Nghena endzeni

Hundzela eka leswi nga endzeni

Swivutiso Swa Vahlayi

Swivutiso Swa Vahlayi

Swivutiso Swa Vahlayi

Eka Nehemiya 8:10, Vayuda a va byeriwe ku “dya swilo swo nona,” hambileswi Nawu eka Levhitika 3:17 a wu te: “Mi nga tshuki mi dya mafurha.” Xana timhaka leti ti fambisana njhani?

Eka ririmi ro sungula, rito leri hundzuluxeriweke ri va “swilo swo nona” eka Nehemiya 8:10 ni leri nge “mafurha” eka Levhitika 3:17 ma hambana. Rito ra Xiheveru cheʹlev, leri hundzuluxeriweke ri va “mafurha” eka Levhitika 3:17, ri kombetela eka mafurha ya swiharhi kumbe ya vanhu. (Lev. 3:3; Vaav. 3:22) Mongo wa ndzimana 17 wu kombisa leswaku Vaisrayele a va nga fanelanga va dya mafurha lama funengetaka marhumbu ni tinso ta swiharhi leswi a ku ta endliwa gandzelo ha swona ni mafurha lama nga emasengeni ya swona, hikuva “mafurha hinkwawo i ya Yehovha.” (Lev. 3:14-16) Hikwalaho mafurha lama nga le mirini wa swiharhi leswi a swi ta nyikeriwa eka Yehovha a ma nga fanelanga ma dyiwa.

Hi hala tlhelo rito leri hundzuluxeriweke ri va “swilo swo nona” eka Nehemiya 8:10 i mash·man·nimʹ, naswona ri humelela eka ndzimana leyi ntsena eMatsalweni ya Xiheveru. Ri tekiwe eka riendli sha·menʹ, leswi vulaka “ku nyuhela.” Swi tikomba ntlawa wa marito lama fambisanaka ni riendli leri ma vula ku va swilo swi famba kahle ni ku hlayiseka. (Ringanisa na Esaya 25:6.) Rin’wana ra marito lama talaka ku tekiwa eka riendli leri i riviti sheʹmen, leri hakanyingi ri hundzuluxeriwaka ri va “mafurha” ku katsa ni xiga lexi nge “mafurha ya mutlhwari.” (Det. 8:8; Lev. 24:2) Hilaha ri tirhisiweke hakona eka Nehemiya 8:10, mash·man·nimʹ  ri vonaka ri kombetela eka swakudya leswi swekiweke hi mafurha yo tala, naswona swi nga ha endleka a swi katsa nyama leyi nga ni mafurha, kambe ku nga ri mafurha ya xiharhi.

Hambileswi Vaisrayele a va nga pfumeleriwi ku dya mafurha ya swiharhi, a va pfumeleriwa ku dya swakudya leswi fuweke, swo nandziha. Swilo swin’wana swo tanihi makhekhe lama endliweke hi mavele a swi swekiwa hi mafurha ya matsavu hakanyingi mafurha ya mutlhwari ku nga ri mafurha ya swiharhi. (Lev. 2:7) Hikwalaho, Insight on the Scriptures yi vula leswaku “swilo swo nona” laha i “swiphemu leswi fuweke, ku nga ri swilo leswi ondzeke kambe swo nandziha ku katsa ni swilo leswi nga ni nantswo leswi endliweke hi mafurha ya matsavu.”

Vakreste va swi tiva leswaku ku siveriwa ka Vaisrayele ku dya mafurha a ku ri xiphemu xa Nawu. A va le hansi ka Nawu ku katsa ni swilaveko swa wona swa magandzelo ya swiharhi.—Rhom. 3:20; 7:4, 6; 10:4; Kol. 2:16, 17.