Nghena endzeni

Hundzela eka leswi nga endzeni

Xana U Nga Tiyisela Njhani eNtirhweni Wo Chumayela?

Xana U Nga Tiyisela Njhani eNtirhweni Wo Chumayela?

 Xana U Nga Tiyisela Njhani eNtirhweni Wo Chumayela?

XANA u tshame u titwa u karhele naswona u hele matimba lerova u lava ku tshika ntirho wo chumayela? Nkaneto lowukulu, ku vilela, mavabyi, ntshikilelo wa tintangha kumbe loko vanhu lava hi va chumayelaka va nga amukeli ntiyiso swi nga ha endla leswaku swi hi tikela ku tiyisela. Kambe, anakanya hi xikombiso xa Yesu. U tiyisele miringo leyikulu swinene “hikwalaho ka ntsako lowu a wu vekiwe emahlweni ka yena.” (Hev. 12:2) A a swi tiva leswaku loko a kombisa leswaku swihehlo leswi Xikwembu xi phyarhekiweke swona i mavunwa, a a tsakisa mbilu ya Yehovha.—Swiv. 27:11.

Na wena loko u tiyisela entirhweni wo chumayela u nga tsakisa mbilu ya Yehovha. Hambiswiritano, ku vuriwa yini loko swihinga swin’wana swi tikomba onge swi ku hetela matimba ya wena yo chumayela? Krystyna loyi a dyuhaleke naswona a karhatiwaka hi mavabyi u ri: “Minkarhi yo tala ndzi titwa ndzi karhele ni ku titwa ndzi tshikilelekile. Swiphiqo swa mina leswi fambisanaka ni ku dyuhala, swo tanihi mavabyi ni mivilelo ya vutomi bya siku ni siku swi nga tsanisa ku hiseka ka mina swa xinkarhana.” Xana u nga tiyisela njhani entirhweni wo chumayela hambiloko u ri ni swihinga swo tano?

Tekelela Xikombiso Xa Vaprofeta

Leswaku vahuweleri vo tshembeka va Mfumo va kota ku tiyisela entirhweni wo chumayela, va nga lwela ku va ni langutelo ro fana ni ra vaprofeta va khale. Hi xikombiso, anakanya hi Yeremiya. Loko a vitaniwa leswaku a ta va muprofeta, eku sunguleni a a kanakana. Kambe, Yeremiya u swi kotile ku tiyisela eka xiavelo xakwe xo tika ku tlula malembe ya 40 hikuva a a dyondze ku tshemba Xikwembu hi ku helela.—Yer. 1:6; 20:7-11.

Henryk u kume xikhutazo eka xikombiso xa Yeremiya. U ri: “Eka malembe yo tlula 70 lawa ndzi ma heteke ndzi ri karhi ndzi chumayela, minkarhi yin’wana a ndzi pfa ndzi hetiwa matimba hi ndlela leyi vanhu a va angula ha yona—ku kaneta ka vona kumbe loko va nga ri na mhaka na rungula ra hina. Eminkarhini yoleyo, a a ndzi titsundzuxa xikombiso xa Yeremiya. Ndlela leyi a a rhandza Yehovha ha yona ni ku tshembela ka yena eka Yehovha hi ku helela swi endle leswaku a kuma matimba yo ya emahlweni a profeta.” (Yer. 1:17) Rafał na yena u khutaziwe hi xikombiso xa Yeremiya. U ri: “Yeremiya u titshege hi Xikwembu ematshan’weni yo tshemba matimba ya yena ni ku tshemba ndlela leyi a a titwa ha yona. U ye emahlweni a nga chavi nchumu hambileswi vanhu vo tala a va n’wi venga. Ndzi ringeta ku tshama ndzi ri karhi ndzi titsundzuxa mhaka yoleyo.”

Muprofeta un’wana loyi xikombiso xa yena xi pfuneke vanhu vo tala leswaku va tiyisela ensin’wini i Esaya. Xikwembu xi n’wi byele leswaku varikwavo a va nga ta n’wi yingisela. Yehovha u te: “Endla mbilu ya vanhu lava yi sihalala, u endla ni tindleve ta vona ti nonon’hwa.” Xana Esaya a a kunguhateriwile leswaku u ta tsandzeka? Xikwembu a xi nga swi teki hi ndlela yoleyo! Loko a byarhisiwe ntirho wa ku va muprofeta u te: “Hi mina loyi! Ndzi rhume.” (Esa. 6:8-10) Esaya u namarhele xiavelo xakwe. Xana hi yona ndlela leyi u angulaka ha yona eka xileriso xo chumayela?

Leswaku hi tiyisela entirhweni wo chumayela hilaha Esaya a endleke hakona, hambiloko vanhu va nga hi yingisi, hi fanele hi papalata ku ehleketa ngopfu hi mhaka ya leswaku vanhu va pfa va nga hi yingisi. Rafał u lwisana ni xiphiqo lexi hi ndlela leyi: “Ndzi ringeta ku ka ndzi nga ehleketi ngopfu hileswi vanhu va swi vulaka loko va kaneta. Vanhu va le nsin’wini leyi ndzi tirhaka eka yona va ni lunghelo ro angula hi ndlela leyi va lavaka ku angula ha yona.” Anna wa engetela a ku: “Ndzi endla matshalatshala ya leswaku ndzi nga ehleketi hi nchumu wihi na wihi lowu nga riki wunene kumbe lowu hetaka matimba. Lexi endlaka leswaku ndzi kota ku endla tano i xikhongelo ni ku kambisisa ndzimana ya siku ndzi nga si ya ensin’wini. Nchumu wun’wana ni wun’wana wo biha  lowu taka emianakanyweni ya mina ndzi hatla ndzi wu rivala.”

Muprofeta Ezekiyele a a tirha exikarhi ka Vayuda lava a va ome tinhloko lava a va ri evuhlongeni eBabilona. (Ezek. 2:6) Loko muprofeta loyi a a lo tshika ku byela vanhu marito ya Xikwembu naswona loko munhu un’wana wo homboloka a a lo fa a nga xi twanga xitsundzuxo xolexo, Ezekiyele a a ta va ni nandzu wa rifu ra munhu yoloye. Yehovha u byele Ezekiyele a ku: “Ngati yakwe ndzi ta yi lava evokweni ra wena.”—Ezek. 3:17, 18.

Henryk u ringeta ku va ni langutelo ro fana ni ra Ezekiyele, u ri: “A ndzi lavi ku va na nandzu wa ngati ya munhu. Vutomi bya vanhu lebyi nga bya risima byi le khombyeni.” (Mint. 20:26, 27) Zbigniew na yena u titwa hi ndlela leyi fanaka u ri: “Ezekiyele a a fanele a ya emahlweni ni ntirho wakwe ku nga khathariseki leswi vanhu van’wana a va swi ehleketa. Leswi swi ndzi pfuna ku languta ntirho wo chumayela hilaha Muvumbi a wu langutaka hakona.”

A Wu Tirhi U Ri Wexe

Loko u ri eku chumayeleni a wu tirhi u ri wexe. Ku fana na muapostola Pawulo, hi nga vula hi ku: “Hina hi vatirhi-kulobye ni Xikwembu.” (1 Kor. 3:9) Krystyna loyi a pfumelaka leswaku minkarhi yin’wana u pfa a hela matimba, u ri: “Hi yona mhaka leyi ndzi tshamaka ndzi ri karhi ndzi kombela Yehovha leswaku a ndzi nyika matimba. A nga si tshama a ndzi tsona matimba loko ndzi ma kombela.” Ina, ha wu lava moya wa Xikwembu leswaku wu hi pfuna entirhweni wa hina wo chumayela!—Zak. 4:6.

Loko hi ri ensin’wini, moya lowo kwetsima wu tlhela wu hi pfuna leswaku hi kombisa timfanelo leti vumbaka “mihandzu ya moya.” (Gal. 5:22, 23) Mihandzu yoleyo yi hi pfuna leswaku hi tiyisela entirhweni wo chumayela ku nga khathariseki leswaku vanhu va angula njhani. Henryk u ri: “Ku ya ensin’wini swi ndzi pfuna leswaku ndzi antswisa vumunhu bya mina. Ndzi dyondze ku lehisa mbilu, ku anakanyela ni ku ka ndzi nga lan’wi hi ku hatlisa.” Ku tiyisela entirhweni wo chumayela hambiloko u hlangana ni swihinga swo hambana-hambana swi nga ku pfuna leswaku u hlakulela timfanelo ta moya hilaha ku engetelekeke.

Yehovha u kongomisa ntirho lowu wo hlawuleka hi ku tirhisa tintsumi takwe. (Nhlav. 14:6) Bibele yi paluxa leswaku ku ni “timiriyadi ta timiriyadi ni magidi ya magidi” ya swivumbiwa swo tano swa moya. (Nhlav. 5:11) Tintsumi ti pfuna malandza ya Xikwembu ya laha misaveni ti kongomisiwa hi Yesu. Xana u ehleketa hi yona mhaka yoleyo nkarhi wun’wana ni wun’wana loko u ri ensin’wini?

Anna u ri: “Swa ndzi khutaza ku anakanyisisa hi mhaka ya leswaku tintsumi ti na hina loko hi ri entirhweni wo chumayela. Mpfuno lowu ti hi nyikaka wona ndzi wu teka wu ri wa nkoka hikuva ti kongomisiwa hi Yehovha na Yesu.” Wa nga vona lunghelo leri hi nga na rona ro kota ku tirha ni tintsumi to tshembeka!

Xana ku tirha ni vahuweleri van’wana va Mfumo swi nga hi pfuna njhani leswaku hi tiyisela? Hi katekisiwile hileswi hi tolovelaneke ni ntshungu lowukulu wa Timbhoni to tshembeka. A swi kanakanisi leswaku u swi xiyile leswaku ma tiyisile marito ya xivuriso xa le Bibeleni lama nge: “Nsimbi yi lotiwa hi nsimbi. Hi ndlela leyi fanaka munhu u lota xikandza xa un’wana.”—Swiv. 27:17.

Ku tirha ni van’wana ensin’wini swi hi nyika lunghelo lerikulu ro vona tindlela to chumayela leti pfunaka leti nga ha vaka ti ri tintshwa eka hina. Elżbieta u ri: “Ku tirha ni vahuweleri vo hambana-hambana swi ndzi endla ndzi kota ku kombisa rirhandzu eka vahuweleri va le vandlheni ni le ka vanhu lava hi hlanganaka na vona.” Ringeta ku famba ni vahuweleri vo hambana-hambana ensin’wini. Sweswo swi ta endla leswaku vutirheli bya wena bya nsimu byi va lebyi tsakisaka.

Tikhathalele

Leswaku hi tshama hi ri karhi hi hiseka ensin’wini, hi fanele hi hlela kahle, hi va ni xiyimiso lexinene xa dyondzo ya hina vini hi tlhela hi wisa hi ndlela leyi faneleke. Hi marito man’wana, hi fanele hi khathalela vuxaka bya hina na Yehovha ni rihanyo ra hina.

Bibele yi ri: “Kunene makungu ya lava va gingiritekaka ma endla leswi pfunaka.” (Swiv. 21:5) Zygmunt loyi sweswi a nga ni malembe ya 88, u ri: “Ku va ni xiyimiso lexinene xa ntirho wo chumayela swi ndzi pfuna leswaku ndzi fikelela tipakani to karhi. Ndzi hlela nkarhi wa mina hi vukheta leswaku ndzi va ni nkarhi lowu eneleke wo chumayela.”

Ku tiva Matsalwa swinene swa hi tiyisa naswona swi hi endla hi lunghekela ntirho wo chumayela. Tanihi leswi hi faneleke hi dya swakudya leswaku hi kuma matimba, hi fanele hi tshama hi ri karhi hi hlaya rungula leri Yehovha a hi lunghiseleleke rona leswaku hi ya emahlweni hi endla ntirho wo chumayela. Ku dyondza Rito ra Xikwembu siku ni siku ni ku dya ‘swakudya hi nkarhi lowu faneleke’ swi nga hi nyika matimba yo ya entirhweni wo chumayela.—Mat. 24:45-47.

 Elżbieta u cince ndlela leyi a a hanya ha yona hi ndlela yo hlamarisa leswaku a ta antswisa ntirho wa yena wo chumayela. U ri: “Ndzi wu hungute swinene nkarhi lowu ndzi wu hetaka ndzi ri eku hlaleleni ka thelevhixini leswaku ndzi va ni nkarhi wo tala wo lunghiselela ku ya entirhweni wo chumayela. Loko ndzi hlaya Bibele madyambu man’wana ni man’wana, ndzi ehleketa hi vanhu lava ndzi hlanganeke na vona ensin’wini. Ndzi kambisisa matsalwa ni swihloko leswi nga va pfunaka.”

Loko u wisa hi ndlela leyi faneleke swi nga ku pfuna leswaku u tshama u ri ni matimba yo tala naswona swi ta endla leswaku u kota ku ya entirhweni wo chumayela hilaha u nga kotaka hakona. Hi hala tlhelo, loko u heta nkarhi wo tala eka vuhungasi swi nga va ni vuyelo byo biha eka ntirho wa wena. Andrzej, muhuweleri un’wana la hisekaka, u ri: “Loko munhu a nga wisi u karhala ngopfu, naswona sweswo swi endla leswaku munhu a sungula ku hela matimba. Ndzi endla xin’wana ni xin’wana lexi ndzi nga xi kotaka leswaku ndzi papalata mhaka yoleyo.”—Ekl. 4:6.

Ku nga khathariseki leswaku hi endla matshalatshala yo tanihi kwihi, vanhu vo tala a va ma amukeli mahungu lamanene. Hambiswiritano, Yehovha a nge pfuki a wu rivele ntirho wa hina. (Hev. 6:10) Hambiloko vanhu vo tala va nga lavi ku vulavula na hina, va nga ha sala va vulavula hi hina loko se hi fambile. Vuyelo bya kona byi nga ha fana ni lebyi hi hlayaka ha byona malunghana na Ezekiyele: Vanhu “kunene va ta swi tiva leswaku muprofeta a a ri kona exikarhi ka vona.” (Ezek. 2:5) I ntiyiso leswaku ku endla ntirho wa hina wo chumayela a wu olovi, kambe swa hi vuyerisa naswona swi ta vuyerisa ni vanhu lava hi yingisaka.

Zygmunt u ri: “Loko hi ya ensin’wini swi hi pfuna leswaku hi ambala vumunhu lebyintshwa ni ku kombisa leswaku hi rhandza Xikwembu ni vanhu-kulorhi.” Andrzej u engetela a ku: “I lunghelo eka hina ku va hi hoxa xandla entirhweni lowu, lowu ponisaka vutomi. A wu nge he endliwi hi ndlela leyi kumbe ehansi ka swiyimo leswi fanaka ni leswi.” Na wena u nga kuma mikateko yo tala hi ku va u tiyisela entirhweni wo chumayela namuntlha.—2 Kor. 4:1, 2.

[Xifaniso lexi nga eka tluka 31]

Loko hi khathalela vuxaka bya hina na Yehovha hi tlhela hi tikhathalela hi tlhelo ra nyama swi ta hi pfuna leswaku hi tiyisela entirhweni wo chumayela