Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Hi nga ri vulavula njhani hi ndlela leyi khulukaka “ririmi leri tengeke,” ku nga ntiyiso lowu vulavulaka hi Xikwembu ni hi swikongomelo swa xona? (Sof. 3:9)

Ku fana ni tindzimi letin’wana leti vulavuriwaka, leswaku hi vulavula “ririmi leri tengeke” hi ndlela leyi khulukaka hi fanele hi rhiya ndleve, hi tekelela vanhu lava ri vulavulaka kahle ririmi leri, hi nhlokohata mavito ya tibuku ta le Bibeleni ni tindzimana to karhi leti nga eBibeleni, hi phindha swilo leswi hi swi dyondzeke, hi hlayela ehenhla, hi kambisisa milawu ya ririmi kumbe ntila wa ntiyiso, hi tikarhatela ku endla nhluvuko, hi tivekela nkarhi wo hlaya, ni ku titoloveta ku “vulavula” ririmi leri tengeke.—8/15, matluka 21-25.

• Hi swihi swilo swin’wana leswi katsekaka loko u lava ku tiva leswi Xikwembu xi nga xiswona?

“Yehovha i vito rakwe,” naswona u lava hi n’wi tiva hi vito rero. (Eks. 15:3) I “Xikwembu xa rirhandzu ni ku rhula.” (2 Kor. 13:11) I “Xikwembu xa vutivi” ni “xa ku ponisa.” (1 Sam. 2:3; Ps. 25:5) Xikwembu xi ta tshinela eka lava va xi tivaka.—9/1, matluka 4-7.

• Mhaka ya “ntambhu ya miluko yinharhu” yi nga tirha njhani evukatini?

Xiga lexi nge “ntambhu ya miluko yinharhu” i xifananisi. (Ekl. 4:12) Loko xi tirhiseriwa evukatini xi katsa wanuna ni wansati, miluko yimbirhi leyi tiyisiwaka hi lowa vunharhu, ku nga Xikwembu. Ku va ni vun’we ni Xikwembu swi nyika mpatswa matimba yo langutana ni swiphiqo ni ku kuma ntsako.—9/15, tluka 16.

• “Ku tlhandleka mavoko” loku ku vulavuriwaka hi kona eka Vaheveru 6:2 swi kombetela eka yini?

Swi nga ha endleka a swi kombetela eka ku tlhandleka mavoko leswaku ku hundziseriwa nyiko ya moya lowo kwetsima ya singita ematshan’weni yo kombetela eka ku veka vakulu lava nga Vakreste. (Mint. 8:14-17; 19:6)—9/15, tluka 32.

• I yini leswi tatana lonene a swi xiyaka leswaku vana vakwe va swi lava?

Swin’wana swa leswi va swi lavaka i (1) rirhandzu rakwe, (2) xikombiso lexinene, (3) kaya leri tsakeke, (4) ku dyondzisiwa milawu ya Xikwembu, (5) ku layiwa, (6) ku sirheleriwa.—10/1, matluka 18-21.

• Lava rhangelaka va nga va xixima njhani van’wana?

Ndlela yin’wana leyi nkulu a nga endlaka sweswo ha yona i ku nga kombeli van’wana leswaku va endla swilo leswi yena a nga swi laviki ku swi endla. Nakambe u kombisa ku xixima van’wana hi ku nyika swivangelo loko a kombele leswaku ku endliwa swo karhi kumbe loko a nyikele swileriso swo karhi.—10/15, tluka 22.

• Hi swihi swilo swin’wana leswi nga endlaka xiboho xa vukati xi tiya?

Swimbirhi swa swona hileswi: (1) Tikarhatele ku tiyisa vukati bya wena. (2) Papalata tindlela hinkwato ta ku nga tshembeki evukatini. Ku nga khathariseki leswaku swilo swi famba kahle evukatini bya wena kumbe a swi fambi kahle, munghana wa wena wa vukati u fanele a swi tiva leswaku u tinyiketerile eka ku endla leswaku swilo swi famba kahle evukatini; swilo swoleswo swimbirhi swi ta pfuna.—11/1, matluka 18-21.

• Nkulu la nga Mukreste a nga dyondza yini eka ndlela leyi murisi wa Muisrayele a a yi tirhisa ha yona nxongotelo?

Murisi a a tirhisa nxongotelo ku kongomisa ntlhambi wakwe. Loko tinyimpfu ti nghena kumbe ti huma etshangeni, a ti ‘hundza ehansi ka nxongotelo’ ivi a ti hlaya. (Lev. 27:32) Murisi la nga Mukreste na yena u fanele a wu tiva kahle ntlhambi wa Xikwembu lowu vekiweke ehansi ka yena ni ku tiva leswaku nyimpfu ha yin’we swi yi fambela njhani.—11/15, tluka 9.

• Manana a nga swi kombisa njhani leswaku u teka ku basa ku ri ka nkoka?

Swakudya swi nga vanga mavabyi hi tindlela to hambana-hambana, hikwalaho u hlamba mavoko a nga si khoma swakudya naswona u tshama a funengete swakudya. U endla leswaku yindlu yi tshama yi basile leswaku ku nga ngheni makondlo ni switsotswana. Magoza man’wana ma katsa ku hlayisa swiambalo swi basile ni ku hlamba minkarhi hinkwayo. Magoza wolawo ma pfumelelana ni leswi vuriwaka hi Bibele.—12/1, matluka 9-11.