Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

 Swivutiso Swa Vahlayi

Hi yihi dyondzo leyi hi yi kumaka eka Swivuriso 24:27?

Loko mutsari wa Swivuriso a nyika jaha ndzayo u tsale a ku: “Lunghiselela ntirho wa wena u ri ehandle, naswona wu endle wu lungheka wa ha ri ensin’wini. Endzhaku ka sweswo u ta tlhela u aka vandyangu wa wena.” Hi yihi yinhla ya nkoka leyi kumekaka eka xivuriso lexi lexi huhuteriweke? Wanuna u fanele a tilunghiselela kahle a nga si teka nsati ni ku sungula ndyangu, u fanele a tiva vutihlamuleri lebyi a nga ta va na byona bya ndyangu.

Eku sunguleni, ndzimana leyi minkarhi yin’wana a yi hlamuseriwa tanihi leyi vulaka leswaku wanuna kumbe tatana a nga fanelanga a khathala hi ntirho wa yena wa ku tihanyisa ntsena, kambe u fanele a tlhela a tirhela ku aka ni ku khutaza ndyangu wa yena, hi xikombiso, u fanele a wu dyondzisa hi Xikwembu. Hambileswi mhaka leyi ku nga ntiyiso naswona yi sekeriweke eMatsalweni, a yi tikombi yi ri yinhla-nkulu eka ndzimana leyi. Hikwalaho ka yini? Xiya swivangelo swimbirhi.

Xo sungula, ndzimana leyi loko yi vulavula hi ku aka a yi vulavuli hi ku khutaza kumbe ku tiyisa ndyangu lowu se wu nga kona. Ematshan’weni ya sweswo, ndzimana leyi yi vulavula hi ku aka yindlu hi ku kongoma. Rito leri hundzuluxeriweke ri va “aka,” hi ndlela yo fanekisela ri nga ha tlhela ri vula ku sungula ndyangu, ku nga ku teka nsati ni ku va ni vana.

Xa vumbirhi, ndzimana leyi yi kandziyisa ku endla swilo hi ndlela yo hleleka onge hi loko yi ku, “Sungula hi ku endla leswi; ivi u endla leswiya.” Xana swi vula leswaku xivuriso lexi xi vula leswaku ntirho wa ku tihanyisa wu fanele wu rhangisiwa emahlweni ka ntirho wa Xikwembu? A swi tano!

Eminkarhini ya Bibele, loko wanuna a lava ku “aka vandyangu wa [yena],” kumbe ku sungula ndyangu hi ku teka nsati a a fanele a tivutisa xivutiso lexi nge, ‘Xana ndzi swi lunghekerile ku khathalela ni ku hlayisa nsati swin’we ni vana lava hi nga ha vaka na vona?’ Loko a nga si sungula ndyangu, a ku ri ni ntirho lowu a a fanele a wu endla, wa ku khathalela masimu ni ntshovelo. Hikwalaho, Bibele ya Mahungu Lamanene yi hundzuluxele ndzimana leyi yi ku: “Rhanga u dyondza ku ti tirhela, u lulamisa ni masimu ya wena, hi kona u nga ta aka muti.” Xana nawu lowu wa ha tirha ninamuntlha?

Ina. Wanuna loyi a lavaka ku teka nsati u fanele a byi lunghekela kahle vutihlamuleri byebyo. Loko rihanyo ra yena ri n’wi pfumelela, u fanele a tirha leswaku a wundla ndyangu wa yena. Entiyisweni, loko a endla tano u ta swi kota ku wu khathalela hi swilo leswi vonakaka. Rito ra Xikwembu ri kombisa leswaku wanuna loyi a nga riki na mhaka ni ndyangu wa yena, a nga khathaliki hi ndlela leyi wu titwaka ha yona naswona a nga wu hlayisiki hi tlhelo ra moya u bihe ngopfu ku tlula munhu la nga riki na ripfumelo! (1 Tim. 5:8) Ku tlula kwalaho, loko jaha ri lava ku va ni ndyangu ri fanele ri tivutisa swivutiso leswi landzelaka: ‘Xana ndzi swi lunghekerile hakunene ku wundla ndyangu? Xana ndzi swi lunghekerile ku rhangela ndyangu wa mina loko swi ta etimhakeni ta vugandzeri? Xana ndzi ta byi hetisisa vutihlamuleri bya mina bya ku fambisa dyondzo ya Bibele nkarhi na nkarhi ni ndyangu wa mina?’ Rito ra Xikwembu ri kandziyisa vutihlamuleri lebyi bya nkoka swinene.—Det. 6:6-8; Efe. 6:4.

Hikwalaho, jaha leri lavaka nsati ri fanele ri ehleketisisa kahle hi nawu lowu kumekaka eka Swivuriso 24:27. Hilaha ku fanaka, ni wanhwana u ta va a endla kahle ku tivutisa loko a byi lunghekerile vutihlamuleri bya ku tekiwa kumbe ku va mutswari. Mpatswa lowu wa ha ku tekanaka wu nga ha tivutisa swivutiso leswi fanaka loko wu ehleketa hi ku kurisa vana. (Luka 14:28) Ku landzela nawu wolowo lowu huhuteriweke swi nga pfuna vanhu va Xikwembu leswaku va papalata ku vilela ngopfu naswona va tiphina hi vutomi bya ndyangu lebyi tsakisaka.

[Marito lama tshahiweke exihlokweni lama nga eka tluka 12]

Hi swihi swivutiso leswi jaha ri faneleke ri tivutisa swona loko ri lava ku va ni ndyangu?