Nghena endzeni

Hundzela eka leswi nga endzeni

Ku Hlula Swihinga Loko U Chumayela Hi Yindlu Ni Yindlu

Ku Hlula Swihinga Loko U Chumayela Hi Yindlu Ni Yindlu

 Ku Hlula Swihinga Loko U Chumayela Hi Yindlu Ni Yindlu

‘Hi kume vurhena hikwalaho ka Xikwembu xa hina, bya ku mi byela mahungu lamanene ya Xikwembu hi ku lwa lokukulu ngopfu.’—1 TES. 2:2.

1. Hi swihi swihinga leswi Yeremiya a langutaneke na swona, naswona u swi hlurise ku yini?

YEREMIYA a a ri munhu la fanaka na hina. Loko Yehovha a n’wi rhuma ku ya va “muprofeta wa matiko,” u huwelerile a ku: “Oho, Wena Yehovha, Hosi leyi Lawulaka! Phela entiyisweni a ndzi swi tivi ku vulavula, hikuva ndza ha ri mufana.” Nilokoswiritano, leswi a a tshemba Yehovha, u xi amukerile xiavelo xexo. (Yer. 1:4-10) Yeremiya u hete malembe yo tlula 40 a profeta eka vanhu lava a va nga ri tsakeli rungula ra yena, lava a va n’wi kaneta, va n’wi hlekula hambi ku ri ku n’wi ba. (Yer. 20:1, 2) Minkarhi yin’wana a a titwa onge a nga tshika ntirho wa yena. Kambe u tiyiserile a twarisa rungula leri dzungaka eka vanhu lava nga laviki ku twa nchumu. Hi matimba ya Xikwembu, Yeremiya u kote ku endla ntirho lowu a a ta va a nga wu endlanga hi matimba ya yena.—Hlaya Yeremiya 20:7-9.

2, 3. Namuntlha malandza ya Xikwembu ma langutana ni swiphiqo leswi fanaka ni swa Yeremiya hi ndlela yihi?

2 Namuntlha, malandza yo tala ya Xikwembu ma  titwa ku fana na Yeremiya. Loko hi anakanyisisa hi mhaka yo chumayela hi yindlu ni yindlu, van’wana va hina hi tshame hi tibyela leswi, ‘Sweswo a ndzi nge pfuki ndzi swi kotile.’ Kambe loko hi xiya leswaku a ku ri ku rhandza ka Yehovha leswaku hi huwelela mahungu lamanene, hi hlule ku chava koloko kutani hi khomeka hi ntirho wo chumayela. Hambiswiritano, vo tala va hina hi langutane ni swiyimo leswi a swi endla swi tika ku hambeta hi chumayela, ku ringana nkarhi wo karhi. I ntiyiso leswaku a swi olovi ku sungula ku chumayela hi yindlu ni yindlu ni ku ya emahlweni hi chumayela ku ya fika emakumu.—Mat. 24:13.

3 Ku vuriwa yini loko se u ri ni nkarhinyana u dyondza Bibele ni Timbhoni ta Yehovha naswona u ya eminhlanganweni ya vandlha, kambe wa ha kanakana ku sungula ku chumayela hi yindlu ni yindlu? Kumbe ku vuriwa yini loko u ri Mbhoni leyi khuvuriweke kambe swi ku tikela ku chumayela hi yindlu ni yindlu hambiloko rihanyo ra wena ri ku pfumelela ku endla tano? Tiyiseka leswaku vanhu va swiyimo hinkwaswo va swi kota ku langutana na swona swiphiqo leswi va hlangavetanaka na swona entirhweni wa yindlu ni yindlu. Na wena u nga swi kota ku langutana na swona hi mpfuno wa Yehovha.

Ku Va Ni Vurhena

4. I yini leswi pfuneke muapostola Pawulo leswaku a chumayela mahungu lamanene hi vurhena?

4 A swi kanakanisi leswaku wa swi tiva leswaku emisaveni hinkwayo, ntirho lowu wo chumayela wu hetisisiwa hi moya wa Xikwembu ku nga ri hi matimba kumbe vutlhari bya munhu. (Zak. 4:6) Niloko Mukreste ha un’we a ri eku chumayeleni u pfuniwa hi moya wa Xikwembu. (2 Kor. 4:7) Xiya mhaka ya muapostola Pawulo. Loko a tsundzuka nkarhi lowu yena ni murhumiwa-kulobye va xanisiweke ha wona hi vakaneti, u tsarile a ku: “Loko hi rhange hi xaniseka ni ku rhukaniwa . . . eFilipiya, mi tiva ndlela leyi hi kumeke vurhena ha yona hikwalaho ka Xikwembu xa hina, bya ku mi byela mahungu lamanene ya Xikwembu hi ku lwa lokukulu ngopfu.” (1 Tes. 2:2; Mint. 16:22-24) A hi nge ehleketi leswaku muchumayeri la hisekaka la fanaka na Pawulo minkarhi yin’wana a swi pfa swi lava leswaku a lwa hi matimba leswaku a chumayela. Kambe, ku fana na hina hinkwerhu, Pawulo a a fanele a titshega hi Yehovha leswaku a kota ku chumayela mahungu lamanene hi vurhena. (Hlaya Vaefesa 6:18-20.) Hi nga xi tekelela njhani xikombiso xa Pawulo?

5. I yini lexi nga hi pfunaka leswaku hi chumayela hi vurhena?

5 Xikhongelo xi hi nyika vurhena byo hambeta hi chumayela. Phayona rin’wana ri te: “Ndzi khongelela leswaku ndzi kota ku vulavula hi xivindzi, ndzi khongelela leswaku ndzi kota ku fikelela timbilu ta vanhu, naswona ndzi khongelela leswaku ndzi kuma ntsako loko ndzi ri ensin’wini. Phela, lowu i ntirho wa Yehovha a hi wa hina, hikwalaho ku hava lexi hi nga xi endlaka handle ka mpfuno wakwe.” (1 Tes. 5:17) Hinkwerhu hi fanele hi hambeta hi khongelela mpfuno wa moya lowo kwetsima wa Xikwembu leswaku hi kota ku chumayela hi vurhena.—Luka 11:9-13.

6, 7. (a) Hi xihi xivono lexi Ezekiyele a kombiweke xona, naswona a xi vula yini? (b) Malandza ya Xikwembu ya namuntlha ma dyondza yini eka xivono xa Ezekiyele?

6 Buku ya Ezekiyele yi paluxa swin’wana leswi nga hi pfunaka leswaku hi vulavula hi vurhena. Exivonweni, Yehovha u nyike Ezekiyele buku-nsongwa leyi tsariweke “xirilo ni xiviti ni ku kalakala” ematlhelo hinkwawo kutani a n’wi byela leswaku a yi dya, a ku: “N’wana wa munhu, u fanele u dyisa khwiri ra wena, leswaku u tata marhumbu ya wena hi buku leyi yi songiwaka leyi ndzi ku nyikaka yona.” A xi vula yini xivono lexi? Ezekiyele a a fanele a ri tswonga hi ku helela rungula leri a a ta ri twarisa. A ri fanele ri va emirini wa yena hi ndlela yo fanekisela, ri khumba mintlhaveko ya yena. Muprofeta u ye emahlweni a ku: “Hiloko ndzi yi dya, enon’wini wa mina a yi nyanganya kukota vulombe.” Eka Ezekiyele, ku twarisa rungula ra Xikwembu eka vanhu a swi tsakisa ku fana ni ku dya vulombe. U titwe a ri ni lunghelo ro hlawuleka ra ku yimela Yehovha ni ku hetisisa xiavelo lexi a nyikiweke xona hi Xikwembu, hambileswi sweswo a swi ta vula ku chumayela rungula ra matimba eka vanhu lava nga tsakeriki.—Hlaya Ezekiyele 2:8–3:4, 7-9.

7 Xivono lexi xi dyondzisa malandza ya Xikwembu dyondzo ya nkoka namuntlha. Na hina hi ni rungula ra nkoka leri hi faneleke hi ri chumayela eka vanhu lava minkarhi yin’wana va nga ma tlangeriki matshalatshala ya hina. Leswaku hi ya emahlweni hi teka ntirho wa hina wo chumayela wu ri lunghelo leri humaka eka Xikwembu, hi fanele hi hambeta hi dya swakudya swa moya. Loko hi ri ni  mukhuva wa ku nga ri dyondzi nkarhi hinkwawo Rito ra Xikwembu a ri nge dziki etimbilwini ta hina. Xana u nga antswisa dyondzo ya wena n’wini ya Bibele kumbe ku hlaya ka wena Bibele u swi endla nkarhi na nkarhi? Xana u nga tinyika nkarhi lowu engetelekeke wa ku anakanyisisa hi leswi u swi hlayeke?—Ps. 1:2, 3.

Ku Sungula Mabulo Ya Bibele

8. Hi swihi swingheniso leswi pfuneke vahuweleri van’wana va Mfumo leswaku va sungula mabulo ya Bibele evutirhelini bya yindlu ni yindlu?

8 Vahuweleri vo tala swa va tikela ku sungula bulo ra Bibele ni n’wini wa muti eka riendzo ro sungula loko va chumayela hi yindlu ni yindlu. Phela etinsin’wini tin’wana a swi olovi ku sungula mabulo. Vahuweleri van’wana va titwa va ntshunxekile loko va sungula bulo ni n’wini wa muti hi ku vula marito ma nga ri mangani lamanene ivi va n’wi nyika xiphephana hilaha swi kombisiweke hakona ebokisini leri nga laha hansi. Nhloko-mhaka ya xiphephana kumbe xifaniso xa xona swi nga ha koka nyingiso wa n’wini wa muti, ivi swi hi pfuna leswaku hi n’wi byela hi ku komisa xikongomelo xa riendzo ra hina ni ku n’wi vutisa xivutiso xo karhi. Eka xingheniso xin’wana u nga ha komba n’wini wa muti swiphephana swinharhu kumbe swa mune kutani u n’wi kombela leswaku a tihlawulela xin’we lexi n’wi tsakisaka. I ntiyiso leswaku xikongomelo xa hina a hi ku fambisa swiphephana kumbe ku swi tirhisa endlwini yin’wana ni yin’wana, kambe i ku sungula mabulo ya Bibele lama nga ta endla leswaku hi sungula tidyondzo ta Bibele.

9. Ha yini swi ri swa nkoka ku lunghiselela kahle?

 9 Ku nga khathariseki leswaku u tirhisa xingheniso xihi, ku lunghiselela kahle swi ta ku pfuna leswaku u tshama u lunghekile naswona u hiseka entirhweni wa yindlu ni yindlu. Phayona rin’wana ri te: “Ndzi tsaka swinene loko ndzi lunghiselele kahle. Swi ndzi endla ndzi lava ku bula ni vanhu hi xingheniso lexi ndzi xi lunghiseleleke.” Kasi rin’wana ri te: “Loko ndzi tiva leswi nkandziyiso lowu ndzi nga ta wu fambisa wu vulavulaka ha swona, ndzi hisekela ku wu fambisa.” Hambileswi swi vuyerisaka ku swi pfuxeta hi mbilu leswi hi nga ta swi vula, vo tala va kume swi pfuna ku pfuxeta swingheniso swa vona va vulavulela ehenhla. Sweswo swi va pfuna leswaku va endlela Yehovha ntirho lowunene ngopfu.—Kol. 3:23; 2 Tim. 2:15.

10. I yini leswi nga endliwaka ku endlela leswaku minhlangano ya ntirho wa nsimu yi va leyi pfunaka?

10 Minhlangano leyi pfunaka ya ntirho wa nsimu ya hi pfuna leswaku swi hi fambela kahle entirhweni wa yindlu ni yindlu naswona hi wu tsakela. Loko ndzimana ya siku yi vulavula hi ku chumayela, yi nga ha hlayiwa ivi ku buriwa ha yona hi ku komisa. Hambiswiritano, makwerhu la fambisaka nhlangano wa ntirho wa nsimu u fanele a tirhisa nkarhi lowu ringaneke a bula kumbe a endla nkombiso wo olova lowu yi fanelaka kahle nsimu kumbe a hlamusela rungula rin’wana leri nga tirhisiwaka ensin’wini siku rero. Leswi swi ta hlomisa lava nga kona leswaku va chumayela hi ndlela leyi humelelaka. Hi ku lunghiselela ka ha ri na nkarhi, vakulu ni van’wana lava khomaka minhlangano leyi va ta swi kota ku endla leswi va tlhela va heta nhlangano lowu hi nkarhi lowu vekiweke.—Rhom. 12:8.

Leswi Hi Nga Swi Hetisisaka Hi Ku Rhiya Ndleve

11, 12. Xana ku rhiya ndleve hi ri ni ntwela-vusiwana swi nga pfuna njhani leswaku hi chumayela vanhu mahungu lamanene? Nyika swikombiso.

11 Ku lunghiselela kahle a hi swona ntsena swi pfunaka kambe ni ku rhandza vanhu hi kona ku hi pfunaka leswaku hi sungula mabulo ya Bibele ni ku fikelela timbilu ta vanhu ensin’wini. Ndlela yin’wana leyi hi kombisaka sweswo ha yona i ku va hi rhiya ndleve. Mulanguteri un’wana la famba-fambaka u te: “Ku lehisa mbilu ni ku kombisa vanhu leswaku hi lava ku va yingisela swi koka vanhu leswaku va yingisela naswona i ndlela leyinene yo kombisa leswaku ha va tsakela.” Ku yingisela vini va miti hi mbilu hinkwayo swi nga endla va yingisela mabulo ya Bibele hilaha ntokoto lowu landzelaka wu kombisaka hakona.

12 Eka papila rin’wana leri humesiweke eka phepha-hungu leri nge Le Progrès, ra le Saint-Étienne, le Furwa, wansati un’wana u hlamusele ta ku endzeriwa ka yena hi vanhu vambirhi lava nga fika va gongondza enyangweni ya yena endzhakunyana ka loko a ha ku feriwa hi xinhwanyetana xakwe xa tin’hweti tinharhu. U tsarile a ku: “Ndzi swi vone xikan’we-kan’we leswaku a va ri Timbhoni ta Yehovha. A ndzi tiyimisele ku va hlongola hi moya wo rhula, kambe hiloko ndzi vona broxara leyi a va yi fambisa. A yi vulavula hi xivangelo xa ku va Xikwembu xi pfumelela ku xaniseka. Hiloko ndzi va amukela leswaku ndzi ta kanetana na vona. . . . Timbhoni leti ti tshame nkarhi wo tlula awara. Ti rhiye ndleve ti ri ni ntwela-vusiwana swinene naswona loko ti famba, ndzi titwe ndzi chavelelekile lerova ndzi pfumerile leswaku ti tlhela ti vuya.” (Rhom. 12:15) Hi ku famba ka nkarhi wansati loyi u pfumele ku dyondzeriwa Bibele. Hi nga dyondza swo tala eka mhaka ya leswaku leswi a swi tsundzukaka hi ta riendzo rero ro sungula a hi leswi vamakwerhu va swi vuleke, kambe i ndlela leyi va rhiyeke ndleve ha yona.

13. Hi nga xi pfumelelanisa njhani xingheniso xa hina xa mahungu lamanene ni swilaveko swa vanhu lava hi va chumayelaka?

13 Loko hi rhiya ndleve hi ri ni ntwela-vusiwana, kahle-kahle hi pfumelela vanhu leswaku va hi byela leswaku ha yini va wu lava Mfumo. Leswi swi hi endla hi kota ku bula na vona hi mahungu lamanene. Swi nga endleka u swi xiyile leswaku vahuweleri lava humelelaka hakanyingi va ni vutshila byo yingisela. (Swiv. 20:5) Va kombisa vanhu lava hlanganaka na vona ensin’wini leswaku va va rhandza hakunene. A va tsali mavito ni tiadirese ta vona ntsena, kambe va tlhela va tsala leswi vanhu volavo va swi tsakeleke ni swilaveko swa vona. Loko munhu wo karhi a lava ku tiva mhaka yo karhi, va endla ndzavisiso kutani va tlhelela eka yena hi ku hatlisa leswaku va ya n’wi hlamula. Ku fana na muapostola Pawulo, va pfumelelanisa xingheniso xa vona xa rungula ra Mfumo ni swilaveko swa vanhu lava va hlanganaka na vona. (Hlaya 1 Vakorinto 9:19-23.) Ku tsakela vanhu hi mbilu hinkwayo swi va endla leswaku va yingisela mahungu lamanene naswona swi wu kombisa kahle “ntsetselelo lowukulu wa Xikwembu xa hina.”—Luka 1:78.

 Tshama U Ri Ni Langutelo Lerinene

14. Loko hi ri karhi hi hetisisa vutirheli bya hina, xana hi nga ti kombisa njhani timfanelo ta Yehovha?

14 Yehovha u kombise leswaku u hi teka hi ri va nkoka hi ku hi nyika ntshunxeko wa ku tihlawulela. Hambileswi a nga Xikwembu xa Matimba Hinkwawo, a nga sindzisi vanhu leswaku va n’wi tirhela kambe u va kombela hi rirhandzu, a katekisa lava amukelaka malunghiselelo yakwe lama hlamarisaka. (Rhom. 2:4) Tanihi vatirheli va yena, nkarhi hinkwawo hi fanele hi lunghekela ku chumayela mahungu lamanene hi ndlela leyi swi xi fanelaka ha yona Xikwembu xa hina xa musa. (2 Kor. 5:20, 21; 6:3-6) Leswaku hi endla sweswo, hi fanele hi tshama hi ri ni langutelo lerinene hi vanhu va le nsin’wini ya hina. I yini lexi nga hi pfunaka leswaku hi hlula xiphiqo lexi?

15. (a) Yesu u byele vaapostola vakwe leswaku va endla yini loko vanhu va nga ri amukeli rungula ra vona? (b) I yini lexi nga hi pfunaka leswaku hi kuma lava fanelekaka?

15 Yesu u khutaze valandzeri vakwe leswaku va nga vileli ngopfu loko vanhu van’wana va ala rungula ra vona, kambe va fanele va ya emahlweni va lavisisa lava fanelekaka. (Hlaya Matewu 10:11-15.) Ku tivekela tipakani letitsongo, kambe leti fikelelekaka swi nga hi pfuna leswaku hi endla leswi. Makwerhu un’wana u tifanisa ni munhu loyi a famba-fambaka a lavana ni oyili, nsuku, kumbe swicelwa swin’wana. U tshamela ku vula marito lawa, “Ndzi swi langutele hi mahlo-ngati ku kuma nsuku wo saseka namuntlha.” Makwerhu un’wana yena u tivekele pakani “yo hlangana ni munhu un’we la tsakelaka eka riendzo ro sungula vhiki rin’wana ni rin’wana ivi a tlhelela eka yena a hlakulela ku tsakela koloko endzhaku ka masiku ma nga ri mangani.” Vahuweleri van’wana va tikarhatela ku hlayela n’wini wa muti tsalwa rin’we loko swi koteka. Xana hi yihi pakani ya xiviri leyi u nga tivekelaka yona?

16. Hi swihi swivangelo leswi hi nga na swona swo hambeta hi chumayela?

16 Leswaku swilo swi hi fambela kahle evutirhelini bya hina bya yindlu ni yindlu a swi titsheganga hi ndlela leyi vanhu va le nsin’wini ya hina va angulaka ha yona. I ntiyiso leswaku ntirho wo chumayela wu hetisisa xiphemu xa risima eku ponisiweni ka vanhu va timbilu letinene, kambe wu tlhela wu hetisisa xikongomelo xin’wana xa nkoka. Vutirheli bya Vukreste byi hi nyika nkarhi wo kombisa rirhandzu ra hina eka Yehovha. (1 Yoh. 5:3) Byi endla leswaku hi nga vi ni nandzu wa ngati. (Mint. 20:26, 27) Byi lemukisa lava nga chaviki Xikwembu leswaku “nkarhi wa ku avanyisiwa hi xona wu fikile.” (Nhlav. 14:6, 7) Xa nkoka swinene, vito ra Yehovha ra kwetsimisiwa emisaveni hinkwayo loko ku chumayeriwa mahungu lamanene. (Ps. 113:3) Hikwalaho, ku nga khathariseki leswaku vanhu va yingisa kumbe e-e, hi fanele hi ya emahlweni hi chumayela rungula ra Mfumo. Hakunene, matshalatshala ya hina hinkwawo yo chumayela mahungu lamanene ma sasekile ematihlweni ya Yehovha.—Rhom. 10:13-15.

17. I yini leswi vanhu va nga ta boheka ku swi xiya ku nga ri khale?

17 Hambileswi vo tala va honisaka ntirho wa hina wo chumayela namuntlha, ku nga ri khale va ta sungula ku wu languta hi ndlela yin’wana. (Mat. 24:37-39) Yehovha u tiyisekise Ezekiyele leswaku loko vuavanyisi lebyi a byi twariseke byi hetiseka, tiko leri xandzukeke ra Israyele “kunene [a ri ta] swi tiva leswaku muprofeta a a ri kona exikarhi ka [rona].” (Ezek. 2:5) Hilaha ku fanaka, loko Xikwembu xi avanyisa mafambiselo lawa ya swilo, vanhu va ta boheka ku swi xiya leswaku rungula leri Timbhoni ta Yehovha ti ri chumayeleke erivaleni ni hi yindlu ni yindlu kahle-kahle a ri huma eka Yehovha, Xikwembu xi ri xin’we xa ntiyiso nileswaku Timbhoni a ti ri vayimeri va yena hakunene. Hakunene hi ni lunghelo lerikulu ro byarha vito ra yena ni ku twarisa rungula ra yena eminkarhini leyi yo hlawuleka! Onge hi nga hambeta hi langutana hi ndlela leyinene ni swiphiqo leswi hi hlanganaka na swona loko hi chumayela hi yindlu ni yindlu, hi pfuniwa hi yena.

U Nga Hlamula Njhani?

• Hi nga byi kuma njhani vurhena byo chumayela?

• I yini lexi nga hi pfunaka leswaku hi sungula mabulo ya Bibele loko hi chumayela hi yindlu ni yindlu?

• Hi nga va kombisa njhani vanhu leswaku hi va tsakela hi mbilu hinkwayo?

• I yini lexi nga hi pfunaka leswaku hi va ni langutelo lerinene hi vanhu va le nsin’wini ya hina?

[Swivutiso Swa Dyondzo]

[Bokisi/Xifaniso lexi nga eka tluka 9]

Tindlela Tin’wana To Sungula Mabulo Ya Bibele

U nga ha vula leswi:

▪ Endzhaku ko xeweta n’wini wa muti, u nga ha n’wi nyika xiphephana kutani u ku, “Namuntlha ndzi ku endzerile leswaku ndzi ta bula na wena hi mhaka leyi ya nkoka.”

▪ Kumbe u nga ha n’wi nyika xiphephana kutani u ku, “Ndzi lo ku endzela swa xinkarhana namuntlha hikwalaho ka leswi ndzi tsakelaka ku twa leswi wena u swi ehleketaka hi mhaka leyi.”

Loko xiphephana xi amukeriwa:

▪ Namba u n’wi vutisa xivutiso xo olova xo lava ku tiva vonelo ra yena hi nhloko-mhaka ya xiphephana.

▪ Yingiserisisa, u ringeta ku ma twisisa kahle mavonelo ya n’wini wa muti. N’wi nkhense kutani u boxa leswi a swi vuleke loko mi ri karhi mi bula.

Ndlela yo yisa bulo emahlweni:

▪ Hlaya u tlhela u hlamusela tsalwa rin’we kumbe yo hlayanyana, u ma endla ma pfumelelana ni leswi a swi tsakelaka kumbe swilaveko swa yena.

▪ Loko a tsakela, n’wi nyike buku u tlhela u n’wi kombisa ndlela leyi dyondzo ya Bibele yi fambisiwaka ha yona loko swi koteka. Hlela ku tlhela u vuya.