Nghena endzeni

Hundzela eka leswi nga endzeni

Ku Tirhela Xikwembu Hi “Mbilu Yin’we Ni Moya-xiviri Wun’we”

Ku Tirhela Xikwembu Hi “Mbilu Yin’we Ni Moya-xiviri Wun’we”

 Ku Tirhela Xikwembu Hi “Mbilu Yin’we Ni Moya-xiviri Wun’we”

VAYUDA ni vaproselita a va hlengeletanile va rhendzela vadyondzisiwa va Yesu Kreste. A ku ri Nkhuvo wa Pentekosta, naswona vaendzi lava va teke eYerusalema a va suka etindhawini to tanihi le Rhoma leyi nga le vupela-dyambu ni le Partiya leyi nga le vuxeni. Ntshungu lowu a wu vulavula tindzimi to hambana-hambana. Kambe vadyondzisiwa va Yesu lava a va vulavula na vona a va ri Vagaleliya. Vaendzi van’wana lava pfilunganyekeke va vutise va ku: “Swi endlekisa ku yini leswaku un’wana ni un’wana wa hina, a twa ririmi ra hina leri hi nga velekiwa na rona?”—Mint. 2:8.

Muapostola Petro u suke a yima a hlamusela  lexi endleke leswaku ku va ni singita leri a va ri vona. Ntshungu wu amukele rungula ra kona hi ku hatlisa. Vanhu va magidi va khuvuriwile! (Mint. 2:41) Hambileswi vandlha ri kuleke hi ku hatlisa, ri hambete ri ri ni vun’we. Luka mutsari wa Bibele u ri: “Vunyingi bya lava va kholweke a byi ri ni mbilu yin’we ni moya-xiviri wun’we.”—Mint. 4:32.

Vanhu va magidi lava khuvuriweke hi siku rero ra Pentekosta hi 33 C.E. a va lava ku tshama eYerusalema nkarhi wo leha leswaku va kota ku dyondza leswi engetelekeke hi ta ripfumelo ra vona lerintshwa. Kambe loko va ta a va nga tiyimiselanga ku tshama nkarhi wo leha. Hikwalaho, ku hlengeletiwe mali swa xinkarhana. Vapfumeri van’wana hi ku tirhandzela va xavise swilo swa vona kutani va tisa mpindzulo wa kona eka vaapostola leswaku va wu avela lava pfumalaka. (Mint. 2:42-47) Kunene va kombise rirhandzu ni ku hanana!

Vakreste va ntiyiso minkarhi hinkwayo va ni rirhandzu ro tano ni moya wo hanana. Namuntlha, vandlha ra Vukreste ri hambeta ri tirhela Yehovha hi vun’we hi “mbilu yin’we ni moya-xiviri wun’we.” Mukreste ha un’we u nyikela swi huma embilwini hi nkarhi wakwe, matimba na hi mali leswaku a ta chumayela mahungu lamanene ni ku seketela timhaka ta Mfumo wa Xikwembu.—Vona bokisi leri nge  “Tindlela Leti Van’wana Va Hlawulaka Ku Nyikela Ha Tona.”

[Bokisi leri nga eka tluka 6, 7]

 TINDLELA LETI VAN’WANA VA HLAWULAKA KU NYIKELA HA TONA

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya munyikelo lama nga ni mfungho lowu nge “Ntirho Wa Misava Hinkwayo.”

N’hweti na n’hweti mavandlha ma rhumela minyikelo leyi erhavini ra Timbhoni ta Yehovha leri langutelaka matiko lawa mavandlha ya kona ma nga eka wona. Nakambe minyikelo ya ku tirhandzela yi nga rhumeriwa hi ku kongoma eka Watch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, kumbe ehofisini ya rhavi ya Timbhoni ta Yehovha leyi langutelaka tiko ra ka n’wina. Loko u nyikela hi cheke eka adirese leyi nga laha henhla, tsala leswaku mali ya kona yi ya eka “Watch Tower Society.” Hi kombela leswaku u tivisa rhavi loko u lava ku nyikela hi swin’wetsin’wetsi kumbe hi swilo swin’wana swa nkoka. Endzhaku ka sweswo u fanele u rhumela papila ro koma leri hlamuselaka leswaku leyi i nyiko.

NYIKO LEYI KUNGUHATIWEKE

Ku engetela eka minyikelo leyi kongomeke, ku ni tindlela tin’wana ta ku nyikela leti vuyerisaka ntirho wa Mfumo wa misava hinkwayo. Tona ti katsa:

Ndzindza-khombo: Watch Tower Bible and Tract Society of South Africa yi nga tsariwa tanihi leyi nga ta sala yi tirhisa mali ya ndzindza-khombo wa vutomi kumbe ya mudende loko n’wini wa yona a file.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Watch Tower Bible and Tract Society of South Africa, tanihi nyiko leyi heleleke.

Ndhawu: Ndhawu leyi xavisekaka yi nga ha nyikeriwa hi ku kongoma kumbe loko ku ri yindlu yinene, ku endliwa ntwanano wa leswaku yi ta tekiwa ntsena loko loyi a nyikeleke ha yona a rhurha kumbe a fa. Tivisa hofisi ya rhavi ya le tikweni ra ka n’wina u nga si nyikela hi ndhawu.

Swiboho: Nhundzu kumbe mali swi nga ha nyikeriwa eka Watch Tower Bible and Tract Society of South Africa hi ku tirhisa xileriso xa mufi lexi nga enawini.

Loko u lava rungula leri engetelekeke, u fanele u vutisa Accounting Office hi ku ba riqingho kumbe hi ku tsalela eka adirese leyi nga laha hansi kumbe u vutisa hofisi ya rhavi leyi langutelaka ntirho wo chumayela etikweni ra ka n’wina.

Accounting Office

Watch Tower Bible and Tract Society of South Africa

Private Bag X2067

Krugersdorp

1740

South Africa

Riqingho: 011 761-1000