo ya le hansi]

^ par. 3 Vona xihloko lexi nge, “Yehovha U Voningise Xikandza Xakwe Eka Vona,” lexi nga eka Xihondzo xo Rindza xa August 15, 2009.

[Xifaniso lexi nga eka tluka 31]

Rungula ra Mfumo ri nga ha n’wi tsakisa swinene munhu la feke tindleve loko ri hundziseriwa eka yena hi ririmi ra mavoko

[Xifaniso lexi nga eka tluka 32]

Minhlangano ya hina yi fanele yi va minkarhi leyi tsakisaka laha eka yona vamakwerhu lava feke tindleve va nga kumaka rungula leri nga va tiyisaka ripfumelo