Nghena endzeni

Hundzela eka leswi nga endzeni

Kula Evutivini Lebyi Kongomeke Hi ‘Mapfundza Ya Mianakanyo’

Kula Evutivini Lebyi Kongomeke Hi ‘Mapfundza Ya Mianakanyo’

 Kula Evutivini Lebyi Kongomeke Hi ‘Mapfundza Ya Mianakanyo’

MALANDZA hinkwawo ya Yehovha ma lava ku amukeriwa hi yena. Leswi hi lavaka ku amukeriwa hi yena, hi tikarhatela ku kurisa ripfumelo ra hina ni ku n’wi endlela ntirho wo kwetsima hi ku hiseka. Hambiswiritano, muapostola Pawulo u hi lemukisa hi khombo leri nga ha vaka kona, leri khumbeke Vayuda van’wana enkarhini wa yena: “Va xi hisekela Xikwembu; kambe ku nga ri hikwalaho ka vutivi lebyi kongomeke.” (Rhom. 10:2) Swi le rivaleni leswaku ripfumelo ra hina ni ku gandzela ka hina Yehovha a swi fanelanga swi sekeriwa eka mintlhaveko ntsena. Hi fanele hi n’wi tiva hi ndlela leyi kongomeke Muvumbi wa hina hi tlhela hi tiva ni ku rhandza ka yena.

Eka matsalwa man’wana yakwe Pawulo u fanise mahanyelo lawa Xikwembu xi ma amukelaka ni mapfundza ya hina yo kuma vutivi. U khongele leswaku valandzeri va Kreste va “tala vutivi lebyi kongomeke” bya ku rhandza ka Xikwembu leswaku ‘va famba hi mukhuva lowu fanelaka eka Yehovha leswaku va n’wi tsakisa hi ku helela’ loko va ‘ri karhi va veka mihandzu entirhweni wun’wana ni wun’wana lowunene ni ku kula eku tiveni ka Xikwembu hi ku kongoma.’ (Kol. 1:9, 10) Ha yini swi ri swa nkoka leswaku hi lava “vutivi lebyi kongomeke”? Naswona ha yini hi fanele hi kula evutivini byo tano?

Lexi Endlaka Munhu A Va Ni Ripfumelo

Ku va ni vutivi lebyi kongomeke hi Xikwembu na hi ku rhandza ka xona loku boxiweke eBibeleni hi swona swi endlaka leswaku hi va ni ripfumelo. Loko hi nga ri na byona vutivi byo tano, ripfumelo ra hina eka Yehovha ri ta fana ni xiyindlwana lexi akiweke hi mimpumpurha lexi nga waka loko xi ninginisiwa switsongo. Pawulo u hi khutaza leswaku hi endlela Xikwembu ntirho wo kwetsima hi ‘matimba ya hina ya ku anakanya’ ni ku ‘hundzula mianakanyo ya hina.’ (Rhom. 12:1, 2) Ku dyondza Bibele nkarhi ni nkarhi swi nga hi pfuna emhakeni leyi.

Ewa loyi a nga phayona ra nkarhi hinkwawo le Poland, u ri: “Loko a ndzi lo tshika ku dyondza Rito ra Xikwembu nkarhi ni nkarhi, vutivi bya mina lebyi kongomeke hi Yehovha a byi ta va byi nga kulanga. Mfungho wa mina wa ku va Mukreste a wu nga ha ta vonaka ni ripfumelo ra mina eka Xikwembu a ri ta tsana naswona a ndzi ta onha vuxaka bya mina ni Xikwembu.” Swoleswo a swi fanelanga swi humelela eka hina! Anakanya hi xikombiso xa wanuna un’wana loyi a kuleke evutivini bya Yehovha lebyi kongomeke kutani eku heteleleni a amukeriwa hi Yena.

“Ndzi Wu Rhandza Swinene Nawu Wa Wena!”

Risimu ro tlhokovetsela leri ri nga Pisalema 119 eTibibeleni ta hina ri hlamusela ndlela leyi mupisalema a a titwa ha yona hi milawu, switsundzuxo, swileriso ni swiboho swa vuavanyisi swa Yehovha. Mupisalema u tsarile a ku: “Ndzi ta rhandza milawu ya wena. . . . Switsundzuxo swa wena ndza swi rhandza.” U tlhele a tsala a ku: “Ndzi wu rhandza swinene nawu wa wena! Ndzi anakanya ha wona siku hinkwaro.”—Ps. 119:16, 24, 47, 48, 77, 97.

Rito leri nge “rhandza” ni leri nge “anakanya” entiyisweni ma vula ku anakanyisisa hi Rito ra Xikwembu ni ku tsakisiwa hi ku anakanya hi rona. Marito lawa ma kandziyisa rirhandzu leri mupisalema a a ri na rona hi ku dyondza nawu wa Xikwembu. Rirhandzu rolero a ri nga vangiwi hileswi mbilu yakwe a yi n’wi susumetela ku endla tano. Kambe, a a swi navela hi mbilu hinkwayo leswaku ‘a anakanya’ hi nawu, leswaku a twisisa marito ya Yehovha.  Hi nga swi vona eka langutelo rakwe leswaku a a lava ku tiva Xikwembu hi ku kongoma ni swilo leswi xi swi rhandzaka hilaha a nga kotaka hakona.

Swi le rivaleni leswaku mupisalema a a rhandza Rito ra Xikwembu hi mbilu hinkwayo. Hi nga tivutisa: ‘Xana na mina ndzi ri rhandza hi mbilu hinkwayo Rito ra Xikwembu? Xana ndza swi tsakela ku hlaya ni ku anakanyisisa hi xiphemu xo karhi xa Bibele siku ni siku? Xana ndzi endla matshalatshala yo hlaya Rito ra Xikwembu ni ku tshinela eka Yehovha hi xikhongelo loko ndzi nga si ri hlaya?’ Loko ho hlamula swivutiso leswi hi ina, swi ta vula leswaku ha “kula eku tiveni ka Xikwembu hi ku kongoma.”

Ewa u ri: “Nkarhi hinkwawo ndzi tikarhatela ku antswisa dyondzo ya mina n’wini. Ku sukela loko hi kume broxara leyi nge, ‘Vona Tiko Lerinene’ ndzi yi tirhisa nkarhi ni nkarhi eka dyondzo ya mina. Ndzi ringeta hilaha ndzi nga kotaka hakona leswaku ndzi kumisisa vuxokoxoko bya swilo ebukwini leyi nge Insight on the Scriptures naswona ndzi tirhisa ni tibuku tin’wana loko swi laveka.”

Nakambe, anakanya hi xikombiso xa Wojciech ni xa Małgorzata, lava nga ni vutihlamuleri byo tala endyangwini. Xana va swi kotisa ku yini ku katsa dyondzo ya vona vini ya Bibele eka xiyimiso xa vona? “Hi veka nkarhi wa leswaku hi tihlayela Rito ra Xikwembu hilaha hi nga kotaka hakona. Kutani, hi nkarhi wa dyondzo ya ndyangu ni le ka mabulo ya hina ya siku ni siku, hi vulavula hi tinhla leti hi voneke ti tsakisa kumbe ti khutaza.” Dyondzo leyi dzikeke ya munhu hi yexe yi va tisele ntsako lowukulu ni ku va pfuna leswaku va ‘kula evutivini lebyi kongomeke.’

Dyondza Hi Xikongomelo Xo Lava Ku Tiva

Leswi hi nga Vakreste, hi pfumela leswaku Xikwembu xi lava “leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Tim. 2:3, 4) Yinhla leyi yi kandziyisa nkoka wo hlaya Bibele ni ku tikarhatela ku ‘kuma mongo wa yona.’ (Mat. 15:10) Nchumu wun’wana lowu pfunaka leswaku munhu a endla tano i ku dyondza hi xikongomelo xo lava ku tiva. Langutelo leri ri kombisiwe hi Vaberiya va khale loko Pawulo a va byele mahungu lamanene: “Va amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku ku vona loko swilo leswi swi ri tano.”—Mint. 17:11.

Xana wa xi landzela xikombiso xa Vaberiya xa ku va ni mapfundza ya mianakanyo ni ku papalata ku kavanyetiwa loko u ri eku dyondzeni ka Bibele? Mukreste a nga tikarhatela ku tekelela Vaberiya hambiloko enkarhini lowu hundzeke a a nga swi tsakeli ku dyondza. Ku tlula kwalaho, vanhu van’wana loko va ri karhi va dyuhala va ya va loloha ku hlaya, kambe Mukreste a nga fanelanga a endla tano. Ku nga khathariseki leswaku munhu u tanihi kwihi, a nga swi kota ku papalata swihinga leswi nga n’wi kavanyetaka. Loko u ri karhi u hlaya, u nga tikarhatela ku lava rungula leri u nga ri byelaka van’wana. Hi xikombiso, xana u nga tivekela pakani yo byela munghana wa wena wa vukati kumbe munghana wa wena la nga Mukreste leswi u swi hlayeke kumbe leswi u swi dyondzeke loko u ri karhi u dyondza? Loko u endla tano u ta dzikisa swilo swoleswo emianakanyweni ni le mbilwini ya wena u ri karhi u pfuna van’wana.

Malunghana ni nkarhi wa dyondzo ya wena, landzela xikombiso xa Ezra, nandza wa khale wa Xikwembu loyi “a a lunghiselele mbilu yakwe leswaku yi kambisisa nawu wa Yehovha.” (Ezra 7:10) U nga swi endlisa ku yini sweswo? U nga ha lava ndhawu leyi rhuleke laha u nga kotaka ku dyondza u ri eka yona. Endzhaku ka sweswo, tshama ehansi ivi u khongela eka Yehovha leswaku a ku kongomisa ni ku ku nyika vutlhari. (Yak. 1:5) Tivutise, ‘I yini leswi ndzi languteleke ku swi dyondza eka dyondzo leyi?’  Loko u ri karhi u hlaya, xalamukela ku kuma tinhla-nkulu ta leswi u swi hlayaka. U nga ha lava ku tsala kumbe ku fungha tinhla ta swiphemu leswi u lavaka ku swi tsundzuka. Xiya ndlela leyi u nga ri tirhisaka ha yona rungula ra kona loko u ri eku chumayeleni, loko u endla swiboho, kumbe loko u khutaza vapfumeri-kuloni. Loko u ri ekusuhi ni ku gimeta dyondzo ya wena, pfuxeta leswi u swi dyondzeke. Sweswo swi ta endla leswaku u kota ku tsundzuka leswi u swi dyondzeke.

Ewa u hlamusela leswi a a swi endla, a ku: “Loko ndzi ri karhi ndzi hlaya Bibele, ndzi tirhisa swikombo swa matsalwa, Watch Tower Publications Index ni Watchtower Library leyi nga eka CD-ROM. Ndzi titsalela tinhla hi xikongomelo xo ti tirhisa ensin’wini.”

Van’wana va ni malembe yo tala va ri karhi va tiphina hi ku dyondza hi vuenti, va dzika eku dyondzeni hi Xikwembu. (Swiv. 2:1-5) Hambiswiritano, va ni vutihlamuleri byo tala naswona swa va tikela ku veka nkarhi wo va ni dyondzo ya vona vini. Loko swi ri tano ni le ka wena, hi yihi mindzulamiso leyi u nga yi endlaka eka xiyimiso xa wena?

Ndzi Nga Wu Kuma Njhani Nkarhi?

A swi kanakanisi leswaku u ta pfumela leswaku swa olova ku tivekela nkarhi wo endla swilo leswi u swi tsakelaka. Van’wana va kume leswaku nchumu lowu pfunaka leswaku va dzika eka dyondzo ya munhu hi yexe i ku tivekela tipakani leti fikelelekaka, to tanihi ku hlaya Bibele hinkwayo. I ntiyiso leswaku swi nga ha vonaka swi tika swinene ku hlaya matimu yo leha ya swivongo, nhlamuselo leyi enteke ya tempele ya khale, kumbe vuprofeta lebyi rharhanganeke lebyi vonakaka byi nga fambisani helo ni vutomi bya siku ni siku. Ringeta ku lava tindlela leti nga ku pfunaka ku fikelela pakani ya wena. Hi xikombiso, loko u nga si kambisisa mhaka yo karhi eBibeleni leyi vonakaka yi tika, u nga ha hlaya hi ta matimu ya kona kumbe ndlela leyi yi pfunaka ha yona. Rungula ro tano ri nga kumiwa ebukwini leyi nge “Matsalwa Hinkwawo Ma Huhuteriwe Hi Xikwembu Naswona Ma Pfuna,” leyi kumekaka hi tindzimi ta kwalomu ka 50.

Swa khutaza ku vona leswi u swi hlayaka eBibeleni hi tihlo ra mianakanyo. Leswi swi nga ku pfuna leswaku u vona vanhu lava ku vulavuriwaka hi vona ni swiendlakalo leswi katsekaka hi tihlo ra mianakanyo. Loko u tirhisa swiringanyeto leswi swi nga ri swingani swi ta endla leswaku dyondzo ya wena yi tsakisa naswona yi va leyi pfunaka. Hi ku endla tano, u ta ya u va ni mapfundza yo va ni nkarhi wo dyondza. Swi ta ku olovela ku hambeta u hlaya Bibele siku ni siku.

 Hambileswi swiringanyeto leswi nga laha henhla swi nga ha pfunaka munhu ha un’we, xana ndyangu lowu tshamaka wu khomekile wu nga endla yini? Ha yini mi nga tshami ehansi kutani mi bula hi vuyelo lebyi nga vaka kona bya dyondzo ya ndyangu? Endzhaku ko bula hi mhaka leyi, ku nga ha va ni tinhla leti pfunaka, to tanihi ku pfuka emahlweni ka nkarhi lowu mi pfukaka hi wona siku ni siku kumbe hi masiku yo karhi leswaku mi kambisisa xiphemu xo karhi xa Bibele. Kumbexana mabulo ya n’wina ma ta paluxa leswaku ku ni xilaveko xo lulamisa xiyimiso xa ndyangu. Hi xikombiso, mindyangu yin’wana yi vone swi pfuna ku kambisisa tsalwa ra siku kumbe ku hlaya xiphemu xo karhi xa Bibele loko yi heta ku dya swakudya tanihi ndyangu. Loko ndyangu wa ha tshame swin’we etafuleni, wu tirhisa timinete ta khume kumbe 15 leswaku wu kambisisa Matsalwa kumbe wu hlaya Bibele. Eku sunguleni leswi swi nga ha vonaka swi tika, kambe swi nga si ya kwihi ndyangu wu ta swi tolovela naswona wu ta swi tsakela.

Wojciech na Małgorzata va hlamusela leswi pfuneke ndyangu wa vona: “Enkarhini lowu hundzeke, nkarhi wa hina a wu hetiwa hi mintirho leyi nga riki ya nkoka. Hi endle xiboho xo hunguta nkarhi lowu hi wu hetaka hi ri eku rhumeleni ka ti-e-mail. Hi tlhele hi hunguta minkarhi yo tihungasa kutani hi veka siku ro karhi ni nkarhi wa leswaku hi va ni dyondzo leyi dzikeke ya ndyangu.” Handle ko kanakana ndyangu lowu a wu tisoli hileswi wu endleke mindzulamiso yoleyo, kutani na wena u nga kuma sweswo swi tirha endyangwini wa wena.

Ku Kula eVutivini Lebyi Kongomeke I Swa Nkoka!

Ku dyondza Rito ra Xikwembu hi vuenti swi nga “veka mihandzu entirhweni wun’wana ni wun’wana lowunene.” (Kol. 1:10) Loko sweswo swi ri karhi swi vonaka evuton’wini bya wena, vanhu hinkwavo va ta vona nhluvuko wa wena. U ta va munhu loyi a ti twisisaka kahle tidyondzo ta Bibele. Swiboho leswi u swi endlaka swi ta va leswi faneleke naswona u ta va u lunghekele ku pfuna van’wana, u ta papalata ku hundzeleta swilo, ku nga nchumu lowu talaka ku endliwa hi vanhu lava pfumalaka vutivi. Ku tlula kwalaho u ta tshinela swinene eka Yehovha. U ta ti tlangela swinene timfanelo ta yena, naswona leswi swi ta vonaka loko u ri karhi u byela van’wana hi yena.—1 Tim. 4:15; Yak. 4:8.

Ku nga khathariseki leswaku u ni malembe mangani hi vukhale kumbe u ni ntokoto wo tanihi kwihi, endla matshalatshala yo hambeta u tsakela Rito ra Xikwembu ni ku ri dyondza hi vuenti hi xikongomelo xo lava ku ri twisisa. U nga tiyiseka leswaku Yehovha a nge ma rivali matshalatshala ya wena. (Hev. 6:10) U ta ku nyika mikateko yo tala.

[Bokisi leri nga eka tluka 13]

LOKO HI ‘KULA EVUTIVINI LEBYI KONGOMEKE’ . . . 

Hi tiyisa ripfumelo ra hina eka Xikwembu kutani hi famba hi mukhuva lowu fanelaka eka Yehovha.—Kol. 1:9, 10

Hi kuma vutivi, hi kota ku twisisa ni ku endla swiboho swa vutlhari.—Ps. 119:99

Hi ya hi tsakela ku pfuna van’wana leswaku va tshinela eka Yehovha.—Mat. 28:19, 20

[Swifaniso leswi nga eka tluka 14]

Swi nga ha tika ku kuma ndhawu leyi rhuleke laha u nga kotaka ku dyondza u ri kona, kambe swa pfuna

[Xifaniso lexi nga eka tluka 15]

Mindyangu yin’wana yi hlaya xiphemu xo karhi xa Bibele loko yi heta ku dya tanihi ndyangu